BURI mwaka Abakristo b’omuhendo bingi ababingirwe nibagaruka omu kibina. Tekateka aha ku ‘omu iguru bari kushemererwa’ omuntu omwe yagaruka omu kibina! (Luk 15:7, 10) Ku orabe wagarwirwe omu kibina yesige otari kubanganisa ku Yesu, bamarayika na Yehova bashemerirwe. Konka omu bwire obu ori kombeka obunywani bwawe na Yehova nobasa kubugana ebizibu. Bimwe omuri ebyo bizibu ni biha kandi shi ni enki ekiri kubasa kukukwasa?

Abingi abari kugaruka omu kibina nibaguma kurwana n’enyehurira mbi. Nobasa kuba ori kwehurira nk’oku Omugabe Dawudi yabire ari kwehurira. Na bwanyima y’okusasirwa ekibi ceye akagamba ati: ‘Eby’okutahikirira nibindemesa.’ (Zab 40:12; 65:3) Abari kugarukira Yehova nibabasa kumara emyaka myingi bacayecwera orubanja kandi bine ekishwaro. Isabelle akamara emyaka eri kurenga 20 abingirwe omu kibina. * Akagamba ati: “Kikaba kingumire kwikiriza ku Yehova ari kubasa kunsaasira.” Ku ori kugira enyehurira nk’ezo nikikucwa entege. (Enf 24:10) Guma ogezeho kurwanisa ezo nyehurira.

Abandi nibatina ku batari kubasa kukora ebintu ebiri kubasa kutuma bagaruka kugira obunywani burungi na Yehova. Antoine ku yamazire kugarurwa omu kibina akagamba ati: “Nkaba nayebirwe ebintu byona ebi nabire nayegire.” Ezo nyehurira nizibasa kutuma abamwe baremwa kwekwatanisa omu bikorwa by’omwika.

Kugira ngu tubishoborocerwe reka tugire ngu omuntu ayine enju yeye rero ihunga ry’amani ryija ryayitera; ku ari kutekateka aha mani n’obwire bw’arakorese kugira ngu ayongere ayombeke nabasa kutina. Ni co kimwe obunywani bwawe na Yehova bwasisikara ahabw’ekibi c’amani eki okozire, nobasa kutina watekateka  aha mani agu orije kutaho kugira ngu bushube bube burungi.

Konka hariho ebintu ebiri kubasa kukukwasa. Yehova natugambira ati: ‘Nimwije [tuganire] mbereke oku muri kubasa kukizaho kugira obunywani burungi nanye.’ (Isa 1:18) Wamazire kutamu amani kugira ngu ogire obunywani burungi na Yehova. Yehova nakukunda ahabw’ago mani agu watiremu. Kitekatekeho: Okaha Yehova ecokugarukamu Sitaane otura namujuma!—Enf 27:11.

Ahabw’okukora eco okahika hihi ya Yehova kandi na we nakuraganisa ku arije kukuhika hihi. (Yak 4:8) Konka nambwenu abandi bashemerire kureba ku wagarukire omu kibina. Oshemerire kugumya obunywani obu oyine n’Isho ori kukukunda Yehova. Ni bata oku ori kubasa kukikora?

Gezaho kweteraho entego ezi ori kubasa kuhikaho. Nobasa kuba ori kwijuka enyegesa z’okubandizaho ezi wayegire eziri kukwata ahari Yehova n’ekiraganiso ca Paradiso. Konka noba oshemerire kongera kukora ebi Omukristo ashemerire kukora nk’okukora omurimo g’okuburira n’okwekwatanisa na Benetata na banyanyazi. Reba entego zimwe ezi ori kubasa kweteraho.

Guma oshabe Yehova. Yehova namanya ku kuba omuntuwomunda wawe ari kukucwera orubanja, kumushaba kiri kubasa kukugumira. (Rom 8:26) Konka, gumizamu kushaba Yehova ohamire omugambire ku ori kwenda kugira obunywani burungi na we. (Rom 12:12) Andrej akagamba ebyamubireho ati: “Nkaba ninkunda kwecwera orubanja kandi mpurira nyine ekishwaro. Konka ku nabire nimara kushaba nkaba ninyehurira ge kandi mpurira nagira obusinge.” Yaba ori kuhurira otari kubasa kumanya eki ori kubasa kugamba omu shara, shwijuma eshara y’Omugabe Dawudi eri omuri Zaaburi ya 51 n’eya 65.

Guma oyeyegese Bibuli burijo. Eco nikija kukukwasa kugira okwikiriza kugumire kandi rukundo eyi ori kukunda Yehova ekizeho kuhama. (Zab 19:7-11) Felipe akagamba ati: “Ku nayemerize kweyegesa Bibuli n’okugishoma, kikatuma nacweka entege kandi nashasha Yehova. Nkaba ntari kwenda kugaruka kukora enshobe eyi nakozire, obwe rero, nkataho entebekanisa y’okweyegesa Bibuli.” N’iwe nobasa kukikora. Waba ori kwetenga ebintu birungi by’okweyegesaho nobasa kushaba omuntu okuzire omu by’omwika akukwasa .

Yongera ogire obunywani burungi na benetata na banyanyazi. Abamwe abari kugaruka omu kibina nibatina ngu abandi nibija kubareba kubi. Larissa akagamba ati: “Nkaba nyine enshoni. Nkahurira nahemukire benetata na banyanyazi. Nkamara obwire buringwa nyine ezo nyehurira.” Guma oyesige ku abazehe n’abandi benetata b’omu kibina betegwire kukukwasa kugira ngu oyongere kugira obunywani burungi na Yehova. (Reba akashanduku akari kugira ngu: “ Eki abazehe bari kubasa kukora”) Nibashemererwa ahakuba wagarukire omu kibina kandi nibenda kukukwasa kugira obunywani burungi na Yehova!—Enf 17:17.

Ni enki ekiri kubasa kukukwasa kongera kugira obunywani burungi n’ab’omu kibina? Guma oyekwatanise na benetata na banyanyazi omu bi bari kukora harimu nk’okwija omu nterane n’omu murimo g’okuburira. Ni bata oku biri kubasa kukugasira? Felix akagamba ngu: “Ab’omu kibina bona bakashemererwa ku nagarukire Yehova. Eco kikatuma nahurira ndi kukundwa. Bona bakankwasa kuhurira ndi ow’omu kibina nayesiga ku Yehova yansasire, rero nagumizamu kumukorera.”—Reba akashanduku akari kugira ngu: “ Eki ori kubasa kukora.”

Sitaane nayija kugumizamu kukuteza ebizibu kugira ngu ohwe amani; obwe rero guma obe oyetegwire kugumya obunywani bwawe na Yehova. (Luk 4:13).

Ahabw’okuba Yehova ari kukunda entama zeye naturaganisa ngu: ‘Nzasherura ezibuzire, ngarura ezirazire, mbunge ezihendekire, ezitine amani nzigagaruramu.’ (Ezk 34:16) Yehova akakwasa abantu bingi ababire bari kwenda kongera kugira obunywani burungi na we. Obwe rero guma oyesige ku nayenda kukukwasa ngu ogire obunywani bugumire na we.