Yehova akashaba Abisirayeli ngu babe abari kwera. Eco akakisindagiriza ari kubagambira ati: ‘Otarigendagenda nogambura abantu omu bantu b’owanyu; kandi otariba mushinja w’ebishuba kwitisa mutahi wawe. Ni inye [Yehova].’—Lev 19:2, 16.

Ebigambo ngu ‘otariba mushinja w’ebishuba’ bikahindurwa birugire omu Ruheburayo; konka shi nibimanyisa ki? Ekitabo cy’Abayudaya ekiri kugamba aha kitabo c’Abalevi nikigira kiti: “Ebigambo by’omuri oru runyiriri . . . bigumire ahabw’okuba bikahindurwa birugire omu nfumu y’Oruheburayo eri kumanyisa ngu ‘otarimukira mutahi wawe ninga shi ngu omutahirire.’”

Abanyabwenge abamwe nibabuganisa ebyo bigambo n’orunyiriri oruri kubandiza orwo, oruri kugira ngu: ‘Otarikora ebitari by’oburyo omu kucwa emanja; otarigwera rubaju rw’omworo, n’obu kwakuba okweta aha kitinisa c’omukuru; kureka ocwere mutahi wawe orubanja rw’oburyo.’ (Lev 19:15) Obwe rero, ekiragiro ekiri omu runyiriri rwa 16 c’okutimukira mutahi wawe nikimanyisa ku Ruhanga atari kwenda ngu abahereza beye bakorere kubi bangenzi babo omu by’emanja, omu by’obushubuzi n’omu ka, ninga shi ngu baryaryane bari kweyendera amagoba gabo. Ni amazima, titushemerire kukora ebyo bintu; konka hariho obundi buryo obu tushemerire kuhuriramu ebigambo ebyagambwa omu runyiriri rwa 16.

Yetegereze ebigambo ebiri kutandika orunyiriri rwa 16. Ruhanga naragira abahereza beye kwerinda kugambura abandi. Yijuka ku okubeherera abandi kiri kukira aha kubunza orugambo, n’obu n’okubunza orugambo na co kiri kureta ebizibu. (Enf 10:19; Mub 10:12-14; 1 Tim 5:11-15; Yak 3:6) Omuntu nabeherera ondijo omu bigambo agenderire kushisa izina ryeye. Omuntu ori kubeherera abandi nabashinja ebishuba, kandi eco nikita amagara gabo omu kabi. Yijuka ku ba mushinja b’ebishuba ari bo ababeherire Naboti kikatuma yaterwa amabare ari kuturwa busha. (1 Bag 21:8-13) Mazima, omushinja w’ebishuba nabasa kwitisa mugenzi weye nk’oku kiri kugambwa omu kicweka ca kabiri c’omu Baleevi 19:16.

Omuri 1 Yohaana 3:15 nihagira ngu: ‘Wena ori kwanga mwenishe ni omwisi; kandi nimumanya ngu tihariho mwisi oyine amagara agatahwaho omuri we.’ Nikitushemeza kumanya ku Ruhanga yayongire ahari ebyo bigambo by’omu runyiriri rwa 16, ebigambo ebiri kugira ngu: ‘Otariyangira mwene wanyu omu mutima.’—Lev 19:17.

Obwe rero, eco kiragiro eki tutamanyirire ekiri omu Baleevi 19:16 nikiha Abakristo b’omuri obu bwire obuhabuzi bw’amani. Tushemerire kwangira kimwe ebitekateko bibi n’okubeherera abandi. Omu bindi bigambo, twayimukira mugenzi witu tukamwanga ninga tukamugirira ihari nikituma twamubeherera, kandi eco nicoreka ku turi kumwangira omu mutima. Mazima Abakristo bashemerire kwerinda eco kintu.—Mat 12:36, 37.