1-2. (a) Ahabw’enki abatasine juba bashemerire kwesiga Yehova? (Zaaburi ya 37:3, 4) (b) Ni enki eki twaza kushwijuma omuri eki kicweka?

MBEHI oyine entebekanisa y’okutaha omu bushwere, ninga omazire obwire buce obutahiremu? Caba kiri kisyoya, mazima n’oba ori kwenda kutasana n’omuntu owu muri kukundana munonga. Ni amazima abatasine nibabugana ebizibu byingi kandi abari kuba bamara kutasana hine ensharamu z’amani ezi bari kuba bashemerire kukora. Oku ori kwetwara omuri ebyo bizibu n’ensharamu ezi ori kukora nibibasa kugira engaruka aha kushemererwa kwawe n’owu mwatasine. Konka ku orayesige Yehova, noyija kukora ensharamu ndungi, eka yanyu egume kandi mutunge okushemererwa. Ku muriremwa kukuratiza obuhabuzi bwa Ruhanga nikibasa kutuma mwatunga ebizibu, kandi mubure okushemererwa omu ka yanyu.—Shoma omuri Zaaburi ya 37:3, 4.

² N’obu eki kicweka kiri kugamba munonga ah’abatasine juba, nitwija kushwijuma ebizibu ebi abatasine bona bari kubugana. Nitwija kushwijuma ebyokureberaho by’abashija n’abakazi b’abesigwa abari kugambwa omuri Bibuli. Ebyokureberaho by’omuri Bibuli byaza kutwegesa oku turi kubasa kuraba omu bizibu, otwariremu n’abatasine. Nambwenu, twaza kureba ebi turi kubasa kwegera aha bashija n’abakazi b’omuri obu bwire.

3-4. Ni biha bizibu ebi abatasine juba bari kubasa kubugana?

³ Abantu abamwe nibabasa kuhiga abatasine juba ngu babeho nk’oku na bo babireho. Ecokureberaho: Abazire n’abandi banyabuzare nibabasa kuhiga abatasine juba kuhika  bari kuzara abana. Nambwenu, abanywani n’abanyabuzare nibabasa kubahiga kugura enju n’ebindi bintu birungi munonga.

⁴ Abatasine juba baba batetonzire, noshanga bakozire ensharamu eziri kutuma baza omu mabanja mingi. Eco nikibasa kutuma, omushija n’omukazi bakora amashaha mingi kugira ngu babase kushashura ago mabanja. Nibabasa kumarira obwire bwabo aha murimo, kituma babura obwire bwo kweyegesa Bibuli, kukora okuramya kw’eka, n’okuza omu murimo g’okuburira. Nambwenu, nibabasa kutandika kosha enterane, bakora amashaha mingi kugira ngu batunge esente nyingi ninga ngu batabingwa aha murimo. Ebyo nibituma batatunga emigisha eri kuruga omu kwekwatanisa omu murimo gwa Yehova.

5. Ni enki eki turi kubasa kwegera aha cokureberaho ca Klaus na Marisa?

⁵ Ebyokureberaho byingi nibyereka ku okuronda eby’obutungi bitari kureta okushemererwa omu ka. Tekateka aha byahikire aha mushija ori kwetwa Klaus n’omukazi weye Marisa. * Ku bamazire kutasana, bombi bakaba nibakora amashaha mingi kugira ngu babase kutunga esente nyingi. Konka mazima tibaramazirwe. Klaus akagamba ati: “Tukatunga ebintu byingi, konka tihine entego z’eby’omwika ezi twabire twine. Mazima, tukaba nitutura turuhire, kandi twine ebizibu byingi.” Eco nicereka ku okutaho amani mingi ngu tutunge ebintu byingi, kitari kuturetera okushemererwa. Konka yaba ori omuri ezo mbera, otahwa amani. Ebyokureberaho birungi ebi twaza kushwijuma nibibasa kukukwasa kukora empinduka. Ec’okubanza, reka tushwijume eki abashija bari kubasa kwegera aha mugabe Yehoshafati.

6. Ni bata oku Yehoshafati yatire omu nkora obuhabuzi oburi omu Nfumu 3:5, 6, obu amahe mingi gamutahirire we n’abaturage beye?

⁶ Bashija mwe, mbehi hine obu muri kuhurira mwemerize omutima ahabw’obujunanizibwa bw’omu ka obu mwine? Caba kiri kisyo, nobasa kugasirwa washwijuma ecokurebereho c’omugabe Yehoshafati. Nk’abandi bagabe bona, Yehoshafati akaba ayine obujunanizibwa bw’okureberera ihanga ryona? Ni enki eki yakozire kugira ngu abase kuhikiriza ogo murimo ogwabire gugumire. Yehoshafati akakora cona eki yabire ari kubasa kugira ngu arinde abaturage. Akijuza amatawuni g’omuri Yuda abasirikare abari kurenga 1,160,000. (2 Bus 17:12-19) Bwanyima, Yehoshafati akabugana ekizibu c’amani. Amahe mingi g’Abamoni, Abamowabu, n’abashija bingi b’omu mishozi ya Seyiri, bakamutahirira we n’ab’omu ka yeye n’abaturage beye. (2 Bus 20:1, 2) Ni enki eki Yehoshafati yakozire? Akashaba Yehova ngu amukwase kandi ngu amuhe amani. Ebyo nibibugana n’obuhabuzi oburi omu Nfumu 3:5, 6. (Hashome.) Eshara ya Yehoshafati, eri omu 2 Businge 20:5-12, neyereka oku yabire ari kwesiga  munonga Tata w’omu iguru ori kutukunda. Ni bata oku Yehova yagarukiremu eshara ya Yehoshafati?

7. Ni bata oku Yehova yagarukiremu eshara ya Yehoshafati?

⁷ Yehova akagamba na Yehoshafati akoresize omulevi ori kwetwa Yahaziyeli. Yehova akagamba ati: ‘Muze omu myanya yanyu, mwemerere konka, murebe oku [Yehova] arabasingurire.’ (2 Bus 20:13-17) Mazima, obwo ti oburyo obwabire bushangirwe omu kurwana orutaro! Konka obwo buhabuzi bukaba butaruga aha muntu, ahobwe bukaba bwaruga ahari Yehova. Yehoshafati akereka ku ari kwesiga Yehova omu bwijwire ari korobera obwo buhabuzi. Obu we n’amahe geye babire baza kubugana omwangi, bakaba bebembirwe n’abantu bingi ababire batari abasirikare bamanyirire, ahobwe bakaba bari abeshongozi ababire bari kuhimbisa Yehova. Yehova akakwasa Yehoshafati yasingura amahe g’omwangi.—2 Bus 20:18-23.

8. Ni enki eki abashija bari kubasa kwegera aha cokureberaho ca Yehoshafati?

⁸ Imwe bashija mwe, nimubasa kwegera byingi aha cokureberaho ca Yehoshafati. Mwine obujunanizibwa bw’okureberera ab’omu maka ganyu; obwe rero mushemerire kukora n’amani kugira ngu mubarinde. Wabugana ebizibu, nobasa kuhurira hine oburyo bwawe obu ori kubasa kubiterezamu. Konka, otayesiga amani gawe. Ahobwe omu mwanya gw’eco, shaba Yehova obuyambi waba ori wenka. Nambwenu, shaba Yehova omugambire byona waba ori n’omukazi wawe. Rondera ahari Yehova obuhabuzi ori kweyegesa Bibuli n’ebitabo ebi ekitongore kitu kiri kutuha, kandi ote omu bikorwa ebi wayegamu. Abandi nibabasa kutikirizingana n’iwe ahabw’ensharamu ezi okozire zegamire ahari Bibuli, ninga bakugambira ku ori omushema. Nibabasa kukugambira ku esente n’ebindi bintu biri kubasa kubaretera oburinzi omu ka yanyu. Konka yijuka ecokureberaho ca Yehoshafati. Akesiga Yehova kandi yabyereka omu bikorwa. Yehova tarasigireho ogo mushija w’omwesigwa, kandi n’iwe tarije kukusigaho. (Zab 37:28; Heb 13:5) Ni enki ekindi eki omushija n’omukazi bari kubasa kukora kugira ngu batunge okushemererwa?

9. Ni enki eki turi kubasa kugamba aha muhanuzi Isaaya n’omukazi weye?

⁹ Omuhanuzi Isaaya n’omukazi weye, kuramya Yehova ni byo ebi babire nibata omu mwanya g’okubanza. Isaaya akaba ari omuhanuzi, kandi n’omukazi weye nabasa kuba yabire ari omuhanuzikazi. (Isa 8:1-4) Isaaya n’omukazi weye bakaba nibata okuramya Yehova omu mwanya g’okubanza. Mazima ni ecokureberaho kirungi eki baterireho abashija n’abakazi b’omuri obu bwire!

10. Ni bata oku okwega obuhanuzi bw’omuri Bibuli biri kukwasa omushija n’omukazi kumaririra kukorera Yehova byingi oku bari kubasa?

¹⁰ Abashija n’abakazi b’omuri obu bwire nibabasa kukora cona eki bari kubasa kugira ngu bahereze Yehova omu bwijwire. Nibabasa kukizaho kwesiga Yehova bari kwegera hamwe obuhanuzi bw’omuri Bibuli kandi bareba n’oku buri kuhikirira. * (Tit 1:2) Nibabasa n’okutekateka aha ki bari kubasa kukora kugira ngu bekwatanise omu kuhikiriza bumwe omuri obwo buhanuzi bw’omuri Bibuli. Ecokureberaho: Nibabasa kwekwatanisa omu kuhikiriza obuhanuzi  bwa Yesu oburi kugamba ku obutumwa burungi bwabire buraburirwe omu nsi yona emperu etakizire. (Mat 24:14) Oku omushija n’omukazi bari kureba oku obuhanuzi bw’omuri Bibuli buri kuhikirira, ni ko oku bari kukizaho kumaririra kukorera Yehova byingi oku bari kubasa.

11. Ni enki eki Purisikila na Akwila babire betegwire kukora, kandi ahabw’enki?

¹¹ Abashija n’abakazi abatasine juba nibabasa kwegera byingi ahari Purisikila na Akwila, Abayudaya ababire batwire omu tawuni ya Roma. Bakahurira obutumwa burungi oburi kukwata ahari Yesu rero bahinduka Abakristo. Hatariho okubanganisa bakaba bamazirwe n’oku babire babireho. Konka ekiri kushasha, amagara gabo gakahinduka obu omutegeki ori kwetwa Kalawudiyo yaragire ngu Abayudaya bona baruge omuri Roma. Tekateka aha ku byakwasire ahari Akwila na Purisikila. Bakaba bashemerire kuruga omu kacweka aku babire bamanyirire baza kutura ahandi, kandi bagumizamu kukora omurimo gwabo g’okukora amahema omuri ako kacweka kasya. Mbehi ezo mbera zikatuma bayemereza omurimo g’okukorera Yehova? Mazima ingaha. Omu ka yabo sya omuri Korinso, Akwila na Purisikila bakatandika kukwasa ekibina kisya kandi bakwasa Paulo omu kugumya benetata b’omuri ako kacweka. Bwanyima, bakafurukira omu gandi matawuni agabire gari kwetengwa kuburirwa. (Byak 18:18-21; Rom 16:3-5) Eco kikatuma batunga okushemererwa!

12. Ahabw’enki omushija n’omukazi bari kuba bashemerire kweteraho entego z’omu buryo bw’omwika?

¹² Abashija n’abakazi b’omuri obu bwire nibabasa kutoreza Purisikila na Akwila bari kuta eby’Obukama omu mwanya g’okubanza. Obwire burungi obu omushija n’omukazi bari kuba bashemerire kuganira aha ntego zabo, ni omu bwire obu bacasigurana. Omushija n’omukazi ku bari kweteraho entego bari hamwe kandi bakataho amani kugira ngu bahike aha ntego zabo z’eby’omwika, niberebera oku Yehova ari kubakwasa omu kubaho kwabo. (Mub 4:9, 12) Reka tushwijume ebyahikire ahari Russell na Elizabeth. Russell  akamba ati: “Obu twabire tucasigurana, tukaganira tutari kusherekana aha ntego zitu z’eby’omwika.” Elizabeth akagamba ati: “Tukaganira ko n’obu bwanyima twakubugana ebizibu byabire bitaratuzibire kuhika aha ntego zitu.” Embera ezi Russell na Elizabeth babire barimu zikabikiririza kufurukira omuri Micronesia kuhereza ahu ababurizi bari kwetengwa kukira abandi.

13. Tukuratize Zaaburi ya 28:7, twayesiga Yehova ni enki ekiri kurugamu?

¹³ Nk’oku Russell na Elizabeth bakikozire, abashija n’abakazi b’omuri obu bwire bakakora ensharamu y’okorobya embera, kugira ngo bakorese obwire bwabo oku biri kubasika omu kubirira. Omushija n’omukazi ku bari kweteraho entego yo kukorera Yehova kandi bakakorera hamwe kugira ngu bayihikeho, nibahika ahari byingi. Niberebera oku Yehova ari kubafaho, bakizaho kumwesiga kandi batunga okushemererwa.—Shoma omuri Zaaburi ya 28:7.

14. Ni bata oku Petero n’omukazi weye bayerekire ku babire bari kwesiga ekiraganiso ekiri omuri Matayo 6:25, 31-34?

¹⁴ Nambwenu abatasine nibabasa kwegera aha cokureberaho ca Petero n’omukazi weye. Hahwireho obwire Petero abugine na Yesu akaba ashemerire kukora ensharamu y’amani. Petero akaba nayekorera omurimo g’okuroba ebyenyanja. Obwe rero, obu Yesu yayesire Petero ngu amukurate omu murimo g’obwire bwona, akaba ashemerire kutekateka aha ka yeye. (Luk 5:1-11) Petero akasharamu kugenda na Yesu omu murimo g’okuburira. Mazima akakora ensharamu y’obwenge! Kandi nitubasa kugamaba tutari kubanaganisa ku omukazi wa Petero yashagikire ensharamu yeye. Bibuli negamba ku obu Yesu yamazire kuzoka Petero n’omukazi weye bamazire obwire bari kugenda hamwe. (1 Kor 9: 5) Hatariho okubanganisa, ecokureberaho kirungi c’ogo mukazi kikatuma Petero yabasa kuha abandi bashija n’abakazi obuhabuzi. (1 Pet 3:1-7) Mazima, Petero n’omukazi weye bakesiga ekiraganiso ca Yehova ekiri kugamba ku bata eby’Obukama omu mwanya g’okubanza yabire arabahe ebi babire bari kwetenga byona.—Shoma omuri Matayo 6:25, 31-34.

15. Ni enki eki wayeera aha byahikire ahari Tiago na Esther?

¹⁵ Yaba omazire emyaka mice otahize, ni bata oku ori kubasa kugumizamu ecetengo cawe c’okongera aha murimo g’okuburira? Oburyo bumwe obu ori kubasa kukikoramu ni okwegera aha bandi bashija n’abakazi. Nobasa kushoma ebicweka ebiri kushohora omu Munara g’Omurinzi ebiri kugira ngu: “Bakehayo bekundire.” Ebyo bicweka bikakwasa Tiago n’omukazi weye Esther, b’omuri Burazili, kugumya ecetengo cabo, c’okuza kuhereza ahari kwetengwa obuyambi. Tiago akagamba ati: “Ku turi kushoma enkuru z’oku Yehova yakwasize abahereza beye b’omuri obu bwire, n’itwe nituhurira turi kwenda kukuratiza obuhabuzi bwa Yehova kugira ngu atufeho.” Bakaruga omuri Paragwe, baza kuhereza omuri Porutugali kwiha omu mwaka gwa 2014. Esther akagamba ati: “Ecahandikirwe eki twembi turi kukunda munonga ni ec’omu Baefeso 3:20. Tukaguma turi kwerebera oku ebyo bigambo biri kuhikirira omu murimo ogu turi kukorera Yehova.” Omuri eyo baruha, Paulo akaturaganisa ku Yehova ariije kutuha byingi ebiri kukira ebi turi kumushaba. Nitukira kwerebera eci kiraganiso kiri kuhikirira!

16. Abashija n’abakazi abamazire emyaka mice batasine, ni baha abu bari kubasa kuronderaho obuhabuzi baba bari kwenda kweteraho entego?

 ¹⁶ Omuri obu bwire abashija n’abakazi abatasine juba nibabasa kwegera byingi aha bandi abayegire kwesiga Yehova. Abashija n’abakazi bingi bamazire obwire bari kukorera Yehova omurimo g’obwire bwona. Nobasa kubashaba obuhabuzi waba ori kwenda kweteraho entego? Obwo ni obundi buryo obu ori kubasa kwerekamu ku noyesiga Yehova. (Enf 22:17, 19) Abazehe na bo nibabasa kukwasa abashija n’abakazi abatasine juba kweteraho entego z’eby’omwika kandi bakazihikaho.

17. Ni enki ecahikire ahari Klaus na Marisa, kandi ni enki eki turi kubasa kubegeraho?

¹⁷ Obumwe, ensharamu yitu y’okongera omurimo gwitu nebasa kutagenda nk’oku twaba tubyetegire. Eco ni co ecahikire ahari Klaus na Marisa, abu tugambireho. Bwanyima y’emyaka ishatu batasine bakaruga omu ka yabo baza kuyamba omu by’obwombeki ahari ofisi ya Finilandi. Konka, bakamanya ku babire batari kubasa kwikirizibwa kuhamara amezi garengire mukaga. Omu kubanza bakahurira bahwamu amani. Konka obwire bwo kutaha ku bwabire buri hihi kuhika, baketwa kuza kwekwatanisa omu mashomo g’okwega orurimi rw’Oruharabu kandi hati bine okushemererwa ahakuba nibakorera Yehova bari kukoresa orwo rurimi omu rindi hanga. Marisa akagamba ati: “Nkaba ntinire kugira eki nakora nk’oku nabire nimbikora kare. Obwe rero nkaba nsherire kukizaho kwesiga Yehova. Ni kiba kigumire kuruga omu kacweka aku ori kuba omanyirire ngu ogumizemu n’okwesiga Yehova; konka nkerebera ku Yehova ari kuba ayetegwire kutukwasa omu buryo obu turi kuba tutetegire. Bwanyima nkakizaho kwesiga Yehova kandi okwikiriza kwange kwahama” Nk’oku eki cokureberaho cabyereka, nobasa kwesiga ku Yehova arikuha emigisha wamwesiga omu bwijwire.

18. Ni enki ekiri kubasa kukwasa abatasine kugumizamu kwesiga Yehova?

¹⁸ Obushwere ni ekiconco ekiri kuruga ahari Yehova. (Mat 19:5, 6) Nayenda ngu abari kutasana bashemerererweeco kiconco. (Enf 5:18) Imwe abatasine juba, mbehi timuri kubasa kushwijuma oku murije kukoresa amagara ganyu? Mbehi ti muri kubasa kukora cona eki muri kubasa kugira ngu mwereke Yehova ku muri kumusima ahabw’eco kiconco eki yabahire? Bigambire Yehova omu kushaba. Rondera omu Kigambo ceye emisinge eri kubasa kukukwasa. Bwanyima okuratize obuhabuzi obu Yehova arakuhe. Nobasa kwesiga otari kubanganisa, ku mwata okukorera Yehova omu mwanya g’okubanza murije kutunga okushemererwa n’okumarwa!