EKICWEKA C’OKWEGA 45
Tugumizemu kwerekana rukundo etari kuhemuka
‘Buri muntu agirire mwene wabo embabazi n’esaasi.’—ZEK 7:9.
ECESHONGORO CA 107 Rukundo nk’Eya Ruhanga
EMPINYE *
1-2. Ni ziha nshonga ezishemerire kutuma twayerekana rukundo etari kuhemuka?
TWINE enshonga nyingi ezishemerire kutuma twayerekana rukundo etari kuhemuka. Zimwe omuri ezo ni ziha? Reba oku enfumu z’omuri Bibuli ziri kugarukamu eco kibuzo: ‘Embabazi n’obwesigwa bireke kukurugaho. Obwo nibwo orashongoce, okagira izina rirungi omu misho ga Ruhanga n’abantu.’ ‘Ow’embabazi ayezimurira ebirungi.’ ‘Ori kukuratira okuhikirira n’embabazi, aryagira amagara.’—Enf 3:3, 4; 11:17; 21:21.
2 Ezo nfumu ishatu nizereka enshonga ahabw’enki tushemerire kwereka rukundo etari kuhemuka. Ey’okubanza: Twayereka rukundo etari kuhemuka nikituma twaba ab’omuhendo omu misho ga Ruhanga. Eya kabiri: Ku turi kwereka rukundo etari kuhemuka, n’itwe nikitugasira. Ecokureberaho: Nikituma twagira obunywani n’abandi. Eya kashatu: Twayereka rukundo etari kuhemuka nitwija kutunga emigisha omu biro by’omu misho, harimu n’amagara agatahwaho. Nambwenu, twine enshonga ndungi eshemerire kutuma twayorobera obuhabuzi bwa Yehova oburi kugira ngu: ‘Buri muntu agirire mwene wabo embabazi n’esaasi.’—Zek 7:9.
3. Ni biha bibuzo ebi twaza kushwijuma omuri eki kicweka?
3 Omuri eki kicweka, twaza kushwijuma ebyokugarukamu by’ebi bibuzo bina. Ni baha abu tushemerire kwereka rukundo etari kuhemuka? Ni enki eki turi kubasa kwegera omu kitabo ca Rusi aha bikwatirine n’okwereka rukundo etari kuhemuka? Ni bata oku turi kubasa kwereka rukundo etari kuhemuka omuri obu bwire? Ni eha migisha eyi abantu abari kwereka rukundo etari kuhemuka bari kutunga?
NI BAHA ABU TUSHEMERIRE KWEREKA RUKUNDO ETARI KUHEMUKA?
4. Ni bata oku turi kubasa kutoreza Yehova turi kwereka rukundo etari kuhemuka? (Mak 10:29, 30)
4 Ekicweka ecabandize eki, kikatukwasa kushoborocerwa ku Yehova ari kwereka rukundo etari kuhemuka kusha abari kumukunda kandi bakamuhereza (Dan 9:4) N’itwe nitwenda kuhereza Ruhanga ‘nk’abana abari kukundwa.’ (Efe 5:1) Obwe rero, nituba twine ecetengo c’okwereka benetata na banyanyazi rukundo etari kuhemuka.—Shoma omuri Mako 10:29, 30.
5-6. Ekigambo omwesigwa, nikibasa kumanyisa ki?
5 Mazima, oku turi kukizaho kushoborocerwa eki rukundo etari kuhemuka eri kumanyisa, ni ko turi kukizaho kugira ecetengo c’okuyereka benetata na banyanyazi. Kugira ngu tukizeho kushoborocerwa eki rukundo etari kuhemuka eri kumanyisa, reka tushwijume ahu eri kubuganira n’okuba omwesigwa. Reba ecokureberaho.
6 Omuri obu bwire, nitubasa kugamba ku omukozi owamara emyaka myingi ari kukora omu kitongore nanka, ari kuba ari omwesigwa. Konka omuri eyo myaka eyi ari kuba yamara, nabasa kuba atakabuganaho n’abakama b’eco kitongore. Nabasa kuba atari kwikiriza ebiragiro byona by’eco kitongore. Nabasa kuba atari kukunda eco kitongore, konka ari kukunda omurimo gweye oguri kutuma yatunga akasente. Nagumizamu kukora ogo murimu kuhisya obu aritunga ogundi oguri kumushashura ge kusinga ogo.
7-8. (a) Ni kiha kintu c’omugasho ekiri kukira kuba omwesigwa? (b) Ahabw’enki tushemerire kushwijuma enyiriri zimwe z’omu kitabo ca Rusi?
7 Kuba omwesigwa omu bi ori kukora ni omutwarize murungi. Konka hine ekindi kintu ekishemerire kutuma waba omwesigwa. Ni enki ekiri kugambwa omuri Bibuli, ecatumire abahereza ba Ruhanga b’omu bwire bwa kare baba abesigwa? Tibarabikozire ahakuba babire bashemerire kubikora, ahobwe ni ahabwa rukundo etari kuhemuka. Tekateka aha cokureberaho ca Dawudi. Akaba nakunda munywani weye Yonatani n’omutima gweye gona, n’obu ishe yabire ari kwenda kumwita. Na bwanyima y’emyaka myingi Yonatani afire, rukundo etari kuhemuka ekatuma Dawudi yagumizamu kuha Mefibosheti, mutabani wa Yonatani, ebi yabire ari kwetenga byona.—1 Sam 20:9, 14, 15; 2 Sam 4:4; 8:15; 9:1, 6, 7.
8 Nambwenu nitubasa kwega byingi aha bikwatirine rukundo etari kuhemuka twashwijuma zimwe omu nyiriri z’omu kitabo ca Rusi. Ni gaha mashomo agakwatirine na rukundo etari kuhemuka agu turi kubasa kwegera omuri eco kitabo? Ni bata oku turi kubasa kuta omu nkora ago mashomo omu kibina kitu? *
EKI TURI KUBASA KWEGERA AHA KITABO CA RUSI AHA BIKWATIRINE N’OKWEREKA RUKUNDO ETARI KUHEMUKA?
9. Ahabw’enki Nawomi yagambire ku Yehova yabire ari ‘kumurwanisa’?
9 Omu kitabo ca Rusi, nitushomamu enkuru ya Nawomi, omukamwana weye Rusi, na Bowazi owabire ari kutina Ruhanga, kandi owabire ari omunyabuzare w’omushija wa Nawomi. Ahabw’enjara eyabire eri omuri Isirayeli, Nawomi, omushija weye, n’abatabani babo babiri bakafurukira omuri Mowabu. Ku hahwire obwire, omushija wa Nawomi akafa. Batabani beye babiri bakaba baresire abakazi, konka ekiri kushasha, na bo bakafa. (Rus 1:3-5; 2:1) Ebyo bikatuma Nawomi yashasha munonga. Akahwamu amani yahika n’aha kutekateka ku Ruhanga ari kumurwanisa. Reba oku yagambire ebi yabire ari kutekateka ahari Ruhanga: ‘[Yehova] abangire omukono gweye kundwanisa.’ ‘Ow’obushoborozi bwona akankorera ebiri kusharira munonga.’ Nambwenu akagamba ati: ‘[Yehova] ambonabonesize, kandi Owobushoborozi bwona oku angwisize akagwe.’—Rus 1:13, 20, 21.
10. Ni bata oku Yehova yayehurire ahabw’ebigambo bya Nawomi?
10 Ni bata oku Yehova yayehurire ahabw’ebigambo bya Nawomi? Eco tikiratumire yareceraho kukwasa Nawomi. Ekiri kutana n’eco, akamufaho munonga. Yehova namanya ku ‘okuhata kuri kuhindura omunyabwenge omushema.’ (Mub 7:7) Obwe rero, Nawomi akaba ari kwetenga omuntu wo kumukwasa kumanya ku Yehova yabire acari aha rubaju rweye. Ruhanga akamukwasa ata? (1 Sam 2:8) Rusi akakwasa nyinazara kugaruka kwehurira ge omu nyehurira n’omu by’omwika, abyihire aha mutima. Ni enki eki turi kwegera ahari Rusi?
11. Ahabw’enki benetata na banyanyazi abine omutima murungi bari kukwasa abehebire?
11 Rukundo etari kuhemuka netuma twakwasa abari kuba bahwiremu amani. Nk’oku Rusi yakwasize Nawomi, benetata na banyanyazi abine omutima murungi omuri obu bwire, nibehayo bekundire bakwasa ab’omu kibina abari kuba behebire. Nibakunda benetata na banyanyazi, kandi nibakora cona eki bari kubasa ngu babakwase. (Enf 12:25; 24:10) Entumwa Pawulo akatugambira eki tushemerire kukora ari kugira ati: ‘Mugumye abahahire emitima, muramire abatine mani, mugumisiririze bona.’—1 Tes 5:14.
Nitubasa kukwasa mwenetata ninga munyanyazi oyehebire turi kumuhurikiza twetonzire (Reba paragurafu ya 12)
12. Emirundi myingi, ni buha buryo burungi bw’okukwasamu benetata na banyanyazi abahwiremu amani?
12 Emirundi myingi oburyo burungi bw’okukwasa benetata na banyanyazi abahwiremu amani, ni okubahurikiza kandi tubagambira ku turi kubakunda. Yehova nashemererwa ahabw’ebi ori kukora omu kukwasa benetata na banyanyazi b’omuhendo. (Zab 41:1) Omu Nfumu 19:17 nihagira ngu: ‘Ogirira aboro embabazi, aba naguza [YEHOVA]; aryamuzimurira ebi yakozire.’
Rusi yagenda na nyinazara Nawomi, Orupa yagaruka omuri Mowabu. Rusi yagambira Nawomi ati: ‘Ahu oriza hona, nanye ni ho ndiza.’ (Reba paragurafu ya 13)
13. Rusi na Orupa bakaba nibatanira nkahe, kandi shi ni bata oku ensharamu ya Rusi yayerekire rukundo etari kuhemuka? (Reba ekishushani c’aha kishembeso.)
13 Nitukizaho kushoborocerwa eki rukundo etari kuhemuka eri kumanyisa twashwijuma ebyahikire ahari Nawomi, bwanyima y’okufisa omushija weye na batabani beye. Nawomi ku yamanyire ku ‘Ruhanga yatayayire abantu beye akabaha ebyokurya’ akasharamu kugaruka omu ihanga ryeye. (Rus 1:6) Bakamwana beye babiri bakatandikana na we orugendo. Konka obu babire bari omu muhanda, Nawomi akabagambira emirundi eri kurenga ishatu ngu begarukire owabo omuri Mowabu. Bikagenda bita? Bibuli negira ngu: ‘Orupa yanywegera nyinazara, konka Rusi we yamubaho akaramata.’ (Rus 1:7-14) Orupa akikiriza ebi nyinazara yabire yagamba rero yayegarukira owabo. Konka Rusi we, akanga kugenda. Na we akaba ari kubasa kugenda, konka ahabwa rukundo etari kuhemuka akasharamu kuguma ari kukwasa Nawomi. (Rus 1:16, 17) Rusi taragumire na Nawomi ahabw’okumugema, ahobwe ni ahabw’okuba yabire ari kubyenda. Rusi akereka Nawomi rukundo etari kuhemuka. Ni nki twayegera omuri eyi nkuru?
14. (a) Ni bata oku benetata na banyanyazi bingi bari kutoreza Rusi? (b) Tukuratize ebiri omu Baheburaayo 13:16, ni kuha kweferereza oku turi kubasa kukora tukashemeza Ruhanga?
14 Rukundo etari kuhemuka netuma twakora ekirengire aha bi tushemerire kukora. Nk’oku abahereza ba Ruhanga b’omu bwire bwa kare bakikozire, benetata na banyanyazi bingi bakasharamu kwereka rukundo etari kuhemuka Abakristo bagenzi babo, nangwa n’obu bakuba batari kubamanya. Ecokureberaho: Bamanya ku hine ahaba ebihikirizi, nibahika bari kutekateka aha ki bari kubasa kukora ngu babakwase. Omu kibina hagira owabugana ebizibu nibahika bari kuza kumureba ngu bamuhe obuyambi obu ari kwetenga omu bikorwa. Nk’oku Abakristo b’omu kinyigana c’okubanza b’omuri Makedoniya bakikozire, nibakora ebiri kukira aha bi bari kuba bari kushabwa. Nibehayo nangwa n’okukiraho, kugira ngu bakwase benetata na banyanyazi abine ebi bari kwetenga. (2 Kor 8:3) Mazima Yehova nashemererwa munoga yareba oku bari kwereka rukundo etari kuhemuka!—Shoma omu Baheburaayo 13:16.
OKU TURI KUBASA KWEREKA RUKUNDO ETARI KUHEMUKA OMURI OBU BWIRE?
15-16. Ni bata oku Rusi yayerekire ku yabire ayetegwire kukwasa abandi?
15 Nitubasa kwegera byingi aha ku Rusi yakwasize Nawomi. Reka tushwijume bimwe omuri ebyo.
16 Guma obe oyetegwire kukwasa abandi. Obu Rusi yashaziremu kugenda na nyinazara omuri Yuda, Nawomi akagezaho kumuzibira. Konka Rusi tarabyikirize. Ni enki ecarugiremu? Bibuli negira ngu: ‘Nawomi ku yarebire amaririre kimwe kugenda na we, yarekera aho kumugambira.’—Rus 1:15-18.
17. Ni enki ekirije kutukwasa kutareka kukwasa abandi?
17 Eki biri kutwegesa: Nikiba nikishaba kwehangana kugira ngu tukwase omuntu oyehebire, konka titushemerire kureka kumuyamba. Omunyanyazi nabasa kuba ari kwetenga obuyambi konka omu kubanza abanza yayanga. * Rukundo etari kuhemuka neyija kutuma twakora ekiri kubasika cona kugira ngu tumukwase. (Gal 6:2) Nituba turi kwesiga ku obwire burije kuhika akikiriza obuyambi bwitu kandi tukamuhumuriza.
18. Ni enki ecabire kiri kubasa kushasha Rusi?
18 Otarirahuka kugubwa kubi. Obu Nawomi na Rusi bahikire omuri Betelehemu, Nawomi akabugana ababire bari batahi beye. Akabagambira ati: ‘Nkaruga kunuya nyijwire, mbwenu [Yehova] yangarura ntine kantu.’ (Rus 1:21) Tekateka aha ku Rusi yayehurire ku yahurire ebyo bigambo bya Nawomi! Rusi akaba yakozire cona eki ari kubasa ngu akwase Nawomi. Rusi akarira na we, yamugumya, kandi akagenda na we orugendo ruringwa. N’obu Nawomi yabire ari kumanya ebyo byona akagamaba ati: ‘[Yehova] yangarura ntine kantu.’ Ebyo bigambo bya Nawomi, bikereka ku yabire ari kureba ku hatine eki Rusi yamuyambire. Mazima eco nikibasa kuba cashashire Rusi! Konka nabwo, akaguma na Nawomi.
19. Ni enki ekiri kubasa kutukwasa kugumizamu kuyamba omuntu ori kuba oyehebire?
19 Eki biri kutwegesa: Omuri obu bwire, omunyanyazi oyine ebizibu nabasa kutugambira kubi, n’obu twakuba tutireho amani ngu tumukwase. Konka eco, tikishemerire kutuma twareka kumukwasa. Nituguma na munyanyazi witu ori kwetenga obuyambi kandi tushaba Yehova ngu atukwase kumanya oburyo burungi obu turi kubasa kumugumyamu.—Enf 17:17.
Ni bata oku abazehe omuri obu bwire bari kubasa kutoreza Bowazi? (Reba paragurafu ya 20-21)
20. Ni bata oku Rusi yatungire obuyambi obu yabire ari kwetenga?
20 Gumya abandi baba bari kubyetenga. Rusi akereka rukundo etari kuhemuka Nawomi, konka na we akaba nayetenga obuyambi. Kandi Yehova akakoresa Bowazi omu kumuyamba. Bowazi akagambira Rusi ati: ‘[Yehova] akuzimurire ahabw’ebi wakozire; [YEHOVA] Ruhanga wa Isirayeli; owu wahungire omu mababa geye, akuhe ebihembo byawe byona bitacwirweho.’ Ebyo bigambo birungi bikahika Rusi aha mutima. Eco kikatuma yagarukamu Bowazi ngu: ‘Wampumuriza, kandi wagamba ge n’omuzana wawe.’ (Rus 2:12, 13) Ebigambo ebi Bowazi yagambire Rusi bikamugumya omu bwire obu yabire nabyetenga.
21. Nk’oku biri kugambwa omuri Isaaya 32:1, 2, ni enki eki abazehe bashemerire kukora?
21 Eki biri kutwegesa: Abari kwereka abandi rukundo etari kuhemuka na bo hine obu bari kwetenga obuyambi. Nk’oku Bowazi yasimire Rusi ahabwa rukundo etari kuhemuka eyi yayerekire, omuri obu bwire abazehe nibasima benetata na banyanyazi bareba oku bari kukwasa abandi. Abazehe ku bari kusima abo benetata na banyanyazi, nikituma bagira amani.—Shoma omuri Isaaya 32:1, 2.
NI EHA MIGISHA EYI ABARI KWEREKA RUKUNDO ETARI KUHEMUKA BARIJE KUTUNGA?
22-23. Ni bata oku Nawomi yahindwire enyehurira zeye, kandi ahabw’enki? (Zaaburi 136:23, 26)
22 Ku hahwireho obwire, Bowazi akereka obufura Rusi na Nawomi ari kubaha ebyokurya. (Rus 2:14-18) Ni bata oku Nawomi yayehurire ahabw’obufura obu Bowazi yaberekire? Akagamba ati: ‘Ogo mushija ahebwe omugisha ahari [Yehova], otarekire kugirira mbabazi abakiriho na baanyakufa.’ (Rus 2:20) Mazima Nawomi akereka ku nasima! Omu kubanza akagamba ari kurira ati: ‘Yehova akambonabonesa,’ konka hati yagamba ayine okushemererwa ati: “Yehova tararekire kugirira embazi bakiriho.’ Ni enki ecatumire Nawomi yahindura oku yabire ari kwehurira?
23 Aha muheru, Nawomi akatandika kureba ku Yehova ataramusigireho. Yehova akakoresa Rusi yamuha obuyambi obu yabire ari kwetenga omu rugendo obu babire bari kuza omuri Yuda. (Rus 1:16) Nambwenu Nawomi akareba omukono gwa Yehova obu Bowazi, omwe omu ‘bacunguzi’ babo yaberekire obufura. * (Rus 2:19, 20) Nawomi akamanya ku Yehova atarabarekire. Nambwenu akamanya ku Yehova yabire ari na we obwire bwona! (Shoma omuri Zaaburi ya 136:23, 26.) Mazima Nawomi akashemererwa ahakuba Rusi na Bowazi batararekire kumwereka rukundo! Nitubasa kutekateka aha ku bashemerirwe ahabw’ebirungi ebyarugiremu.
24. Ahabw’enki tushemerire kugumizamu kwereka rukundo etari kuhemuka benetata na banyanyazi?
24 Ni enki eki twayegera omu kitabo ca Rusi aha bikwatirine na rukundo etari kuhemuka? Rukundo etari kuhemuka netuma tutareka kukwasa benetata na banyanyazi abari kuba behebire. Nambwenu netuma twayeferereza kugira ngu tubakwase. Abazehe bashemerire kuguma bari kusima abari kwereka abandi rukundo etari kuhemuka. Ku turi kureba oku abari kuba behebire bari kugaruka kuba ge omu by’omwika, nikituma twashemererwa. (Byak 20:35) Ni eha nshonga eri kukira ezindi, eshemerire kutuma twagumizamu kwereka rukundo etari kuhemuka? Ni ahabw’okuba turi kwenda kutoreza Yehova kandi tukamuhimbisa, we ‘oyijwire’ rukundo etari kuhemuka.—Kur 34:6; Zab 33:22.
ECESHONGORO CA 130 Saasira Abandi
^ par. 5 Yehova nayenda ngu twereke benetata na banyanyazi b’omu kibina rukundo etari kuhemuka. Nitubasa kumanya ge eki rukundo etari kuhemuka kiri kumanyisa, twajwijuma oku abahereza ba Ruhanga b’omu bwire bwa kare bayerekire. Omuri eki kicweka, twaza kureba eki turi kwegera ahari Rusi, Nawomi, na Bowazi.
^ par. 8 Kugira ngu okizeho kushoborocerwa ebiri omuri eki kicweka, nitukuhiga kushoma ekicweka ca 1 n’eca 2 by’omu kitabo ca Rusi.
^ par. 17 Ahabw’okuba twashwijuma ecokureberaho ca Nawomi, ni yo nshonga eyi twagamba aha banyanyazi abari kuba bari kwetenga obuyambi. Konka ebiri kugambwa omuri eki kicweka nibikwata n’ahari benetata.
^ par. 23 Kugira ngu okizeho kumanya omurimo gwa Bowazi nk’omucunguzi, reba ekicweka ekiri kugira ngu “Toreza okwikiriza kwabo—‘Omukazi w’omutima,’” omu Munara g’Omurinzi gw’aha kiro ca 1, 2012, p. 20.
