Poputá seni ei ier, epwele lapóló ach fansoun le ammólnatá fán iten Áchechchemen málóón Kraist. Ika ewe Áchechchem a sereni atun weekday, ewe Manawach me Ach Angangen Afalafal Mwich esap fis lón ena wiik. Ika ewe Áchechchem a sereni atun weekend, ewe afalafal fán iten aramas meinisin me ewe káéén Leenien Mas resap fis. Kopwe alamotaéchú ena fansoun lón óm schedule? Usun chék met a fis lón fansoun ekkewe aposel, a lamot ekkóch repwe wisen féri ekkewe kókkót fán iten ei rán mi aúchea. (Luk 22:7-13; km 3/15 1) Nge kich meinisin sipwe ammólnatá letipach. Ifa usun sipwe féri ena?

• Ekilonei lamoten óm kopwe fiti ewe Áchechchem.​—1Ko 11:23-26

• Iótek me etittina óm riri ngeni Jiowa.​—1Ko 11:27-29; 2Ko 13:5

• Álleani me ekilonei met ewe Paipel me néúch kewe puk ra apasa usun weween ewe Áchechchem.​—Jo 3:16; 15:13

Ekkóch ra álleani me ekilonei ewe álleaan Paipel fán iten ewe Áchechchem lón ewe puk Etittina Paipel Iteiten Rán. Nge ekkóch ra álleani ekkewe wokisin seni Paipel mi mak fan. Nge pwal ekkóch ra enniwili ekkewe lesen lón ekkewe Leenien Mas mi fós usun ewe Áchechchem me ewe tong Jiowa me Jesus ra pwáraatá ngenikich. Ese lifilifil menni sókkun napanapen káé ka filatá, nge amwo epwe álisuk le arap ngeni Jiowa me Néún we.