Pwata sipwe awora fansoun le chiechi ngeni chókkewe mi tongei Jiowa? Pokiten chókkewe sia awora fansoun ngeniir ra tongeni álisikich le féri minne mi pwúng are ra tongeni pesekich ach sipwe féri minne mi mwáál. (SF 13:20) Áwewe chék, King Jehoas “a föri mine a pwüng me fän mesen ewe Samol mi Lapalap” ánein an nóm ren ewe souasor mi lap, Jehoiata. (2Kr 24:2) Mwirin án Jehoiata máló, Jehoas a chiechi ngeni chókkewe mi ngaw iwe a likitaló Jiowa.​—2Kr 24:17-19.

Lón fansoun ekkewe aposel, Paulus a áweweei pwe ewe mwichefelin Chón Kraist a usun chék “eu imw mi watte” nge chón lón ewe mwichefel iir ekkewe “sepi” are ekkewe pisekin lón imw. Kich sia “eu pisekin aea fän iten ekoch popun mi aüchea” ika sise chiechi ngeni emén féfférún a eletipengawa Jiowa, inaamwo ika iir chón ach famili are chón ewe mwichefel. (2Ti 2:20, 21) Amwo sipwe sópweló le chiechi ngeni chókkewe mi tongei Jiowa me chón apéchékkúlakich le angang ngeni i.

KATOL EWE VIDEO LEARN TO REJECT BAD ASSOCIATION, MWIRIN PÉLÚWENI EKKEEI KAPAS EIS:

• Ifa usun sia tongeni awora fansoun, nge sise tepereni, ngeni ekkewe aramas ese fich ach sipwe chiechi ngeniir?

• Lón ewe video, met a álisi ekkewe úlúmén Chón Kraist ar repwe úkú seni chiechi mi ngaw?

• Ikkefa ekkewe kapasen emmwen lón Paipel a tongeni álisuk le kefiléch chiechiom?