Met a kan áweiresuk rán me rán? En emén mékúren famili mi angang weires le féri sókkopaten wisom fán iten túmúnún óm famili? Are en emén sam are in ese wor pwúlúwom mi angang weires le ataweei osupwangemi? Are en emén kúkúún mi kúna riáfféú seni chienom kewe chón sukul? Are en emén mi weires pokiten apwangapwangen inisum are pokiten en mi chinnap? Kich meinisin sia nóm fán en me an weires. Nge chómmóng Chón Kraist ra kúna sókkopaten osukosuk lón eú chék atun. Nge sia silei pwe ekiseló chék sipwele ngaseló seni ekkeei esin riáfféú.​—2Ko 4:16-18.

Iwe, ren mwo iei, sia kúna oururun letipach ren ach silei pwe Jiowa a weweiti ach achocho fán weires, áfánni ach tuppwél me likiitú, me a isoni fán itach ekkewe feiéch mi fókkun múrinné. (Jer 29:11, 12) Jesus a pwal áfánni emén me emén kich. Atun ach apwénúetá wisach wisen Chón Kraist, iei an we kapasen alúkúlúk ngenikich: “Ngang üpwe etikemi fansoun meinisin tori lesopolan fanüfan.” (Mat 28:20) Ika sia awora fansoun le ekilonei ach ngaseló lón mwachkkan fán nemenien án Kot we Mwú, sia apéchékkúla ach ápilúkúlúk me ach tipeppós le likiitú ngeni ekkewe riáfféú sia kúkkúna iei.​—Ro 8:19-21.

KATOL EI VIDEO ATUN MÉLÚMÉL EPWE TORIKICH, NENNENGENI JESUS!​—FEIÉCH EWE MWÚÚN KOT EPWE ATOTO, MWIRIN PÉLÚWENI EKKEEI KAPAS EIS:

• Pwata aramas ra towaw seni Kot, me met mwirilóón?

• Met néún Jiowa kewe aramas mi tuppwél ra ápilúkúlúkú?

• Met a atufichi ei esin fansoun mi amwarar lón mwachkkan?

• Menni feiéch ka mwétéresiti óm kopwe kúna lón ewe ótót sefé?