Ach we mwicheich a fen angang weires le ammólnatá ekkewe alen pwóróusfengen fán iten ekkewe chón afalafal, me chómmóng ra fen kúna álilliséchúr lón ar kewe territory. Iwe nge, pokiten nónnómun ekkewe chón afalafal wóón unusen fénúfan a sókkofesen, iwe atun ra afalafal ra tongeni fós usun pwal eú pwóróus aramasen leenier repwe sani le rong, are pwóróus wóón met ewe alen pwóróusfengen a fós usun, nge filatá pwal eú kapas eis, wokisin, me kapas eis lón nan. Nge atun a fis ewe angangen afalafal mi kkóló aúchean, mi lamot pwe meinisin repwe fiti ekkewe kapasen emmwen mi kawor fán iten ena fansoun. Met ewe sia mochen achocho ngeni, ina ach sipwe apwénúetá án Jesus allúk ach sipwe esilefeili kapas allimen ewe Mwú.​—Mat 24:14.

Atun ekkewe chón sukul ra féri ar kinikin, repwe áeá met ewe alen pwóróusfengen a fós usun. Ra tongeni siwili masouan, nge ena kapas eis, wokisin, met repwe pwóróusfengen wóón lón nan, are napanapen ar afalafal epwe chúen chék riri ngeni ewe alen pwóróusfengen. Iwe nge, fán ekkóch, epwe wor emmwen mi tichik pwe ewe chón sukul epwe chék unusen fiti ewe alen pwóróusfengen ren an áeá ewe chék kapas eis, wokisin, me kapas eis lón nan. Ei emmwen a siwili minne a mak lón néúch we Manawach me Ach Angangen Afalafal Mwich, minen June 2020, pekin taropwe 8.