Inaamwo ika Chón Kraist rese nóm fán ewe Allúkún Moses, nge an kewe ruu allúk mi lap seni meinisin, weween tongei Kot me chón óruch, ra chúen menlapei met Kot a mochen sipwe féri. (Mat 22:37-39) Ena esin tong esap pwúkún fisitá. Mi lamot sipwe pwisin achocho le ámááraatá. Ifa usun? A lamot álleaan Paipel iteiten rán. Ika sia káé chómmóng napanapen Kot kewe me ren Paipel, sipwe kúna “lingochun ewe Samol.” (Kf 27:4, TF) Iwe, ach tongei i epwe mááritá me epwe lapóló ach eáni an ekiek. Ei epwe amwékútúkich le álleasochisi án Kot kewe allúk kapachelong ewe allúk pwe sipwe pwáraatá ewe esin tong mi pennúkúóló pwisin mochenin ngeni chón óruch. (Jo 13:34, 35; 1Jo 5:3) Ikkeei úlúngát kapasen pesepes pwe óm álleaan Paipel epwe eú fansoun mi apwapwa me ámmeseik:

• Anganga óm tufichin anchang le kachitoni mettóch fitifengen me óm tufichin kúna, rong, neni, meefi, me tini. Anchangei pwe ka nóm ikewe. Met kopwe kúna, rong, me fáreni? Epwe met meefien ekkewe aramas lón ena pwóróus?

• Sótuni sókkopaten napanapen állea. Ikkeei ekkóch mettóch ka tongeni féri: Léúwommóng le állea are aúseling ngeni me fiti ewe álleaan Paipel mi record. Lap seni óm chék fiti tettelin ekkewe sópwun lón Paipel, álleani usun pwóróusen emén me emén aramas are eú me eú itelap. Áwewe chék, ren pwóróusen Jesus ka tongeni áeá ewe Kinikin 4 are Kinikin 16 lón ewe puk Minen Álillis fán Iten Káéén Paipel. Álleani unusen ewe sópwun lón Paipel ewe lesenin rán a feito seni. Álleani ekkewe puken Paipel lón tettelin ar ra mak.

• Állea pwe kopwe weweiti. Óm álleani eú chék sópwun iteiten rán me achocho le weweiti me ekilon wóón a fókkun múrinné lap seni óm kopwe chék achocho le álleaanaaló chómmóng sópwun. Ekieki met a fis lón ewe pwóróus. Etittina tichikin. Néúnéú ekkewe map me marginal reference. Research are kútta pwóróusen mwaren eú mettóch kese weweiti. Ika mi tufich, epwe léllé úkúkún óm fansoun állea me fansoun ekilon.