Minen katol, áwewe chék ren sasing, lios, me metakkan, ra kan alapaaló án emén mwétéres le káé me a álisi le weweiti me chechchemeni minne a káé. Ach we Soukáit mi Lap Jiowa a áeá minen katol le asukula ngeni aramas ekkewe lesen mi lamot. (Ken 15:5; Jer 18:1-6) Ewe Sense mi Lap Jesus a pwal ina usun. (Mat 18:2-6; 22:19-21) Eú sókkun minen katol mi fókkun álilliséch lón ekkeei ier, ina néúch kewe video. Ka alamotaéchú ekkewe video lupwen ka káé ngeni aramas ewe Paipel?

A fen katowu engol video mi álisikich le asukula aramas ekkewe lesen seni ewe puk Pwóróus Allim Seni Kot! Lap ngeni itelapen ekkena video ra léllé ngeni eú me lein ekkewe kapas eis mi makkechól lón ena puk. Nge lupwen emén epwe néúnéú computer are device le álleani ena puk, mi wor ekkewe minen áchchem ren ineet atun epwe fichi ekkena video. A pwal wor ekkewe ekkóch video mi weneiti masouen néúch kewe sókkopaten puk lón ach we Pwórun Asukul.

Ka pwóróus wóón och mettóch lón Paipel nge a weires ngeni noum we chón káé an epwe weweiti? Are noum we chón káé a nóm fán sóssót? Kútta eú video epwe álisi me wóón jw.org® are JW Broadcasting®. Neman en me noum chón káé oua tongeni katol eú me lein ekkena video me pwóróusfengen wóón.

Iteiten maram, a kan katowu mineféén video. Atun óm katol, ekieki ifa usun ka tongeni alamota ekkena video le káé ngeni aramas.