Papa me mama ra mmen achocho lón ewe lamalamen Katolik. Nge lupwen ra káé seni Paipel pwe Jiowa ina iten Kot, iir me rúúemén ra wiliiti Chón Pwáraatá Jiowa mi tinikken. Papa a kaúló le ffal uluulun liosun Jises, me a fen áeá silean lón pekin táikú le féri fán imwem we pwe epwe wiliiti ewe áeúin Leenien Mwiich lón San Juan del Monte, eú leeni lón Manila, ewe iolap lón Philippines.

Mwirin ái uputiw lón ewe ier 1952, semei kewe me inei ra poputá le áiti ngeniei pwóróusen Jiowa ussun chék met ra kan pwal féri ngeni pwii kewe fémén me fefinei kewe úlúmén iir mi watte seniei. Lupwen úa wakkattetá, semei we a pese ngeniei ái úpwe álleani eú sópwun lón Paipel iteiten rán, me a káé ngeniei lón néúch kewe sókkopaten puk. Fán ekkóch, semei kewe me inei ra kan etiwa ekkewe chónemmwen mi wisen sáifetál me ekkewe chón tupuni ewe keangen ofesilap ar repwe nóm rem lón imwem we. A atoto watteen pwapwa ngeni ám famili me áúa meefi péchékkúl ren pwóróuseer. Ina met a amwékútúkem meinisin ám áúpwe akkomwa ewe angangen afalafal lón manawem.

A chómmóng met úa káé seni semei kewe me inei mi fókkun túppwél ngeni Jiowa. Mwirin án inei we mi fókkun áchengicheng a máló ren eú semmwen, ám me papa áúa poputá pioneer lón ewe ier 1971. Nge lón ewe ier 1973 atun a 20 ieri, papa a máló. Málóón semei kana me inei, a efisi ái úpwe meefi tipitipingaw me ákkáláemén. Nge ewe ápilúkúlúk mi “núkúchar me alúkúlúk” Paipel a fós ussun, a álisiei ái úpwe eáni ekiek pwúng lap seni ái úpwe kon kokotiw lón letipechou, me a álisiei le ririéch ngeni Jiowa. (Ipru 6:19) Ekiseló chék mwirin málóón semei we, úa etiwa ewe etiwetiw ái úpwe ló special pioneer lón ewe fénú mi towaw itan Coron, lón ewe kinikin Palawan.

A 21 ieri atun úa ló Coron. Pokiten úa kan nóm lein telinimw, úa máirú atun úa kúna pwe wóón ei  fénú a chék wor fitu imw mi kus konik lón me wor ar fiifi me a chék wor ákkáefóch tarakú are skuter. Inaamwo iká mi wor fitemén chienach ikena ie, nge ese wor chienei pioneer me fán ekkóch úa chék áláemén le afalafal. Lón ewe áeúin maramen ái nónnóm ikena, úa fókkun pwosiiti chón ái we famili me chiechiei kewe. Lepwin, úa kan netáái ekkewe fúú fán láng me kechiw. Úa mochen úkútiw seni wisei we me liwiniti leeniei.

Lón ekkena fansoun, úa kan iinaawu ngeni Jiowa masouen letipei. Úa kan áchchemasefáli ekkewe pwóróus mi apéchékkúl úa álleani lón Paipel me néúch kewe puk. Lape ngeni, úa kan ekieki masouen Kölfel 19:14. Úa mirititi pwe Jiowa a tongeni wiliiti “ai achau me ai chon amanau” iká úpwe ekilonei ekkewe mettóch mi apwapwaai letipan, áwewe chék ren met ekkewe a kan féfféri me napanapan kewe. Ewe lesen lón ewe Watchtower itelapan “You Are Never Alone” a a fókkun álilliséch ngeniei. Úa álleani fán chómmóng. Lón ekkewe fansoun úa áláemén, Jiowa a nóm rei, me a fókkun aúchea ekkena fansoun pún úa áeá le iótek, káé, me ekilon.

Ese ttam me mwirin ái wareiti Coron, úa kewis ngeni ewe wis mwán mi ásimaw. Pokiten ngang chék ú wiseni ena wis, iwe, úa poputá le emmweni ewe Sukulen Angangen Chón Kraist, ewe Service Meeting, ewe Puk Study, me ewe Káéén Leenien Mas iteiten wiik. Úa pwal wisen eáni public talk iteiten wiik. Pokiten úa busy, iwe ese wor atun ái úpwe meefi tipitipingaw!

Ái angangen afalafal lón Coron a mmen sópwéch me ekkóch me lein nei kewe chón káé ra papatais. Nge mi pwal wor ekkóch weires úa kúna. Fán ekkóch, úa kan fetál úkúúkún esopw rán ngeni ikewe úpwe afalafal ie, me úse silei ia úpwe méúr ie atun úpwe tikeri ena leeni. A wor chómmóng kúkkún fénú mi kapachelong lón kinikinin án ewe mwichefel leenien afalafal. Úa kan fiti mwoota ngeni ekkena fénú lón ngawen ásepwál inaamwo iká úse sile á! Lón meinisin ekkena fansoun mi áweires, Jiowa a túmúnúei me álisiei. Mwirin och fansoun, úa mirititi pwe Jiowa a ammólnaeitá ngeni ekkewe mettóch epwe fen kon áweires úpwe kúna lón ewe wis úpwe kewis ngeni mwirin.

Lón 1978, úa kewis ái úpwe ló álillis Papua New Guinea, ewe fénú mi nóm efengin Australia. Papua New Guinea, eú leeni mi chómmóng chukun. Úa ingeló atun úa silei pwe úkúúkún úlúngát million aramasen ena leeni ra fós lón lap seni 800 fósun fénúfan. Nge úa kilisou pwe lap ngeni ekkewe aramas ra tongeni fós lón Melanesian Pidgin, ewe mi iteni Tok Pisin.

Me akkomwan ra ereniei ái úpwe fiti ewe mwichefel mi eáni fósun Merika mi nóm wóón ewe iolap itan Port Moresby. Nge mwirin, úa mwékút ngeni eú mwichefel mi eáni fósun Tok Pisin, me úa fiti eú class fán iten ái úpwe káé ena fós. Úa áeá lón ewe angangen afalafal met úa káé lón ena sukul. Ina met a álisiei ái úpwe mwittir sile ena fós. Ese ttam me mwirin ena, nge úa tongeni eáni public talk lón Tok Pisin. Anchangei máirúúi pún esaamwo tori eú ier ái nóm Papua New Guinea, nge úa kewis ngeni ewe wis chónemmwen mi wisen sáifetál fán iten ekkewe mwichefel mi eáni fósun Tok Pisin lón chómmóng leeni mi fókkun watte.

Pokiten ekkewe mwichefel ra towaufesen, a lamot ái úpwe akkóta chómmóng circuit mwichelap me sái fán chómmóng. Me akkomwan, úa fókkun  tipitipingaw pokiten úse sissilei ewe leeni, ewe fós, me éérenien ewe leeni. Pokiten a chómmóng chukun ekkewe leeni me ese wor aler, ina popun úa chék fiti sepelin le sái ngeni ekkewe mwichefel. Arapakkan iteiten wiik, úa kan fiti sepelin. Fán ekkóch, ngang chék ewe pasisé wóón ewe kúkkún sepelin ese núkúnúkéch. Me rei, ái sái wóón sepelin a léllé ngeni eniwokkusun ái sái lemataw!

Ekkóch chék a wor néúr phone, ina popun úa kan chék mak taropwe ngeni ekkewe mwichefel. Fán chómmóng, úa akkomw wareiti ewe leeni mwen nei kewe taropwe, ina popun úa eisini aramasen ewe leeni ia ekkewe Chón Pwáraatá ra nóm ie. Iwe nge, iteiten ái tori chienach kewe ra fókkun kilisou me etiwaéchúei, me ina met a áchchema ngeniei popun ái fókkun achocho ái úpwe tikeriir. Úa kúna pwe Jiowa a álisiei lón chómmóng mettóch, me ái riri ngeni a péppéchékkúleló.

Lón ewe áeúin mwiich úa fiti lón ewe fénú itan Bougainville, eú pea pwúpwúlú ra fókkun emelimel, pwere ngeniei me eisiniei, “En mi chechchemenikem?” Úa chemeni pwe úa afalafal ngeni ei pean pwúpwúlú lón ewe atun úa kerán wareiti Port Moresby. Úa poputá le káé ngeniir mwirin úa ereni emén chienach lón ena leeni an epwe sópweeló. Nge iei iir me rúúemén ra papatais! Iei eú me lein ekkewe chómmóng feiéch a toriei lón ái nónnóm Papua New Guinea úkúúkún úlúngát ier.

Me mwen ái ló seni Coron lón 1978, úa sissilei emén chienach fefin itan Adel mi nie múrinné me tinikken. I emén regular pioneer me a pwal túmúnú néún kewe rúúemén iter Samuel me Shirley. Lón pwal ena atun, a pwal túttúmúnú inan we. Lón May 1981, úa liwiniti Philippines pwe áúpwele pwúpwúlú me Adel. Mwirin ám apwúpwúlú, áúa regular pioneer me álillisfengen le túmúnú ám famili.

Inaamwo iká a wor ái famili, nge lón ewe 1983, úa ketiwsefál ái úpwe special pioneer lón ewe fénú itan Linapacan, lón Palawan. Unusen ám we famili a mwékút ngeni ena leeni ikewe ese wor Chón Pwáraatá ie. Inen Adel we a sópwóló ina epwe eú ier mwirin. Iwe nge, áúa tinikken le fiti ewe angangen afalafal, me ina met a álisikem le likiitú ngeni ám letipechou. Áúa káé ngeni chómmóng chón káé mi feffeitá lón Linapacan ina popun a lamot ngenikem eú kúkkún Leenien Mwiich. Iwe, áúa pwisin aúetá eú. Mwirin chék úlúngát ierin ám tori Linapacan, áúa pwapwa le kúna 110 aramas mi fiti ewe Áchechchem, me chómmóng me leir ra papatais mwirin ám áúa ló seni ikena.

Lón 1986, úa ketiw le ló álillis Culion, eú fénú ekkewe aramas mi úriir keinepan ra kan nóm ie. Fitu ier mwirin, Adel a pwal ketiw an epwe emén special pioneer. Me lepoputáán, áúa niwokkus le afalafal ngeni ekkewe aramas mi úriir keinepan. Nge chienach kewe lón ena leeni, ra anúkúnúkú ngenikem pwe ekkewe aramas mi úriir ena semmwen ra fen sáfei me saminne epwe mwittir úrikem. Ekkóch me lein ekkena aramas ra kan fiffiti mwiich lón imwen emén chienach fefin. Mwirin chék ekis fansoun, áúa kinamwe le afalafal me fókkun pwapwa le afalafala ach we ápilúkúlúk ngeni ekkena sókkun aramas mi meefi pwe Kot me ekkewe aramas ra oputer. A mmen apwapwa ám kúna pwapwaan ekkena sókkun aramas mi fókkun semmwen  atun ra silei pwe lón eú ekkeei rán repwe inisini eú inis mi unuséch.—Luk 5:​12, 13.

Ifa ussun néúm kewe ra éérenaaló ewe manaw lón Culion? Ám me Adel áúa etiwa rúúemén chienach fépwúl seni Coron ar repwe fitikem pwe epwe wor chienen néúm kewe mi múrinné. Samuel, Shirley, me ekkena rúúemén fépwúl ra angangéchúló lón ar angangen afalafal. Ra káé ngeni chómmóng semirit atun ám me Adel áúa káé ngeni semen me inen ekkena semirit. Ren enletin, a wor eú atun áúa káé ngeni 11 famili. Ekiseló mwirin, pokiten áúa káé ngeni chómmóng chón káé mi feffeitá, iwe a fférútá eú mwichefel!

Me akkomwan, ngang chék ewe mwán mi ásimaw lón ena leeni. Ina popun, ewe keangen ofesilap a ereniei ái úpwe féri ekkewe mwiich iteiten wiik fán iten ekkewe wanimén chón afalafal lón Culion, mwirin úpwe pwal féri fán iten ekkewe tiwemén chón afalafal lón ewe sóópw itan Marily, towauen ach sipwe sái ngeni wóón mwoota úkúúkún úlúngát awa. Sárin ekkewe mwiich ikena ie, ngang me ái we famili áúa fetál fite fite awa wóón ekkewe chukuchukutá pwe áúpwe káé ngeni ekkewe chón káé lón ewe sóópw itan Halsey.

Ekiseló mwirin, chómmóng aramas lón Marily me Halsey ra fiti ewe enlet ina popun áúa kaú Leenien Mwiich lón ekkena leeni. Pwiich kewe me ekkewe aramas mi mochen káé lón ekkena leeni ra pwal ussun chón Linapacan, iir ra awora lape ngeni ekkewe pisek me féri lape ngeni ekkewe angang lón ewe angangen kaú. Iwe, 200 aramas ra tongeni kuch lón ewe Leenien Mwiich lón Marily me a pwal tongeni káwáteeló, ina popun áúa tongeni áeá fán iten mwichelap.

Lón 1993 atun néúm kewe ra watte, ám me Adel áúa poputá le fiti ewe angangen sáifetál lón Philippines. Mwirin lón ewe 2000, úa fiti ewe Ministerial Training School ái úpwe train pwe úpwele wisen senseen ena sukul. Úa meefi pwe úa lipwákingaw ngeni ena angang, nge Adel a kan soun apéchékkúla letipei. A áchchema ngeniei pwe Jiowa epwe fang ngeniei ewe péchékkúl pwe úpwe tongeni féri ei mineféén angang. (Fil. 4:13) Adel a apasa ena  pokiten a fen pwisin kúna lón manawan ren an tufichin apwénúetá an we angang inaamwo iká a wor an semmwen.

Lón 2006 atun ái senseen ena asukul, a úri Adel ewe semmwen itan Parkinson. Áúa fókkun máirú! Lupwen úa ereni Adel ám áúpwele úkútiw seni ám we angang, i a ereniei, “Kese mochen kopwe kútta emén tokter epwe tongeni álisiei, me úa silei pwe Jiowa epwe álisikich le sópweeló ach angang.” Lón ekkewe wonu ier mwirin, Adel a sópweeló an angang ngeni Jiowa me esap fán eú epwe ngúnúngúnúngaw. Atun ese chúen tongeni fetál, a chék wawa wheelchair le afalafal. Lupwen a weires ngeni an epwe fós, a kan chék apasa eú are ruu kapas lón an uwawu meefian lón mwiich. Tori an a máló lón ewe 2013, chómmóng chienach kewe ra kan text ngeni me ereni ar kilisou ren an leenien áppirú mi múrinné ren an likiitú. Ren lap seni 30 ier áúa nómfengen me Adel, pwúlúwei we mi túppwél me tong, nge atun a máló, iwe úa pwal meefisefál letipechou me tipitipingaw.

Adel a mochen ái úpwe sópweeló ái we angang, iwe, ina met úa féri. A chómmóng met úa kan féfféri, ina met a álisiei le likiitú ngeni ái tipitipingaw. Seni 2014 ngeni 2017, úa kewis ái úpwe ló chuuri ekkewe mwichefel mi eáni fósun Tagalog lón ekkewe fénú mi pinepin ach angang ie. Mwirin ena, úa ló chuuri ekkewe mwichefel mi eáni fósun Tagalog lón Taiwan, Merika, me Canada. Lón 2019, úa wisen senseen ewe Sukulen Chón Afalafala ewe Mwú mi fis lón fósun Merika lón India me Thailand. Úa fókkun pwapwa lón meinisin ekkena angang úa féri. A kon lap ái pwapwa atun úa unusen nefótófót wóón ái féri án Jiowa angang.

Lón eú me eú ekkewe angang mi kewis ngeniei, a mááritá ái tongei chienach kewe úa kerán chuuriir, ina popun a weires ái úpwe káimu seniir. Lón ekkena atun, úa unusen lúkúlúk wóón Jiowa. Iteitan úa kúna an álisiei, me ina met a álisiei ái úpwe tipemecheres le etiwa ese lifilifil sókkun siwil mi fis lón manawei. Lón ei fansoun, úa special pioneer lón Philippines. Úa kinamwe lón ái ei minefé mwichefel, a wiliiti eú ái famili mi álilliséch ngeniei me tongeei. Úa pwal pwapwa le kúna pwe Samuel me Shirley ra áppirú iner we lón ar angang ngeni Kot.—3 Jon 4.

Ewer, a toriei chómmóng weires lón manawei, kapachelong ái kúna riáfféún me málóón pwúlúwei we mi áchengicheng ren eú semmwen mi áweires. A pwal lamot ái úpwe éérenaaló chómmóng nónnómun manawei. Iwe nge, úa kúna pwe Jiowa “ese towaw seni emén me emén leich.” (Féf. 17:27) Péún Jiowa ese “mochomoch” le álisi me apéchékkúla néún kewe chón angang, pwal mwo nge lón ekkewe leeni mi towaw. (Ais. 59:1) Jiowa, i ái Achaw, a nónnóm rei lón unusen manawei, me úa fókkun kilisou ngeni. Úse fókkun áláemén.