Mary me pwúlúwan we itan John, a ra nóm lón eú leeni ikewe ra tongeni afalafala ewe kapas allim ngeni chómmóng chón angang seni Philippines. Atun ewe COVID-19 pandemic, a sópwéch án Mary poputá káé ngeni aramas esap chék ikewe a kan nónnóm ie, nge pwal ngeni aramasen ekkewe ekkóch leeni wóón fénúfan. Ifa ussun a féri ena?

Mary a kan eisini néún kewe chón káé, “Ka sissilei emén epwe mochen káé ewe Paipel?” Iká ra erá ewer, iwe a kan tingorer iká ra tongeni álisi le pwóróus ngeni. Lape ngeni a kan sópwéch an eáni ena esin kapas eis mi mecheres. Pwata? Pún chókkewe mi aúcheani án Kot Kapas, ra kan mochen apwóróusa ngeni chón ar kewe famili me chiechier kewe met ra kákkáé. Met mwirilóón an eáni ena esin kapas eis mi chék mecheres?

Néún Mary we chón káé itan Jasmin a álisi Mary an epwe pwóróus ngeni fémén aramas mi pwal mochen káé ewe Paipel. Emén me leir itan Kristine, i a fókkun sani an káé ina popun a ereni Mary an epwe káé ngeni fán ruu iteiten wiik. Lupwen Mary a eisini Kristine iká a sissilei emén mi pwal mochen káé ewe Paipel, iwe a erá, “Ewer, úpwe álisuk óm kopwe pwal fós ngeni chiechiei kewe.” Mwirin chék fitu wiik, Kristine a álisi Mary an epwe fós ngeni fémén chiechian mi mochen káé Paipel. Ló, ló, ló, Kristine a pwal álisi an epwe fós ngeni chienan kewe pwal ekkóch, me chókkana ra pwal álisi Mary an epwe pwal fós ngeni pwal ekkóch chiechier.

Kristine a pwal mochen án chón an we famili lón Philippines repwe káé ewe Paipel. Ina minne, a fós ngeni néún we nengngin itan Andrea. Me akkomwan, Andrea a ekieki, ‘Ekkewe Chón Pwáraatá iir och sókkun lamalam, rese lúkú Jises, me ra chék néúnéú ewe Testament Lóóm.’ Nge mwirin chék an we áeúin káé, a mirititi pwe mi mwáál met a eáni ekiek ussun Chón Pwáraatá. Iwe, iteiten an káé och mineféén pwóróus seni Paipel, a kan erá, “Iká ina met Paipel a apasa, iwe mi pwúng!”

Mwirin och fansoun, Andrea a ereni Mary ussun rúúemén chienan me emén chienan chón angang, iwe ra poputá le káé. A pwal wor emén fefin itan Angela, i tettelin inen Andrea. I mi chuun nge a kan aúseling atun Mary a káé ngeni Andrea, nge Mary ese silei ussun. Iwe eú rán, Angela a ereni Andrea an epwe tingorei Mary an epwe pwal káé ngeni. Angela a fókkun sani met a káé, iwe lón chék úkúúkún eú maram a fen akkamwéchú chómmóng wokisin, me a mochen  káé fán rúáánú lón eú wiik! Ren án Andrea álillis, Angela a poputá le fiffiti mwiich iteitan ren an aúseling wóón Internet.

Atun Mary a silei pwe pwúlúwen Kristine we itan Joshua a kan pwal akkaúseling ngeni ar káé, Mary a eisini iká a mochen fitiir. Joshua a erá, “Úa chék mochen aúseling, nge kosap pwal kapas eis ngeniei. Iká kopwe kapas eis ngeniei, iwe úpwe sú.” Iwe, ren úkúúkún nimu minich ar káé, i a fen wisen kakkapas eis ngeni Mary lap seni Kristine, me a mochen epwele pwal káé Paipel.

Án Mary we kapas eis mi mecheres a efisi chómmóngólóón néún chón káé. Mary a poputá le káé ngeni 28 aramas lón rúáánú sókkun fénú. Iwe, a akkóta án chienan kewe Chón Pwáraatá repwe káé ngeni ekkóch me leir.

Jasmin, ewe mi akkomw káé ren Mary, a papatais lón ewe April 2021. Kristine a papatais lón ewe May 2022 me a liwiniti an we famili lón Philippines. Ekkewe pwal rúúemén chón káé Kristine a fós ngeni Mary ussur, ra pwal papatais. Angela a papatais fitu maram mwirin, me iei a wiliiti emén regular pioneer. Pwúlúwen Kristine we itan Joshua me néúr we nengngin itan Andrea, me pwal ekkewe ekkóch chón káé, ra pwal feffeitá.

Lón fansoun ekkewe aposel, a fókkun mwittir chéúlóón ewe kapas allim lefilen famili me chiechi. (Jon 1:​41, 42a; Féf. 10:​24, 27, 48; 16:​25-33) Kopwe eisini noum kewe chón káé me ekkewe pwal ekkóch mi mochen káé, “Ka sissilei emén epwe mochen káé ewe Paipel?” Iká ka eáni ena esin kapas eis mi mecheres, iwe eli kopwe pwal kúna chómmóng mi mochen káé ewe Paipel.