KA ESILLA pwe chómmóng aramas lón ei ótót ra meefi pwe a fich ngeniir án aramas repwe eáni féffér mi kkóló ngeniir? Inaamwo iká aramas ra fen eáni féffér mi kkóló ngeniir nge rese menemenéch. Chókkewe mi eáni ena esin ekiek, ra achéchééi pwisin iir me rese sile kilisou ren met mi wor rer. Paipel a erá pwe aramas repwe ina ussun lón ekkeei ránin lesópwólóón.—2 Tim. 3:2.

Ewer, án aramas achéchééi pwisin iir, esap ina eú féffér e kerán pwá. Atam me If ra pwisin filaatá met mi éch me ngaw me rer, me ra pwúnúngaw ngenikich meinisin. Pwóróusen ewe kingen Juta itan Usaia, pwal ina eú lesen fán itach. A ekieki pwe a mumu ngeni an epwe eáni asor appach mi pwokkus lón ewe imwenfel, nge a fókkun mwáál an epwe féri ena. (2 Kron. 26:​18, 19) Pwal ina ussun ren ekkewe Farisi me Satusi iir mi lúkú pwe a fich an epwe kkóló án Kot féffér ngeniir pokiten chék iir mwirimwirin Eperiam.—Mat. 3:9.

Sia nóm lein aramas mi achéchééi pwisin iir me lamalamtekia, iwe sia tongeni tipetipeló ren ar ekiek. (Kal. 5:26) Eli sia tongeni poputá le ekieki pwe a fich ngenikich ach sipwe wiseni eú sókkun wis, are án aramas repwe eáni féffér mi kkóló ngenikich. Ifa ussun sia tongeni túmúnúkich seni ena esin ekiek? A lamot ach sipwe weweiti ekiekin Jiowa wóón ena mettóch. Ikkeei ruu án Paipel kapasen emmwen repwe álisikich.

Jiowa a wisen filaatá met a fich ach sipwe angei. Áwewe chék ren ekkeei mettóch.

• Lón famili, ewe mwán epwe meefi ésúfélún seni pwúlúwan we, nge ewe fefin epwe meefi tongan seni pwúlúwan we. (Efi. 5:33) A lamot án ekkewe pwúpwúlú repwe pwárfengeni ekkewe féfférún tong mi fich lefiler chék. (1 Kor. 7:3) A  pwal fich ngeni ekkewe sam me in án néúr kewe repwe álleasochisiir, me a pwal fich ngeni ekkewe naw án semer kewe me iner repwe túmúnúúr me tongeer.—2 Kor. 12:14; Efi. 6:2.

• Lón ewe mwichefel, a fich ach sipwe asamolu ekkewe mwán mi ásimaw mi angang weires. (1 Tes. 5:12) Iwe nge ese wor ar pwúúng le nemeni met chiener kewe Chón Kraist ra féri.—1 Pit. 5:​2, 3.

• Kot a ngeni ekkewe néúwisin mwú ar pwúúng le angei takises me án néúr kewe aramas repwe súfélitiir.—Rom 13:​1, 6, 7.

Fán tong, Jiowa a fang ngenikich lap seni met a fich ngenikich. Pokiten kich aramas tipis, iwe a chék fich ngenikich ach sipwe máló. (Rom 6:23) Iwe nge, Jiowa a fang ngenikich chómmóng feiéch ren an tong enlet. (Kölf. 103:​10, 11) Iteiten feiéch are wis sia angei me ren, a fis pokiten an kirekiréch mi somwoló.—Rom 12:​6-8; Efi. 2:8.

Túmúnúkich seni ekiekin chón fénúfan. Eli sipwe poputá le ekieki pwe a fich ngenikich an epwe torikich feiéch lap seni ekkewe ekkóch, nge sise tepereni. Lón eú atun, Jises a apwóróusa eú pwóróus mi pwáári pwe a tongeni mecheres ach sipwe eáni ena esin ekiek. A fós ussun ekkóch chón angang mi tipeeú ngeni ar repwe angang unusen rán fán iten eféú denarius. Mwirin, ewe masta a atolonga pwal ekkóch chón angang. Iwe lekuniol, a ngeni meinisin ekkena chón angang eféú denarius pwal mwo nge chókkewe mi chék angang ren eú awa. Iwe, chókkewe mi angang seni lesossor ra ekieki pwe itá úrúrún epwe watte liwiniir lap seni ekkewe ekkóch pwe ra angang unusen rán fán akkar. (Mat. 20:​1-16) Lón ei kapas áwewe, Jises a áiti ngeni néún kewe chón káé lamoten ar repwe menemenéch ren met Kot a pwapwa le fang ngeniir.

Kopwe chék kilisou nge kosap ekieki pwe ekkewe ekkóch repwe faffang ngonuk mettóch. (1 Tes. 5:18) Kopwe áppirú ewe aposel Paul, ese menei seni chienan kewe Chón Kraist lón Korint ar repwe wisen awora met a osupwangan, inaamwo iká a wor an pwúúng an epwe féri ena. (1 Kor. 9:​11-14) A lamot ach sipwe kilisou ren meinisin ekkewe feiéch sia angei me  sipwe túmúnú pwe site ekieki pwe ekkewe ekkóch repwe chék faffang ngenikich.

Ámááraatá tipetekison. Atun emén a ekieki pwe a kon aúchea, iwe lape ngeni epwe poputá le meefi pwe a fich an epwe angei met mi lap seni minne a fich ngeni. Tipetekison a álisi an esap fókkun eáni ena esin ekiek mi efeiengaw.

Ewe soufós Taniel a isettiw leenien áppirú mi múrinné ussun tipetekison. I a feito seni eú famili mi iteféúló. I a mesemeséch, tipáchem, me a sipeéch lón chómmóng mettóch. Ina pwata a tongeni meefi pwe a fich ngeni án aramas repwe eáni féffér mi kkóló ngeni me a fich ngeni ekkewe wis. (Tan. 1:​3, 4, 19, 20) Iwe nge, Taniel a chék tipetekison, ina minne Jiowa a aúcheani ren ena napanap.—Tan. 2:30; 10:​11, 12.

Sipwe fókkun ttiisenikich ekiekin lamalamtekia me achéchééi pwisinkich, ekkewe napanap mi chéúfetál lón ei fansoun. Sipwe fen sópweeló le meefi pwapwa lón iteiten sókkun feiéch Jiowa a fang ngenikich ren an kirekiréch mi somwoló.