1-2. (a) Pwata a lamot ekkewe pwúpwúlúfé repwe lúkúlúk wóón Jiowa? (Kölfel 37:3, 4) (b) Met sipwele káé lón ei lesen?

KOPWELE pwúpwúlú, are ka kerán pwúpwúlú? Ika ina, ese mwáál ka mwétéresiti ámi oupwe nónnómfengen me ewe emén ka fókkun tongei. Ewer, a kan pwal wor osukosuk lón pwúpwúlú, me a wor ekkewe kefil mi aúchea oupwe féri. Minne kopwe féri atun a ppiitá osukosuk me lón óm kewe kefil epwe kkúú ámi pwapwa me pwúlúwom we ren fite fite ier. Ika ka lúkúlúk wóón Jiowa, kopwe féri kefil mi múrinné, óm ririin pwúpwúlú epwe péchékkúleló, me kopwe pwapwa. Nge ika ka tunaló án Jiowa emmwen, epwe ppiitá osukosuk mi tongeni áweiresi óm pwúpwúlú, iwe ousap pwapwa.​—Álleani Kölfel 37:3, 4.

² Inaamwo ika ei lesen a ákkáeúin weneiti ekkewe pwúpwúlúfé, nge epwe fós usun ekkewe osukosuk a tongeni fis ngeni meinisin pwúpwúlú. Epwe menlapei met sia tongeni káé seni pwóróusen ekkewe mwán me fefin mi tuppwél mi mak lón Paipel. Ekkena pwóróus ra áiti ngenikich ekkewe lesen sia tongeni apwénúetá lón manawach, kapachelong lón ach pwúpwúlú. Sipwe pwal ppii met sia tongeni káé seni pwóróusen ekkóch pwúpwúlú lón ach ei fansoun.

3-4. Met sókkun etipetip are sóssót a tongeni tori ekkewe pwúpwúlúfé?

³ Ekkóch aramas neman repwe pesei ngeni ekkewe pwúpwúlúfé ar repwe manaweni ewe esin manaw lape ngeni aramas  ra eáni lón ei fansoun. Áwewe chék, ekkewe sam me in are pwal ekkóch aramaser kewe neman repwe peppeseer ar repwe néúnéú. Are, neman chiechier me chón ar famili repwe peseer ar repwe kamé imwer me amasoua ren pisekin lón imw mi múrinné.

⁴ Ika eú pean pwúpwúlú rese túmúnúéch, neman ra tongeni féri ekkewe kefil epwe atolonger lón watteen liwinimmang. Iwe, neman iir me rúúemén repwe angang fite fite awa pwe repwe tongeni omusa ar kana liwinimmang. Angangen moni a tongeni angealó ewe fansoun itá repwe áeá fán iten ar pwisin káéén Paipel, ar famili fel, me ar fiti angangen afalafal. Neman repwe pwal mwo nge etiwaaló mwich pokiten ar angangoló pwe epwe watteeló liwiniir are angangoló pwe resap katowu seni ar angang. Ika ra ina usun, iwe resap tufichin féri ekkewe angang mi fókkun aúchea lón án Jiowa we mwicheich.

5. Met ka tongeni káé seni pwóróusen Klaus me Marisa?

⁵ A wor chómmóng pwóróus mi ánnetatá pwe ach nefótófót wóón ach alapaaló wéúch, esap atoto ngenikich pwapwa. Ekieki met a fis ngeni Klaus me Marisa. * Lepoputáán ar pwúpwúlú, iir me rúúemén ra angang full-time pwe repwe tongeni eáni ewe manaw mi kinamwe. Iwe nge, rese wesewesen pwapwa. Iei met Klaus a apasa: “A watte wéúm lón pekin aion, nge lón pekin lúkú, ese wor met aua achocho ngeni. Ren enletin, manawem a áweires me uren aúrek.” Ese mwáál, ka pwal kúna pwe óm nefótófót wóón óm alapaaló wéum lón pekin aion, ese atoto ngonuk pwapwa. Ika ina, kosap letipengaw. Óm ekieki ekkeei leenien áppirú mi múrinné, a tongeni álisuk le féri ekkesiwil. Iei sipwele ppii met ekkewe mwán mi pwúpwúlú ra tongeni káé seni án King Jehosafat leenien áppirú.

6. Ifa usun Jehosafat a apwénúetá ewe emmwen lón Än Salomon Fos 3:5, 6, atun eú watteen mwichen soufiu ra etto maun ngeni me néún aramas?

⁶ Ámi mwán mi pwúpwúlú, fán ekkóch oua meefi pwe a kon chou wisemi kewe? Ika ina, oua tongeni kúna álillis seni pwóróusen King Jehosafat. Pokiten i emén king, i a mesemes wóón túmúnún unusen aramasen mwúún we. Ifa usun a apwénúetá ena wis mi chou? Jehosafat a achocho le féri met a tongeni féri pwe epwe túmúnú chókkana mi nóm fán túmúnúan. A apéchékkúla tittin ekkewe telinimwen Juta me emwichafengeni eú mwichen soufiu mi péchékkúl iir lap seni 1,160,000. (2 Kron. 17:12-19) Lo, lo, lo, a tori Jehosafat eú watteen osukosuk. Eú watteen mwichen soufiu iir chón Amon, Moap, me ekkewe mwán seni ewe leeni lón Seir mi chukuchukutá ra etto maun ngeni me néún aramas. (2 Kron. 20:1, 2) Met Jehosafat a féri? A tingorei Jiowa an epwe álisi me apéchékkúla. Minne a féri a tipeeú ngeni ewe kapasen emmwen lón Än Salomon Fos 3:5, 6. (Álleani.)  Án Jehosafat ei iótek mi mak lón 2 Kronika 20:5-12, a pwári pwe a fókkun lúkúlúk wóón Seman we mi tong lón láng. Ifa usun Jiowa a pélúweni án Jehosafat ei iótek?

7. Ifa usun Jiowa a pélúweni án Jehosafat iótek?

⁷ Jiowa a néúnéú emén re Lefi itan Jaasiel le fós ngeni Jehosafat. Iei met Jiowa a apasa: “Oupwe atettelikemi o ükütä chök. Oupwe nengeni usun än ewe Samol mi Lapalap awinnakemi.” (2 Kron. 20:13-17) Ren enletin esap ina napanapen eú maunfengen! Iwe nge, ekkena kapasen emmwen rese pop seni emén aramas, ra feito seni Jiowa. Pokiten Jehosafat a unusen lúkúlúk wóón Kot, i a apwénúetá ena kapasen emmwen. Atun i me néún kewe aramas ra ló ngeni chón koputer kewe, i a onómu mwer ekkewe soukél rese uwou pisekin maun, nge esap fen soufiu mi sipeéch. Jiowa a apwénúetá an pwon ngeni Jehosafat. I a okkufu chón koputer kewe.​—2 Kron. 20:18-23.

8. Met ekkewe mwán mi pwúpwúlú ra tongeni káé seni án Jehosafat leenien áppirú?

⁸ Ámi kana mwán mi pwúpwúlú, oua tongeni káé seni án Jehosafat leenien áppirú. Wisemi ámi oupwe ekieki túmúnún ámi famili, ina minne oua angang weires pwe oupwe túmúnúúr me atufichiir. Lupwen a wor ámi osukosuk, neman oua meefi pwe oua tongeni pwisin pwákini. Iwe nge, ousap lúkúlúkú pwisin péchékkúlemi. Oupwe fen imuló me iótek ngeni Jiowa me tingor an álillis. Pwal och, eti pwúlúwemi kewe le iótek seni enletin letipemi. Kútta emmwen seni Jiowa ren ámi káé ewe Paipel me néúch kewe puk mi kawor seni án Kot mwicheich, me apwénúetá minne oua káé. Ese mwáál ekkóch resap tipeeú ngeni ekkewe kefil oua féri mi lóngólóng wóón áitien Paipel, me neman repwe pwal mwo nge erenuk pwe en mi umwes. Neman repwe erá pwe moni me pisek ra tongeni fókkun túmúnú óm famili. Nge chechchemeni án Jehosafat leenien áppirú. I a lúkúlúk wóón Jiowa me a leteló lón féfférún. Jiowa ese likitaló ena mwán mi tuppwél, iwe i esap pwal likitukoló. (Kölf. 37:28; Ipru 13:5) Met ekkewe mi pwúpwúlú ra pwal tongeni féri pwe repwe fókkun pwapwa lón manawer?

9. Met sia tongeni apasa usun Aisea me pwúlúwan we?

⁹ Ewe soufós Aisea me pwúlúwan we ra akkomwa lón manawer ar angang ngeni Jiowa. Aisea i emén soufós me neman pwúlúwan we a pwal eáni angangen emén soufós pwe Paipel a kér ngeni, soufós fefin. (Ais. 8:1-4, NW) A ffat pwe iir me rúúemén, Aisea me pwúlúwen we, ra nefótófót wóón ar fel ngeni Jiowa. A ifa me múrinnéén ei leenien áppirú ra isetiw fán iten ekkewe pean pwúpwúlú lón ei fansoun!

10. Pwata án ekkewe pean pwúpwúlú káé ekkewe oesini lón Paipel a tongeni álisiir le angang ngeni Jiowa úkúkún ar tufich?

¹⁰ Lón ei fansoun ekkewe pean pwúpwúlú ra tongeni áppirú Aisea me pwúlúwan we le féri úkúkún met ra tongeni féri lón án Jiowa angang. Ra tongeni apéchékkúla ar lúkúlúk wóón Jiowa ren ar káé ekkewe oesini lón Paipel me ppii ifa usun ra pwénúetá fansoun meinisin. * (Tit. 1:2) Ra tongeni ekieki met repwe féri pwe repwe álisatá pwénúetáán ekkewe pwal ekkóch oesini lón Paipel. Áwewe chék, ra tongeni álillis lón pwénúetáán án Jesus we oesini usun esilefeilin ewe kapas allim wóón unusen fénúfan mwen warotoon ewe sópwólóón. (Mat. 24:14) Lapólóón án eú  pean pwúpwúlú lúkúlúk wóón pwénúetáán ekkewe oesini lón Paipel, pwal ina lapólóón ar repwe mochen angang ngeni Jiowa úkúkún ar tufich.

11. Met Prisila me Akwila ra tongeni féri, me pwata?

¹¹ Ekkewe pwúpwúlú alúwél me fépwúl, ra tongeni káé seni Prisila me Akwila, eú pean pwúpwúlú chón Jus mi nóm lón Rom. Ra rong ewe kapas allim usun Jesus me ra wiliti Chón Kraist. Ese mwáál, ra menemenéch ren nónnómun manawer. Iwe nge, a siwil atun ewe sounemenemen Rom itan Klautius a allúk pwe meinisin chón Jus repwe towu seni Rom. Ekieki met a fis ngeni Akwila me Prisila. Ra ló seni leenier we ra fen eérenaaló, kútta eú mineféén leenier, me férsefáli leenien ar we business fán iten fférún tento. Áweiresin nónnómur a itá aúkúreló lón ar angang ngeni Jiowa? Ese mwáál ka silei pélúwen ena kapas eis. Lón leenier we minefé lón Korint, Akwila me Prisila ra fiti ewe mwichefel ikena ie me fiti aposel Paulus le apéchékkúla pwiir kewe Chón Kraist. Mwirin, ra mwékút ngeni pwal eú leeni ikewe mi osupwangen chón afalafal ie. (Föf. 18:18-21; Rom 16:3-5) A ifa me múrinnéén me feiéchún ei manaw ra pwapwaiti lón ar angangfengen!

12. Pwata a lamot án eú pean pwúpwúlú repwe isetiw minne repwe achocho ngeni lón pekin lúkú?

¹² Ekkewe pean pwúpwúlú lón ei fansoun ra tongeni áppirú Prisila me Akwila ren ar akkomwa án Kot we Mwú lón manawer. Me mwen án rúúemén repwe pwúpwúlú, ina ewe atun a mmen múrinné ar repwe fósfengen wóón met repwe achocho ngeni lón manawer. Lupwen ekkewe rúúemén ra isetiw met repwe achocho ngeni lón ar angang ngeni Jiowa me angangfengen le tikeriir, epwe chómmóngoló alen ar repwe kúna ifa usun án Jiowa we ngún mi fel a álisiir. (SalAf. 4:9, 12) Ekieki pwóróusen Russell me Elizabeth. Iei met Russell a erá, “Me mwen ám aupwe pwúpwúlú, aua tichiki le pwóróusfengen wóón met aupwe achocho ngeni lón pekin lúkú.” Elizabeth a apasa, “Aua pwóppwóróusfengen wóón ena pwe atun aupwe féri kefil mwirin, minne aua filatá esap eppeti ám aupwe tikeri  ekkena mettóch aua achocho ngeni lón pekin lúkú.” Nónnómun manawen Russell me Elizabeth a atufichiir ar repwe mwékút ngeni Micronesia me álillis ikewe mi osupwangen chón afalafal ie.

13. Me ren Kölfel 28:7, met epwe fis ngenikich ika sia lúkúlúk wóón Jiowa?

¹³ Chómmóng pean pwúpwúlú ra usun chék Russell me Elizabeth le filatá ar repwe ámecheresi nónnómun manawer pwe repwe tongeni áeá watteen ar fansoun lón ewe angangen afalafala ewe kapas allim. Lupwen eú pean pwúpwúlú ra isetiw mwer minne repwe achocho ngeni lón ar angang ngeni Jiowa me angangfengen le tikeriir, iwe repwe kúna watteen feiéch. Repwe kúna ifa usun Jiowa a túttúmúnúúr, epwe lapóló ar lúkúlúk wóón i, me repwe meefi pwapwa mi enlet.​—Álleani Kölfel 28:7.

14. Ifa usun aposel Petrus me pwúlúwan we ra pwári ar lúkúlúk wóón ewe pwon mi mak lón Mateus 6:25, 31-34?

¹⁴ Ekkewe pwúpwúlú ra pwal tongeni káé seni án aposel Petrus me pwúlúwan we leenien áppirú. Ina epwe mwirin wonu maram ngeni eú ier seni ewe áeúin atun Petrus a kerán chúri Jesus, a lamot epwe féri eú kefil mi kkóló lamotan. Tufichin Petrus me an famili a lóngólóng wóón an angangen attaw. Iwe atun Jesus a etiwa le tapweló mwirin me áeá unusen an fansoun fán itan, i a ekieki pwúlúwan we me mwen an epwe filatá minne epwe féri. (Luk. 5:1-11) Petrus a filatá le fiti Jesus lón an angangen afalafal. A fókkun múrinné met a filatá! Sia lúkú pwe pwúlúwen Petrus we a álisatá an na kefil. Ewe Paipel a erá pwe mwirin án Jesus manawsefál, neminna a fiti Petrus fán ekkóch lón an sáifetál. (1 Kor. 9:5) Ese mwáál, pokiten i emén fefin mi pwúpwúlú mi múrinné, ese wor pinepinen án Petrus epwe fénéú ekkewe Chón Kraist mwán me fefin mi pwúpwúlú. (1 Pet. 3:1-7) A ffat pwe Petrus me pwúlúwan we ra lúkúlúk wóón án Jiowa we pwon pwe i epwe awora minne ra osupwangan ika repwe akkomwa an we Mwú lón manawer.​—Álleani Mateus 6:25, 31-34.

15. Met ka káé seni pwóróusen Tiago me Esther?

¹⁵ Ika ka fen pwúpwúlú ren fite ier iei, ifa usun kopwe ákkámááraatá óm mochen alapaaló óm angang ngeni Jiowa? Eú mettóch a tongeni álisuk, ina óm álleani ekkóch pwóróus usun ekkewe pean pwúpwúlú. Áwewe chék, ka tongeni kúna ekkena esin pwóróus mi apéchékkúl me lón néúch kewe puk. Ekkena esin pwóróus a álisi eú pean pwúpwúlú seni Brazil iter Tiago me Esther le alapaaló ar mochen álillis ikewe mi osupwangen chón afalafal ie. Tiago a erá: “Atun aua álleani ekkewe pwóróus usun án Jiowa álisi néún kewe chón angang lón ei fansoun, aua pwal mochen meefi án Jiowa túmún me nóm fán an emmwen.” Mwirin och fansoun ra mwékút ngeni Paraguay, ikewe ra álisi ekkewe chón Portugal seni ewe ier 2014. Esther a apasa: “Eú wokisin ám me rúúemén aua fókkun efich ina Efisos 3:20. Fán chómmóng aua kúna pwénútáán ekkena kapas lón ám angang ngeni Jiowa.” Lón néún Paulus na taropwe ngeni ekkewe chón Efisos, i a pwon pwe Jiowa epwe awora met mi lap seni minne sia tingor. A ifa me pwúngún ena pwon!

16. Atun ekkewe pwúpwúlú alúwél me fépwúl ra ekieki usun minne repwe achocho ngeni lón pekin lúkú, ié ra tongeni kútta emmwen seni?

¹⁶ Ekkewe pwúpwúlú alúwél me fépwúl lón ei fansoun, ra tongeni káé seni pwóróusen chókkewe ra fen lúkúlúk wóón Jiowa. Ekkóch pwúpwúlú ra fen fiti ewe angangen  afalafal full-time ren fite fite ier. Pwata kese kútta emmwen seniir ika ka ekieki usun minne ka mochen achocho ngeni lón pekin lúkú? Iei pwal eú alen óm pwáraatá pwe ka lúkúlúk wóón Jiowa. (SalF. 22:17, 19) Ekkewe mwán mi ásimaw ra pwal tongeni álisi ekkewe pwúpwúlú alúwél me fépwúl ar repwe isetiw mwer met repwe achocho ngeni lón pekin lúkú me álisiir le tikeri.

17. Met a fis ngeni Klaus me Marisa, me met sa káé seni pwóróuseer?

¹⁷ Fán ekkóch, neman met ewe sia mochen féri lón ach alapaaló ach angang ngeni Jiowa, esap ina ewe a pwénútá. Ekieki met a fis ngeni Klaus me Marisa, ekkewe sia fen pwóróus usur. Úlúngát ier mwirin ar pwúpwúlú, ra ló seni leenier we pwe repwe álillis lón ewe angangen kaú lón ewe keangen ofesilap Finland. Iwe nge, ra silei pwe ese mumu ngeniir ar repwe nóm ikkena ie lap seni wonu maram. Akkomwan ra meefi lichippúng. Nge mwirin ena, ra ketiw ar repwe fiti ewe sukul fán iten fósun Arabic, me iei ra pwapwa le afalafal lón pwal eú fénú ngeni chókkewe mi eáni fósun Arabic. Lupwen Marisa a ekieki minne a fis, iei met a apasa: “Ua niwokkus le féri och mettóch use fen féfféri me mwan me a lamot ai upwe unusen lúkúlúk wóón Jiowa. Nge ua kúna pwe fán chómmóng Jiowa a álisikem lón napanap ause fen tepereni. Mwirin met a fis ngenikem, ai lúkúlúk wóón Jiowa a péchékkúleló.” Minne sia kúna seni ei pwóróus, a affata pwe Jiowa epwe efeiéchuk ika ka unusen lúkúlúk wóón i.

18. Met ekkewe pean pwúpwúlú ra tongeni féri pwe repwe lúkúlúk wóón Jiowa fansoun meinisin?

¹⁸ Ewe mettóch pwúpwúlú, ina eú liffang me ren Jiowa. (Mat. 19:5, 6) I a mochen ekkewe pean pwúpwúlú repwe pwapwaiti ena liffang. (SalF. 5:18) Ámi kana pwúpwúlú alúwél me fépwúl, pwata ouse etittina met oua féfféri lón manawemi? Oua féri met oua tufichin féri pwe oupwe pwár ngeni Jiowa úkúkún ámi aúcheani ekkewe liffang a ngenikemi? Fós ngeni Jiowa lón iótek. Kútta seni án Jiowa we Kapas ekkewe kapasen emmwen mi weneiti nónnómumi me apwénúretá. Oua fókkun tongeni lúkúlúk pwe oupwe kúna pwapwa me feiéch lón manawemi ika oua akkomwa Jiowa lón ámi pwúpwúlú!