1. Ifa ewe kapas eis sia tongeni pwisin eisinikich?

FÁN EKKÓCH ka kan aúreki ekkewe mettóch repwele fis ekiseló chék, áwewe chék ren katalóón lamalam chofona, án Kok seni Makok maunekich, me ewe maunen Armaketon? Ka fen piin pwisin eisinuk, ‘Upwe akkamwéchú ai tuppwél atun ekkena mettóch mi eniwokkus repwe fis?’ Ika ka fen piin ekieki usun ekkena kapas eis, ach pwóróusfengen wóón alon Jesus ei lón ei wokisin ach ei lesen a lóngólóng wóón, epwe fókkun álisuk. Jesus a ereni néún kewe chón káé: “Ousap lolilen lon lelukemi. Oupwe lükü Kot.” (Joh. 14:1) Lúkú mi péchékkúl epwe apworaikich ese lifilifil met epwe fis lón ekkan rán repwe feito.

2. Ifa usun sia tongeni apéchékkúla ach lúkú, me met sipwele káé lón ei lesen?

² Sia tongeni apéchékkúlaló ach lúkú pwe sipwe tongeni likiitú ngeni ekkewe sóssót lón mwachkkan ren ach ekieki minne sia féri lón ei fansoun atun sia nóm lón sóssót. Ach féri ena, epwe álisikich le silei ekkewe atun mi lamot sipwe apéchékkúlaló ach lúkú lón. Iteiten sóssót sia pworacho ngeni, pwal ina péchékkúlelóón ach lúkú. Ei epwe álisikich le likiitú fán ekkewe sóssót epwe torikich lón mwachkkan. Lón ei lesen sipwe pwóróusfengen wóón rúáánú atun a pwáló lamoten án néún Jesus kewe chón káé repwe apéchékkúlaló ar lúkú. Me sipwe pwal pwóróusfengen wóón ifa usun neman sia pwal tongeni kúna ekkena esin sóssót lón ei fansoun me ifa usun ra tongeni ammólnakichetá ngeni mwachkkan.

3. Me ren Mateus 6:30, 33, met Jesus a affata usun lúkú?

³ A pwúkún nóm ren ewe mékúren famili ewe mochen an epwe awora ngeni pwúlúwan we me néún kewe ener mwéngé, úfer, me leenier. Fán ekkóch, esap mecheres ar repwe féri ena lón ei fansoun mi áweires. Ekkóch me lein pwiich  kewe ese chúen wor ar angangen moni, me inaamwo ika ra achocho le kút ar angang, rese fókkun kúnékún. Ekkóch me leir, rese etiwa ekkewe esin angang ese fich ngeni Chón Kraist. Atun epwe fis ekkeei esin mettóch, mi lamot epwe péchékkúl ach lúkú pwe Jiowa epwe awora minne ach famili a osupwangan. Jesus a affata ei ngeni néún kewe chón káé lón an we Afalafal Wóón ewe Chuuk. (Álleani Mateus 6:30, 33.) Ika sia unusen lúkúlúk pwe Jiowa esap fókkun likitikicheló, sipwe tongeni nefótófót wóón ach angang ngeni I. Me atun sia kúna ifa usun Jiowa a ákkálisikich lón pekin aion, sipwe ririéch ngeni I me epwe péchékkúleló ach lúkú.

4-5. Met a álisi eú famili atun ra lólilen ren osupwanger lón pekin aion?

⁴ Ekieki ifa usun Jiowa a álisi ei famili lón Venezuela atun ra lólilen ren osupwanger lón pekin aion. Me mwan a wor án ei familien Castro ekis moni tolong ren ar atakeni fénúer we. Mwirin, eú gang fán néúr pistor ra afanga seniir fénúer na me asúroló seni. Ewe sam itan Miguel a erá: “Iei, aua chék atakeni eú kúkkún kinikinin fénú aua paaro seni emén. Iteiten eú me eú rán, ua kan tingorei Jiowa an epwe awora met aua osupwangan lón ena ránin.” A mmen áweires manawen ei familien Castro, nge ar unusen lúkúlúk wóón án Semach we mi tong tufichin awora minne ra osupwangan rán me rán, ra fiti ach kewe mwich iteitan me fiti ewe angangen afalafal. Iir ra akkomwa angangen án Kot we Mwú lón manawer, me Jiowa a awora minne ra osupwangan.

⁵ Atun ei fansoun mi áweires lón manawen ei famili, Miguel me pwúlúwan ei, Yurai, ra nefótófót wóón ifa usun Jiowa a álisiir. Fán ekkóch Jiowa a néúnéú pwiich kewe le awora ngeniir ekkóch ekkewe mettóch ra osupwangan, are álisi Miguel le kúnékún an angang. Lón pwal ekkóch atun, Jiowa a néúnéú ewe keangen ofesilap le awora ekkóch ekkewe mettóch mi lamot ngeniir. Jiowa ese fókkun likitiireló. Iwe, án chón ar we famili lúkú a péchékkúleló. Mwirin ar apwóróusa eú atun Jiowa a álisiir, iei met néúr we finichi itan Yoselin a apasa: “A mmen apéchékkúl ai kúna ifa usun Jiowa a álisikem. I chiechiei me ua lúkúlúk pwe epwe álisiei fansoun meinisin.” A pwal erá: “Ekkeei sóssót mi tori ám famili, a ammólnakemitá ngeni ekkewe sóssót mi kkóló áweiresin repwe fis lón mwachkkan.”

6. Ifa usun kopwe apéchékkúlaló óm lúkú atun a nafangaw noum moni le mééni ekkewe mettóch mi lamot ngeni manawom rán me rán?

⁶ A nafangaw noum moni le mééni ekkewe mettóch mi lamot ngeni manawom rán me rán? Ika ina, iwe iei eú fansoun mi fókkun áweires ngonuk. Iwe nge, inaamwo ika a áweires nónnómun manawom, ka chúen tongeni áeá ena fansoun le apéchékkúlaló óm lúkú. Iótek ngeni Jiowa me álleani alon Jesus kewe mi mak lón Mateus 6:25-34 me ekiloner. Ekieki pwóróusen ekkóch aramas lón ei fansoun mi ánnetatá pwe Jiowa a awora tufichin chókkewe mi akkomwa an angang lón manawer. (1 Kor. 15:58) Óm féri ena, epwe  apéchékkúlaló óm lúkúlúk pwe Jiowa epwe álisuk usun chék an álisi ekkewe pwal ekkóch mi kúna ena esin osukosuk ka pwal nóm lón. I a silei met ka osupwangan, me a pwal silei ifa usun epwe awora ngonuk. Atun ka kúna ifa usun Jiowa a álisuk, óm lúkú epwe péchékkúleló, iwe kopwe tongeni likiitú ngeni ekkewe sóssót mi kkóló áweiresin epwe fis lón mwachkkan.​—Ap. 3:17, 18.

7. Me ren Mateus 8:23-26, ifa usun “eu mölümöl mi pöchökül” a sótuni án ekkewe chón káé lúkú?

⁷ Atun Jesus me néún kewe chón káé ra sái wóón efóch waa, ra sereni eú mélúmél. Jesus a áeá ena fansoun le álisiir ar repwe weweiti lamoten an epwe péchékkúleló ar lúkú. (Álleani Mateus 8:23-26.) Ena mélúmél a fókkun péchékkúl pwe waar we a ur ren ewe sáát mi núlong lón, nge Jesus a kinamwe le méúr. Lupwen néún kewe chón káé mi niwokkus ra féngúnatá me tingorei an epwe selániir, iwe a eisiniir: “Pwota oua niuokus? Pwota iei me lükükisikisimi.” Itá iir repwe fen mirititi pwe Jiowa a tongeni túmúnú Jesus me chókkewe mi eti. Met sa káé seni ena? Lúkú mi péchékkúl a tongeni álisikich atun epwe torikich “mölümöl mi pöchökül,” are sókkun osukosuk mi usun eú mélúmél.

8-9. Met sókkun sóssót a sótuni án Anel lúkú, me met a álisi?

⁸ Ekieki ifa usun a péchékkúleló lúkúen emén Chón Kraist fefin lipich lón Puerto Rico itan Anel pokiten an likiitú fán eú sóssót mi áweires. Ena sóssót mi tori, ina eú wesewesen “mölümöl mi pöchökül.” A poputá ena lón ewe 2017 atun ewe taifun itan Maria a ataieló imwan we. Mwirin ena taifun, ese chúen wor an angangen moni. Iei met Anel a apasa: “Lón ekkena rán mi fókkun áweires, ua chék akkaúrek.” A pwal erá: “Nge ua lúkúlúk wóón Jiowa ren ai iótek me use mut ngeni ai aúrek epwe aúkúeitiw seni ekkewe mettóch mi lamot upwe féri.”

⁹ Anel a erá pwe álleasochis a pwal álisi le likiitú ngeni an kewe sóssót. Iei alon: “Ai álleasochisi ekkewe emmwen seni án Jiowa mwicheich, a álisiei ai usap kon aúrek. Jiowa a álisiei ren an néúnéú chienei kewe Chón Kraist. Iir ra apéchékkúla letipei me awora ngeniei ekkewe mettóch mi lamot ngeni manawei.” A pwal erá: “Jiowa a fang ngeniei minne mi lap seni met ua tingorei, me ai lúkú a fókkun péchékkúleló.”

10. Met kopwe féri ika a toruk eú watteen osukosuk mi usun “eu mölümöl mi pöchökül”?

¹⁰ A toruk eú watteen osukosuk mi usun “eu mölümöl mi pöchökül”? Eli ka weires ren fisin eú feiengaw watte. Are neman a uruk eú semmwen mi chou mi efisi óm kopwe meefi watteen letipengaw me tipemwaramwareiti met kopwe féri. Eli fán ekkóch ka aúrek, nge kosap mut ngeni aúrek an epwe aúkúketiw le lúkúlúk wóón Jiowa. Kopwe chiechi ngeni I ren óm ikkiótek ngeni seni unusen letipom. Apéchékkúlaló óm lúkú ren óm ekilonei ekkewe fansoun  me lóóm Jiowa a fen álisuk lón. (Kölf. 77:11, 12) Ka tongeni unusen lúkúlúk pwe I esap fókkun likitukoló.

11. Pwata a lamot ach sipwe tipeppós le álleasochisi chókkewe mi wisen emmwenikich?

¹¹ Met a pwal tongeni álisuk le likiitú fán ekkewe sóssót mi toruk? Anel a erá pwe álleasochis. Ina popun kopwe lúkúlúkú chókkewe Jiowa me Jesus ra lúkúlúk wóór. Fán ekkóch, chókkewe mi kewis ngeni ar repwe wisen emmwenikich, eli repwe ngenikich kapasen emmwen ese pwúng me rech. Iwe nge, Jiowa a efeiéchú chókkewe mi álleasochis. Sia silei ena seni lón an we Kapas me seni pwóróusen néún kewe chón angang mi tuppwél mi fen kúna manaw pokiten ar álleasochis. (Eks. 14:1-4; 2 Kron. 20:17) Ekilonei ekkena sókkun pwóróus. Óm féri ena, epwe etipeppósaok le mochen álleasochisi kapasen emmwen mi feito seni án Jiowa we mwicheich lón ei fansoun me lón mwachkkan. (Ipru 13:17) Iwe esap fókkun wor ákkáekisin popun óm kopwe niwokkusiti ewe riáfféú mi lapalap epwele fis ekiseló chék.​—SalF. 3:25.

12. Me ren Lukas 18:1-8, met ririfengennin lúkú me án emén likiitú ngeni pwúngúngaw?

¹² Jesus a silei pwe ewe mettóch pwúngúngaw a tongeni sótuni án néún kewe chón káé lúkú. Ren an epwe álisiir le likiitú ngeni ena mettóch, a ereniir ei kapas áwewe mi mak lón puken Lukas. Jesus a apwóróusa ngeniir pwóróusen emén fefin mi má pwúlúwan, ese úkútiw le sié ngeni emén soukapwúng mi pwúngúngaw usun eú kapwúng. A lúkúlúk pwe ika epwe chék sópweló le tingor an álillis, iwe epwe álisi. Ekiseló mwirin, ena soukapwúng a álisi. Met sia tongeni káé seni ei pwóróus? Jiowa, esap i emén mi pwúngúngaw. Iei met Jesus a apasa: “Ifa usun, Kot esap fokun pwärala än nöün kewe mi fil pwüng, ir chokewe mi kökköri le rän me le pwin?” (Álleani Lukas 18:1-8.) Jesus a pwal erá: “Lupwen Nöün Aramas epwe war, ifa usun, epwe küna aramas mi lükülük won fanüfan?” Atun sia pwal kúna pwúngúngaw, mi lamot sipwe pwári lón ach mosonottam me tipeppós pwe ach lúkú a péchékkúl usun chék án ena fefin mi má seni pwúlúwan. Ren ena esin lúkú, sia tongeni lúkúlúk pwe ekiseló chék Jiowa epwe mwékút me álisikich. A pwal lamot sipwe lúkúlúk wóón manamanen ewe mettóch iótek. Fán ekkóch, ach iótek a tongeni pélú lón napanap sise fen tepereni.

13. Ifa usun iótek a álisi eú famili atun aramas ra kirikiringaw ngeniir?

¹³ Ekieki pwóróusen ei Chón Kraist fefin itan Vero, mi nóm lón Democratic Republic of the Congo. Vero, pwúlúwan we esap emén Chón Kraist, me néúr we nengngin 15 ierin, ra sú seni leenier we atun ewe mwichen soufiu ra eriáfféúr. Atun án ei famili a sú, ra tikeri eú kinikin ikewe ie ekkewe soufiu ra akkaúlóór me ekiekin nireló. Atun Vero a poputá le kechiw, néún we nengngin a sótun echipa letipan ren  an léúwommóng le iótek me ren an pani iten Jiowa fán fite lón an na iótek. Lupwen a wes le iótek ewe menlapen ena kúmiin soufiu a eisini, “Nengngin, ié a áituk óm kopwe iótek?” A erá, “Mama a áitiei ren an áiti ngeniei met mi mak lón Mateus 6:9-13.” Ena meilap a erá, “Nengngin, oule ló me inom kana me semom lón kinamwe, amwo óm na Kot Jiowa epwe túmúnúkemi!”

14. Met a tongeni sótuni ach lúkú, me met epwe álisikich le likiitú ngeni?

¹⁴ Ekkena esin pwóróus ra áiti ngenikich pwe iótek a mmen fókkun aúchea. Nge, met kopwe féri ika óm iótek ese mwittir pélú, are ese pélú lón napanap mi amwarar? Sópweló le ikkiótek usun ewe fefin mi má seni pwúlúwan lón án Jesus we kapas áwewe. Kopwe lúkúlúk pwe ach we Kot esap fókkun likitukoló, me i epwe pélúweni óm iótek. Sópweló le tingorei Jiowa an we ngún mi fel. (Ais. 12:2) Chemeni pwe Jiowa epwe fókkun efeiéchuk, iwe epwe fókkun ménúk sonuk ekkewe riáfféú ka kúna me lóóm. Lupwen ka likiitú ngeni ekkewe sóssót pokiten Jiowa a álisuk, iwe kopwe péchékkúleló me kopwe tufichin likiitú ngeni ekkewe sóssót epwe toruk lón mwachkkan.​—1 Pet. 1:6, 7.

15. Me ren Mateus 17:19, 20, ifa ewe mettóch a fis ngeni néún Jesus kewe chón káé?

¹⁵ Jesus a áiti ngeni néún kewe chón káé pwe lúkú a tongeni álisiir le pworacho ngeni ekkewe weires repwe kúna. (Álleani Mateus 17:19, 20.) Lón eú atun, rese tongeni asúoló emén timon inaamwo ika ra fen sópwéch lón ekkóch fansoun le féri ena. Pwata? Jesus a erá pwe a lamot repwe alapaaló ar lúkú, a ereniir pwe ika a naf ar lúkú repwe tufichin pwákini ekkewe osukosuk mi usun eú watteen chuuk. Lón ei fansoun, neman epwe pwal torikich ekkewe esin weires esap tongeni ki ngenikich.

16. Ifa usun lúkú a álisi Geydi mwirin ninilóón pwúlúwan we?

¹⁶ Ekieki pwóróusen emén Chón Kraist fefin seni Guatemala itan Geydi. Emén a nieló pwúlúwan we itan Edi atun ar liwin ngeni imwer we sárin mwich. Ifa usun án Geydi lúkú a álisi lón an watteen chúúpwúl? Neminna a apasa: “Iótek a álisiei le iinaawu ai weires ngeni Jiowa, iwe ina met a ekinamwei letipei. Ua kúna pwe Jiowa a túmúnúei ren an néúnéú chón ai famili me chiechiei kewe lón mwichefel. Ai achocho le fiffiti án Jiowa angang, a ekisikisaaló metekin letipei me álisiei ai upwe nefótófót wóón eú me eú rán nge usap aúreki met epwe fis lesor. Seni met a fis ngeniei, ua kúna pwe ese lifilifil met sókkun sóssót neman epwe toriei lón mwachkkan, ua tongeni pworacho ngeniir ren álillisin Jiowa, Jesus, me ewe mwicheich.”

17. Met sia tongeni féri lupwen a torikich eú watteen osukosuk mi usun eú watteen chuuk?

¹⁷ Ka letipeta ren málóón emén en mi fókkun tongei? Awora fansoun le apéchékkúlaló óm lúkú ewe ápilúkúlúkún manawsefál ren óm ákkálleani pwóróusen chókkewe mi fen manawsefál.  Ka letipeta pokiten emén chón óm famili a katowu? Káé pwe kopwe ánneta ngeni pwisin en pwe napanapen án Kot kapwúng a múrinné fansoun meinisin. Ese lifilifil met sókkun osukosuk epwe toruk, áeá ena fansoun le apéchékkúlaló óm lúkú. Iinaawu ngeni Jiowa masouen letipom. Kosap áimukoló seni pwiom kewe Chón Kraist, nge kopwe fen pacheéch ngeniir. (SalF. 18:1) Féri ekkewe mettóch epwe álisuk le likiitú inaamwo ika kopwe kechiw ren óm chemeni met a fis ngonuk. (Kölf. 126:5, 6) Sópweló le fiffiti ekkewe mwich, ewe angangen afalafal, me álleani ewe Paipel. Me ekkekieki usun ekkewe mettóch mi amwarar Jiowa a pwonei pwe epwe fang ngonuk lón mwachkkan. Lupwen ka kúna ifa usun Jiowa a álisuk lón ei fansoun, óm lúkú i epwe fókkun péchékkúleló.

18. Ika ka meefi pwe óm lúkú ese péchékkúl, met kopwe féri?

¹⁸ Ika ekkewe sóssót a toruk lóóm are lón ei fansoun ra pwári pwe óm lúkú ese péchékkúl, kosap letipengaw. Kopwe fen ekieki pwe iei ewe fansoun kopwe áeá le apéchékkúlaló óm lúkú. Eáni ei esin tingor néún Jesus kewe aposel ra eáni: “Kopwe alisikem pwe äm lükü en epwe wattela.” (Luk. 17:5) Pwal och, ekieki pwóróusen pwiich keei mi nóm lón ei lesen. Áppirú Miguel me Yurai le chemesefáli meinisin ekkewe atun Jiowa a fen álisuk. Áppirú néún Vero we nengngin me Anel le iótek ngeni Jiowa seni unusen letipom, ákkáeúin atun a toruk watteen osukosuk. Áppirú Geydi le mirititi pwe Jiowa a tongeni awora ewe álillis mi lamot ngonuk ren an néúnéú chón óm famili me chiechiom kewe. Lupwen ka mut ngeni Jiowa an epwe álisuk le likiitú ngeni ekkewe sóssót ka kúna lón ei fansoun, epwe lapóló óm lúkúlúk pwe i epwe álisuk le likiitú ngeni ekkewe sóssót epwe toruk lón mwachkkan.

19. Met Jesus a lúkúlúkú? Nge en, met ka pwal tongeni lúkúlúkú?

¹⁹ Jesus a álisi néún kewe chón káé le mirititi ekkewe atun ra osupwangen lúkú. Nge a lúkúlúk pwe ren án Jiowa álillis repwe tongeni pworacho ngeni ekkewe sóssót repwe kúna lón ekkewe fansoun epwe feito. (Joh. 14:1; 16:33) I a lúkúlúk pwe lúkú mi péchékkúl a tongeni álisi ewe mwich mi fókkun chóchó le manawewu seni ewe riáfféú mi lapalap. (Pwär. 7:9, 14) Met, kopwe nóm leir? Ren án Jiowa álillis, ka tongeni ika kopwe achocho úkúkún óm tufich lón ei fansoun le apéchékkúlaló óm lúkú!​—Ipru 10:39.