1. Pwata a lamot ngenikich án Jiowa emmwen? Áweweei.

 ANCHANGEI pwe ka mworukoló lón eú wollap. A efeiengaw ikkena pokiten a wor manmwacho, áchi, irá mi poison, me ka pwal tongeni turulong lón eú pwaang. Ese mwáál, ka mmen kilisou pwe a wor emén chón emmwenuk mi sipeéch me a silei ia ekkewe feiengaw ra nóm ie pwe epwe atowauakoló seniir! Ei fénúfan a ussun ena wollap. A ur ren chómmóng mettóch mi efeiengaw mi tongeni atai ach riri ngeni Jiowa. Nge a wor néúch Chónemmwen mi unuséch, ina i Jiowa. A álisikich ach sipwe towaw seni ekkewe feiengaw me a emmwenikich ngeni manaw esemuch lón ewe ótót séfé.

2. Ifa ussun Jiowa a emmwenikich?

² Ifa ussun Jiowa a emmwenikich? A ákkáeúin emmwenikich ren álillisin an we Kapas ewe Paipel. Iwe nge, a pwal néúnéú aramas le emmwenikich. Áwewe chék, a néúnéú “ewe chón angang mi túppwél me tipáchem” le awora mwéngé lón pekin lúkú mi álisikich le eáni kefil mi múrinné. (Mat. 24:45) Jiowa a pwal néúnéú ekkewe ekkóch mwán mi lipwákéch le emmwenikich. Áwewe chék, ekkewe chónemmwen mi wisen sáifetál me ekkewe mwán mi ásimaw ra awora kapasen apéchékkúl me emmwen mi álisikich atun fansoun weires. A ifa me kilisouch ren ekkewe emmwen mi alúkúlúk lón ekkeei ránin lesópwólóón! Ra álisikich le pacheéch ngeni Jiowa pwe sipwe tongeni pwapwa iei me tori feilfeiló.

3. Met sipwele káé lón ei lesen?

³ Nge fán ekkóch eli a weires ach sipwe álleasochisi án Jiowa emmwen, ákkáeúin atun ekkewe mwán rese unuséch ra atoura. Pwata? Eli sisap sani minne ra erenikich. Are sipwe ekieki pwe ewe emmwen ese kon éch iwe sia meefi pwe ese wesewesen feito seni Jiowa. Lón ekkena atun, a fókkun lamot  ach sipwe lúkúlúk pwe Jiowa i ewe a wesewesen emmweni néún kewe aramas me sipwe feiéch iká sia álleasochisi. Ren an epwe péchékkúleló ach lúkúlúk, sipwele káé lón ei lesen (1) ifa ussun Jiowa a emmweni néún kewe aramas lón fansoun lóóm, (2) ifa ussun a emmwenikich lón ei fansoun, me (3) ifa ussun sia feiéch atun sia álleasochisi an kewe emmwen.

USSUN ÁN JIOWA EMMWENI EWE MWÚÚN ISRAEL

4-5. Ifa ussun Jiowa a pwáári pwe a néúnéú Moses le emmweni ekkewe chón Israel? (Ppii ewe sasing.)

⁴ Jiowa a ewisa ngeni Moses an epwe emmwenawu ekkewe chón Israel seni Isip. Me a pwáári ngeni ekkewe chón Israel pwe i a wisen emmweniir ren Moses. Áwewe chék, Jiowa a awora eú úrekuchu le emmweniir lerán, me eú úreekkei mi emmweniir lepwin. (Eks. 13:21) Moses a tapweló mwirin ena úrekuchu, me a emmweniir me ekkewe chón Israel ngeni ewe Setipar. Nge ekkewe chón Isip ra tapweriir. Iwe ekkewe chón Israel ra fókkun niwokkus pún ra ekieki pwe repwe nireló. Iwe ra meefi pwe Moses a mwáálliló le emmweniir ngeni ewe Setipar, nge ese mwáálliló. Jiowa a akkóta le emmweni néún kana aramas ikkena me ren Moses. (Eks. 14:2) Mwirin Kot a amanawer ren eú manaman.—Eks. 14:​26-28.

⁵ Ren úkúúkún 40 ier mwirin, Moses a sópweeló le lúkú pwe Jiowa a áeá ewe úrekuchu le emmweni néún kewe aramas lón ewe fénúapé. a Ren och fansoun, Jiowa a onómu ena úrekuchu asetáán án Moses we tento, pwe meinisin chón Israel repwe tongeni kúna. (Eks. 33:​7, 9, 10) Jiowa a fós ngeni Moses me lón ewe úrekuchu, iwe mwirin Moses a atoura án Jiowa emmwen ngeni ekkewe aramas. (Kölf. 99:7) Ekkewe chón Israel ra wesen kúna pwe Jiowa a néúnéú Moses le emmweniir.

6. Met meefien ekkewe chón Israel ren án Jiowa emmwen? (Numperis 14:​2, 10, 11)

⁶ A mmen elichippúng pwe lape ngeni ekkewe chón Israel ra tunaaló ewe pisekin ánnet mi fataffatéch pwe Moses a fós fán iten Jiowa. (Álleani Numperis 14:​2, 10, 11.) Fán chómmóng, rese mochen etiwa wisen Moses na. Pokiten ena, Jiowa ese mut ngeniir ar repwe tolong lón ewe Fénúen Pwon.—Num. 14:30.

7. Apwóróusa pwóróusen chókkewe mi álleasochisi án Jiowa emmwen. (Numperis 14:24) (Pwal ppii ewe sasing.)

⁷ Iwe nge, ekkóch chón Israel ra álleasochisi án Jiowa emmwen. Áwewe chék, iei met Jiowa a erá, “Kalep . . . a pwal fokun aleasochisiei.” (Álleani Numperis 14:24.) Kot a efeiéchú Kalep, me a pwal mwo nge mut ngeni an epwe fili ia a mochen nóm ie lón ewe Fénúen Pwon. (Jos. 14:​12-14) Ekkewe chón Israel mi mumu ngeniir ar repwe tolong lón ewe Fénúen Pwon ra isettiw eú leenien áppirú mi múrinné ren ar álleasochisi án Jiowa emmwen. Atun Josua a wii Moses le emmweni ekkewe chón Israel, “ra meniniti Josua lon ränin manauan meinisin.” (Jos. 4:14) Iwe mwirin, Jiowa a efeiéchúúr ren an uweiirelong lón ewe fénú a pwone ngeniir.—Jos. 21:​43, 44.

8. Áweweei ifa ussun Jiowa a emmweni néún kewe aramas lón fansoun ekkewe king. (Pwal ppii ewe sasing.)

⁸ Fite ier mwirin, Jiowa a ewisa ngeni ekkewe soukapwúng ar repwe emmweni néún kewe aramas. Mwirin, lón fansoun ekkewe king, Jiowa a ewisa ekkewe soufós ar repwe emmweni néún kewe aramas. Ekkewe king mi túppwél ra álleasochisi ekkewe emmwen mi feito seni ekkewe soufós. Áwewe chék,  fán tipetekison King Tafit a etiwa kapasen apwúng seni soufós Natan. (2 Sam. 12:​7, 13; 1 Kron. 17:​3, 4) King Jeosafat a lúkúlúk wóón ewe soufós Jaasiel fán iten emmwen me a apéchékkúla ekkewe aramasen Juta ar repwe ‘lükü mine nöün [Kot] kewe soufos ra üreniir.’ (2 Kron. 20:​14, 15, 20) Atun King Esekaia a nóm fán weires, a kútta álillis seni ewe soufós Aisea. (Ais. 37:​1-6) Iteiten án ekkewe king álleasochisi án Jiowa emmwen, ra kúna feiéch me mwúúr kewe ra túmún. (2 Kron. 20:​29, 30; 32:22) Itá úrúrún meinisin repwe mirititi pwe Jiowa a néúnéú ekkewe soufós le emmweni néún kewe aramas. Iwe nge, lape ngeni ekkewe king me ekkewe aramas ra ú ngeni néún Jiowa kewe soufós.—Jer. 35:​12-15.

USSUN ÁN JIOWA EMMWENI EKKEWE POPUN CHÓN KRAIST

9. Ié kewe Jiowa a néúnéú le emmweni ekkewe popun Chón Kraist? (Pwal ppii ewe sasing.)

⁹ Lón ewe Pentikos ier 33, Jiowa a féraatá ewe mwichefelin Chón Kraist. Ifa ussun a emmweni ekkena popun Chón Kraist? A ewisa ngeni Jises an epwe mékúren ewe mwichefel. (Efi. 5:23) Nge Jises ese ereni emén me emén ekkena chón káé met repwe féri. A néúnéú ekkewe aposel me mwán mi ásimaw lón Jerusalem le wisen emmwen. (Féf. 15:​1, 2) Pwal och, ekkewe mwán mi ásimaw ra kewis le emmweni ekkewe mwichefel.—1 Tes. 5:12; Tait. 1:5.

10. (a) Met meefien lape ngeni ekkewe popun Chón Kraist ren ekkewe emmwen mi kawor ngeniir? (Féffér 15:​30, 31) (b) Pwata ekkóch rese etiwa chókkewe Jiowa a néúnéú le emmweniir? (Ppii ewe pwóór “ Pwata Ekkóch Ra Oput án Jiowa Néúnéú Aramas le Emmweni Néún Kewe Aramas?”)

¹⁰ Itá ekkena Chón Kraist lón na fansoun ra etiwa ekkewe emmwen? Lape ngeniir ra pwapwa le álleasochisi ekkewe emmwen. Ren enletin, “ra pwapwa ren ekkewe kapasen pesepes.” (Álleani Féffér 15:​30, 31.) Iwe nge, ifa ussun Jiowa a emmweni néún kewe aramas lón ei fansoun?

USSUN ÁN JIOWA EMMWENIKICH LÓN EI FANSOUN

11. Apwóróusa eú pwóróus mi pwáári ifa ussun Jiowa a emmweni chókkewe ra wisen emmwen lón ekkewe fitu ier ra ló.

¹¹ Jiowa a sópweeló le emmweni néún kewe aramas lón ei fansoun. A féri ena ren an we Kapas me Néún we, mékúren ewe mwichefel.  Ka tongeni kúna ekkewe pisekin ánnet mi pwáári pwe Kot a sópweeló le néúnéú aramas lón ach ei fansoun? Ewer. Áwewe chék, ekieki ussun met a fis mwirin ewe ier 1870. Charles Taze Russell me chienan kewe ra poputá le weweiti pwe lón ewe ier 1914 epwe fis och mettóch a mmen aúchea ussun ewe Mwúún Kot. (Tan. 4:​25, 26) Ra sile ena ren ar káéfichi Paipel me ra lúkú pwe repwe kúna pwénútáán ekkewe oesini. Itá Jiowa a emmweniir? Fókkun ewer! Minne a fis wóón fénúfan lón 1914 a ánneta pwe án Kot we Mwú a poputá le nemenem. A fis ewe Áeúin Maunen Fénúfan me a pwal fis málapalap, chechchechin fénú, me lengita. (Luk 21:​10, 11) A fókkun ffat pwe Jiowa a néúnéú ekkena mwán mi letipwenechar le emmweni néún kewe aramas.

12-13. Met ekkewe mwán mi wisen emmwen ra féri atun ewe Oruuen Maunen Fénúfan pwe epwe lapóló ewe angangen afalafal?

¹² Sipwe pwal ppii met a fis atun ewe Oruuen Maunen Fénúfan. Ekkewe mwán mi wisen emmweni ewe angang lón ewe ofesilap lón New York ra káéfichi Pwáraatá 17:8. Mwirin ar etittinafichi ena wokisin, ra weweiti pwe Armaketon esap fis mwirin ena maun. Ra silei pwe epwe wor fansoun kinamwe mwirin, me Chón Pwáraatá Jiowa ra tongeni alapaaló ar afalafal ngeni chómmóng aramas. Me inaamwo iká ussun me rech esap ina ewe fansoun mi éch, nge ekkewe mwán mi wisen emmwen ra filaatá le poputááni ewe Sukulen Gilead. Repwe asukula ekkewe misineri le afalafal me asukula aramas wóón unusen fénúfan. Ra tiinaaló ekkewe misineri pwal mwo nge atun fisin ewe maun. Pwal och, ewe chón angang mi túppwél a akkóta eú sukul b mi kkóló aúchean epwe fis lón meinisin mwichefel. Epwe álisi meinisin ar repwe wiliiti chón afalafal mi lipwákéch. Ekkena sukul ra álisi néún Kot kewe aramas le mmólnetá fán iten ewe angangen afalafal mi lamot repwe féri.

¹³ Lón ei fansoun, sia tongeni wesen kúna pwe Jiowa a emmweni néún kewe aramas lón ena fansoun mi áweires. Seni ewe Oruuen Maunen Fénúfan, a suuk ngeni néún Jiowa kewe aramas ar repwe afalafal lón chómmóng fénú nge ese wor pinepinan. Ren enletin, a fókkun sópwéch ena angang.

14. Pwata sia tongeni lúkúlúk wóón ekkewe emmwen mi feito seni án Jiowa mwicheich me ekkewe mwán mi ásimaw mi kefilitá? (Pwáraatá 2:1) (Pwal ppii ewe sasing.)

¹⁴ Lón ei fansoun, chón ewe Mwichen Soupwúngúpwúng ra sópweeló le kútta emmwen seni Kraist. Ra mochen pwe ewe emmwen ra awora ngeni chón ewe mwichefel epwe tipeeú ngeni meefien Jiowa. Me ra néúnéú ekkewe chónemmwen mi wisen sáifetál me ekkewe mwán mi ásimaw le awora emmwen ngeni ekkewe mwichefel. c Ekkewe mwán mi ásimaw mi kepit ra nóm lón “péúmwáánin péún” Kraist. (Álleani Pwáraatá 2:1.) Pwúngún, ekkewe mwán mi ásimaw meinisin rese unuséch me ra kan mwámmwáálliló. Moses me Josua ra pwal mwámmwáálliló fán ekkóch, ussun chék ekkewe aposel. (Num. 20:12; Jos. 9:​14, 15; Rom 3:23) Nge sia tongeni fókkun kúna pwe Jises a emmweniéchú ewe chón angang mi túppwél me ekkewe mwán mi ásimaw mi kefilitá, me epwe sópweeló le féri ena “lón ekkewe rán meinisin tori sópwólóón ótóten ei fénúfan.” (Mat. 28:20) Ina minne, a wor chómmóng popun pwata sipwe lúkú ewe emmwen mi kawor seni chókkewe mi filitá le emmwenikich.

SIA FEIÉCH ATUN SIA ÁKKÁLLEASOCHISI ÁN JIOWA EMMWEN

15-16. Met ka káé seni pwóróusen chókkewe mi ákkálleasochisi án Jiowa emmwen?

¹⁵ Atun sia ákkálleasochisi án Jiowa emmwen, sia kúna feiéch pwal mwo nge iei. Áwewe chék, Andy me Robyn ra apwénúetá án ewe chón angang mi túppwél emmwen le ámecheresaaló nónnómun manawer. Iwe pokiten ena, ra tongeni álillis lón ekkewe angangen kaú ach we mwicheich a féri. Iei met Robyn a erá: “Fán ekkóch áúa nóm lón ekkewe kúkkún imw, ese pwal mwo nge wor leenien kuk. Me a lamot úpwe améméló chómmóng ekkewe pisek úa ákkáeá fán iten ái fich sasing, ina ewe mettóch úa fókkun sani. Úa kan kechiw atun úa améméroló. Nge úa úppós le nenneló mwei, ussun pwúlúwen Eperiam we, Sara nge úsapw nesékúr.” (Ipru 11:15) Ifa ussun Andy me Robyn ra feiéch seni met ra filaatá? Iei met Robyn a erá: “Áúa fókkun pwapwa pokiten áúa silei pwe áúa fang ngeni Jiowa meinisin minne mi wor rem. Atun áúa féri ekkewe angang mi kewis ngenikem, áúa ekis meefi pwe epwe ina nónnómun manawem lón ewe ótót séfé.” Andy a tipeeú ngeni me a erá: “Áúa fókkun pwapwa pokiten áúa fang unusen ám fansoun me péchékkúl fán iten án Jiowa angang.”

 ¹⁶ Ifa ussun sia pwal kúna feiéch seni ach ákkálleasochisi án Jiowa emmwen? Mwirin án Marcia sochungio seni high school, a fókkun mochen apwénúetá ewe emmwen le pioneer. (Mat. 6:33; Rom 12:11) A erá: “Úa ketiw le fiti college ren úkúúkún rúáánú ier, nge ese kamé. Nge úa mochen alapaaló ái angang fán iten Jiowa. Ina popun, úse fiti college, nge úa fen filaatá le fiti eú sukul mi asukula och sókkun angang pwe epwe naf nei moni le pioneer. Úa fókkun pwapwa ren ái filaatá ena. Iei úa pwapwa le pioneer, me pokiten úa pwisin fili ineet úpwe angang iwe úa tufichin álillis lón Bethel me pwapwaiti pwal ekkóch angang fán iten Jiowa.”

17. Ikkefa pwal ekkóch feiéch sipwe kúna atun sia sópweeló le álleasochisi án Jiowa kewe emmwen? (Aisea 48:​17, 18)

¹⁷ Fán ekkóch, sia angei kapasen éúréúr seni ach we mwicheich pwe epwe túmúnúkich. Áwewe chék, ra éúréúrakich ussun efeiengawen tongen moni me ekkewe mettóch mi tongeni emmwenikich le atai án Kot kewe allúk. Atun sia álleasochisi án Jiowa kana emmwen sipwe kúna pwal ekkóch feiéch. Epwe limeliméch mwelien letipach me sipwe túmúnúkich seni chómmóng osukosuk. (1 Tim. 6:​9, 10) Iwe sia tongeni angang ngeni Jiowa ren unusen letipach. Ese wor pwal och mettóch epwe atoto ngenikich enletin pwapwa me kinamwe.—Álleani Aisea 48:​17, 18.

18. Pwata ka úppós le ákkálleasochisi án Jiowa emmwen?

¹⁸ Sia fókkun lúkú pwe Jiowa epwe sópweeló le néúnéú aramas le awora ngenikich kapasen emmwen atun ewe riáfféú mi lapalap me atun ewe Nemenem Úkúúkún Engéréú Ier. (Kölf. 45:16) Itá sipwe sópweeló le álleasochisi ena emmwen pwal mwo nge atun sia mochen féri pwal och mettóch? Epwe mecheres ach sipwe álleasochis iká sia éérenaaló iei le álleasochisi án Jiowa kewe kapasen emmwen. Ina minne, ousipwe sópweeló le álleasochisi án Jiowa emmwen, kapachelong ekkewe emmwen mi feito seni ekkewe mwán mi kefilitá le túmúnúkich. (Ais. 32:​1, 2; Ipru 13:17) Sia tongeni unusen lúkúlúk wóón néúch we Chónemmwen Jiowa, pokiten a álisikich ach sipwe towaw seni ekkewe mettóch mi tongeni atai ach chiechi ngeni me a emmwenikich ngeni manaw esemuch lón ewe ótót séfé.