Iwe nge, Jiowa a mochen ach sipwe mosonottam le witiwiti an epwe mwékút lón an fansoun mi fen kefililó. Pwata a mochen ach sipwe witiwit fán mosonottam? Met a tongeni álisikich le pwapwa atun sia witiwit?

PWATA JIOWA A MOCHEN ACH SIPWE WITIWIT FÁN MOSONOTTAM?

Ewe Paipel a apasa: “Jiowa a witiwit fán mosonottam an epwe pwáári kirekiréch ngenikemi, me i epwe mwékút an epwe pwáári úméúméch ngenikemi. Pún Jiowa i emén Kot mi pwúng. Ra pwapwa meinisin chókkewe mi sópweeló le witiwiti i.” (Ais. 30:​18, NW) Alon Aisea na, a akkomw weneiti ekkewe chón Jus mi lúkúmach. (Ais. 30:1) Nge ekkena kapas, ra pwal awora ápilúkúlúk ngeni ekkewe chón Jus mi túppwél mi nóm leir. Ekkena kapas ra pwal awora ápilúkúlúk ngeni néún Jiowa kewe chón angang mi túppwél lón ei fansoun.

Iwe, pokiten Jiowa a witiwit fán mosonottam, sipwe pwal witiwit fán mosonottam. A fen fili ewe fansoun epwe amóeló ei ótót, me iei a witiwiti warotoon ránin me kulókun ena fansoun. (Mat. 24:36) Lón ena atun, epwe fókkun ffatéchúló mwáállin án ewe Tefil kewe kapasen tipimwáál ngeni Jiowa me chókkewe mi angang ngeni. Mwirin epwe nieló Setan me meinisin chón peni i, nge epwe ‘pwáári úméúméch ngenikich.’

Nge ren mwo iei, eli Jiowa esap amóeló ach kewe weires, nge a alúkúlúkú ngenikich pwe sia tongeni pwapwa atun sia witiwiti. Ussun met Aisea a apasa, sia tongeni pwapwa atun sia ápilúkúlúkú fisin och mettóch mi múrinné. (Ais. 30:​18, NW) Ifa ussun sia tongeni eáni ena pwapwa? A wor rúáánú mettóch mi tongeni álisikich.

PWAPWA ATUN ACH WITIWIT

Nefótófót wóón mettóch mi pwúng. King Tafit a kúna chómmóng féfféringaw lón ánein manawan. (Kölf. 37:35) Iwe nge, a erá: “Kopwe fanafanala me fän mesen ewe Samol mi Lapalap o likitü le witiwiti i. Kosap achouuk ren ekewe aramas mi pisekisekila, pwal ren chokewe mi afisätä ar rawangau.” (Kölf. 37:7) Tafit a álleasochisi ena kapasen fén ren an nefótófót wóón án Jiowa pwonei an epwe amanawa i. A pwal kilisou ren ekkewe mettóch meinisin mi múrinné Jiowa a féri fán itan. (Kölf. 40:5) Iká sia pwal nefótófót wóón ekkewe  mettóch mi múrinné mi nóm rech nge sisap nefótófót wóón ekkewe osukosuk mi torikich, iwe epwe mecheres ngenikich ach sipwe witiwiti Jiowa.

Alapaaló ach fansoun le mwareiti Jiowa. Ewe soumakken Kölfel 71, ese mwáál Tafit, a ereni Jiowa: “Üpwe apilükülükuk fansoun meinisin o alapala ai mwareituk.” (Kölf. 71:14) Ifa ussun epwe mwareiti Jiowa? Epwe ereni ekkewe ekkóch ussun Jiowa me eáni ngeni ekkewe kélún mwareiti. (Kölf. 71:​16, 23) Sia pwal tongeni kúna pwapwa atun sia witiwiti Jiowa ussun chék Tafit. Sia mwareiti i atun sia afalafal ngeni aramas, fós ussun i ngeni chienach kewe me chón ach famili, me atun sia eáni ach kewe kél. Lón en, iká kopwe eáni eché ach kewe kél, kopwe ekiekiéchú kúkúún kewe me ifa ussun a atoto ngonuk pwapwa.

Angei péchékkúl seni chienach kewe Chón Kraist. Atun Tafit a nóm lón weires, iei met a ereni Jiowa: “Üpwe asilefeili ngeni noum kewe aramas pwe en ka kirikiröch. Ei üpwe föri me fän meser.” (Kölf. 52:9) Kich sia pwal tongeni péchékkúletá ren chienach kewe mi túppwél, esap chék atun sia fiti ach kewe mwiich me ewe angangen afalafal nge pwal atun ach kukkunoufengen.—Rom 1:​11, 12.

Apéchékkúlaló ach ápilúkúlúk. Kölfel 62:5 a apasa: “Üa likitü le witiwiti Kot echök, pun üa anomu ai apilükülük won.” A mmen lamot an epwe péchékkúl ach ápilúkúlúk ákkáeúin iká sia meefi pwe a mmang sópwólóón ei ótót. Mi lamot sipwe lúkúlúk pwe án Jiowa kewe pwon repwe fókkun pwénúetá ese lifilifil ifa úkúúkún ttamen ach sipwe witiwiti. Sia tongeni apéchékkúlaló ach ápilúkúlúk ren ach kákkáé án Kot we Kapas. Áwewe chék, sipwe ekieki ekkewe oesini ra fen pwénútá, ifa ussun ekkewe chón makkeei Paipel ra tipeeúfengen lón minne ra makkeei, me tichikin ekkewe pwóróus Jiowa a pwáraaló ussun pwisin i. (Kölf. 1:​2, 3) Pwal och, mi lamot sipwe sópweeló le “iótek fán emmwenien ewe ngún mi fel” pwe epwe chék péppéchékkúl ach riri ngeni Jiowa atun sia witiwiti pwénútáán an we pwon ussun ewe manaw esemuch.—Juta 20, 21.

Kopwe áppirú King Tafit le lúkúlúk pwe Jiowa a mammasa chókkewe mi witiwiti me a pwáári an tong enlet ngeniir. (Kölf. 33:​18, 22) Kopwe mosonottam le witiwiti Jiowa ren óm nefótófót wóón ekkewe mettóch mi múrinné lón manawom, ren óm mwareiti i, ren óm angei péchékkúl seni chienach kewe, me ren óm akkapéchékkúla óm we ápilúkúlúk mi aúchea.