1-2. Met a tongeni álisikich le weweiti meefien Jiowa atun a itengaw itan we?

 ANCHANGEI EI: Emén ka fókkun tongei a erá met mi ngaw ussum. Ka silei pwe mi chofona, nge ekkóch ra lúkú. Nge a fen kon ngaw pwe ra poputá le apwóróusa ena pwóróus ese pwúng, me a chómmóngoló ra pwal lúkú. Epwele ifa meefiom? Iká ka ekieki ussun ekkewe ekkóch me itéchumw, iwe kopwe fókkun letipengaw ren ena kapasen pweni, iká met?—SalF. 22:1.

² Ena pwóróus a tongeni álisikich le weweiti meefien Jiowa atun a itengaw itan we. Emén me lein néún kewe chónláng a kapas chofona ussun i ngeni ewe áeménún fefin, If. Neminna a lúkú ena kapas chofona. Ena kapas chofona a efisi án popuch kewe repwe ú ngeni Jiowa. Mwirilóón, aramas meinisin ra tipis me ló, ló, ló, ra máló. (Ken. 3:​1-6; Rom 5:12) Meinisin ekkewe osukosuk sia kúkkúna lón ei ótót, áwewe chék ren máló, maun, riáfféú, ra fis pokiten ena kapas chofona Setan a poputá le achéwú lón ewe tánipiin Ichen. Itá Jiowa a meefi letipengaw ren ena sókkun kapasen pweni me ekkewe mettóch ra fis seni ena kapasen pweni? Ewer. Nge Jiowa ese akkamwéchú an song. Ren enletin, i emén Kot mi chék pwappwapwa.—1 Tim. 1:11.

3. Ifa wisach we mi aúchea?

³ A wor wisach mi aúchea le pwáári pwe mi mwáál minne Setan a eáni kapas chofona ussun Jiowa. Sia féri ena ren ach álleasochisi ewe allúk ach sipwe mwareiti itan we, Jiowa. (Kölf. 113:1) Sia mwareiti itan na atun sia ereni ekkewe ekkóch ewe enlet ussun i. Kopwe mwareiti i? Iei sipwele káé úlúngát mettóch mi amwékútúkich le mwareiti iten ach na Kot ren unusen letipach.

 SIA APWAPWAAI JIOWA ATUN SIA MWAREITI ITAN WE

4. Pwata ach mwareiti Jiowa a apwapwaai i? Áweweei. (Pwal ppii ewe sasing.)

⁴ Sia apwapwaai Semach we lón láng atun sia mwareiti itan we. (Kölf. 119:108) Iwe nge, a itá wewe ngeni pwe ewe Kot mi lapalap a ussun aramas rese unuséch mi mochen án ekkewe ekkóch repwe mwareitiir pokiten a lamot ngeniir kapasen apéchékkúl? Aapw esap ina. Ekieki ei kapas áwewe. Emén kúkkún nengngin a ssá ngeni seman we me turufaaló me ereni: “Papa ese wor e toruk me wóón ei fénúfan!” Ewe sam a pwapwa, me a pwal mwo nge chúng letipan ren met néún na a féri. Pwata? Esap weween pwe a lamot ngeni ena mwán kapasen apéchékkúl me mwareiti seni néún na nengngin. Nge sia lúkú pwe i emén sam mi tipeppós me pwapwa le kúna án néún na pwáári tong me kilisou ngeni. A silei pwe néún na nengngin epwe mámmááritá me wiliiti emén mi pwapwa pún i emén mi sile tong me kilisou. A pwal ina ussun Jiowa, ewe Sam ese wor táppin, a pwapwa atun sia mwareiti I.

5. Ifa ewe kapas chofona sia pwáári mwáállin atun sia mwareiti iten Kot we?

⁵ Atun sia mwareiti Semach we lón láng, sia pwáári pwe mi mwáál ewe pwal eú kapas chofona Setan a apasa ussun emén me emén kich. Setan a erá pwe ese wor emén aramas epwe túppwél le peni iten Kot we, me ese wor emén epwe akkamwéchú an túppwél atun a kúna sóssót. A pwal erá pwe sipwe úkútiw le angang ngeni Kot iká ese efeiéchúkich. (Hiop 1:​9-11; 2:4) Nge Jop a chék akkamwéchú an túppwél ngeni Kot, me pwáári pwe Setan emén mi kapas chofona. Nge en, kopwe pwal akkamwéchú óm túppwél ngeni Kot? Emén me emén kich sia tongeni filaatá le peni Semach we me apwapwaai i ren ach angang ngeni fán túppwél. (SalF. 27:11) Ren enletin, ina eú watteen feiéch.

6. Ifa ussun sia tongeni áppirú King Tafit me ekkewe chón Lifai? (Nehemia 9:5)

⁶ Án chókkewe mi túppwél tongei Kot, a amwékútúúr le mwareiti itan we seni unusen letiper. Iei met King Tafit a makkeei: “Ngüni, kopwe mwareiti ewe Samol mi Lapalap, leuti meinisin, kopwe mwareiti itan mi pin.” (Kölf. 103:1) Tafit a silei pwe ach mwareiti iten Jiowa we, a léllé ngeni ach mwareiti pwisin Jiowa. Atun sia rong iten Jiowa we, sia ekieki iká i met sókkun Kot, napanapan kewe mi amwarar, me ekkewe mettóch mi amwarar a féri. Tafit a mochen epini iten Seman na me mwareiti. A mochen féri ena seni ‘leutun meinisin,’ weween ren unusen letipan. A pwal ina ussun ren ekkewe chón  Lifai, ra wisen emmweni ewe angangen mwareiti Jiowa. Fán tipetekison, ra mirititi pwe ar kapas esap tongeni unusen akkarap ngeni ekkewe kapasen mwareiti mi fich ngeni iten Jiowa we. (Álleani Nehemia 9:5.) Iwe nge, ese wor tipemwárámwár pwe a apwapwaai Jiowa ar mwareiti i fán tipetekison me seni unusen letiper.

7. Ifa ussun sia tongeni mwareiti Jiowa lón ach we angangen afalafal me lón minne sia féri iteiten rán?

⁷ Lón ei fansoun, sia tongeni apwapwaai Jiowa ren ach fóffós ussun i lón ewe napanap mi pwáári úkúúkún ach kilisou ngeni me tongei i. Atun sia fiti afalafal, sipwe chemeni pwe sia achocho le álisi aramas ar repwe riri ngeni Jiowa me meefi met sia pwal meefi ussun Semach na mi tong. (Jem. 4:8) Sia pwapwa le áiti ngeni aramas ussun met Paipel a apasa ussun i, ifa ussun a pwáraaló an tong, pwúng, tipáchem, manaman, me pwal ekkóch napanapan kewe mi aúchea. Sia pwal mwareiti Jiowa me apwapwaai i ren ach achocho le áppirú i. (Efi. 5:1) Atun sia féri ena, ekkóch repwe esilla pwe sia sókkóló seni chón lón ei fénúfan mi ngaw, me eli repwe ekieki iká pwata sia sókkóló. (Mat. 5:​14-16) Atun sia fós ngeniir are chuuriir, sia tongeni áwewe ngeniir pwata sia ina ussun. Mwirilóón, chókkewe mi letipwenechar repwe mochen ririéch ngeni ach na Kot. Atun sia mwareiti Jiowa lón ekkena esin napanap, sia apwapwaai letipan.—1 Tim. 2:​3, 4.

SIA APWAPWAAI JISES ATUN SIA MWAREITI ITEN JIOWA WE

8. Pwata Jises i ewe leenien áppirú mi fókkun múrinné ren an mwareiti iten Jiowa we?

⁸ Ese wor emén lón láng me fénúfan a silefichi ewe Sam lap seni Jises. (Mat. 11:27) Jises a tongei Seman we me i ewe leenien áppirú ren an mwareiti iten Jiowa we. (Jon 14:31) Lón ewe pwinin me mwen an epwele máló, a iótek ngeni Seman we me iei met a apasa ussun ewe angang mi aúchea a féri wóón fénúfan: “Úa fen esilei ngeniir itom we.” (Jon 17:26) Met weween alon na?

9. Ifa ewe kapas áwewe Jises a eáni mi áweweéchú ussun Seman we?

⁹ Jises ese chék ereni aramas pwe Jiowa ina iten Kot. Ekkewe chón Jus Jises a asukuler, ra fen silei iten Kot we. Nge Jises a isettiw leenien áppirú ren an wisen “pwáraaló ussun I.” (Jon 1:​17, 18) Áwewe chék, ewe Tesin Ipru a pwáraaló pwe Jiowa i emén mi úméúméch me kirekiréch. (Eks. 34:​5-7) Jises a pwáárfichieló ena pwóróus mi enlet atun a eáni eú kapas áwewe ussun ewe sam me néún we mi mwálecheló. Sia kúna úkúúkún úméúméchún me kirekiréchún Jiowa lón ach álleani pwóróusen ewe sam mi kúna me towaw néún we mi áier, iwe a ssáló me souni, turufaaló, me omusaaló tipisin seni unusen letipan. (Luk 15:​11-32) Jises a álisi aramas le weweiti enletin napanapen Jiowa.

10. (a) Ifa ussun sia silei pwe Jises a néúnéú iten Seman we me mochen án ekkóch repwe pwal féri ena? (Mark 5:19) (Pwal ppii ewe sasing.) (b) Met Jises a mochen ach sipwe féri lón ei fansoun?

¹⁰ Jises mi pwal mochen án ekkewe ekkóch repwe néúnéú iten Seman we? Ewer. Ekkóch néúwisin lamalam lón fansoun Jises we, eli ra lúkú pwe a ésúfélúngaw ar repwe apasa iten Kot we, nge Jises ese fókkun mut ngeni ar ééreni ese pop seni Paipel an epwe eppeti le elingaaló iten Seman we. Ekieki ussun ewe atun a echikara ewe mwán mi wááni timon me lón ewe leeni Kerasa. Ekkewe aramas ra fókkun niwokkus me ra tingormaw ngeni Jises an epwe ló, ina popun ese nómotiw ikena. (Mark 5:​16, 17) Nge Jises a chúen mochen pwe iten Jiowa we epwe chéúló ikena ie. Ina popun a ereni ewe mwán  e echikaraatá an epwe ereni ekkewe aramas met Jiowa a féri, nge esap met i a féri. (Álleani Mark 5:19.) a A pwal mochen ach sipwe esilei iten Seman we wóón unusen fénúfan! (Mat. 24:14; 28:​19, 20) Atun sia féri ena, sia apwapwaai ach we King, Jises.

11. Met ewe Jises a áiti ngeni néún kewe chón káé ar repwe iótek ussun, me pwata a mmen aúchea ena? (Isikiel 36:23)

¹¹ Jises a silei pwe letipen Jiowa an epwe epinaaló itan we, weween pwe epwe eliméchú seni meinisin ekkewe kapas chofona a fen chéú fán itan. Ina popun néúch na Masta a áiti ngeni chókkewe mi tapweló mwirin ar repwe eáni ei iótek: “Semem mi nónnóm láng, itom epwe pin.” (Mat. 6:9) Jises a weweiti pwe ina eú mettóch mi fókkun aúchea seni meinisin mi weneitikich meinisin. (Álleani Isikiel 36:23.) Ese wor emén lón láng me wóón fénúfan mi ussun Jises lón an elingaaló iten Jiowa we. Nge atun Jises a ares, chón koputan ra tipi ngeni pwe a ésúfélúngawa iten Seman we. Ese wor tipemwárámwár pwe Jises a meefi pwe eú tipis watte án emén turunufasa are pweni iten Seman we mi pin. Ese fókkun kinamwe ren ar tipi ngeni ena. Ese mwáál ina ewe ákkáeúin popun Jises a nóm lón “eú sókkun watteen riáfféú” lón ewe kulók epwele ares lón.—Luk 22:​41-44.

12. Ifa ussun Jises a epinaaló iten Seman we?

¹² Ren án Jises epwe epini iten Seman we, a likiitú fán iteiten riáfféú, esiit, me kapas chofona mi iti ngeni. A silei pwe a fen álleasochisi Seman we lón mettóch meinisin me ese wor met epwe sáw ren. (Ipru 12:2) A pwal silei pwe Setan a fókkun mesááni lón ekkena fansoun mi áweires. (Luk 22:​2-4; 23:​33, 34) Setan a fókkun mochen atai pwúngún enletin án Jises túppwél, nge i a fókkun sópwongaw! Jises a fókkun pwáári pwe Setan i emén mi wesewesen kapas chofona, me Jises a pwal affata pwe a wor néún Jiowa chón angang mi túppwél, iir mi angang ngeni fán pwúngún enletin ar túppwél pwal mwo nge fán watteen sóssót!

13. Ifa ussun ka tongeni apwapwaai noum we King mi nennemenem?

¹³ Ka mochen apwapwaai noum we King mi nennemenem? Iwe, sópweeló le mwareiti iten  Jiowa we, me álisi aramas le silei meinisin napanapan kewe mi amwarar. Atun ka féri ena, ka tapweló lón ipwen Jises. (1 Pit. 2:21) Ka áppirú Jises ren óm apwapwaai Jiowa me pwáári pwe Setan, i emén chón kapas chofona mi sáwemmang!

SIA ÁLILLIS LE SELÁNI ARAMAS ATUN SIA MWAREITI ITEN JIOWA WE

14-15. Ikkefa ekkewe mettóch mi amwarar ra tongeni fis atun sia asukula aramas ussun Jiowa?

¹⁴ Atun sia mwareiti iten Jiowa we, sia álillis le seláni aramas. Ifa ussun? Setan ‘a ochunaaló ekiekin’ chókkewe rese lúkú. (2 Kor. 4:4) Ina minne, ra lúkúoló án Setan kewe kapas chofona, áwewe chék ren ekkeei kapas chofona pwe ese wor Kot, i a fókkun towaw senikich me ese fókkun ekieki aramas, i emén mi kirikiringaw, me a eriáfféwú aramas mi ngaw tori feilfeiló. Setan a eáni ekkena esin kapas chofona pokiten a chék mochen atai itéchún iten Jiowa we me aúkatiw aramas seni ar mochen riri ngeni I. Nge atun sia afalafal, sia eppeti án Setan epwe féri met ena a mochen. Sia áiti ngeni aramas ewe enlet ussun Semach we, me sia mwareiti iten ach na Kot mi pin. Iwe, met mwirilóón?

¹⁵ A watte manamanen ewe enlet seni án Kot Kapas. Ach áiti ngeni aramas ussun Jiowa me áiti ngeniir iká i met sókkun Kot, a atufichikich le kúna eú mettóch mi amwarar. Aramas rese chúen tupuló ren án Setan kewe kapas chofona, me ra poputá le kúna napanapen Semach we mi amwarar. Ra fókkun mwaar ren an manaman ese wor aúkúúkún. (Ais. 40:26) Ra lúkúlúk wóón pokiten unuséchún an pwúng. (Tut. 32:4) Ra káé chómmóng mettóch seni watteen an tipáchem. (Ais. 55:9; Rom 11:33) Me ra kúna oururun letiper atun ra silei pwe i tong. (1 Jon 4:8) Atun ra ririéch ngeni Jiowa, a núkúchar ar ápilúkúlúkún manaw tori feilfeiló me ar wiliiti néún. A ifa me aúchean wisach le álisi aramas le ririéch ngeni Semer na! Atun sia féri ena, me ren Jiowa epwe kich ‘chienan chón angang.’—1 Kor. 3:​5, 9.

16. Ifa ussun án ekkewe ekkóch silei pwe mi wor iten Kot a ekkesiwili manawer? Apwóróusa ekkóch pwóróus.

¹⁶ Me lepoputáán, eli sia chék áiti aramas pwe iten Kot, Jiowa. Ena mettóch a tongeni  ekkesiwili manawen emén mi letipwenechar. Áwewe chék, emén fépwúl itan Aaliyah b a mááritá lón eú famili mi fiti eú lamalam ese asukula áitien Paipel. Nge neminna ese menemenéch ren met a káé seni an lamalam me ese meefi an ririéch ngeni Kot. Iwe nge, a siwil mwirin an káé ren Chón Pwáraatá Jiowa. A poputá le meefi pwe Kot i Chiechian. Me a máirú atun a silei pwe a téttélúló iten Kot we seni chómmóng Paipel me ekkesiwil ngeni ekkewe itelap, áwewe chék ren Samol. An silei pwe iten Kot, Jiowa, a ekkesiwili manawan. A erá: “A wor iten Chiechiei we!” Iwe, met a fis? A erá: “Iei a fókkun kinamwe letipei. Úa fókkun feiéch ren ái silei iten Kot.” Pwal iei pwóróusen emén mwán itan Steve, mi chóni pekin kél me a feito seni eú famili chón Jus mi fókkun tichik le fiti éérenien ewe lamalamen Jus. A atowawaaló seni mwékútúkútún lamalam pún a kúna chómmóng angangen likótuputup. Iwe nge, mwirin málóón inan we, a fiti eú káéén Paipel emén Chón Pwáraatá Jiowa a emmweni. A fókkun chúng letipan ren an silei iten Kot. A erá: “Úse fókkun silei pwe a wor iten Kot.” A pwal erá: “Epwe kerán iei ái úpwe silei pwe mi wor Kot! Úa weweiti pwe i wesewesen Emén. Seni ena atun úa kúna emén Chienei.”

17. Pwata ka tipeppós le sópweeló óm mwareiti iten Jiowa we? (Pwal ppii ewe sasing.)

¹⁷ Lón óm angangen afalafal me asukula aramas, ka kan áiti ngeniir ewe it mi pin, Jiowa? Ka álisiir le silei iká i wesewesen met sókkun Kot? Iká ka féri ena, ka mwareiti iten Kot we. Amwo kopwe sópweeló le mwareiti iten Jiowa we mi pin ren óm álisi aramas le silei iká i wesewesen met sókkun Kot. Iká ka féri ena, kopwe seláni manawen aramas me kopwe áppirú óm we King, Kraist Jises. Nge lap seni meinisin, kopwe apwapwaai Semom we mi tong, Jiowa. Amwo kopwe ‘mwareiti o alinga itan tori feilfeilachök’!—Kölf. 145:2.