LÓN Aúlúngát, January 18, 2023, a wor eú esilesil mi kkóló aúchean a pwá wóón ewe jw.org mi erá pwe Pwiich Gage Fleegle me Jeffrey Winder ra kapachelong lón ewe Mwichen Soupwúngúpwúng án Chón Pwáraatá Jiowa. Iir me rúúemén ra angang ngeni Jiowa fán túppwél ren langattam fansoun.

Pwiich Fleegle a mááritá lón Pennsylvania lón Merika, me seman kewe me inan ra álisi le silei ewe enlet. Atun an ierin teenage, i me an we famili ra mwékút ngeni eú kúkkún sóópw ikewe a watte osupwangen chón afalafal ie. Mwirin ekis fansoun, a papatais lón November 20, 1988.

Semen me inen Pwiich Fleegle kewe ra kan pesei an epwe angang ngeni Jiowa full-time. Fán chómmóng ra kan etiwa ngeni imwer we ekkewe chónemmwen mi wisen sáifetál me chón angangen Bethel, me Pwiich Fleegle a tongeni kúna án chienach kana pwapwa. Ekiseló mwirin an papatais, a poputá le regular pioneer lón ewe September 1, 1989. Ruu ier mwirin, a pwénútá ewe mettóch a mochen achocho ngeni atun an we 12 ierin, ina an epwe angang lón Bethel. A poputá le angang lón Brooklyn Bethel lón ewe October 1991.

Atun Pwiich Fleegle a nóm Bethel, a angang lón ewe leenien ffér puk (Bindery) úkúúkún wanú ier, nge mwirin a kewis an epwe angang lón ewe Service Department. Lón ena atun, a fiti eú mwichefel lón fósun Russia ren fitu ier. Lón 2006 ra pwúpwúlú me Nadia, me neminna a fiti le angang lón Bethel. Iir ra álillis lón ewe angangen afalafal lón fósun Portugal, nge lap seni engol ier ra álillis lón ewe angangen afalafal lón fósun Spein. Mwirin án Pwiich Fleegle angang lón ewe Service Department ren fite ier, i a kewis an epwe angang lón ewe ofesin Teaching Committee, nge mwirin lón ewe ofesin Service Committee. Lón March 2022 a kewis an epwe chón álillis ngeni ewe Service Committee, án ewe Mwichen Soupwúngúpwúng.

 Pwiich Winder a mámmááritá lón Murrieta, California lón Merika. Seman kewe me inan ra áiti ngeni ewe enlet, me a papatais lón ewe March 29, 1986. Lón ewe chék maram mwirin ena, a filaatá an epwe auxiliary pioneer. A fókkun sani, ina popun a mochen sópweeló le pioneer. Mwirin fitu maramen an auxiliary pioneer, a poputá le regular pioneer lón October 1, 1986.

Atun án Pwiich Winder ierin teenage, a ló chuuri pwiin kewe rúúemén mi watte seni re angang Bethel lón ena atun. An féri ena, a amwékútú an epwe mochen apply ngeni an epwe angang Bethel atun a wattetá. Iwe, lón May 1990, a ketiw an epwe angang lón ewe Bethel lón Wallkill.

Pwiich Winder a angang lón sókkopaten kinikin lón Bethel, kapachelong lón ewe Pekin Elimelim, lón ewe Pekin Atake, me ewe Ofesin Bethel. Lón ewe ier 1997, ra pwúpwúlú me Angela, me seni ena atun ra angangfengen lón Bethel. Lón ewe ier 2014, ra mwékút ngeni Warwick, ikewe Pwiich Winder a kewis an epwe álillis lón angangen kaúún ewe ofesilap. Lón 2016 ra mwékút ngeni ewe Watchtower Educational Center lón Patterson, ikewe Pwiich Winder a angang lón ewe Audio/Video Services. Rúáánú ier mwirin, ra mwékútsefál ngeni Warwick, me Pwiich Winder a angang lón ewe ofesin Personnel Committee. Lón March 2022, a kewis an epwe chón álillis ngeni ewe Personnel Committee, án ewe Mwichen Soupwúngúpwúng.

Sia iótek pwe Jiowa epwe efeiéchú “ekkeei mwán” mi ussun “liffang,” lón ar sópweeló ar angang weires fán iten angangen ewe Mwúún Kot.—Efi. 4:8.