1. Met ekkewe sam me in ra mochen fán iten néúr kewe?

 ÁMI kana sam me in, ám mi silei pwe oua mochen álisi néúmi kewe ar repwe silei Jiowa me tongei i. Nge sise tongeni kúna Kot. Iwe, ifa usun oua tongeni álisiir ar repwe silei pwe Jiowa i wesewesen Emén me ar repwe arap ngeni i?​—Jas. 4:8.

2. Ifa usun ekkewe sam me in ra tongeni áiti ngeni néúr kewe napanapen Jiowa kewe?

² Eú minen álillis mi fókkun tongeni álisi néúmi kewe semirit ar repwe akkarap ngeni Jiowa, ina ámi káé ngeniir ewe Paipel. (2 Tim. 3:14-17) Iwe nge, ewe Paipel a affata pwal eú alen án ekkewe kúkkún ra tongeni káé usun Jiowa. Lón ewe puken Än Salomon Fos, emén sam a kan áchema ngeni néún we an esap fókkun tunaló napanapen Jiowa kewe mi pwá me lón ekkewe mettóch a fériiretá. (SalF. 3:19-21) Sipwe pwóróus wóón ifa usun ekkewe sam me in ra tongeni áeá férien Kot kewe le álisi néúr kewe semirit le káé usun napanapen Jiowa kewe.

3. Met a lamot ekkewe sam me in repwe álisi néúr kewe wóón?

³ Ewe Paipel a erá pwe ese “wor eman aramas a tongeni küna Kot. Nge aramas ra tongeni silei usun Kot ren ekewe mettoch i a föri.” (Rom 1:20) Ámi kana sam me in, ese mwáál oua sani le kunou ngeni néúmi kewe atun oua nóm lúkún. Áeá ena fansoun le álisiir ar repwe kúna ririfengenin napanapen Jiowa kewe mi amwarar me “ekewe mettoch i a föri.” Sipwele ppii met ekkewe sam me in ra tongeni káé seni án Jesus leenien áppirú.

4. Ifa usun Jesus a áeá férien Kot kewe le asukula néún kewe chón káé? (Lukas 12:24, 27-30)

⁴ Katol ifa usun Jesus a áeá férien Kot kewe le asukul. Lón  eú atun, a ereni néún kewe chón káé ar repwe katol ekkewe ángá me ekkewe pénirá. (Álleani Lukas 12:24, 27-30.) Jesus a tongeni fós usun ese lifilifil férien Kot kewe, nge a filatá an epwe fós usun ekkewe machchang me ekkewe pénirá néún kewe chón káé ra kúkkúner. Eli néún kewe chón káé ra kan kúna ekkewe ángá mi chang asan me ekkewe pénirá mi máár lemal. Ka tongeni anchangei án Jesus itini ekkena mettóch atun a fós? Me, met a féri mwirin an fós usun ekkena mettóch? A áiti ngeni néún kewe chón káé eú lesen mi fókkun múrinné usun fangafangéchún me kirekiréchún Semer we lón láng. Jiowa epwe amwéngééni me éúféúfa néún kewe chón angang mi tuppwél usun met a fér ngeni ekkewe ángá me pénirá lemal.

5. Ikkefa férien Jiowa kewe sam me in ra tongeni áeá le asukula néúr we usun I?

⁵ Ámi kana sam me in, oupwe áppirú napanapen án Jesus asukul? Oua tongeni áiti ngeni néúmi we eú me lein férien Kot kewe oua kon aúcheani, áwewe chék ren emén man are och sókkun irá oua kon sani. Atun oua ereni néúmi we usun ekkena mettóch, a lamot oupwe áwewe ngeni met ra áiti ngenikich usun Jiowa. Eli oua tongeni eisini ika met sókkun man are irá a fókkun sani. Ika oua fós usun met ekkewe a saniir, iwe neman epwe fókkun aúseling ngenikemi atun oua achocho le asukula usun Jiowa.

6. Met sia tongeni káé seni án inen Christopher we leenien áppirú?

⁶ Itá mi pwal lamot án ekkewe sam me in repwe awora watteen fansoun le research usun emén sókkun man are och sókkun irá me mwen ar repwe pwóróus ngeni néúr kewe usun met férien Jiowa kewe ra pwári usun i? Ese pwal lamot. Jesus ese pwal attama an áwewe wóón ifa usun ekkewe ángá ra mwéngé are ifa usun ekkewe pénirá ra mááritá. Inaamwo ika néúmi kewe ra sani le káé tichikin ekkewe mettóch Kot a fératá, nge fán ekkóch a chék naf kapas eis are kapas mi mwochomwoch me mecheres ren ámi oupwe áiti ngeniir eú pwóróus. Áwewe chék, iei met emén Chón Kraist mwán itan Christopher a chemeni an fis lekúkkúnún. “Inei we a kan apasa itiitin kapas mi mecheres pwe epwe álisikem le aúcheani férien Kot kewe mi nóm wiliórum. Áwewe chék, atun aua nóm únúkkún ekkewe chuuk, epwe apasa: ‘Katol me watteen me lingéchún ekkeei chuuk! Jiowa a fókkun amwarar, ika met?’ Are atun aua nóm órosset, epwe apasa: ‘Katol me péchékkúlen ekkeei lóó! Kot a manaman, ika met?’” Christopher a erá: “Ekkena itiitin kapas, ra efisi ám aupwe ekiek.”

7. Ifa usun oua tongeni áiti ngeni néúmi kewe ar repwe ekilonei usun férien Kot kewe?

⁷ Atun néúmi kewe ra mámmááritá, oua tongeni áiti ngeniir ar repwe ekilonei férien Jiowa kewe me káé usun i. Oua tongeni fós usun eú mettóch Jiowa a fératá me eisiniir, “Met ei mettóch a áiti ngonuk usun Jiowa?” Eli oupwe máirú me pwapwa atun oua rong meefien néúmi kewe.​—Mat. 21:16.

8. Met ekkewe sam me in lón Israel ra tongeni féri atun ar fetál “won al”?

⁸ A wor kapasen pesepes ngeni ekkewe sam me in lón Israel ar repwe asukula ngeni néúr kewe án Jiowa kewe allúk atun ar fetál “won al.” (Tut. 11:19) A wor ekkewe al lemalen ewe fénú Israel. A wor sókkopaten man, machchang, me pénirá, aramas ra tongeni kúna. Atun ekkewe famili lón Israel ra fetál wóón ekkewe al, ekkewe sam me in ra tongeni fós ngeni néúr kewe usun ekkewe mettóch Jiowa  a féri. Ese mwáál ámi kana sam me in a pwal suuk ngenikemi ekkena esin atun le asukula néúmi kewe. Sipwe ppii ifa usun ekkóch sam me in ra féri ena.

9. Met ka tongeni káé seni Punitha me Katya?

⁹ Emén in itan Punitha, mi nóm lón eú watteen telinimw lón India, a erá: “Atun aua kan ló chuuri ám famili lón ewe leeni mi towau seni telinimw, aua kúna pwe a suuk ngenikem alen ám aupwe asukula néúm kewe usun férien Jiowa kewe mi amwarar. Ua kúna pwe nei kewe ra kon weweéchúti férien Kot kewe atun ra nóm towau seni ekkewe leeni mi kon chómmóng aramas ie me traffic.” Ámi kana sam me in, ese mwáál ese tongeni ménúk seni néúmi kewe ewe fansoun oua kunoufengen lón eú leeni mi ling. Emén Chón Kraist fefin itan Katya, seni Moldova, a erá: “Ewe mettóch ua fókkun chechchemeni seni lekúkkúni, ina ám kunoufengen me semei kewe me inei lón ewe leeni mi towau seni telinimw. Ua kilisou ngeniir ren ar asukulaei seni lekúkkúni ai upwe kaúló me katol met Jiowa a féri me kúna i seni lón férian kewe.”

10. Met ekkewe sam me in ra tongeni féri ika a weires ngeniir ar repwe sái seni telinimw? (Ppii ewe pwóór “ Álillis fán Iten Sam me In.”)

¹⁰ Met oupwe féri ika ouse tufichin sái ngeni eú leeni mi towau seni telinimw? Emén mwán itan Amol, a pwal nónnóm India, a erá: “Ikewe ia ua nóm ie, a lamot án ekkewe sam me in repwe angang fite fite awa, me a mémmóng liwinin sái ngeni ikewe mi towau seni telinimw. Iwe nge, ekkewe sam me in ra tongeni áeá eú kúkkún park are asen eú imw, le katol férien Jiowa kewe me fós usun napanapan kewe.” Atun oua nennefetál, ese mwáál oua pwal tongeni kúnékún chómmóng férien Kot me órun leeniemi we oua tongeni áiti ngeni néúmi kewe. (Kölf. 104:24) Ese mwáál, oua tongeni kúnékún machchang, irá, molus, áchi, me metakkan. Karina, seni Germany, a  erá: “Inei we a sani pénirá, iwe, atun ua kúkkún, atun ám fetál a kan áiti ngeniei ekkewe pénirá mi ling.” Ámi kana sam me in, oua pwal tongeni néúnéú ekkewe chómmóng video me puk mi fós usun férien Kot kewe ach we mwicheich a awora le asukula néúmi kewe. Ewer, ese lifilifil ia oua nónnóm ie, oua tongeni álisi néúmi kewe le káé seni férien Kot kewe. Iei sipwele pwóróus wóón ekkóch napanapen Jiowa kewe oua tongeni áiti ngeniir.

11. Ifa usun ekkewe sam me in ra tongeni álisi néúr kewe ar repwe kúna án Jiowa tong?

¹¹ Ren ámi oupwe álisi néúmi kewe ar repwe mirititi án Jiowa tong, oua tongeni áiti ngeniir ifa usun chómmóng man ra ange pwetete le túmúnú eteniir kewe. (Mat. 23:37) Oua pwal tongeni menlapei och mettóch Kot a féri oua fókkun sani mi sókkopat sókkun. Karina, ewe sia fen fós usun, a erá: “Atun aua kan fetál me inei we, a kan pese ei ai upwe kaúló me katol ifa usun epé me epé ekkewe pénirá ra sókkofesen me ifa usun lingéchúr a pwári án Jiowa tong. Mwirin fite fite ier, ua chúen attolafichi ekkewe pénirá me katol ifa usun napanaper me anúwer ra sókkofesen. Ra kan áchema ngeniei úkúkún án Jiowa tongekich.”

12. Ifa usun ekkewe sam me in ra tongeni álisi néúr kewe ar repwe kúna án Jiowa tipachem? (Kölfel 139:14) (Pwal ppii ewe sasing.)

¹² Oupwe álisi néúmi kewe ar repwe mirititi án Kot tipachem. Jiowa a fókkun tipachem lap senikich. (Rom 11:33) Áwewe chék, oua tongeni áiti ngeni néúmi kewe ifa usun ewe konik a mwórotá me efisi ekkewe kuchu, me ifa usun ekkewe kuchu ra mwékút seni eú leeni ngeni eú leeni. (Hiop 38:36, 37) Oua pwal tongeni menlapei amwararen fférún inisin aramas. (Álleani Kölfel 139:14.) Iei met emén sam itan Vladimir a féri. A erá: “Eú rán, néúm we át a turutiw me wóón waan we pasiken me a kinás. Mwirin fitu rán, a mwó kinásan we. Ám me pwúlúwei we aua áweweei ngeni pwe Jiowa a féri inisich fitifengen me an tufichin pwisin férsefáli met a kinás me wóón. Aua áiti ngeni pwe sise tongeni kúna ena esin tufich wóón ekkewe mettóch aramas ra wisen féri. Áwewe chék, efóch tarakú ese tongeni pwisin  férsefáli mwirin an ákseten. Ei pwóróus a álisi néúm we át le weweiti án Jiowa tipachem.”

13. Ifa usun ekkewe sam me in ra tongeni álisi néúr kewe ar repwe kúna án Jiowa manaman? (Aisea 40:26)

¹³ Jiowa a etiwakich ach sipwe netá fán láng me ekieki úkúkún watteen an manaman le eleenia ekkewe fúú lón leenier. (Álleani Aisea 40:26.) Oua tongeni pesei néúmi kewe ar repwe nennetá fán láng me ekieki met ekkewe ra kúna. Iei met emén Chón Kraist fefin seni Taiwan, itan Tingting a erá usun met a chemeni seni lekúkkúnún: “Fán eú, aua ló camp me inei we, me aua tongeni kúna chómmóng fúú pokiten ause nóm lón ewe telinimw mi wor ttinen tengki ie. Lón pwal ena atun, ua lólilen ren án chienei kewe chón sukul etipetip me ua ekieki ika upwe tongeni sópweló ai angang ngeni Jiowa fán tuppwél. Inei we a pese ei ai upwe ekieki ewe manaman Jiowa a áeá le féri meinisin fúú me chemeni pwe i a tongeni áeá ena manaman le álisiei le pworacho fán ese lifilifil sóssót epwe toriei. Mwirin ai katol férien Jiowa kewe lón ena atun, a amwékútúei ai upwe alapaaló ai sileéchú i, me a lapóló ai tipeppós le angang ngeni.”

14. Ifa usun sam me in ra tongeni áeá férien Jiowa kewe le álisi néúr kewe le silei pwe i emén Kot mi pwapwa?

¹⁴ Férien Jiowa kewe ra pwári pwe i emén Kot mi pwapwa me i a pwal mochen ach sipwe pwapwa. Ekkewe scientist ra kúna pwe lape ngeni ekkewe man ra kan urumwot, kapachelong ekkewe machchang me iik. (Hiop 40:20) Néúmi kewe ra takir atun ra kúna án emén man urumwot? Eli ra fen kúna án emén kúkkún káttu urumwot ngeni eféú pwóór, are án ekkewe kúkkún kolak urumwotfengen. Atun néúmi kewe ra pwal takir atun ra katol án emén man féffér mi atakirikir, oupwe áchema ngeniir pwe sia angang ngeni emén Kot mi pwapwa.​—1 Tim. 1:11, NW.

15. Met a tongeni álisi ekkewe sam me in le silei minne néúr kewe ra ekieki? (Än Salomon Fos 20:5) (Pwal ppii ewe sasing.)

¹⁵ Fán ekkóch, a weires ngeni ekkewe sam me in ar repwe silei seni néúr kewe ekkewe osukosuk mi toriir. Ika a pwal ina usumi, eli  a lamot oupwe ‘üfatä’ met a nóm lón letipen néúmi kewe. (Álleani Än Salomon Fos 20:5.) Ekkóch sam me in ra kúna pwe a mecheres ar repwe féri ena atun iir me néúr kewe ra pwapwa le kakkatol férien Kot kewe. Pwata? Eú popun, pún ese kon wor met epwe erikaló ekiekin ekkewe nau me ekkewe sam me in. Emén sam lón Taiwan itan Masahiko a pwal fós usun eú popun, a erá: “Atun aua kunoufengen me néúm kewe, ren ám fetál wóón chuuk are fetál leppi, ra kan meefi kinamwe me pwapwa. Aua kúna pwe a mecheres ngenikem ám aupwe fós ngeniir me silei met ra ekieki.” Katya, ewe sia fen fós usun, a erá: “Sárin sukul, inei we a kan uwei ei ngeni eú park mi ling. Lón ena esin leeni mi ekinamwe, a mecheres ngeniei ai upwe ereni met a fis lón sukul are met ua lólileniesini.”

16. Ifa usun ekkewe famili ra tongeni asésé me pwapwaiti férien Jiowa kewe atun ra kunoufengen?

¹⁶ Atun ekkewe famili ra kakkatol ekkewe mettóch Jiowa a féri, ra tongeni asésé me pwapwafengen. Ena a tongeni alapaaló ar tongfengen. Ewe Paipel a apasa pwe a wor “fansoun takir” me “fansoun pwörük.” (SalAf. 3:1, 4) Jiowa a féri ekkewe leeni mi ling wóón fénúfan, ikewe sia tongeni féri ekkewe mettóch sia fókkun sani. Chómmóng famili ra sani le kunoufengen leppi, wóón chuuk, are wóón téé. Ekkóch semirit ra sani le ssá me kunou lón park, katol ekkewe man, are túkken lón chénúpupu, are leset. A chómmóng alen ach sipwe pwapwa le katol férien Jiowa kewe.

17. Pwata a lamot án ekkewe sam me in repwe álisi néúr kewe le pwapwaiti férien Kot kewe?

¹⁷ Lón án Kot we ótót séfé, ekkewe sam me in me néúr kewe repwe pwapwaiti férien Jiowa kewe lón ewe esin napanap rese tongeni féri lón ei fansoun. Lón ena atun, sisap chúen niweiti ekkewe man, me iir resap pwal niweitikich. (Ais. 11:6-9) Esap fókkun tongeni much ach fansoun le kakkatol férien Jiowa kewe. (Kölf. 22:26) Nge ámi kana sam me in, ousap witiwiti ena atun iwe oupwap álisi néúmi kewe ar repwe poputá le sani le kakkatol férien Kot kewe. Atun oua áeá férien Jiowa kewe le asukuler usun i, ese mwáál repwe tipeeú ngeni alon King Tafit ei, a apasa: “Ai Samol, esap pwal wor och föför mi wewe ngeni om kewe föför.”​—Kölf. 86:8.