1-2. Ika kesaamwo mmólnetá ngeni papatais, pwata kosap lichippúng? (Ppii ewe sasing wóón péén.)

 IKA ka mochen papatais, iwe, ina och mettóch mi fókkun múrinné ka achocho ngeni. Ka mmólnetá le féri ena lón ei fansoun? Ika ka lúkúlúk pwe ka mmólnetá me ekkewe mwán mi ásimaw ra pwal tipeeú ngonuk wóón, iwe kosap tipemwaramwar le papatais ineet chék a suuk ngonuk. Ika ka féri ena, kopwe kúna feiéch lón manawom lón óm angang ngeni Jiowa.

² Nge, mi wor emén a erenuk pwe mi lamot kopwe alapaaló óm feffeitá lón pekin lúkú mwen kopwe papatais? Are ka pwisin meefi pwe mi lamot ngonuk ena? Ika ina, kosap lichippúng. Ka tongeni feffeitá lón pekin lúkú me tikeri ena mettóch mi aúchea ka achocho ngeni, ese lifilifil ika en emén kúkkún are watte.

3. Met ewe re Itiopia a eisini Filip, me ifa ewe kapas eis a ppiitá? (Föför 8:36, 38)

³ Álleani Föför 8:36, 38. Emén néúwis mi tekia chón Itiopia, a eisini Filip: “Met a epeti ai üpwe papatais?” Ena re Itiopia a mochen papatais, nge met, a enletin mmólnetá le papatais?

4. Ifa usun ewe re Itiopia a pwári pwe a fókkun mochen sópweló an káé?

⁴ Ewe re Itiopia “a feila Jerusalem pwe epwe fel ngeni Kot.” (Föf. 8:27) Iwe, ese mwáál a kan fiti ewe lamalamen Jus. Ese wor tipemwaramwar pwe a káé usun Jiowa seni lón ekkewe taropwe mi pin lón ewe Tesin Ipru. Iwe nge, a pwal mochen alapaaló silean. Áwewe chék, met ena mwán e féri atun Filip a chuuri me wóón ewe al? A álleani eú scroll makkeien ewe soufós Aisea. (Föf. 8:28) Ina eú pwóróus lón Paipel mi alóllóól.  Ena mwán ese chék menemenéch ren an káé ekkóch ekkewe popun afalafal lón Paipel, nge a mochen alapaaló minne a kákkáé.

5. Met ewe re Itiopia a féri ngeni minne a káé?

⁵ Ewe mwán, i emén néúwis mi tekia lón Itiopia fán Kiwin Kantake. I a wisen “tümwünü pisekin mi aüchea me nöün moni meinisin.” (Föf. 8:27) Iwe, neman a chómmóng met a kan féfféri lón wisan kewe. Iwe nge, a awora fansoun fán iten an fel ngeni Jiowa. Ese chék menemenéch ren an kákkáé ewe enlet, nge a pwal apwénúetá minne a káé. I a sái seni Itiopia ngeni ewe imwenfel lón Jerusalem pwe epwe fel ngeni Jiowa. Ese mwáál, a lamot fansoun me moni fán iten an na sái, nge ese pwal ekieki pokiten a mochen fel ngeni Jiowa.

6-7. Ifa usun án ewe re Itiopia tongei Kot a péppéchékúleló?

⁶ Ewe re Itiopia a káé seni Filip ekkóch mineféén pwóróus mi enlet. Eú me leir, ina Jesus ewe Messaia. (Föf. 8:34, 35) Ena mwán a fókkun pwapwa ren an silei met Jesus a fen féri fán itan. Iwe, met a féri mwirin ena? A tongeni filatá an epwe chék sópweló le fiti ewe lamalamen Jus. Iwe nge, an tong ngeni Jiowa me Néún we a péchékkúleló. Iwe a féri eú kefil mi aúchea, a filatá an epwe papatais me wiliti chón tapweló mwirin Jesus Kraist. Atun Filip a kúna pwe ena mwán a mmólnetá, iwe a papataisi.

⁷ Ika kopwe áppirú met ena re Itiopia a féri, ka tongeni mmólnetá ngeni papatais. Ka pwal tongeni apasa fán lúkúlúk, “Met a epeti ai üpwe papatais?” Sipwe ppii ifa usun ka tongeni féri ekkeei mettóch ewe re Itiopia a féri: I a sópweló le kákkáé, a apwénúetá minne a káé, me a sópweló le apéchékkúla an tongei Kot.

8. Met Johannes 17:3 a apasa mi lamot óm kopwe féri?

⁸ Johannes 17:3, NW a apasa: “Iei ewe manaw esemuch, ar repwe sissileeló en, ewe emén chék Kot mi enlet, pwal Jises Kraist ewe ka tiinaato.” Alon Jesus ei a álisuk óm kopwe filatá le káé ewe Paipel? Ina met a fis ngeni chómmóng me leich. Nge, alon na mi pwal áiti ngenikich ach sipwe sópweló le kákkáé? Ewer. Ese fókkun tongeni much ach sipwe “sissileeló . . . ewe emén chék Kot mi enlet.” (SalAf. 3:11) Ach káé epwe sópwósópwóló tori feilfeiló. Lapólóón ach kákkáé, pwal ina lapólóón ach ririéch ngeni Jiowa.​—Kölf. 73:28.

9. Met a lamot sipwe féri mwirin ach silei ekkewe popun afalafal lón Paipel?

⁹ Lupwen sia kerán poputá le káé usun Jiowa, sia chék káé ekkewe popun afalafal  lón Paipel. Lón néún aposel Paulus we taropwe ngeni ekkewe chón Ipru, a erá pwe ikkena “ekewe lessen fän iten chon popuetä kaiö.” Ese erá pwe “ekewe lepoputän lessen,” ra aúcheangaw. Nge a pwári pwe ra usun ewe milik ekkewe ménúkol ra únúmi. (Ipru 5:12; 6:1) A pwal pesei meinisin Chón Kraist ar resap chék menemenéch ren ekkewe popun afalafal, nge repwe pwal sópweló ar káé me káé ekkewe pwóróus mi alóllóól lón án Kot we Kapas. Ka ámááraatá óm mochen káé ekkewe káit mi alóllóól lón Paipel? Ka mochen feffeitá lón pekin lúkú me sópweló le kákkáé usun Jiowa me minne a tipeni?

10. Pwata a weires ngeni ekkóch ar repwe káé?

¹⁰ Iwe nge, chómmóng me leich a weires ngenikich ach sipwe káé. Met meefiom usun káé? Lón óm sukul, ka káé óm kopwe angéch le állea me angéch le káé? Ka sani le káé, me ka meefi pwe a chómmóng met ka káé seni? Are, ka kúna pwe a weires ngonuk óm kopwe káé me lón puk? Ika ina, esap chék en ka meefi ena. Iwe nge, Jiowa a tongeni álisuk. I mi unuséch me i ewe Sense mi fókkun múrinné seni meinisin.

11. Ifa usun Jiowa a ánnetatá pwe i ewe Soukáit mi Lap?

¹¹ Jiowa a eita ngeni pwisin i, ewe Soukáit mi Lap. (Ais. 30:20, 21) I emén Sense mi mosonottam, kirekiréch, me weweitikich. A kan kútta seni néún kewe chón sukul ekkewe mettóch mi múrinné mi nóm rer. (Kölf. 130:3) Ese pwal menei senikich ekkewe mettóch sise tufichin féri. Chemeni, pwe i a féri tupwuom, ina eú liffang mi amwarar. (Kölf. 139:14) A pwisin nóm rech ewe mochen le káé. Ewe Chón Férikich a mochen ach sipwe káé tori feilfeiló me sipwe pwapwa le féri ena. Ina minne, a lamot sipwe “fokun moneti” ewe enlet lón Paipel lón ei fansoun. (1 Pet. 2:2) Isetiw met ekkewe kopwe achocho ngeni nge ka tongeni tikeri. Kopwe pwal apwénúetá óm kókkótun állea me káé Paipel. (Jos. 1:8) Ren án Jiowa álillis, ka tongeni sassanaaló állea, me epwe lapóló óm kákkáé usun i.

12. Pwata a mmen lamot ach sipwe káé pwóróusen manawen Jesus me an angangen afalafal?

¹² Awora fansoun iteitan le ekilonei pwóróusen manawen Jesus me an angangen afalafal. A mmen lamot ach sipwe áppirúfichi Jesus ika sia mochen angang ngeni Jiowa, ákkáeúin lón ekkeei fansoun mi áweires. (1 Pet. 2:21) Jesus a ereni néún kewe chón káé pwe epwe toriir sóssót. (Luk. 14:27, 28) Iwe nge, a lúkúlúk pwe néún kana chón káé ra tongeni tuppwél ngeni Kot, usun chék i. (Joh. 16:33) Káé tichikin pwóróusen manawen Jesus, me isetiw met kopwe achocho ngeni lón óm áppirú i lón manawom iteiten rán.

13. Met kopwe kan tittingorei Jiowa, me pwata?

¹³ Ese fókkun naf an epwe chék wor óm sile. Ewe popun a lamot ngonuk sile pwe kopwe tongeni alapaaló óm káé usun Jiowa me ámááraatá ekkeei napanap, áwewe chék ren óm tongei i me lúkú i. (1 Kor. 8:1-3) Atun ka sópweló le kákkáé, kopwe kan tittingorei Jiowa an epwe álisuk pwe epwe lapóló óm lúkú. (Luk. 17:5) A kirekiréch le pélúweni ekkena esin iótek. Ewe lúkú mi enlet mi lóngólóng wóón sile mi pwúng usun ach we Kot, epwe álisuk le feffeitá.​—Jas. 2:26.

14. Ifa usun aposel Petrus a menlapei lamoten ach sipwe apwénúetá minne sia káé? (Pwal ppii ewe sasing.)

¹⁴ Ewe aposel Petrus a menlapei lamoten án chókkewe mi tapweló mwirin Kraist repwe akkapwénúetá minne ra káé. A fós usun pwóróusen Noa lón Paipel. Jiowa a ereni Noa pwe epwe nieló ekkewe aramas mi ngaw lón an we fansoun ren eú noter. Án Noa me an  we famili silei warotoon ewe noter, ese naf ren ar repwe kúna manaw. Chemeni pwe Petrus a fós usun ewe fansoun me mwen ewe Noter, “lupwen Noa a föri ewe waimw.” (1 Pet. 3:20) Ewer, Noa me an we famili ra apwénúetá met ra silei seni Kot ren ar fala ewe waimw. (Ipru 11:7) Petrus a apépééi met Noa a féri ngeni papatais, a apasa: “Ei koluk eu liosun papatais mi amanauakemi iei.” (1 Pet. 3:21) Iwe, sia tongeni apépééi ewe angang ka féfféri iei pwe kopwe mmólnetá ngeni papatais, ngeni ewe angangen fala ewe waimw Noa me an we famili ra féri ren fite fite ier. Ifa ewe angang mi lamot kopwe féri pwe kopwe mmólnetá ngeni papatais?

15. Ifa usun kopwe pwári pwe ka enletin aier?

¹⁵ Eú me lein ekkewe mettóch mi lamot sipwe akkomw féri, ina enletin aier seni ach tipis. (Föf. 2:37, 38) Lupwen sia enletin aier, sipwe enletin féri siwil lón manawach. Ka fen úkútiw le féri ekkewe mettóch mi eletipengawa Jiowa, áwewe chék ren óm eáni manaw mi limengaw, ún suupwa, are eáni kapasingaw are kapas mi ámmetek? (1 Kor. 6:9, 10; 2 Kor. 7:1; Ef. 4:29) Ika kesaamwo féri, kopwe achocho le féri siwil. Fós ngeni ewe mi wisen káé ngonuk, are tingor álillis me emmwen seni ekkewe mwán mi ásimaw lón óm we mwichefel. Ika en emén kúkkún are sáráfé mi chúen nóm ren semom me inom, kopwe tingorer ar repwe álisuk pwe kopwe úkútiw le féri ekkewe mettóch mi ngaw mi eppetuk óm kopwe papatais.

16. Met a kapachelong lón eú kókkótun fel ngeni Jiowa?

¹⁶ A pwal lamot ach sipwe fiti eú kókkótun fel ngeni Jiowa. A kapachelong lón ena kókkót, óm fiti ekkewe mwich me uwawu meefiom. (Ipru 10:24, 25) Me atun a fichiituk óm kopwe fiti ewe angangen afalafal, kopwe pwal apachaalong lón óm na kókkót. Lapólóón óm fiti ewe angangen afalafal, pwal ina lapólóón óm pwapwa. (2 Tim. 4:5) Ika en emén kúkkún are sáráfé mi chúen nóm ren semom me inom, pwisin eisinuk: ‘Mi lamot án semei kewe me inei repwe áchema ngeniei ai upwe fiti mwich are ewe angangen afalafal? Are, ua pwisin mwékút?’ Ren óm féri ekkena mettóch, ka pwári pwe a wor óm lúkú me ka tongei Jiowa Kot me kilisou ngeni ren ekkewe mettóch a fang ngonuk. Ikkena ekkewe  liffang ka fang ngeni Jiowa, ekkewe angang mi pwári pwe ka tuppwél ngeni. (2 Pet. 3:11, NW; Ipru 13:15) Meinisin ekkewe liffang sia fang ngeni Jiowa seni letipach, ra apwapwaai i. (Apépé ngeni 2 Korint 9:7.) Sia féri ekkena mettóch, pokiten sia pwapwa le fang ngeni Jiowa seni unusen tufichich.

17-18. Menni napanap mi aúchea epwe álisuk le feffeitá ngeni papatais, me pwata? (Än Salomon Fos 3:3-6)

¹⁷ Atun óm sópweló le feffeitá ngeni papatais, epwe toruk ekkóch sóssót me weires. Ekkóch aramas neman repwe esiitok ren óm mineféén lúkú, eli repwe pwal mwo nge ú ngonuk are eriáfféwúmwááluk. (2 Tim. 3:12) Eli ka achocho le úkú seni och mettóch en mi silei pwe mi ngaw, nge fán ekkóch ka chúen féri ena mettóch. Are neman ka chipwangeló me meefi lichippúng pokiten ewe mettóch ka achocho ngeni usun itá a kon towau. Met epwe álisuk le likiitú? Eú napanap mi fókkun aúchea, ina óm tongei Jiowa.

¹⁸ Ewe mettóch mi nóm reom mi fókkun aúchea seni meinisin, ina óm tongei Jiowa, ina ewe napanap mi múrinné. (Álleani Än Salomon Fos 3:3-6.) Ika a péchékkúl óm tongei i, a tongeni álisuk óm kopwe sópwéch le likiitú fán ekkewe weires lón manawom. Me ika a nóm reom ena esin tong, kosap úkútiw le angang ngeni Jiowa atun a toruk osukosuk. Fán chómmóng, ewe Paipel a fós usun án Jiowa tong enlet ngeni néún kewe chón angang. An na tong enlet, a wewe ngeni an esap fókkun likitaló néún kewe aramas are esap fókkun úkútiw le tongeer. (Kölf. 100:5) Kot a féruk lón pwisin napanapan. (Ken. 1:26) Ifa usun ka tongeni áppirú ena esin tong?

19. Ifa usun ka tongeni alapaaló óm kilisou ngeni Jiowa ren meinisin met a féri fán itom? (Kalatia 2:20)

¹⁹ Kopwe pwári óm kilisou. (1 Tes. 5:18) Iteiten rán, kopwe pwisin eisinuk, ‘Ifa usun Jiowa a pwári an tong ngeniei?’ Iwe chemeni óm kopwe kilisou ngeni Jiowa lón óm iótek, tichiki ngeni ekkewe mettóch a féri fán itom. Kopwe mirititi pwe pwisin Jiowa a féri ekkewe mettóch mi múrinné fán itom pokiten a tongeok, usun chék án ewe aposel Paulus mirititi ena usun Jiowa. (Álleani Kalatia 2:20.) Pwisin eisinuk, ‘Ua mochen pwár ngeni pwe ua pwal tongei?’ Óm tongei Jiowa epwe álisuk óm kopwe sópweló le ttiisonuk sóssót me sópwéch le likiitú fán ekkewe weires. Epwe amwékútuk óm kopwe sópweló le  fel ngeni Jiowa iteitan me pwár ngeni Semom na óm tongei iteiten rán.

20. Met a lamot kopwe féri pwe kopwe fangóló manawom ngeni Jiowa, me ifa úkúkún aúchean ena kefil?

²⁰ Ló, ló, ló, óm tongei Jiowa epwe amwékútuk le eáni eú iótek mi kkóló aúchean. Kopwe fangóló manawom ngeni Kot. Chemeni pwe atun ka fangóló manawom ngeni Jiowa, a nóm reom ei ápilúkúlúk mi amwarar: Ka tongeni wiliti emén néún tori feilfeiló. Atun ka fangóló manawom ngeni Jiowa, ka pwon pwe kopwe angang ngeni lón fansoun kinamwe me fansoun weires. Ese pwal chúen lamot óm kopwe eánisefáli ena esin pwon. Ewer, atun sia fangóló manawach, sia féri eú kefil mi chou. Nge ekieki ei: Epwe chómmóng kefil kopwe féri lón manawom, ekkóch me leir ra fókkun múrinné, nge ese wor eú kefil kopwe féri epwe fókkun múrinné lap seni óm kefil le fangóló manawom ngeni Jiowa. (Kölf. 50:14) Satan epwe sótun apwangapwangaaló óm tongei Jiowa pwe a mochen kopwe fangetá lón óm tuppwél ngeni. Kosap fókkun mut ngeni Satan an epwe win! (Hiop 27:5) Óm fókkun tongei Jiowa epwe álisuk le akkapwénúetá óm pwon ngeni me ririéch ngeni Semom na lón láng.

21. Pwata sia tongeni erá pwe papatais esap ina muchúlóón óm angang ngeni Jiowa nge fen ina poputáán?

²¹ Mwirin óm fangóló manawom ngeni Jiowa, fós ngeni ekkewe mwán mi ásimaw lón óm we mwichefel usun ekkewe mettóch mi lamot kopwe féri. Nge kopwe chemeni fansoun meinisin, pwe papatais esap ina muchúlóón óm angang ngeni Jiowa nge fen ina poputáán. Epwe poputááni eú manaw ese wor muchún lón óm angang ngeni Jiowa. Ina minne, kopwe apéchékkúlaló óm tongei Semom na iei. Isetiw met kopwe achocho ngeni pwe óm tong epwe péppéchékúleló iteiten rán. Óm féri ena, epwe amwékútuk óm kopwe papatais. Epwe ina eú rán mi fókkun apwapwa. Nge ina chék kerán poputáán. Amwo óm tongei Jiowa me Néún we, epwe péppéchékúleló tori feilfeiló!