Pwata ewe mwán mi iteni “Ätenan” a erá, “mwirimwiri kewe resap tongeni fanüeni” ewe fénú ika a pwúlúweni Rut? (Rut 4:1, 6)

Lón fansoun lóóm, ika emén mwán mi pwúpwúlú a máló nge ese wor néún, iwe met epwe fis ngeni fénúan we? Itá epwele moroffócholó itan we? Ewe Allúkún Moses epwe álisikich le silei pélúwen ekkena kapas eis.

Met epwe fis ngeni fénúen emén ika a máló, me met epwe fis ngeni fénúen emén ika a wéúngawoló me améméló? Emén pwiir are aramaser mi kon kkan ngeniir epwe tongeni angei are méénisefáli ena fénú pwe ena famili epwe chúen fénúeni ena fénú.​—Lif. 25:23-28; Num. 27:8-11.

Ifa usun ena kókkót a túmúnú an esap moroffócholó iten ewe mwán mi máló? Ren án pwiin ewe mi máló pwúlúweni pwúlúwan we usun chék met a fis ngeni Rut. Ena mwán mi pwúlúweni pwúlúwen pwiin we mi máló epwe néúnéú me wóón me wor mwirimwirin mi wisen sópweló iten ewe mi máló me álemwiri fénúan we. Ena kókkót mi pwári tong a pwal túmúnú ekkewe fefin mi má seniir pwúlúwer.​—Tut. 25:5-7; Mat. 22:23-28.

Áwewe chék iei pwóróusen Naomi. A pwúlúweni emén mwán itan Elimelek. Atun pwúlúwan na me néún kewe rúúemén át ra máló, ese chúen wor emén mwán epwe wisen túmúnú. (Rut 1:1-5) Atun Naomi a liwiniti Juta, a ereni Rut pwúlúwen emén néún kewe át an epwe tingorei Poas epwe wisen méénisefáli fénúer we. Poas i aramasen Elimelek. (Rut 2:1, 19, 20; 3:1-4) Nge Poas a silei pwe mi pwal wor emén aramasen Elimelek mi kon kkan ngeni Elimelek, nge Paipel a eita ngeni aramasan na “Ätenan.” Iwe, a wor án Átena pwúúng le akkomw filatá ika a mochen méénisefáli ewe fénú.​—Rut 3:9, 12, 13.

Akkomwan ‘Ätena’ a tipeeú ngeni an epwe féri ena. (Rut 4:1-4) A silei pwe a lamot epwe awora méén ena fénú, nge a pwal silei pwe Naomi a fen chinnap, iwe esap chúen tongeni néúnatiw emén epwe wisen álemwiri ewe fénú seni Elimelek. Ewe mi iteni “Ätenan,” epwe tongeni angei ena fénú me epwe kapachelong lón fénúan, ina popun usun itá a win ika a féri ena.

Nge Átena a siwili an ekiek le méénisefáli ena fénú atun a silei pwe mi lamot an epwe pwúlúweni Rut. A apasa: “Üsap mochen möni ewe fanü, pun mwirimwiri kewe resap tongeni fanüeni me mürin.” (Rut 4:5, 6) Pwata a siwili an ekiek?

Ika Átena are pwal emén a pwúlúweni Rut, nge Rut a néúni emén át, iwe ena át epwe álemwiri fénúen Elimelek we. Iwe ifa usun ena mettóch epwe efisi án mwirimwirin Átewe kewe resap tongeni fénúeni ewe fénú? Paipel ese pwal affata, nge eli ikkeei ekkóch popun.

• Áeúin, ewe moni a méén ngeni ewe fénú, epwe solap pwe esap tongeni fénúeni fénúen Elimelek we. Epwe ló ngeni néún Rut we át.

• Oruuan, epwe wisen amwéngééni me túmúnú Naomi me Rut.

• Aúlúngátin, ika Rut a pwal néúnéú me wóón ‘Ätena,’ nge a pwal pwisin wor néún Átena, iwe a lamot án néúr kana repwe fénúenifengeni ewe fénú.

• Arúáánún, ika ese wor pwisin néún Átenan, iwe epwe wor án ewe át Rut a néúnatiw pwúúng wóón fénúen Elimelek me fénúen ewe mi iteni Átenan. Ika Átena a máló, iwe ewe át mi uwei iten Elimelek, epwe wisen fénúeni fénúen ewe mi iteni Átenan. Iwe, Átena, ese mochen an epwe fis ena mettóch ngeni fénúan ren an álisi Naomi. A mochen pwe Poas aramasen Elimelek we epwele wisen méénisefáli ewe fénú. Poas a féri ena pwe a mochen “aupwätiu mwrimwirin ewe mi mäla, pwe repwe fanüeni fanüan.”​—Rut 4:10.

A ffat pwe Átena a kon aúcheani pwisin itan me fénúan. A achéchééi pwisin. Inaamwo ika a fókkun mochen an esap morolo itan, nge lón ei fansoun sise mwo nge silei ifa itan. Ese pwal angei ewe feiéch mi kkóló aúchean Poas a angei ren an wiliti emén me lein semelapen ewe Messaia, Jesus Kraist. A mmen eletipechou án ewe mi iteni Átena achéchééi pwisin i, iwe ese mochen álisi emén mi nóm lón osupwang!​—Mat. 1:5; Luk. 3:23, 32.