1-2. Met a kan fis atun papatais, me met sipwele káé lón ei lesen?

 KA FEN piin katol eú kúmiin chón papatais? Ka rong ar pélúweni ekkewe ruu kapas eis fán lúkúlúk mwen repwele papatais. Ka kúna pwapwaan chón ar kewe famili me chiechier kewe. Me atun ekkena chón papatais ra tuutá me lón ewe konik, ka rong episipis me kúna mese pwapwaan meinisin. Iteiten wiik a wor fitengeréú ra fangóló manawer me papatais pwe repwe wiliti néún Jiowa Chón Pwáraatá.

² Nge en? Ika ka ekiekin papatais, iwe en emén mi fókkun aúchea me lón ei ótót mi ngaw pún ka “kütta Kot.” (Kölf. 14:1, 2) Ei lesen a mak fán itom, ese lifilifil ika en emén kúkkún are watte. Nge ren kich ekkewe mi fen papatais, sia pwal mochen apéchékkúlaló ach úppós le angang ngeni Jiowa tori feilfeiló. Ina popun iei sipwele káé úlúngát me lein ekkewe chómmóngun popun sia mochen angang ngeni Jiowa.

3. Pwata néún Jiowa aramas ra aúcheani minne mi enlet me minne mi pwúng? (Kölfel 19:8; 119:163)

³ Jiowa a allúkú ngeni néún kewe aramas ar repwe aúcheani are “sani let.” (Sek. 8:19) Jesus a pesei ekkewe chón tapweló mwirin ar repwe féri minne mi pwúng. (Mat. 5:6) Weween pwe repwe enletin mochen féri minne mi pwúng, múrinné, me limeliméch mwen mesen Kot. Ka aúcheani minne mi enlet me minne mi pwúng? Aua lúkú pwe ka aúcheani. Ka oput chofona me meinisin met mi mwáál me ngaw. (Álleani Kölfel 19:8; 119:163.) Emén mi chofona a áppirú Satan, ewe sounemenemen ei fénúfan. (Joh. 8:44; 12:31) Eú me lein ekkewe mettóch Satan a achocho le féri, ina an pweni iten Jiowa Kot we mi pin. A achéúfetálei kapas chofona usun ach we Kot seni ewe atun a fis ewe angangen ú ngeni lón Eten. A achocho le  efisi án aramas repwe ekieki pwe Jiowa i emén Sounemenem mi achéchééi pwisin i, chofona, me amwéchú minne mi múrinné seni aramas. (Ken. 3:1, 4, 5) Án Satan kapas chofona usun Jiowa a chúen sópwósópwóló le poisonú ekiekin me letipen aramas. Atun aramas ra filatá ar resap aúcheani are “sani let,” Satan a tongeni etipetiper le féri meinisin sókkun féffér ese pwúng me féffér mi ngaw.​—Rom 1:25-31.

4. Ifa usun Jiowa a pwári pwe i “ewe Koten enlet”? (Pwal ppii ewe sasing.)

⁴ Jiowa i “ewe Koten enlet” me a kirekiréch le asukula ewe enlet ngeni chókkewe mi tongei i. (Kölf. 31:5, NW) An féri ena, a álisiir ar resap chúen tupuló ren án Satan kapas chofona. Jiowa a pwal áiti ngeni néún kewe chón angang ar repwe wenechar me eáni féfférún pwúng. Ena mettóch a álisiir le eáni ekiek pwúng usun pwisin iir me eáni ewe kinamween letip. (SalF. 13:5, 6) A pwal féri ngonuk ena, atun ka káé ewe Paipel? Ka káé pwe minne Jiowa a eáni ekiek me féffér a fókkun múrinné fán iten aramas meinisin me pwal fán itom. (Kölf. 77:13) Ina popun, ka mochen féri met Kot a erá pwe mi pwúng. (Mat. 6:33) Ka mochen esilei ngeni aramas ewe enlet, me ánneta pwe minne Satan a erá usun ach we Kot Jiowa, a chofona. Ifa usun kopwe féri ena?

5. Ifa usun ka tongeni penaatá minne mi enlet me minne mi pwúng?

⁵ Ka tongeni eáni ewe sókkun manaw mi pwári ngeni aramas meinisin pwe ka oputa án Satan kewe kapas chofona me ka penaatá minne mi enlet. Ka tongeni pwári pwe ka mochen án Jiowa epwe noum Sounemenem me mochen féri minne a apasa pwe mi pwúng. Ifa usun kopwe féri ena? Ina ren óm pwon ngeni lón iótek pwe kopwe angang ngeni tori feilfeiló me ren óm papatais. Óm aúcheani minne mi enlet me minne mi pwúng, epwe fókkun amwékútuk óm kopwe filatá le papatais.

6. Me ren Kölfel 45:4, ikkefa ekkewe popun ka tongei Jesus Kraist?

⁶ Pwata ka tongei Jesus Kraist? Ppii ekkeei ekkóch popun mi múrinné mi mak lón Kölfel 45:4. (Álleani.) Jesus a peni minne mi enlet, aúcheani tipetekison, me a aúcheani minne mi pwúng. Ika ka aúcheani minne mi enlet me minne mi pwúng, iwe ka pwal tongei Jesus Kraist. Ekieki usun pworaan Jesus le peni minne mi enlet me minne mi pwúng.  (Joh. 18:37) Iwe nge, ifa usun Jesus a áiti ngenikich ach sipwe tipetekison?

7. Pwata ka aúcheani án Jesus tipetekison?

⁷ Jesus a áiti ngenikich ach sipwe tipetekison ren an isetiw leenien áppirú. Áwewe chék, ling meinisin a ngeni Seman we, nge esap ngeni pwisin i. (Mark. 10:17, 18; Joh. 5:19) Met ka meefi ren tipetekisonun Jesus? Ese amwékútuk óm kopwe tongei Néún Kot na me áppirú i? Ewer. Pwata Jesus a tipetekison? Pún a tongei me áppirú Seman we, ewe mi tipetekison. (Kölf. 18:35; Ipru 1:3) Kese mochen chiechi ngeni Jesus, ewe mi unusen áppirú napanapen Jiowa kewe?

8. Pwata sia tongei Jesus néúch we King?

⁸ Sia tongei Jesus, néúch we King, pokiten i ewe Sounemenem mi múrinné seni meinisin. Jiowa pwisin a asukula Néún na me seikaatá an epwe nemenem. (Ais. 50:4, 5) Pwal ekieki usun án Jesus pwári ewe esin tong mi pennúkúóló pwisin mochenin. (Joh. 13:1) Pokiten Jesus i noum King, a fókkun fich ngeni óm kopwe tongei. A áweweei pwe chókkewe mi enletin tongei, iir chiechian pwe ra pwári ar tongei ren ar álleasochisi an kewe allúk. (Joh. 14:15; 15:14, 15) A ifa me feiéchúch ren ach chiechi ngeni Néún Jiowa na!

9. Ifa usun án Chón Kraist papatais a léllé ngeni án Kraist papatais?

⁹ Eú me lein án Jesus kewe allúk, ina án ekkewe chón tapweló mwirin repwe papatais. (Mat. 28:19, 20) A isetiw leenien áppirú. Nge an papatais a sókkóló seni án ekkewe chón tapweló mwirin papatais. (Ppii ewe pwóór, “ Met Sókkofesenin án Jesus Papatais me án Ekkewe Chón Tapweló Mwirin?”) Nge a pwal léllé lón och napanap. Atun Jesus a papatais, a pwári pwe epwele féri letipen Seman we. (Ipru 10:7) A pwal ina usun ren ekkewe chón tapweló mwirin, atun ra papatais ra pwári ngeni aramas pwe ra fangóló manawer ngeni Jiowa Kot. Seni ena atun, ewe mettóch mi kon aúchea lón manawer, ina ar féri letipen Kot, nge esap pwisin letiper. Iwe ra áppirú met néúr na Masta a féri.

10. Pwata kopwe tongei Jesus, me met ena tong epwe amwékútuk le féri?

¹⁰ Ka lúkú pwe Jesus i Néún Jiowa we áláemén, me ka pwapwa pwe i ewe King Kot a seikaatá an epwe nemenem wóóch. Ka silei pwe Jesus a tipetekison me a áppirúfichi Seman we. Ka silei usun an amwéngééni ekkewe mi echik, oururu ekkewe mi letipechou, me pwal mwo nge echikara ekkewe mi semmwen. (Mat. 14:14-21) Ka fen kúna usun an emmweni an we mwichefel lón ei fansoun. (Mat. 23:10) Me ka silei pwe epwe pwal féri chómmóng mettóch fán itach lón mwachkkan pokiten i Kingen án Kot we Mwú. Ifa usun ka tongeni pwári óm tongei? Ren óm áppirú i. (Joh. 14:21) Ka tongeni poputá le féri ena ren óm fangóló manawom ngeni Jiowa me papatais.

11. Ifa ewe ákkáeúin popun án emén epwe papatais, me pwata?

¹¹ Ifa ewe ákkáeúin popun án emén epwe papatais? Jesus a áiti ngenikich án Kot we allúk mi lapalap seni meinisin ren an erá: “Kopwe echeni ewe Samol om Kot ren unusen lelukom, ren unusen ngünum, ren unusen ekiekum pwal ren unusen tufichum.” (Mark. 12:30) Ekkena itiitin kapas ra pwári ifa úkúkún óm tongei Kot?

12. Pwata ka tongei Jiowa? (Pwal ppii ewe sasing.)

¹² A chómmóng popun óm kopwe tongei Jiowa. Áwewe chék, ka silei pwe i “ewe lepopun manau meinisin,” me i ewe Chón Awora “lifang mi mürina meinisin me feiöch mi unusöch meinisin.” (Kölf. 36:9; Jas. 1:17)  Meinisin ekkewe mettóch mi múrinné mi nóm reom, ra feito seni ach na Kot mi tong me kisáseú.

13. Pwata ewe méén kepich ina eú liffang mi fókkun aúchea?

¹³ Ewe méén kepich ina eú liffang mi fókkun aúchea Jiowa a fang ngenikich. Pwata sia tongeni erá ena? Ekieki ririéchún Jiowa me Néún we. Jesus a apasa: “Semei a echeniei,” me “ngang üa echeni Semei.” (Joh. 10:17; 14:31) Ewe riri lefiler a péchékkúleló atun ra nónnómfengen ren fite billion ier. (SalF. 8:22, 23, 30) Ekieki úkúkún metekin letipen Kot atun a mut ngeni Néún we an epwe riáfféú me máló. Jiowa a fókkun tongei aramas kapachelong en, ina popun a tipemecheres le fangóló Néún we mi áchengicheng pwe epwe eú asor pwe en me ekkewe ekkóch oupwe tongeni kúna manaw tori feilfeiló. (Joh. 3:16; Kal. 2:20) Ina ewe popun mi fókkun aúchea seni meinisin ach sipwe tongei Kot.

14. Ifa ewe mettóch mi fókkun aúchea lón manawom ka tongeni achocho le tikeri?

¹⁴ Óm tongei Jiowa a lapóló pokiten ka fen káé chómmóng mettóch usun i. Ese wor tipemwaramwar pwe ka mochen ririéch ngeni iei tori feilfeiló, me ka tongeni féri ena. A peseok fán kirekiréch óm kopwe apwapwaai letipan. (SalF. 23:15, 16) Ka tongeni féri ena lón óm féffér, nge esap chék lón óm kapas.  Ewe napanapen manaw ka eáni iei, epwe pwári pwe ka enletin tongei Jiowa. (1 Joh. 5:3) Ina ewe mettóch mi fókkun aúchea ka tongeni achocho le tikeri lón manawom.

15. Ifa usun ka tongeni pwári óm tongei Jiowa?

¹⁵ Ifa usun kopwe pwári óm tongei Jiowa? Áeúin, kopwe eáni eú iótek mi kkóló aúchean mi pwári pwe ka fangóló manawom ngeni ewe emén chék Kot mi enlet. (Kölf. 40:8) Mwirin, kopwe pwáraaló ngeni aramas pwe ka fen fangóló manawom ren óm papatais. Sia fen káé me lón ei lesen pwe óm papatais, ina ewe fansoun mi apwapwa me aúchea lón manawom. Kopwe poputá le eáni eú mineféén manaw, esap fán pwisin itom, nge fán iten Jiowa. (Rom 14:8; 1 Pet. 4:1, 2) Usun itá ina eú watteen kefil kopwe eáni. Ewer, mi pwúng ena, nge a suuki ngonuk alen óm kopwe eáni ewe esin manaw mi múrinné seni meinisin. Ifa usun?

16. Me ren Kölfel 41:12, ifa usun Jiowa epwe efeiéchú chókkewe mi áeá manawer le angang ngeni?

¹⁶ Jiowa, i ewe mi fangafangéch seni meinisin. Ese lifilifil met ka fang ngeni, epwe chék pwal eliwini ngonuk nge epwe fen somwoló seni. (Mark. 10:29, 30) Epwe fang ngonuk ewe esin manaw mi apwapwa me aúchea, pwal mwo nge iei lón ei ótót mi ngaw. Me a kerán chék ina poputáán. Ewe manaw ka poputá le eáni seni ewe atun ka papatais, mi tongeni nómoffóch. Ka tongeni angang ngeni Semom na mi tong tori feilfeiló. Ewe tong lefilemi me Semom na epwe péppéchékúleló, me kopwe manaw tori feilfeiló, usun chék i.​—Álleani Kölfel 41:12.

17. Ifa ewe mettóch ese mwo nóm ren Jiowa ka tongen fang ngeni?

¹⁷ Lupwen ka fangóló manawom ngeni Kot me papatais, a nóm reom eú angang mi aúchea óm kopwe fang ngeni Semom na och mettóch mi kkóló aúchean. A fen fang ngonuk chómmóng mettóch mi múrinné me ekkewe fansoun mi apwapwa. Iwe, ka tongeni fang ngeni ena Sounemenemen láng me fénúfan och mettóch ese mwo nóm ren, ina óm angang ngeni fán tuppwél. (Hiop 1:8; 41:11; SalF. 27:11) Ina ewe mettóch mi múrinné seni meinisin ka tongeni áeá manawom fán itan. Ese  wor tipemwaramwar pwe óm tongei Jiowa, ina ewe ákkáeúin popun kopwe papatais.

18. Ikkefa ekkewe kapas eis kopwe pwisin eisinuk?

¹⁸ Iwe, ifa usun kopwe pélúweni ei kapas eis, Kopwe papatais? En chék ka tongeni pélúweni. Ese mwáál, óm pwisin eisinuk ei kapas eis epwe tongeni álisuk, ‘Met ua chúen witiwiti?’ (Föf. 8:36) Chemeni ekkewe úlúngát mettóch sia pwóróus usun. Áeúin, ka aúcheani ewe enlet me minne mi pwúng. Pwisin eisinuk, ‘Ua mochen nóm lón ewe fansoun atun meinisin repwele chék kapas enlet me féri minne mi pwúng?’ Oruuan, ka tongei Jesus Kraist. Pwisin eisinuk, ‘Ua mochen án Néún Kot we epwe ai King, me ua mochen áppirú an leenien áppirú?’ Aúlúngátin, ewe mi fókkun aúchea, ka tongei Jiowa. Pwisin eisinuk, ‘Ua mochen apwapwaai letipen Jiowa ren ai angang ngeni?’ Ika pélúwen ekkena kapas eis me reom “ewer,” iwe pwata kese le papatais? Met ka witiwiti?​—Föf. 16:33.

19. Pwata kosap tipemwaramwar le papatais? Áweweei. (Johannes 4:34)

¹⁹ Ika a wor óm tipemwaramwar le papatais, ekieki án Jesus ei kapas áwewe. (Álleani Johannes 4:34.) Jesus a aléllééi an féri letipen Seman we ngeni anan mwéngé. Pwata? Mwéngé, a múrinné fán itach. Jesus a silei pwe meinisin minne Jiowa a erenikich ach sipwe féri, a múrinné fán itach. Jiowa ese mochen ach sipwe féri met epwe efeiengawakich. Met, Jiowa a mochen óm kopwe papatais? Ewer. (Föf. 2:38) Iwe, ka tongeni lúkúlúk pwe óm álleasochisi ewe allúk óm kopwe papatais, epwe efeiéchuk. Ika kese tipemwaramwar le mwéngé och sókkun mwéngé mi fókkun anné, iwe, pwata kopwe tipemwaramwar le papatais?

20. Met sipwe káé lón en lesen mwirin ei?

²⁰ Pwata ekkóch ra witiwit? Eli ekkóch repwe erá, “Pún use mwo mmólnetá.” Óm filatá le fangóló manawom ngeni Jiowa me papatais, ina ewe kefil mi fókkun aúchea seni kefil kopwe eáni lón manawom. Ina popun a lamot kopwe ekiekiéchú usun ena kefil, me epwe pwal lamot fansoun me achocho ren an epwe fichiituk óm kopwe papatais. Nge ika ka enletin mochen féri ena, iwe met kopwe féri iei pwe kopwe mmólnetá? Sipwe ppii pélúwen ena kapas eis lón en lesen mwirin.