1, 2. (a) Met a kapachelong lón án Kot we “lifang ngenikich, esap tufich ach sipwe awewei lon ach kapas”? (b) Ikkefa ekkewe kapas eis sipwe pwóróus wóón lón ei lesen?

 LUPWEN Jiowa a tiinaato ngeni fénúfan Néún we mi áchengicheng, Jesus, a ngenikich eú liffang mi fiti tong mi lapalap seni meinisin. (Joh. 3:16; 1 Joh. 4:9, 10) Aposel Paulus a erá pwe ina ewe liffang “esap tufich ach sipwe awewei lon ach kapas.” (2 Kor. 9:15) Pwata Paulus a néúnéú ena itiitin kapas?

² Paulus a silei pwe án Jesus asor, ina eú minen anúkúnúk pwe meinisin án Kot kewe pwon repwe pwénútá. (Álleani 2 Korint 1:20.) Weween pwe án Jesus asor me meinisin án Jiowa kewe féfférún kirekiréch me an tong enlet ngenikich, ra kapachelong lón an we “lifang ngenikich, esap tufich ach sipwe awewei lon ach kapas.” Ena liffang a fókkun amwarar, esap tufich ach sipwe áweweei lón ach kapas sipwe tongeni unusen weweiti. Itá met sipwe meefi usun ena liffang mi kkóló aúchean? Ifa usun ena liffang epwe amwékútúkich ach sipwe mmólnetá  fán iten Áchechchemenien án Kraist we Máló lón Aúlúngát, March 23, 2016?

3, 4. (a) Met meefiom lupwen emén a liffang ngonuk? (b) Ifa usun eú liffang mi kkóló aúchean a tongeni ekkesiwili manawom?

³ Sia kan pwapwa lupwen emén a liffang ngenikich. Nge ekkóch liffang ra kon kkóló are watte aúchear iwe a tongeni efisi siwil lón manawach. Áwewe chék, sipwe erá pwe ka atai och allúk nge chappen óm tipis, máló. Nge emén kese sissilei a pwisin pennúkúóló manawan me erá pwe epwe wisen angei chappen minne ka féri. A tipemecheres le máló fán ásengesum! Met kopwe itá meefi ren ena sókkun liffang mi kkóló aúchean?

⁴ Ena liffang mi kkóló aúchean mi pwáraatá tong epwe amwékútuk óm kopwe féri siwil lón manawom. Ese mwáál, kopwe pwal meefi pwe ka mochen alapaaló óm pwáraatá kisáseú, tongei aramas me omusaaló tipisin chókkewe ra fen tipis ngonuk. Lón unusen manawom, kopwe mochen pwáraatá óm kilisou ren minne eménna a féri fán itom.

5. Ifa usun án Kot we liffang ewe méén kepich a kon lapalap seni meinisin liffang?

⁵ Án Kot we liffang ewe méén kepich a kon lapalap seni ena liffang lón ena kapas áwewe. (1 Pet. 3:18) Ekieki mwo ei mettóch: Kich meinisin sia álemwiri tipis seni Atam, nge liwinin ena tipis, máló. (Rom 5:12) Tong a amwékútú Jiowa an epwe tiinaato Jesus ngeni fénúfan pwe “epwe mäla fänäsengesin aramas meinisin.” (Ipru 2:9) Nge án Jesus asor epwe atoto pwal ekkóch feiéch! Epwe amóeló máló feilfeiló chék. (Ais. 25:7, 8; 1 Kor. 15:22, 26) Meinisin mi pwáraatá ar lúkú Jesus repwe manaw fán kinamwe me kúna pwapwa tori feilfeiló chék. Ekkóch leir repwe eti Kraist lón ewe wis king lón láng nge ekkóch repwe nónnóm wóón fénúfan fán nemenien án Kot we Mwú. (Rom 6:23; Pwär. 5:9, 10) Ikkefa pwal ekkóch feiéch ra kapachelong lón án Jiowa we liffang?

6. (a) Ikkefa ekkewe feiéch mi kapachelong lón án Jiowa we liffang ka ápilúkúlúkú? (b) Ikkefa úlúngát mettóch án Kot we liffang epwe amwékútúkich le féri?

⁶ Án ei fénúfan wiliti eú paratis, án ekkewe mi samau chikarsefál, me án ekkewe mi máló manawsefál ra kapachelong lón án Kot we liffang. (Ais. 33:24; 35:5, 6; Joh. 5:28, 29) Sia tongei Jiowa me Néún we mi áchengicheng ren ar awora ei liffang “esap tufich ach sipwe awewei lon ach kapas.” Met ei liffang epwe itá amwékútúkich le féri? Epwe amwékútúkich le (1) áppirúfichi Kraist Jesus, (2) tongei pwiich kewe, me (3) enletin omusaaló tipisin ekkewe ekkóch.

7, 8. Itá met sipwe meefi usun án Kraist tong, me met epwe itá amwékútúkich le féri?

⁷ Áeúin, mi lamot sipwe meefi ach sipwe áeá manawach le asamolu Jesus. Ewe aposel Paulus a apasa: “Sia nom fän nemenien än Kraist we chen ngenikich.” (Álleani 2 Korint 5:14, 15.) Paulus a silei pwe ika sia etiwa án Jesus tong mi lap, epwe amwékútúkich le tongei me asamolu Jesus. Ewer, lupwen sia unusen weweiti met Jiowa a fen féri fán ásengesich, an we tong epwe amwékútúkich le manaweni ewe sókkun manaw mi pwáraatá pwe sia asamolu Jesus. Ifa usun sipwe féri ena?

⁸ Ach tong ngeni Jiowa epwe amwékútúkich le áppirúfichi Jesus me tapweló mwirin lón ipwan. (1 Pet. 2:21; 1 Joh. 2:6)  Lupwen sia álleasochisi Kot me Kraist, sia pwáraatá ach tongeer. Jesus a apasa: “Iö a etiwa ai kewe allük o aleasochisiir, i ätewe mi echeniei. Nge iö a echeniei Semei epwe echeni. Pwal ngang üpwe echeni o pwäri ngeni ususi.”​—Joh. 14:21; 1 Joh. 5:3.

9. Ikkefa ekkewe sóssót sia kúkkúna?

⁹ Lón ei fansoun Áchechchem, a múrinné ach sipwe ekilonei ifa usun sia ákkáeá manawach. Ina minne, pwisin eisinuk: ‘Lón menni kinikinin manawei ua kan áppirú Jesus? Met a chúen lamot ai upwe ámúrinnééló lón manawei?’ A lamot sipwe etittinakich ren ekkeei kapas eis pún chón ei fénúfan ra mochen ach sipwe eáni ewe sókkun manaw iir ra eáni. (Rom 12:2) Ika sia túmúnúngaw, sia tongeni tipetipeló me poputá le nikáppirú néún ei fénúfan kewe sou tipachem, me ekkewe mi iteféúló lón pekin sport, kachito, nikáttik, me metakkan. (Kol. 2:8; 1 Joh. 2:15-17) Ifa usun sia tongeni ú ngeni ena sóssót?

10. Ikkefa ekkewe kapas eis sia tongeni pwisin eisinikich lón ei fansoun Áchechchem, nge met pélúwen ekkena kapas eis ra tongeni amwékútúkich le féri? (Ppii ewe sasing lepoputáán ei lesen.)

¹⁰ Atun ewe fansoun Áchechchem a éch ach sipwe etittina met sókkun úf sia kan úféúf, ekkewe kachito me nikáttik sia kan katol me aúseling ngeni, pwal masouen néúch kewe computer, cell phone, are tablet. Pwisin eisinuk: ‘Ika Jesus a nónnóm ikeei me a kúna minne ua úféúf, upwe meefi sáw?’ (Álleani 1 Timoty 2:9, 10.) ‘Úfei kewe ra pwáraatá pwe ngang emén chón tapweló mwirin Kraist? Jesus epwe pwapwaiti ekkewe kachito ua kan katol? Epwe pwal mochen aúseling ekkewe nikáttik ua pwapwaiti? Ika Jesus a paaro nei cell phone are tablet, upwe meefi sáw ren met epwe kúna me lón? Ua tongeni áweweei ngeni Jesus popun ua pwapwaiti le play nei kewe video game?’ Ach tong ngeni Jiowa itá epwe amwékútúkich le péutaló ekkewe mettóch ese fich ngeni emén Chón Kraist, nge meit ika mi mémmong. (Föf. 19:19, 20) Lupwen sia fangóló manawach ngeni Jiowa, sia pwon ngeni pwe sipwe áeá manawach le asamolu Kraist. Ina popun, a lamot sisap amwéchúnnúkú ekkewe mettóch epwe áweiresi ach achocho le áppirú Kraist.​—Mat. 5:29, 30; Fil. 4:8.

11. (a) Ifa usun ach tongei Jiowa me Jesus a amwékútúkich lón ewe angangen afalafal? (b) Ifa usun ach tong epwe amwékútúkich le álisi ekkewe ekkóch lón ach mwichefel?

¹¹ Ach tong fán iten Jesus a amwékútúkich le afalafal me asukula aramas fán tinikken. (Mat. 28:19, 20; Luk. 4:43) Lón fansoun ewe Áchechchem, ka tongeni akkóta óm kopwe auxiliary pioneer me néúni 30 are 50 awa lón ewe angangen afalafal? Emén Chón Kraist mwán mi má seni pwúlúwan, a 84 ierin a meefi pwe ese tongeni pioneer pún a chinnap me apwangapwang. Nge ekkewe pioneer lón leenian we ra mochen álisi i. Ra fili ekkewe leeni ia a tongeni afalafal ie me ra uwei wóón waar kewe. Iwe, pwiich na a tikeri ewe 30 awa a achocho ngeni. Ka tongeni álisi emén lón óm we mwichefel an epwe auxiliary pioneer fán March are April? Pwúngún pwe esap kich meinisin sia tongeni pioneer, nge sia tongeni áeá ach fansoun me péchékkúl le alapaaló ach angang ngeni Jiowa. Ika sia féri ena, sia usun chék Paulus le pwáraatá pwe án Jesus tong a amwékútúkich. Án Kot tong a pwal tongeni amwékútúkich le féri met?

12. Met án Kot tong a amwékútúkich le féri?

¹² Oruuan, án Kot tong itá epwe amwékútúkich ach sipwe tongei pwiich kewe. Iei  met aposel Johannes a makkeei: “Ämi chiechiei kana mi achengicheng, are iei usun än Kot echenikich, kich sipwe pwal echenifengenikich lefilach.” (1 Joh. 4:7-11) Ina minne, ika sia mochen pwe Kot epwe tongekich, mi lamot sipwe pwal tongei pwiich kewe. (1 Joh. 3:16) Ifa usun sia tongeni pwáraatá pwe sia tongeer?

13. Ifa ewe leenien áppirú Jesus a isetiw ren an tongei aramas?

¹³ Án Jesus leenien áppirú a áiti ngenikich ifa usun sipwe tongeni tongei aramas. Lupwen a nónnóm wóón fénúfan, a álisi aramas, ákkáeúin ekkewe mi tipetekison. A echikaraatá ekkewe mi semmwen, pechemá, chun, selingepúng me awemwéch. (Mat. 11:4, 5) Jesus a pwapwa le asukula ekkewe aramas mi mochen silei usun Kot, i ese usun ekkewe néúwisin lamalam mi oput aramas. (Joh. 7:49) A tongei chókkana mi tipetekison me achocho le álisiir.​—Mat. 20:28.

14. Met ka tongeni féri pwe kopwe pwáraatá óm tong ngeni pwiim kewe?

¹⁴ A pwal éch ewe fansoun Áchechchem óm kopwe ekieki ifa usun ka tongeni álisi chón óm mwichefel, ákkáeúin ekkewe chinnap. En mi tongeni ló chuuri chókkana? Ka tongeni uwouló rer ener mwéngé, álisiir lón ar angangen lón imw, eis ika ka tongeni uweir wóón wóóm le ló fiti mwich, are etiwer oupwe mwin le afalafal? (Álleani Lukas 14:12-14.) Mut ngeni án Kot tong an epwe amwékútuk le pwáraatá óm tong ngeni pwiim kewe!

15. Met a lamot sipwe mirititi?

¹⁵ Aúlúngátin, án Jiowa tong a amwékútúkich le omusaaló tipisin pwiich kewe. Kich meinisin sia álemwiri tipis me máló seni Atam, ina popun ese wor emén a tongeni apasa, “Ese lamot ngeniei ewe méén kepich.” A pwal mwo nge lamot ngeni emén néún Kot chón angang mi tuppwél seni meinisin ena méén kepich. Emén me emén kich a omusa senikich ach watteen liwinimmang! Pwata a lamot sipwe mirititi ena? Sipwe kúna pélúwen ena kapas eis lón eú me lein án Jesus kewe kapas áwewe.

16, 17. (a) Ifa ewe lesen sia káé seni án Jesus we kapas áwewe usun emén king me ekkewe chón angang? (b) Atun óm ekieki usun án Jesus kapas áwewe, met ka tipeppós le féri?

¹⁶ Jesus a eáni kapas áwewe usun emén  king mi omusaaló án néún we chón angang watteen liwinimmang úkúkún 10,000 talent, are fite million chala. Nge mwirin, ena chón angang ese omusaaló án chienan we chón angang liwinimmang mi chék kúkkún, a chék fitu chala. Itá án ewe king úméúméch epwe amwékútú néún na chón angang an epwe omusaaló án chienan we liwinimmang. Ewe king a fókkun song lupwen a rongorong met néún we chón angang a féri. A erá: “En eman chon angang mi ngau! Ngang üa amusala unusen om liwinimang ngeniei pokiten ka tüngormau ngeniei. Pwota kosap eäni ümöümöch ngeni chiechiom we chon angang, usun chök ngang üa eäni ümöümöch ngonuk?” (Mat. 18:23-35) Jiowa a fen omusaaló watteen ach liwinimmang usun chék ena king. Met án Jiowa tong me úméúméch itá epwe amwékútúkich le féri?

¹⁷ Lón ach ammólnatá fán iten ewe Áchechchem, sia tongeni pwisin eisinikich: ‘Emén pwii Chón Kraist a fen ekinása letipei? A weires ngeniei ai upwe omusaaló tipisin?’ Ika ina, a éch ei fansoun ach sipwe áppirú Jiowa, ewe “Kot mi amusala tipis.” (Ne. 9:17; Kölf. 86:5) Ika sia aúcheani án Jiowa watteen úméúméch, sipwe úméúméch ngeni ekkewe ekkóch me enletin omusaaló tipisiir. Ika sise tongei me omusaaló tipisin pwiich kewe, sisap tongeni ekieki pwe Jiowa epwe pwal tongekich me omusaaló ach tipis. (Mat. 6:14, 15) Ach omusaaló tipisin ekkewe ekkóch esap weween pwe rese fen tipis ngenikich me ekinása letipach, nge ach féri ena epwe álisikich ach sipwe pwapwa.

18. Ifa usun án Kot tong a álisi emén pwiich an epwe likiitú fán apwangapwangen pwal emén pwiich?

¹⁸ A tongeni weires ach sipwe likiitú fán apwangapwangen pwiich kewe ren ar rese unuséch. (Álleani Efisos 4:32; Kolose 3:13, 14.) Ina met a fis ngeni emén pwiich itan Lily. ^[1] I a álisi emén pwiin Chón Kraist itan Carol, i mi má seni pwúlúwan. Lily a kan uwei Carol wóón waan we ngeni ia chék a lamot epwe ló ie, a álisi lón an shopping, me féri pwal ekkóch angang fán itan. Inaamwo ika Lily a féri ekkena mettóch, nge Carol a chék soun esiita iteitan, me fán ekkóch a weires án Lily epwe álisi. Nge Lily a chék ekieki napanapen Carol kewe mi múrinné me ina met a elikiitú lón fite ier tori án Carol a semmwen me máló. Inaamwo ika a weires ngeni Lily le álisi Carol, nge iei alon: “Ua mwétéresiti ai upwe kúnasefáli Carol lón fansoun manawsefál. Ua mochen silei Carol lupwen a unuséch.” A ffat pwe án Kot tong a tongeni amwékútúkich ach sipwe likiitú ngeni pwiich kewe me ápilúkúlúkú ewe fansoun lupwen aramas repwe unuséch feilfeiló chék.

19. Ifa usun án Kot we liffang “esap tufich ach sipwe awewei lon ach kapas” epwe amwékútuk?

¹⁹ Enlet, Jiowa a fen ngenikich eú liffang “esap tufich ach sipwe awewei lon ach kapas.” Amwo sipwe aúcheani fansoun meinisin! A mmen éch lón fansoun Áchechchem ach sipwe ekilonei mettóch meinisin Jiowa me Jesus ra fen féri fán ásengesich. Amwo ar tong epwe amwékútúkich le áppirúfichi Jesus, pwáraatá tong ngeni pwiich kewe, me enletin omusaaló tipisiir.