ACH angangen afalafal a lamot me aúchea. Nge esap meinisin aramas sia afalafal ngeniir ra weweiti ena. Pwal mwo nge chókkewe mi mochen silei Paipel, esap iir meinisin ra meefi lamoten ar repwe etiwakich ach sipwe káé ngeniir án Kot we Kapas.

Áwewe chék ren Gavin. I a poputá le fiffiti ach kewe mwich, nge ese mochen emén epwe káé ngeni Paipel. Gavin a erá pwe a chék ekis an sile lón Paipel me ese mochen emén epwe silei. A pireir ika emén epwe ereni an epwe fiti eú lamalam, me ese mochen an epwe tupuló. Met óm ekiek? Mi tufich óm kopwe álisi Gavin? Ekieki feiéchún án emén epwe silei áitien ewe Paipel. Jiowa a ereni chón Israel: “Ai kapas epwe wüch usun amurenipwin, epwe usun chimwo won ewe fetil mi pwüküfö.” (Tut. 31:19, 30; 32:2) Iei sipwele káé usun amurenipwin me apépééi ngeni ach angangen afalafal pwe sipwe tongeni lipwákéch le álisi sókkópaten aramas.—1 Tim. 2:3, 4.

Chiin amurenipwin a kan pwetete, ese atai mettóch. Amurenipwin a kan fisitá ekis me ekis lupwen ewe konik mi nofit lón ásepwál a wiliti kúkkún chiin konik. Ifa usun án Jiowa kewe kapas ra tongeni “wüch usun amurenipwin”? A kapas ngeni néún aramas fán kirekiréch me tong, me a kapas pwetete ngeniir. Sia áppirú i lupwen sia súféliti minne aramas ra lúkú. Sia peseer ar repwe pwisin anganga ekiekiir me pwisin filatá met repwe lúkú. Lupwen sia pwáraatá pwe a ina usun ach ekieki aramas, epwe álisiir ar repwe etiwa minne sia apasa, me epwe álisatá sópwéchún ach angangen afalafal.

Amurenipwin a ekinamwe. Lupwen sia ekieki sókkópaten alen ach sipwe álisi aramas le káé usun ewe enlet, ach angangen afalafal epwe ekinamwei letiper. Emén pwiich itan Chris, ewe mi akkomw etiwa Gavin ar repwe káéfengen ewe Paipel, ese eriáni Gavin an epwe káé. Nge a fen kútta sókkópaten alen ar repwe pwóróusfengen usun Paipel nge Gavin epwe kinamwe ren. Chris a ereni Gavin pwe a wor eú pwóróus mi aúchea unusen Paipel a menlapei, me an káé usun ena pwóróus epwe álisi le wewefichiti ekkewe mwich. Mwirin, Chris a áweweei eú oesini lón Paipel mi fókkun álisi pwisin i an epwe lúkú pwe ewe Paipel eú puk mi enlet. Iwe, ra pwóróusfengen fán fite usun pwénútáán ekkewe oesini. Ar kana pwóróusfengen a ekinamwei Gavin, iwe, ló, ló, ló, a etiwa an epwe káé Paipel.

Amurenipwin a lamot fán iten manaw. Atun fansoun pwichikkar me pwás lón Israel, mi tongeni an esap púng rán ren fite maram. Nge ika esap pwúnún ewe amurenipwin, iwe ekkewe irá repwe chék pwáseló me peló. Jiowa a oesini pwe lón ach ei fansoun epwe wor eú fansoun pwás lón kapas áwewe, weween aramas repwe osupwangen ar “rong än ewe Samol mi Lapalap kapas.” (Am. 8:11) I a pwonei pwe ekkewe mi kepit “repwe wewe ngeni amurenipwin seni ewe Samol mi Lapalap” atun ra afalafala ewe kapas allim usun ewe Mwú, me ekkewe ‘ekoch sip’ repwe pwal álisiir. (Mik. 5:7; Joh. 10:16) Ewe pwóróus sia esilefeili a kapachelong lón án Jiowa kókkótun awora manaw ngeni chókkewe mi kakaan ewe enlet. Kich mi aúcheani ei pwóróus?

Amurenipwin eú feiéch seni Jiowa. (Tut. 33:13) Ach angangen afalafal a tongeni eú feiéch, are eú liffang, ngeni chókkewe mi etiwa. Gavin a feiéch ren an káé Paipel pún a álisi le kúna pélúwen meinisin an kewe kapas eis. A mwittir feffeitá, a papatais, me iei iir me pwúlúwan we itan Joyce ra pwapwaiti le afalafala ewe kapas allim usun ewe Mwúún Kot.

Ach apépééi ach angangen afalafal ngeni amurenipwin a pwal tongeni álisikich le aúcheani minne sia pwisin féri lón ena angang. Ifa usun? Eú chiin konik a fókkun kúkkún álillisin, nge lupwen a wor fite million chiin, ewe pwúl epwe ur ren konik. Pwal ina chék usun lón ewe angangen afalafal, me rech neman a fókkun kúkkún minne sia féri. Nge pokiten kapachelapen minne ekkewe fite million chón angang ngeni Jiowa ra féri, iwe sia tongeni esilei ngeni “aramas meinisin” ewe enlet. (Mat. 24:14) Ach angangen afalafal epwe ina eú feiéch mi kawor seni Jiowa fán iten aramas? Ewer, epwe ina usun ika pwe ewe pwóróus sia uwei a usun chék amurenipwin, weween epwe pwetete, ekinamwe, me lamot fán iten manaw!