1, 2. (a) Pwata sia silei pwe mi tufich án aramas repwe wiliti chiechien Kot? (b) Met sipwele káé lón ei lesen?

 SENI leuputiwach tori ach sia máló, a lamot ngenikich tong. A lamot ngeni aramas chiechi mi fiti tong, esap chék ewe sókkun tong lefilen mwán me fefin. Nge ewe a lamot seni meinisin, ach sipwe kúna tong seni Jiowa. Chómmóng rese lúkú pwe aramas ra tongeni pacheéch me chiechiéch ngeni Kot, pún i emén sise tongeni kúna me mi manaman seni meinisin. Nge sia silei pwe ese fókkun pwúng ena!

² Sia silei seni Paipel pwe mi wor ekkewe aramas ra wiliti chiechien Kot. A lamot sipwe káé seni ar leenien áppirú. Pwata? Pokiten ach chiechi ngeni Kot, ina ewe mettóch mi fókkun lamot sipwe achocho ngeni lón manawach. Iwe, sipwe ppii pwóróusen Apraham. (Álleani James 2:23.) Ifa usun Apraham a wiliti chiechien Kot? An chiechiéch ngeni Kot a lóngólóng wóón an lúkú, me a silleló pwe i “semelapen chokewe meinisin mi lükü.” (Rom 4:11) Atun óm káé pwóróusan, pwisin eisinuk, ‘Ifa usun  ua tongeni áppirú án Apraham lúkú me apéchékkúlaló ai ririéch ngeni Jiowa?’

3, 4. (a) Apwóróusa ewe watteen sóssót Apraham a kúna mi sótuni an lúkú. (b) Pwata Apraham a tipemecheres le eáni asor Isaak?

³ Anchangei Apraham, usun a 125 ierin nge a ákkánnifetá wóón eú chuuk. ^[1] Néún we Isaak, a 25 som ierin a tattapwoto mwirin. Isaak a ekii ekkewe émwúch, nge Apraham a uwei efóch náif me ekkewe mettóch epwe áeá le ékkú ekkei. Án Apraham ei sái eli a mmen fókkun áweires seni meinisin an sái. Esap pokiten a watte ierin pún a chúen watte péchékkúlan. Nge mi áweires ngeni pokiten Jiowa a ereni an epwe asoresini néún we át!​—Ken. 22:1-8.

⁴ Minne Apraham a kúna, neman ina ewe sóssót mi watte seni meinisin mi sótuni an lúkú. Ekkóch aramas ra erá pwe Kot mi kirikiringaw pwe a ereni Apraham an epwe asoresini néún we át. Me ekkóch ra erá pwe Apraham a tipemecheres le álleasochis pokiten ese tongei néún we. Aramas ra erá ekkena pokiten ese wor ar lúkú me rese pwal weweiti met weween án emén eáni ena mettóch lúkú. (Ipru 11:1) Apraham ese chék mwittir álleasochisi Kot nge ese akkomw ekieki usun. A álleasochis pokiten a enletin lúkú Kot. A silei pwe Jiowa esap tongeni ereni an epwe féri och mettóch epwe atoto ngeni feiengaw tori feilfeiló. Apraham a silei pwe ika a álleasochis, Jiowa epwe efeiéchú i me néún we át mi áchengicheng. Itá epwe ifa lóngólóngun án Apraham lúkú pwe epwe tongeni eáni ewe sókkun lúkú mi péchékkúl? A lamot án Apraham sile me minne a kúna lón manawan.

5. Ifa usun neman Apraham a silei usun Jiowa, me ifa usun ena sile a amwékútú i?

⁵ Sile. Apraham a mááritá lón eú telinimw itan Ur. Aramas lón ena leeni ra fel ngeni kot chofona, pwal ina met semen Apraham we a féri. (Jos. 24:2) Iwe, ifa usun Apraham a silei usun Jiowa? Ewe Paipel a áiti ngenikich pwe néún Noa we itan Säm, i aramasen Apraham. Säm a manaw tori an a 150 som ierin Apraham. Säm emén mwán mi watte an lúkú, me ese mwáál a fós ngeni aramasan kewe usun Jiowa. Ese ffat ngenikich, nge mi tufich án Apraham epwe silei usun Jiowa seni ena. Minne Apraham a silei a amwékútú i an epwe tongei Jiowa, me ena sile a álisi an epwe apéchékkúla an lúkú.

6, 7. Ifa usun ekkewe mettóch mi fis ngeni Apraham ra apéchékkúlaló an lúkú?

⁶ Minne a kúna lón manawan. Met a fis ngeni Apraham mi apéchékkúlaló an lúkú? Ekkóch ra erá pwe minne emén a eáni ekiek epwe efisi an epwe meefi mettóch, nge minne a meefi epwe emmweni an epwe féri mettóch. Letipen Apraham a chúng ren met a fen káé usun Kot, me a súféliti pwe I “ewe Samol mi Lapalap, ewe Kot mi Unusen Tekia, a föri läng me fanüfan.” (Ken. 14:22) Ewe Paipel a néúnéú ewe itiitin kapas “niuokusiti” Kot fán iten ena esin súfél mi alóllóól. (Föf. 10:35) Ren án emén epwe ririéch ngeni Kot, mi lamot an epwe niwokkusiti Kot. (Kölf. 25:14) Ina ewe mettóch a amwékútú Apraham an epwe álleasochisi Jiowa.

⁷ Kot a ereni Apraham me Sara pwe repwe likitaló imwer lón Ur me mwékút ngeni eú fénúen ekis. Iir ra fen chinnap, nge repwele nónnóm lón tento lón unusen manawer. Inaamwo ika Apraham a silei pwe repwe chuuri chómmóng mettóch mi tongeni efeiengawer, nge a úppós le álleasochisi Jiowa. Kot a efeiéchú me túmúnú i pokiten a álleasochis. Áwewe chék, fán ruu emén a angei seni Apraham  pwúlúwan na mi liéch Sara me i epwele pwal tongeni ninniiló, nge Jiowa a féri manaman pwe epwe túmúnúúr me rúúemén. (Ken. 12:10-20; 20:2-7, 10-12, 17, 18) Án Apraham kúna minne a fis lón ekkena atun a apéchékkúla an lúkú.

8. Met sipwe féri pwe epwe lapóló ach sile, me kúna lón manawach án Kot túmúnúkich me efeiéchúkich?

⁸ Mi tufich ach sipwe wiliti chiechien Jiowa? Ewer, mi fókkun tufich! Mi lamot sipwe usun Apraham, sipwe pwal káé usun Jiowa. Me kich sia pwal tongeni angei ewe sile me kúna lón manawach án Jiowa álisikich. Lón ei fansoun a wor rech chómmóng mettóch lap seni met mi nóm ren Apraham. (Tan. 12:4; Rom 11:33) Ewe Paipel a masou ren chómmóng pwóróus usun ewe chón “föri läng me fanüfan.” Minne sia káé a amwékútúkich ach sipwe tongei Jiowa me a álisikich ach sipwe eáni ewe sókkun súfél mi alóllóól ngeni. Ach tongei me súféliti Kot a amwékútúkich ach sipwe álleasochisi i. Ika sia féri ena, sipwe kúna lón manawach ifa usun Kot a túmúnúkich me efeiéchúkich, iwe epwe péchékkúleló ach lúkú. Ika sia unusen angang ngeni Jiowa, epwe atoto ngenikich menemenéch, kinamwe, me pwapwa. (Kölf. 34:8; SalF. 10:22) Lapólóón ach sile me kúna lón manawach ifa usun Jiowa a álisikich, pwal ina péchékkúlelóón ach ririéch ngeni I.

9, 10. (a) Met a lamot ngeni eú ririin chiechi pwe epwe péchékkúleló? (b) Met a pwáraatá pwe Apraham a aúcheani me apéchékkúlaló an ririéch ngeni Jiowa?

⁹ Chiechiéch lefilen aramas a usun eú pisek mi aúchea. (Álleani Än Salomon Fos 17:17.) Esap usun eú rumeen leenien péén irá mi mémmong minen chék eling, nge a fen usun epé péén irá mi ling mi lamot sipwe akkachéchénú me túmúnú pwe epwe máréch. Apraham a aúcheani me túmúnú an ririéch ngeni Jiowa. Ifa usun a féri ena?

¹⁰ Apraham a akkalapaló an niwokkusiti Kot me álleasochisi i. Áwewe chék, lupwen i me an famili me néún kewe chón angang ra sái ngeni Kanaan, a kan mut ngeni Jiowa an epwe emmweni lupwen a féri kefil wóón mettóch mi kúkkún me watte. Eú ier me mwen uputiwen Isaak, atun a 99 ierin Apraham, Jiowa a ereni pwe meinisin ekkewe mwán lón imwan repwe sirkumsais. Apraham a tipemwaramwareiti Jiowa are sótun kúnetipingen ren an esap féri alon Jiowa na? Aapw, a lúkúlúk wóón Jiowa, me “lon ewe chök ränin” a álleasochisi met Kot a allúk ngeni.​—Ken. 17:10-14, 23.

11. Pwata Apraham a lólileniesini minne epwele fis ngeni Sotom me Komora, me ifa usun Jiowa a álisi?

¹¹ Pokiten Apraham a álleasochisi  Jiowa fansoun meinisin pwal mwo nge lón mettóch mi kisikis, iwe a péchékkúleló ewe riri lefiler. A meefi pwe a tongeni fós ngeni Jiowa wóón ese lifilifil mettóch, pwal mwo nge tingorei an álillis lupwen a osukosuk ren ekkewe mettóch ese weweiti. Áwewe chék, lupwen Jiowa a erá pwe epwe ataieló ekkewe telinimw Sotom me Komora, Apraham a lólilen. Pwata? A lólilen ika ekkewe aramas mi múrinné repwe pwal fiti ekkewe mi ngaw le ninniiló. Eli a lólilen pwe tettelin néún we itan Lot me an famili ra nónnóm lón Sotom. Apraham a lúkúlúk wóón Jiowa, ewe “Souapwüngün unusen fanüfan,” iwe fán tipetekison a ereni Jiowa met a lólileniesini. Jiowa a mosonottam ngeni chiechian na, me a pwáraatá pwe i mi úméúméch. A áwewe ngeni pwe lupwen a apwúngú aramas, a kútta ekkewe aramas mi múrinné me amanawer.​—Ken. 18:22-33.

12, 13. (a) Ifa usun án Apraham sile me minne a kúna lón manawan ra álisi i? (b) Met a pwáraatá pwe Apraham a lúkúlúk wóón Jiowa?

¹² A ffat pwe meinisin án Apraham sile me meinisin minne a kúna lón manawan ra fen álisi an epwe túmúnú péchékkúlen an riri ngeni Jiowa. Ina popun, lupwen Jiowa a ereni Apraham an epwe asoresini néún we át, a silei pwe Jiowa i emén mi pwáraatá mosonottam, úméúméch, mochen túmúnú aramas, me sia tongeni lúkúlúk wóón. Apraham a fókkun silei pwe Jiowa esap tongeni chék mwittir siwil me wiliti emén mi kirikiringaw! Pwata sia apasa ena?

¹³ Mwen án Apraham ló seni néún kewe chón angang, a ereniir: “Oupwe nonom ikei me ewe aas. Nge äm me ätei aipwe feila ikenan o fel ngeni Kot. Iwe, are aipwe wes, aipwe liwinto remi.” (Ken. 22:5) Met weween alon Apraham na? A kapas chofona ngeniir ren an ereniir pwe iir me Isaak repwe liwinitiir nge a fen silei pwe epwele asoresini Isaak? Aapw. Ewe Paipel a apasa pwe Apraham a silei pwe Jiowa a tongeni amanawasefáli Isaak seni máló. (Álleani Ipru 11:19.) Apraham a silei pwe Jiowa a fen féri eú manaman pwe iir me Sara repwe néúni emén át inaamwo ika ra fókkun chinnap. (Ipru 11:11, 12, 18) Iwe a mirititi pwe ese wor och mettóch esap tufich ngeni Jiowa. Apraham ese silei met epwe fis lón ena rán. Nge a lúkú pwe ika néún na a máló, Jiowa epwe amanawasefálietá pwe meinisin minne i a pwonei epwe pwénútá. Ina ewe popun Paipel a eita ngeni Apraham, “semelapen chokewe meinisin mi lükü Kot.”

14. Ikkefa ekkewe mettóch mi áweires ngonuk lón óm angang ngeni Jiowa, me ifa usun án Apraham leenien áppirú a tongeni álisuk?

¹⁴ Iwe nge, lón ei fansoun, Jiowa ese erenikich ach sipwe asoresini néúch kewe, nge a erenikich ach sipwe álleasochisi an kewe allúk. Fán ekkóch neman  sise tongeni weweiti ewe popun a wor ekkena allúk are neman a weires ngenikich ach sipwe apwénúretá. A ina usun meefiom? Me ren ekkóch, ewe angangen afalafal mi áweires. Neman ra nisássáw are a weires ngeniir ar repwe fós ngeni aramas rese sissileer. Ekkóch ra niwokkus ar repwe sókkóló seni chiener kewe chón angang are chón sukul. (Eks. 23:2; 1 Tes. 2:2) Lupwen emén a ewisa ngonuk och mettóch kopwe féri nge mi áweires ngonuk, ekieki usun án Apraham leenien áppirú ren an lúkú me pwora. Lupwen sia ekilonei án ekkewe aramas mi tuppwél leenien áppirú, a tongeni amwékútúkich ach sipwe áppirúúr me arap ngeni Chiechiach we Jiowa.​—Ipru 12:1, 2.

15. Pwata sia silei pwe Apraham ese fókkun niamam ren an álleasochisi Jiowa fán tuppwél?

¹⁵ Mi wor atun Apraham a fen niamam ren an álleasochisi án Jiowa kewe allúk? Ewe Paipel a apasa pwe Apraham “a máló lupwen a chinnap, a menemenéch lón an ierittam.” (Ken. 25:8, NW) Lupwen Apraham a ierini 175, i a tongeni ekieki ránin manawan mi ttam me meefi menemenéch ren. Pwata? Pokiten an ririéch ngeni Jiowa, ina ewe mettóch mi lamot ngeni lap seni meinisin. Iwe nge, lupwen sia kúna seni Paipel pwe Apraham “a menemenéch lón an ierittam,” a itá wewe ngeni an ese chúen tipeni an epwe manaw lón mwachkkan?

16. Pwata Apraham epwe meefi pwapwa lón Paratis?

¹⁶ Ewe Paipel a apasa pwe Apraham “a witiwiti ewe fansoun pwe epwe nom lon ewe telinimw Kot a föri liosun o aüetä, ewe telinimw a wor longolongun esap tongeni tala.” (Ipru 11:10) Apraham a lúkú pwe lón mwach epwe kúna ena telinimw, án Kot we Mwú, an a nemeni unusen fénúfan. I epwe wesewesen kúna! Anchangei úkúkún watteen pwapwaan Apraham lupwen a manaw lón Paratis wóón fénúfan me a akkapéchékkúlaló an ririéch ngeni Kot. Epwe pwapwa le silei pwe an leenien áppirú ren an lúkú a fen álisi néún Kot kewe chón angang ren fite fitengeréú ier! Lón Paratis epwe silei pwe ewe asor wóón ewe chuuk Moria a liosuetá och mettóch mi fókkun lapalap. (Ipru 11:19) Epwe silei ifa usun ewe riáfféú a meefi atun a ammólnatá an epwe asoresini néún we Isaak a fen álisi chómmóng aramas le weweiti ewe riáfféú Jiowa a meefi lupwen a fangóló manawen Néún we, Jesus Kraist, pwe epwe eú méén kepich fán iten aramas. (Joh. 3:16) Án Apraham leenien áppirú a fen álisikich meinisin an epwe lapóló ach aúcheani ewe méén kepich, ina ewe féffér mi pwáraatá tong lap seni meinisin!

17. Met ka úppós le féri, me met sipwe káé lón ewe lesen mwirin ei?

¹⁷ Amwo oukich meinisin sipwe úppós lón ach áppirú án Apraham lúkú. Mi lamot ngenikich sile me minne sia kúna lón manawach, usun chék Apraham. Lón ach kákkáé usun Jiowa me ákkálleasochisi, sipwe kúna ifa usun i epwe efeiéchúkich me túmúnúkich. (Álleani Ipru 6:10-12.) Amwo Jiowa epwe i Chiechiach tori feilfeiló chék! Lón en lesen mwirin ei, sipwe pwal káé usun pwóróusen úlúmén aramas mi tuppwél mi wiliti chiechien Kot.