UA UPUTIW lón ewe ier 1926 lón Crooksville, Ohio lón Merika. Semei kewe me inei rese kan achocho lón lamalam, iwe nge ra erenikem walimén néúr kewe ám aupwe fiti fál. Ua fiti ewe lamalamen Methodist. Lupwen a 14 ieri, ewe néúwis a liffang ngeniei pún ua fiti fál iteiten Ráninfel lón unusen ewe ier.

Lón ena atun, emén chón órúm itan Margaret Walker, i emén Chón Pwáraatá Jiowa, a poputá le chuuri inei we me fós ngeni usun ewe Paipel. Eú rán, ua filatá ai upwe fiti ar káé. Mama a ekieki pwe upwele aosukosuka an káé, iwe a ereniei upwe towu lúkún. Nge ua chúen achocho le aúseling ngeni ar pwóróusfengen. Mwirin án Margaret chuuri Mama fán fite, i a eisiniei, “En mi silei iten Kot?” Ua erá, “Meinisin aramas ra silei, itan Kot.” I a erá, “Angei noum Paipel me suuk ngeni Kölfel 83:18.” Iwe ua suuki me kúna pwe iten Kot, Jiowa. Ua ssáwu lúkún me ereni chiechiei kewe, “Lupwen oua liwiniti imwemi lepwinei, oupwe suuki néúmi Paipel lón Kölfel 83:18 me ppii ifa iten Kot.” Iwe, sia tongeni erá pwe ua fen poputá afalafal lón ena chék atun.

Ua poputá le káé ewe Paipel me papatais lón 1941. Ekiseló mwirin ena, ua eáni ewe wis ai upwe  emmweni eú Puk Study án ewe mwichefel. Ua pesei inei we, pwii kewe, me fefinei ar repwe fiti ewe mwich. Iwe iir meinisin ra poputá le fiti ewe Puk Study ua wisen emmweni. Iwe nge, Papa ese mochen fiti.

Ua eáni pwal ekkóch wis lón ewe mwichefel, me a chómmóng nei kewe puk ua kan ikkisoniir férien Chón Pwáraatá Jiowa. Eú rán, Papa a itini nei kewe puk me ereniei: “Ke kúna meinisin ekkena mettóch? Ua mochen kopwe towu seni lón ei imw faar.” Iwe ua towu seni leimw me ló nóm lón eú sóópw mi kkan ngeni itan Zanesville, Ohio. Nge ua kan etto chuuri ai famili me apéchékkúler.

Papa a sótun pinei Mama seni an fiffiti ekkewe mwich. Fán ekkóch atun Mama a ló ngeni mwich, Papa a chei me átekinatósefál ngeni imwem. Nge Mama a kan ssáwu lón pwal eú asam me ló ngeni mwich. Ua ereni Mama: “Kosap lólilen, Papa epwe chipwang le cheek.” Ló, ló, ló, Papa a fangetá le pinei án Mama fiffiti ekkewe mwich me ese chúen wor osukosukan.

Lón 1943, ám mwichefel a poputá le féri ewe Sukulen Afalafal me ua poputá le eáni ai kewe afalafal usun emén chón sukul. Ekkewe pesepes ua angei mwirin ai féri ai kewe kinikin lón ena sukul, ra álisiei ai upwe lipwákéchúló le afalafal.

Lón 1944, atun ewe Oruuen Maunen Fénúfan, ewe ofesin soufiu a ereniei ai upwe fiti ewe mwichen soufiu. Ua ló ngeni Fort Hayes lón Columbus, Ohio, iwe ra cheki péchékkúlen inisi, me ua amasoua ekkewe taropwe. Ua pwal ereni ekkewe meilap pwe usap wiliti emén soufiu. Iwe ra mut ngeniei ai upwe liwiniti leimw. Nge fitu rán mwirin, emén polis a etto leimw me ereniei, “Corwin Robison, a wor ei taropwe pwe kopwele ares.”

Ruu wiik mwirin, lón ewe imwen kapwúng ewe soukapwúng a erá: “Ika pwisin ngang upwe filatá, upwe apwúngaló pwe kopwe kalapus lón unusen manawom. Mei wor met ka mochen apasa?” Ua pélúweni: “Ámmáfel Soukapwúng, itá epwe fen pwúngúló pwe ua nóm lón tettelin emén chón afalafal seni lamalam. * Eú me eú imwen aramas, ina ai leenien afalafal, me ua fen afalafala ewe kapas allim usun ewe Mwú ngeni chómmóng aramas.” Ewe soukapwúng a ereni ewe jury: * “Ámi ouse nóm ikeei pwe oupwe apwúngaló ika átei emén chón afalafal seni lamalam are esap. Wisemi iei ámi oupwe apwúngaló ika átei a filatá an epwe fiti ewe mwichen soufiu are esap.” Esaamwo tori esopw awa nge ewe jury a apwúngaló pwe ua tipisin atai allúk. Ewe soukapwúng a apwúngaló ai upwe kalapus úkúkún nimu ier lón Ashland, Kentucky.

Akkomw, lón úkúkún ruu wiik ua kalapus lón ewe leenien fétek lón Columbus, Ohio. Nge lón ewe áeúin rán, ua chék nóm lón ruumwei we. Ua iótek ngeni Jiowa: “Use tongeni nónnóm lón ei sókkun ruumwen kalapus lón úkúkún nimu ier. Met ei upwele féri?”

Sorotá ewe rán mwirin, ekkewe chón mas ra mut ngeniei ai upwe towu seni ruumwei. Ua pwere  ngeni emén chón kalapus mi langattam me watte afaran, iwe aua nennewu lón eú asammwacho. A eisiniei, “Pwata ke kalapus, Sokonei?” Ua erá, “Ngang emén Chón Pwáraatá Jiowa.” A erá, “Fókkun? Iwe pwata chék ke nóm ikeei?” Ua apasa, “Chón Pwáraatá Jiowa rese kan fiti maun me nieló aramas.” A erá, “Ra kalapusek pokiten kese mochen nieló aramas. Iwe ra pwal kalapusei ekkewe ekkóch pokiten ra nieló aramas. Met, mi pwúng ena?” Ua erá, “Aapw, ese pwúng.”

Mwirin, ena mwán a erá, “Ua kalapus lón pwal eú leenien fétek úkúkún 15 ier, me ikena ie ua álleani ekkóch néúmi puk.” Lupwen ua rongorong ena, ua iótek, “Jiowa, álisiei pwe ei mwán epwe peniei.” Lón ena atun, ena mwán itan Paul a erá: “Ika emén lein ekkeei aramas a aosukosukok, iwe kopwe chék púchér. Upwe wisen ataweeló ena osukosuk.” Iwe atun ua kalapus ikena, use osukosuk ren ekkewe 50 chón kalapus lón ena kinikin.

Lupwen ra ámwetaei ngeni ewe leenien fétek lón Ashland, ua chuuri fitemén pwii Chón Kraist mi ásimaw mi pwal kalapus ikena. Ra álisikem me ekkewe pwal ekkóch ám aupwe amwéchú ám ririéch ngeni Jiowa. Ra ewisa ngenikem ekkewe wokisin lón Paipel aupwe álleani iteiten wiik, me aua ammólnatá kapas eis me pélúwer fán iten ám kewe chufengen pwiich kana ra kan akkóta. Aua nóm lón eú watteen ruumwen kalapus me ám kewe peet ra tetteliló únúkkún ekkewe etiip. Emén pwiich a wisen akkóta ám leenien afalafal. A kan ereniei: “Robison, enan peet ikenan óm leenien afalafal. Wisom óm kopwe afalafal ngeni ewe emén a nóm wóón. Kopwe túmúnúéchú pwe kopwe afalafal ngeni me mwen an epwe towu.” A ina usun kókkótun ám angangen afalafal.

A wesiló ewe Oruuen Maunen Fénúfan lón 1945, nge ua chúen kalapus ren pwal ekkóch fansoun mwirin ena. Ua lólilen ren ai famili pokiten Papa a fen ereniei atun ua chúen nónnóm rer, “Ika ua tongeni atokowu, ua tongeni pwákini ekkewe pwal ekkóch osukosuk.” Lupwen ua towu seni kalapus, ua máirú me pwapwa. Fúmén lón ai famili ra fiffiti ekkewe mwich me emén lein fefinei kewe a papatais inaamwo ika Papa a fókkun ú ngeniir.

Lón 1950 a poputá ewe maun lón Korea, nge Merika a pwal angolong lón. Iwe, a iei oruuen án ewe ofesin soufiu kékkériei ai upwe fiti ewe mwichen soufiu. Ra ereniei ai upwe ló sefál ngeni Fort Hayes. Mwirin ai angei eú test mi cheki ai kewe tufich, emén meilapen soufiu a ereniei, “En emén mi  fókkun watte óm grade me lón ei kúmi.” Ua apasa, “Mi éch, nge usap fiti ewe mwichen soufiu.” Ua aloni alon 2 Timoty 2:3 me apasa, “Ngang ua fen néún Kraist soufiu.” Ewe meilapen soufiu a mwo fanafaneló, mwirin a apasa, “Iwe ka tongeni ló.”

Ekiseló mwirin ena, ua fiti ewe mwich fán iten Bethel lón eú mwichelap mi fis lón Cincinnati, Ohio. Pwiich we Milton Henschel a apasa lón na mwich pwe lón Bethel a wor osupwang fán iten pwiich kewe mwán mi mochen angang weires fán iten ewe Mwúún Kot. Ua amasoua ewe application fán iten Bethel me mwirin ua ketiw. Lón August 1954 ua poputá le angang lón Brooklyn Bethel me ua chúen angang lón Bethel tori ikenái.

Fansoun meinisin a wor chómmóng ai angang lón Bethel. Lón fite ier, ua wisen túmúnú ekkewe mwesinen epwichipwich fán iten ewe leenien peres puk me ekkewe ofes. Ua pwal emén mekánik me ua férisefálli ekkewe lók mi ta. Ua pwal angang lón ekkewe Leenien Mwichelap lón New York City.

Ua fókkun pwapwaiti ekkewe kókkót lón Bethel, áwewe chék ám féri lesenin rán lesossor, me ewe Káéén Leenien Mas, me pwal ai fiti chón ai mwichefel le afalafal. Nge ren ach ekieki ekkena kókkót, ren enletin itá meinisin familien Chón Pwáraatá Jiowa repwe pwal féri iteitan. Lupwen sam me in me ekkewe nau ra pwóróusfengen wóón ewe lesenin rán, féri ar Famili Fel iteitan, uwawu meefier lón ekkewe mwich me tinikken le afalafala ewe kapas allim, ese mwáál meinisin lón ena famili repwe akkamwéchú ar ririéch ngeni Jiowa.

A chómmóng chiechiei lón Bethel me lón ewe mwichefel. Ekkóch me leir iir mi kepit me ra fen feitá láng. Ekkóch esap iir mi kepit. Nge meinisin néún Jiowa chón angang rese unuséch, kapachelong chón Bethel. Ika aua áninifengen me emén pwiich, ua kan achocho ai upwe kútta kinamwe iteitan. Ua ekieki usun Mateus 5:23, 24 me ifa usun sipwe pwákini tipefesen. Ese mecheres ach sipwe apasa “omusaaló ai tipis,” nge lap ngeni osukosuk lefilen aramas a pwák ren ena.

Lón ekkeei rán, pokiten ua fen chinnap a weires ngeniei ai upwe afalafal imw me imw, iwe nge use fangetá. Ua káé me ekis sile ewe esin fósun China  itan Mandarin me ua pwapwa le chuuri ekkewe chón China mi fetál wóón al. Lón ekkóch rán, ua anéúnéú 30 are 40 puk ngeni aramas mi pwapwaiti.

Ua fen chuursefáli emén lón China! Eú rán, emén nengngin a emelimel ngeniei atun a ngeniei ewe taropween advertise fán iten eú leenien amémé féún irá. Ua pwal emelimel me anéúnéú ngeni Ewe Leenien Mas me Awake! lón fósun China. A angei ekkewe puk me ereniei pwe itan Katie. Mwirin ena, iteiten án Katie kúnaei, a kan etto rei me fós ngeniei. Ua áiti ngeni iten ekkewe féún irá me ekkewe iasai lón fósun Merika, me i a pwal nikáppirú ekkewe kapas ua apasa. Ua pwal áweweei ngeni ekkóch wokisin lón Paipel, me anéúnéú ngeni ewe puk Paipel A Apasa. Iwe nge, mwirin fitu wiik, use chúen kúna i.

Fitu maram mwirin, ua anéúnéú ekkewe puk ngeni pwal emén nengngin a pwal eineti ekkewe taropween advertise, me i a angei. Eú wiik mwirin, ena nengngin a ngeniei néún we cell phone me apasa, “Kopwe fós ngeni China.” Ua apasa “Use sissilei emén lón China.” Nge ese fangetá, iwe ua angei ewe phone me apasa, “Hello, ngang Robison.” Emén a pélúweni, “Robby, ngang Katie. Ua liwiniti China.” Ua erá, “China?” Katie a pélúweni, “Ewer. Robby, ke silei ena nengngin a ngonuk ena phone? I pwii. Ka áiti ngeniei chómmóng mettóch mi múrinné. Kese mochen kopwe pwal asukula i usun chék óm asukulaei.” Ua erá, “Katie, upwe achocho ngeni. Kilisou ren óm ereniei ia ka nóm ia iei.” Ekiseló mwirin ena, ua pwal fós ngeni pwiin Katie na nge a ina ewe sáingolóón fansoun. Ia chék ekkena nengngin ra nónnóm ia iei, amwo ra sópweló ar káé usun Jiowa.

Ua fen angang ngeni Jiowa ren úkúkún 73 ier, me ua pwapwa pwe a álisiei ai usap fiti maun me upwe akkamwéchú ai tuppwél me lón kalapus. Pwal och, pwii kewe me fefinei ra ereniei pwe ua apéchékkúler lupwen ua úppós me use fangetá ren án Papa ú ngeniei. Ló, ló, ló, Mama me wonomén pwii kewe me fefinei ra papatais. Pwal mwo Papa a ekis siwil, me a fen fiti ekkóch mwich me mwen an a máló.

Ika fán letipen Kot, chón ai we famili me chiechiei kewe mi fen máló repwe manawsefál lón ewe ótót sefé. Anchangei pwapwaach ewe atun oukich me chókkewe sia tongeer ousipwe fel ngeni Jiowa tori feilfeiló chék! *