EKIEKI ewe rán mi fókkun apwapwa seni meinisin lón manawom. Ina óm ránin apwúpwúlú are ránin uputiwen noum we áeménún? Are ina ránin óm we papatais? Ese mwáál ina ewe rán lón manawom mi fókkun lamot me apwapwa. Me lón ena rán, a ifa me pwapwaan pwiim kewe Chón Kraist le kúna óm pwáraatá óm tong ngeni Kot seni unusen letipom, manawom, ekiekum, me péchékkúlóm!​—Mark. 12:30.

Ese mwáál, ka fen kúna watteen pwapwa lón óm akkangang ngeni Jiowa seni ewe fansoun ka papatais. Iwe nge, ekkóch chón afalafal a fen péút seniir ewe úkúkún pwapwa ra eáni me lóóm. Pwata? Ikkefa ekkewe popun sipwe chúen akkachocho le angang ngeni Jiowa fán pwapwa?

Ewe pwóróus usun ewe Mwú a atoto ngenikich watteen pwapwa. Pwata? Pokiten Jiowa a pwonei pwe ekiseló chék ewe Mwú epwe amóeló ei ótóten fénúfan mi ngaw me atoto án Kot we ótót sefé. Iei met a mak lón Sefanaia 1:14: “Ewe rän mi lap, ränin ewe Samol mi Lapalap a arapoto, a arapoto o müttirito.” Nge ika sia meefi pwe ach wikkitiwiti ena rán a ttam seni minne sia fen ekieki, iwe a tongeni péút senikich ewe pwapwa sia eáni lóóm. Ei mettóch a tongeni efisi ach sipwe apwangapwangoló lón ach angang ngeni Kot.​—SalF. 13:12.

Ach chiechi ngeni pwiich kewe a apéchékkúlakich ach sipwe sópweló le angang ngeni Jiowa fán pwapwa. Án néún Jiowa kewe aramas eáni féffér mi múrinné, neman a fen lukiikich ngeni ewe enlet me álisikich ach sipwe poputá le angang ngeni Kot fán pwapwa. (1 Pet. 2:12) Iwe nge, met a tongeni fis ika emén lein pwiich kewe chón lúkú a kapwúng pokiten a álleasolapa án Kot allúk? Ei mettóch a tongeni eletipechowu ekkóch lón ewe mwichefel me efisi an epwe péút seniir ar pwapwa.

Tongen pisek a pwal tongeni efisi an epwe péút senikich ach pwapwa. Ifa usun? Án Satan ei fénúfan a kan etipetipakich ach sipwe mééni mettóch ese enletin lamot ngenikich. Iwe, amwo sipwe chechchemeni alon Jesus ei: “Esap wor eman a tongeni angang ngeni ruoman samol. Pun epwe oput eman, nge epwe echeni ewe eman, ika epwe tipeni eman, nge epwe turunufasei ewe eman. Ousap tongeni angangepök ngeni Kot me wöün fanüfan.” (Mat. 6:24) Sise tongeni angang ngeni Jiowa fán pwapwa nge pwal achocho le angei wéún ei fénúfan úkúkún ach tongeni.

Me ren chókkewe mi tongei Jiowa, ar angang ngeni i esap ina och mettóch mi áweires ngeniir. (1 Joh. 5:3) Chechchemeni pwe Jesus a apasa: “Oupwe feito rei ämi meinisin mi weiresikis o uwochou, ngang üpwe asösökemi. Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi. Pun ai we waas üpwe anomu womi a mecheres, nge wosemi we üpwe ngenikemi a pän.” (Mat. 11:28-30) Ach manaweni manawen emén Chón Kraist a atoto ngenikich pwapwa me kinamwe. A wesewesen wor popun mi núkúchar ach sipwe pwapwa lón ach angang ngeni Jiowa. Iei, sipwele ppii úlúngát me leir.​—Ap. 3:18.

Sia angang ngeni ewe Chón Awora ngenikich manaw me ewe Kot mi pwapwa. (Föf. 17:28; 1 Tim. 1:11, NW) Sia mirititi pwe ika esap pwúnún ewe Chón Férikich, esap wor manaw rech. Iwe sipwe sópweló le angang ngeni i fán pwapwa, ese lifilifil fite ier ra fen ló seni ewe atun sia papatais.

Nengeni pwóróusen Héctor. Lón an angang ngeni Jiowa a eáni ewe wis chónemmwen mi wisen sáifetál úkúkún 40 ier. Pwal mwo nge ‘lon an chinlap,’ a chúen pwapwaiti an angang ngeni Jiowa. (Kölf. 92:12-14) Semwenin pwúlúwen Héctor we a efisi an epwe kúkkúnúló án Héctor angang ngeni Kot, iwe nge ese péút seni an pwapwa. A apasa: “Inaamwo ika mi alólilen ai kúna akkapwangapwangolóón pwúlúwei we me a áweires ai túmúnú i, nge use mut ngeni ena mettóch an epwe atai ai pwapwa le angang ngeni ewe Kot mi enlet. Ai silei pwe manawei a pop seni Jiowa, ewe mi féri aramas ren eú popun, a fen naf an epwe amwékútúei ai upwe fókkun tongei i me angang ngeni seni unusen letipei. Ren an esap péút seniei ai pwapwa, ua achocho le fiffiti ewe angangen afalafal, me achocho le afóta ekieki wóón ewe ápilúkúlúk fán iten ewe Mwú.”

Jiowa a awora ewe asoren méén kepich, ewe mi atufichi ach sipwe eáni eú manaw mi pwapwa. Ewer, “iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Joh. 3:16) Ach kewe tipis ra tongeni musoló me sia tongeni kúna manaw esemuch ika pwe sia pwáraatá ach lúkú ewe méén kepich, án Kot we liffang mi fiti tong. Ina eú popun mi fókkun múrinné ach sipwe kilisou! Iwe ach kilisou ren ewe méén kepich epwe amwékútúkich le angang ngeni Jiowa fán pwapwa.

Emén pwiich mwán itan Jesús, mi nónnóm Mexico, a apasa: “Ua usun emén slave fán iten ai we angang, fán ekkóch ua angang fite fite awa rán me rán, inaamwo ika rese ereniei ai upwe ina usun. Ua chék féri ena pwe epwe watte peioffui. Ló, ló, ló, ua  káé usun Jiowa me kúna ifa usun a fangóló Néún we mi áchengicheng fán iten aramas. Ua fókkun mochen angang ngeni i. Iwe ua fangóló manawei ngeni Jiowa, me mwirin ai angang ngeni ewe kompeni úkúkún 28 ier, ua filatá ai upwele towu seni me fiti ewe angangen afalafal full-time.” A ina usun pwóróusen án Jesús poputá le angang ngeni Jiowa fán pwapwa.

Sia eáni eú manaw mi liméch mi atoto ngenikich pwapwa. En mi chechchemeni ifa usun manawom lón ewe atun kesaamwo silei Jiowa? Ewe aposel Paulus a áchema ngeni ekkewe Chón Kraist lón Rom pwe iir ra “chon angang ngeni tipis me lom,” nge mwirin ra “wiliti chon angang ngeni pwüng.” Pokiten ra manaweni eú manaw mi liméch, iwe ra tongeni mwétéresiti ewe manaw esemuch. (Rom 6:17-22) Kich sia pwal fiti án Jiowa kewe allúk, ina minne sia ngaseló seni ewe riáfféú mi feito seni manaw mi limengaw are féfférún akkachofesá. Ina eú popun sia tongeni pwapwa!

Nengeni pwóróusen Jaime, me lóóm i emén mi lúkú pwe ese wor Kot me aramas ra pop seni man, me pwal i emén chón boxing. Jaime a poputá le fiti án Chón Kraist kewe mwich me a chúng letipan ren ewe tong a kúna me ikkena ie. Ren án Jaime epwe likitaló ewe esin manaw a manaweni, a lamot epwe tingorei Jiowa an epwe álisi pwe epwe lúkú I. Iei alon: “Ekis me ekis ua mirititi pwe mi wor emén Sam mi tong me Kot mi úméúméch.” A pwal erá, “Ai achocho le álleasochisi án Jiowa kewe allúk mi pwúng, a eú minen túmún ngeniei. Ika use siwili manawei, iei nge ua fen ninniiló usun chék ekkóch chienei kewe chón boxing. Ekkeei ier ua angang ngeni Jiowa lón, ikkeei ekkewe fansoun mi apwapwa seni meinisin lón manawei.”

Itá epwe ifa meefiach, atun sia wikkitiwiti sópwólóón ei ótót mi ngaw? Chechchemeni pwe kich sia féri letipen Kot me sia ápilúkúlúkú warotoon ewe manaw esemuch. Ina minne “sisap achanü le föföri mine a mürina. Pun are sisap achanü, epwe war ewe fansoun lupwen sipwe kini ewe räs.” (Kal. 6:8, 9) Ren án Jiowa álillis, sipwe likiitú, achocho le ámááraatá ekkewe napanap mi lamot ngenikich pwe sipwe kúna manaw atun ewe “riaföü mi lapalap,” me sópweló le angang ngeni Jiowa fán pwapwa.​—Pwär. 7:9, 13, 14; Jas. 1:2-4.

Sia tongeni lúkúlúk pwe Jiowa epwe efeiéchú ach likiitú pokiten a silei ewe angang sia féri, ach tongei i, me ach aúcheani itan we. Ika sia sópweló le angang ngeni fán pwapwa, sipwe usun Tafit, ewe soumakken kélfel, ewe a apasa: “Iteiten fansoun üa mefi pwe ewe Samol mi Lapalap a nom rei. Pokiten i a arap ngeniei, üsap tongeni mwökütüküt. Iei mine lelukei a pwapwa o mwänek, inisi a mefi kinamwe.”​—Kölf. 16:8, 9.