1. Seni chék lepoputáán, ifa ewe mettóch a kan pwá lón án Kot angang me pwal án néún kewe aramas?

 JIOWA me Jesus ra tipeeúfengen seni me lepoputáán án Kot fératá mettóch. Jiowa a fératá Jesus me mwen an féri mettóch meinisin. Mwirin, iir ra angangfengen, me Jesus a “nom ren Kot usun eman sousile angang.” (SalF. 8:30) Néún Jiowa kewe chón angang ra pwal angangfengen lón ewe angang mi lamot repwe féri. Áwewe chék, Noa me an we famili ra angangfengen le falei ewe waimw. Mwirin, ekkewe chón Israel ra angangfengen le aúetá ewe imwenfel mangaku, epiichatiw, me uwei seni eú leeni ngeni pwal eú leeni. Lón ewe imwenfel, ra angangfengen le ettiki ekkewe pisekin nikáttik me pwal kél pwe repwe mwareiti Jiowa lón kél mi ngiingiéch. Néún Jiowa aramas ra tufichin féri meinisin ekkena mettóch pokiten ra angangfengen fán tipeeú.​—Ken. 6:14-16, 22; Num. 4:4-32; 1 Kron. 25:1-8.

2. (a) Ifa ewe mettóch a kan pwá lón ewe mwichefelin Chón Kraist lón fansoun lóóm? (b) Menni kapas eis sipwele pwóróus wóón?

² Ekkewe Chón Kraist lón fansoun ekkewe aposel ra pwal  angangfengen fán tipeeú. Aposel Paulus a áweweei pwe inaamwo ika a sókkópat ar tufich me angang, nge ra tipeeúfengen. Iir meinisin ra tapweló mwirin néúr we Sou Emmwen, Jesus Kraist. Paulus a apépéfengeniir me eú inis mi wor sókkópaten kifetin mi angangfengen. (Álleani 1 Korint 12:4-6, 12.) Nge ifa usun kich ikenái? Ifa usun sia tongeni angangfengen fán tipeeú lón ewe angangen afalafal, lón ewe mwichefel, me lón famili?

3. Ifa ewe lángipwi aposel Johannes a kúna?

³ Lón fansoun ekkewe aposel, ewe aposel Johannes a kúna eú lángipwiin fúmén chónláng mi ettik néúr rappwa. Lupwen ewe enimménún chónláng a ettiki néún we rappwa, Johannes a kúna “eföü fü a turutiu won fanüfan.” Ena “fü” a áeá efóch kii le suuki ewe asam ngeni eú pwaang mi alóllóól, mi kirochoroch. A akkomw étútá och étúét seni ena pwaang, mwirin lifichifichimas ra towu seni lón ewe étúét. Ekkena lifichifichimas rese atai ekkewe irá are fetil, nge ra fen efeiengawa “ekewe aramas resap eäni än Kot we pwau won chamwer.” (Pwär. 9:1-4) Johannes a silei pwe a tongeni watte attaen ekkewe lifichifichimas. Lón fansoun Moses we ra fen attangawei Isip. (Eks. 10:12-15) Ekkena lifichifichimas Johannes a kúner ra wewe ngeni ekkewe Chón Kraist mi kepit, iir kewe ra akkafalafala ewe pwóróus mi péchékkúl usun kapwúngún ekkewe lamalam chofona. Me iei, fite million aramas mi eáni ápilúkúlúkún manaw wóón fénúfan ra pwal eti chókkana. Iir ra angangfengen fán tipeeú lón ewe angangen afalafal. Ei angang a fen álisi chómmóng aramas ar repwe towu seni lamalam chofona me repwe ngaseló seni fán nemenien Satan.

4. Menni angang a lamot néún Kot kewe aramas repwe féri, me ifa ewe eú chék alen ar repwe tongeni féri ena?

⁴ Wisach ach sipwe afalafala ewe kapas allim ngeni aramas wóón unusen fénúfan me mwen warotoon ewe sópwólóón. Iei eú angang mi fókkun watte! (Mat. 24:14; 28:19, 20) Sipwe etiwa aramas meinisin mi “kaka” ar repwe ún “ewe kolukun manau,” weween sipwe asukula ewe pwóróus mi enlet lón Paipel ngeni meinisin mi mochen weweiti. (Pwär. 22:17) Nge sia chék tongeni féri ena angang ika pwe sia “masfengen,” are angechu fán tipeeú, me angangfengen lón ewe mwichefel.​—Ef. 4:16.

5, 6. Ifa usun sia tipeeúfengen lón ach angangen afalafala ewe kapas allim?

⁵ A lamot sipwe kókkótéch lón ach angangen afalafal, pwe sipwe tikeri chómmóng aramas. Ekkewe emmwen sia angei seni ach mwichefel, áwewe chék seni lón ekkewe mwich fán iten ewe angangen afalafal, ra álisikich le féri ena. Sia ló áiti ngeni aramas ewe kapas allim usun ewe Mwú me pwal anéúnéú ngeniir puk mi lóngólóng wóón Paipel. Ewer, sia fen eineti fite million ekkena esin puk wóón unusen fénúfan. Fán ekkóch a kan kkótóló ach kewe angangen einet mi kkóló aúchean. Lupwen ka féri ei angang, oua angangfengen me fite million aramas wóón unusen fénúfan iir kewe mi pwal afalafala ena chék esin pwóróus! Oua pwal angangfengen me ekkewe chónláng, ekkewe ra álisi néún Kot aramas le afalafala ewe kapas allim.​—Pwär. 14:6.

⁶ A ifa me ámmeseiken ach álleani lón ekkewe Yearbook pwóróusen ewe angangen afalafal wóón unusen fénúfan! Pwal och, ekieki ach tipeeúfengen wóón unusen fénúfan atun sia etiwa aramas ngeni ach kewe mwichelap. Me ikena ie, ousia aúseling ngeni eú chék sókkun prokram. Ekkewe  afalafal, sipai, me pwoomw ra apéchékkúlakich ach sipwe achocho le angang ngeni Jiowa úkúkún ach tufich. Sia pwal tipeeúfengen me pwiich kewe wóón unusen fénúfan ren ach fiti ewe Áchechchem iteiten ier. (1 Kor. 11:23-26) Sia mwichfengen lón eú chék ránin, Nisan 14, mwirin tuputiwen akkar pwe sipwe pwáraatá ach kilisou ren met Jiowa a féri fán itach me pwal álleasochisi án Jesus we allúk ngenikich. Nge lón ekkewe wiik me mwen ewe Áchechchem, ousia angangfengen le etiwa chómmóng aramas úkúkún ach tufich pwe repwe fitikich lón ei mwich mi aúchea.

7. Atun sia angangfengen, met sia tufichin féri?

⁷ Ese tongeni watte minne emén lifichifichimas epwe féri ika pwe i chék ákkáláemén. Pwal ina usun kich, sise tongeni afalafal ngeni aramas meinisin ika pwe kich chék emén. Nge pokiten sia angangfengen, sia tufichin esilei ngeni fite million aramas pwóróus usun Jiowa me álisi ekkóch ar repwe mwareiti me asamolu i.

8, 9. (a) Menni kapas áwewe Paulus a áeá pwe epwe áiti ngeni ekkewe Chón Kraist ar repwe tipeeúfengen? (b) Ifa usun sia tongeni tipeeúfengen lón mwichefel?

⁸ Lón néún Paulus we taropwe ngeni ekkewe chón Efisos, i a áweweei ifa usun kókkótun ewe mwichefel. A pwal erá pwe a lamot meinisin chón ewe mwichefel repwe “fokun mämäritä lon mettoch meinisin.” (Álleani Efisos 4:15, 16.) Paulus a eáni kapas áwewe inisin aramas le áweweei pwe emén me emén Chón Kraist a tongeni álisatá tipeeúin ewe mwichefel fán emmwenien Jesus, ewe mékúren mwichefel. A erá pwe meinisin kifetin ewe inis ra angangfengen “ren ekewe kirupun lekupukup meinisin mi wor ren.” Iwe, met a lamot emén me emén kich sipwe féri, inaamwo ika kich kúkkún are watte, mi péchékkúl inisich are ese?

⁹ Jesus a fen ewisa ngeni ekkewe mwán mi ásimaw ar repwe emmweni ewe mwichefel me i a mochen ach sipwe súfélitiir me álleasochisi ekkewe emmwen ra ngenikich. (Ipru 13:7, 17) Esap fansoun meinisin epwe mecheres ngenikich ena. Iwe nge, sia tongeni tingorei Jiowa an epwe álisikich. An we manaman mi fel a tongeni álisikich ach sipwe álleasochisi menni chék emmwen ekkewe mwán mi ásimaw ra ngenikich. Pwal ekieki úkúkún ewe álillis sia tongeni awora ngeni ach mwichefel ika sia tipetekison me onómukich fán emmwenien ekkewe mwán mi ásimaw. Ach mwichefel epwe tipeeúfengen, me ach tongfengen epwe péchékkúleló.

10. Ifa usun ekkewe chónálillisin mwichefel ra álisatá ewe tipeeú lón mwichefel?

¹⁰ Ekkewe chónálillisin mwichefel ra pwal álisatá ewe tipeeú lón mwichefel. Ra angang weires le álisi ekkewe mwán mi ásimaw me sia aúcheani mettóch meinisin ra féri. Áwewe chék, ekkena chónálillisin mwichefel ra chekiéchú néúch kewe puk sia néúnéú lón ewe angangen afalafal pwe epwe naféch, me ra etiwaéchú ekkewe chón etto fiti ach kewe mwich. Ra achocho le férsefáli met mi ta me wóón ach kewe Leenien Mwich me túmúnú liméchún. Ika sia tipemecheres ngeni ekkeei mwán, sipwe tipeeúfengen me angang ngeni Jiowa fán kókkótéch.​—Apépé ngeni Föför 6:3-6.

11. Ifa usun ekkewe alúwél ra tongeni álisatá ewe tipeeú lón mwichefel?

¹¹ Ekkóch mwán mi ásimaw ra fókkun angang weires ren fite fite ier fán iten ewe mwichefel. Nge pokiten ra chinnapeló neman iei rese chúen tongeni féri ewe úkúkún angang ra kan féri me mwan. Iwe ekkewe alúwél ra tongeni álillis. Ika ra angei káit, ra tongeni eáni pwal ekkóch wis lón ewe mwichefel. Me lupwen ekkewe chónálillisin mwichefel ra achocho, neman iir repwe tufichin eáni ewe wis chónemmwen. (1 Tim. 3: 1, 10) Ekkóch alúwél chónemmwen lón mwichefel ra pwal feffeitá, iwe ra tufichin eáni ewe wis chónemmwen mi wisen sáifetál me ra álisi pwiir kewe lón chómmóng mwichefel. Sia kilisou atun ekkewe alúwél ra tipemecheres le angang fán iten pwiir kewe chón lúkú.​—Álleani Kölfel 110:3; Än Salomon Afalafal 12:1.

12, 13. Met a tongeni álisi meinisin lón ewe famili ar repwe tipeeúfengen?

¹² Ifa usun sia tongeni álisi chón ach famili pwe sipwe angangfengen fán tipeeú? Ach féri ach famili fel iteiten wiik a tongeni álisikich. Lupwen ekkewe sam, in, me nau ra awora fansoun le káéfengen usun Jiowa, ar tongfengen a péchékkúleló. Lón ena fansoun, ra tongeni asóssót met repwe apasa lón ewe angangen afalafal, iwe epwe álisiir le mmólnefichitá. Nge lupwen ra rongorong án emén me emén leir fós usun ewe enlet me kúna pwe iir meinisin lón ewe famili ra tongei Jiowa me mochen apwapwaai i, iwe epwe lapóló ar akkarapfengen.

¹³ Ifa usun emén mwán me pwúlúwan we repwe angangfengen fán tipeeú? (Mat. 19:6) Ika iir me rúúemén ra tongei Jiowa me angang ngeni, iwe repwe pwapwa me tipeeú lón ar pwúpwúlú. A pwal lamot repwe pwáraatá ar tongfengen lefiler, usun chék Apraham me Sara, Isaak me Repeka, me Elkana me Hana. (Ken. 26:8; 1 Sam. 1:5, 8; 1 Pet. 3:5, 6) Lupwen ekkewe pwúpwúlú ra féri ena, a wor tipeeúfengen lefiler me a péchékkúleló ar riri ngeni Jiowa.​—Álleani Än Salomon Afalafal 4:12.

14. Ika pwúlúwom we esap emén chón angang ngeni Jiowa, met kopwe féri pwe ámi ririin pwúpwúlú epwe chék péchékkúl?

¹⁴ Ewe Paipel a fen affata pwe Chón Kraist resap pwúpwúlú ngeni emén ese angang ngeni Jiowa. (2 Kor. 6:14) Iwe nge, mi wor chókkewe pwúlúwer esap iir Chón Pwáraatá  Jiowa. Ekkóch ra kerán káé ewe enlet mwirin ar ra fen pwúpwúlú, me pwúlúwer esap Chón Pwáraatá. Ekkóch neman ra pwúpwúlú ngeni emén mi angang ngeni Jiowa, nge mwirin, ena emén a likitaló ewe mwichefel. Ekkewe Chón Kraist mi kúna ekkena esin lón manawer, ra achocho úkúkún ar tufich le túmúnú péchékkúlen ar ririin pwúpwúlú ren ar álleasochisi án Paipel kapasen emmwen. Fán ekkóch a tongeni weires ena. Áwewe chék, Mary me pwúlúwan we itan David ra angang ngeni Jiowa. Mwirin David a úkútiw le fiti ekkewe mwich. Nge Mary a chúen achocho pwe epwe emén fin pwúpwúlú mi múrinné me pwáraatá napanapen Chón Kraist kewe. A pwal áiti ngeni néúr kewe wonomén usun Jiowa me fiffiti ekkewe mwich me mwichelap. Fitu ier mwirin, lupwen néúr kana ra wattetá me rese chúen nóm rer, Mary a chúen sópweló an angang ngeni Jiowa inaamwo ika a fen kon lapóló weiresin. Ló, ló, ló, David a poputá le ákkálleani ekkewe puk Mary a ka likitatiw. Mwirin och fansoun, a poputásefál le fiti ekkóch ekkewe mwich. Emén át wonu ierin, néún néún David, a kan soun áimuoló eú leenien mwot lón mwich fán iten David, nge ika ese war, ena át a kan ereni, “Papachi, ua pwosituk lón mwich ikenái.” David a liwiniti Jiowa mwirin 25 ier, me iei iir me Mary ra pwapwa pwe ra angangfengen sefál ngeni Jiowa.

15. Ifa usun ekkewe pwúpwúlú mi chinnap ra tongeni álisi ekkewe pwúpwúlú mi kúkkún ieriir seniir?

¹⁵ Lón ei fansoun, Satan a achocho le atai ekkewe famili. Iei eú popun a fókkun lamot án ekkewe pwúpwúlú mi angang ngeni Jiowa repwe achocho le tipeeúfengen lón ar famili. Ese lifilifil ifa úkúkún ttamen ámi oua fen pwúpwúlú, nge ekieki met ka tongeni apasa are féri pwe epwe péchékkúleló ámi ririin pwúpwúlú. Ren ekkewe pwúpwúlú mi fen chinnap, ra tongeni eú leenien áppirú ngeni ekkewe pwúpwúlú mi kúkkún ieriir seniir. Neman oua tongeni etiwa eú pean pwúpwúlú mi kúkkún ieriir senikemi ar repwe fiti ámi famili fel. Repwe kúna pwe ese lifilifil úkúkún ttamen án rúúemén pwúpwúlú, nge mi lamot repwe pwáraatá ar tongfengen lefiler me tipeeúfengen.​—Tit. 2:3-7.

16, 17. Met néún Kot kewe chón angang mi tipeeúfengen ra mwétéresiti?

¹⁶ Lupwen ekkewe chón Israel ra ló fiti ekkewe fetellap lón Jerusalem, ra angangfengen. Ra ammólnatá mettóch meinisin mi lamot ngeni ar sái. Iwe, ra mwin le sái me ra álillisfengen. Ren ewe imwenfel, ra chufengen pwe repwe mwareiti Jiowa me fel ngeni. (Luk. 2:41-44) Ikenái, atun sia ammólnatá ngeni manaw lón ewe ótót sefé, a lamot ousipwe tipeeúfengen me tipemecheres le angangfengen úkúkún ach tongeni. Ka tongeni ekieki pwal ekkóch alen óm kopwe alapaaló le féri ena?

¹⁷ Aramas lón ei fénúfan ra tipefesen me pwal mwo nge ánini are fiu wóón chómmóng mettóch. Nge kich sia kilisou pún Jiowa a álisikich le weweiti ewe enlet me kinamwefengen! Néún kewe aramas wóón unusen fénúfan ra fel ngeni lón ewe napanap i a pwapwaiti. Nge ákkáeúin lón ekkeei ránin lesópwólóón, a fen kon lapóló tipeeúfengenin néún Jiowa aramas lap seni lóóm. Iei sia kúna pwénúetáán met Aisea me Mika ra oesini, néún Kot aramas ra tipeeúfengen le feffeitá “won chukun ewe Samol mi Lapalap.” (Ais. 2:2-4; álleani Mika 4:2-4.) Epwele ifan me pwapwaach lón mwachkkan lupwen aramas meinisin wóón fénúfan repwe tipeeúfengen me angangfengen lón ar fel ngeni Jiowa!