1, 2. (a) Lón ei fansoun, met a kan atoto ngeni néún Kot kewe aramas pwapwa? (b) Ifa usun ekkewe sam me in me chónemmwen lón mwichefel ra tongeni álisi ekkewe kúkkún me sáráfé pwe repwe weweiti weween án emén papatais?

 IEI alon emén chónemmwen lón mwichefel ngeni emén át 12 ierin itan Christopher: “Ua fen sissileok seni leuputiwóm me ua pwapwa ai silei pwe ka mochen papatais. Nge ua mochen eisinuk, ‘Met popun ka mochen papatais?’” Mi wor popun mi múrinné án ena chónemmwen eáni ena kapas eis. Sia fókkun pwapwa le kúna chómmóngun kúkkún me sáráfé mi papatais iteiten ier. (SalAf. 12:1) Nge ekkewe sam me in Chón Kraist me ekkewe chónemmwen lón mwichefel ra pwal mochen ppii pwe chókkana  repwe féri pwisin ar kefil me repwe weweiti met weween án emén papatais.

² Lón Paipel, sia silei pwe án emén Chón Kraist fangóló manawan ngeni Kot me papatais, ina poputáán an a eáni eú mineféén manaw. Ei mineféén manaw a atoto chómmóng feiéch seni Jiowa, nge a pwal wewe ngeni pwe Satan epwe ú ngeni ena emén. (SalF. 10:22; 1 Pet. 5:8) Ina popun a lamot ngeni ekkewe sam me in Chón Kraist ar repwe awora fansoun le áiti ngeni néúr kewe wesewesen weween án emén wiliti néún Jesus chón káé. Ika esap iir Chón Kraist semen me inen ekkewe kúkkún me sáráfé, iwe ekkewe chónemmwen lón ewe mwichefel repwe álisiir fán tong le weweiti weween án emén fangóló manawan ngeni Kot me papatais. (Álleani Lukas 14:27-30.) A lamot án emén epwe ammólnatá me mwen an epwe aúetá eú imw pwe epwe tongeni áweséchúoló, iwe a pwal lamot ngeni ekkewe kúkkún me sáráfé ar repwe ammólnatá me mwen ar repwe papatais pwe repwe tongeni angang ngeni Jiowa fán tuppwél “tori lesopolan.” (Mat. 24:13) Met epwe álisi ekkewe kúkkún me sáráfé ar repwe tipeppós le angang ngeni Jiowa tori feilfeiló chék? Sipwe ppii.

3. (a) Met sia káé seni minne Jesus me Petrus ra apasa usun lamoten papatais? (Mat. 28:19, 20; 1 Pet. 3:21) (b) Ikkefa ekkewe kapas eis sipwele etittina, iwe pwata?

³ En emén kúkkún are sáráfé mi mochen papatais? Ika ina, iwe a mmen éch! A eú watteen feiéch án emén papatais me wiliti emén Chón Pwáraatá Jiowa. Nge pwal ina met mi lamot emén Chón Kraist epwe féri. Me a lamot papatais fán iten chókkewe repwe kúna manaw atun ewe riáfféú mi lapalap. (Mat. 28:19, 20; 1 Pet. 3:21) Lupwen ka papatais, ka pwáraatá pwe ka fen pwon ngeni Jiowa pwe kopwe angang ngeni tori feilfeiló chék. Ka fókkun mochen apwénúetá óm na pwon, iwe ekkeei kapas eis repwe álisuk le silei ika ka mmólnetá le papatais: (1) A fen nóm rei ewe mirit mi lamot, are ásimaw, ren ai upwe féri ei kefil? (2) Seni wesen mochenin pwisin letipei ai upwe papatais? (3) Ngang mi weweiti weween án emén fangóló manawan ngeni Jiowa? Sipwele etittina ekkeei kapas eis.

4, 5. (a) Pwata papatais esap fán iten chék ekkewe mi watte? (b) Met weween án emén Chón Kraist epwe ásimaw?

⁴ Ewe Paipel ese apasa pwe chókkewe chék mi watte ieriir are mi fen tikeri eú úkúkún ier, repwe tongeni papatais. Iei met Än Salomon Fos 20:11 a apasa: “Lapalapen manauen eman semirit a pwä ren an föför, ika a limöch o pwüng lon mine a föri.” Ina minne, pwal mwo nge emén semirit are kúkkún a tongeni weweiti weween án emén epwe féri minne mi pwúng me an epwe fangóló manawan ngeni ewe Chón Fératá i. Iwe, papatais a lamot me a pwal fichiiti emén kúkkún are sáráfé mi fen pwáraatá pwe i mi ásimaw me a fen fangóló manawan ngeni Jiowa.​—SalF. 20:7.

⁵ Met weween án emén epwe ásimaw? Án emén ásimaw esap iteitan epwe weneiti úkúkún ierin are máárin inisin. Ewe Paipel a apasa pwe ekkewe mi ásimaw “ir chokewe mi aörüni ngeniir ar repwe tufichin alefila lefilen mine a öch me mine a ngau.” (Ipru 5:14) Emén mi ásimaw a silei met mi pwúng me a fen filatá lón letipan an epwe féri minne mi pwúng. Ina popun esap tongeni mwittir tipetipeló an epwe féri minne mi mwáál. Ese pwal lamot an epwe wor emén chón pesei ngeni iteitan an epwe féri met mi pwúng. Iwe mi fich ach sipwe ekieki pwe emén kúkkún are sáráfé mi papatais epwe féri minne mi pwúng inaamwo ika  seman kewe me inan are ekkewe watte rese nóm ren.​—Apépé ngeni Filipi 2:12.

6, 7. (a) Áweweei ekkewe sóssót Taniel a kúna lupwen a nóm lón Papilon. (b) Ifa usun Taniel a pwáraatá pwe i emén mi ásimaw?

⁶ Mi wesewesen tufich án emén kúkkún are sáráfé epwe eáni ena esin ásimaw? Nengeni pwóróusen Taniel. Neman i a teenage lupwen a eoló lón Papilon me imu seni seman kewe me inan. Iwe, lón ena atun Taniel a nónnóm ren chókkewe rese álleasochisi Kot. Nge sipwe nengeniéchú nónnómun Taniel. A mmen éch féfférún chón Papilon ngeni, usun i emén mi kkóló aúchean. I emén lein eú kúkkún kúmiin sáráfé mi filitá ar repwe angang ngeni ewe king. (Tan. 1:3-5, 13) Usun a suuk ngeni Taniel me lón Papilon mettóch mi múrinné lap seni minne epwe suuk ngeni ika a nóm lón Israel.

⁷ Iwe met Taniel a féri? Mi mut ngeni etipetipaen aramasen Papilon an epwe siwili i are apwangapwangaaló an lúkú? Aapw! Ewe Paipel a erá pwe lupwen Taniel a nónnóm lón Papilon, a “amolätä letipan pwe esap alimengaua” i, weween epwe ttii seni mettóch meinisin mi riri ngeni fel ngeni kot chofona. (Tan. 1:8) Ena mettóch a pwáraatá pwe Taniel emén mi ásimaw!

8. Met ka tongeni káé seni pwóróusen Taniel?

⁸ Met ka tongeni káé seni pwóróusen Taniel? Emén kúkkún are sáráfé mi ásimaw epwe tipeppós lón minne a lúkú pwal mwo nge lón fansoun mi áweires. Esap usun chék emén nippach mi kan ekkesiwili anúwen inisin pwe epwe chék anúwen ikewe a nóm ie. Esap pwomwen pwe i chiechien Kot lón Leenien Mwich nge pwal chiechien ei fénúfan lón sukul. Nge i epwe fen akkamwéchú an tuppwél ngeni Kot pwal mwo nge atun a kúna sóssót.present.​—Álleani Efisos 4:14, 15.

9, 10. (a) Ifa usun án emén kúkkún are sáráfé ekieki minne a féri atun a kúna sóssót epwe álisi i? (b) Met weween papatais?

⁹ Pwúngún pwe ese wor emén mi unuséch. Fán ekkóch ekkewe kúkkún me sáráfé ra kan mwáálliló usun chék ekkewe watte. (SalAf. 7:20) Nge ika ka mochen papatais, eú alen tipachem óm kopwe etittina ika ifa úkúkún tipeppósun letipom le álleasochisi  án Jiowa kewe allúk. Pwisin eisinuk, ‘Ua fen álleasochisi Jiowa ren och fansoun?’ Ekieki met ka féri lón ewe sáingoon atun ka kúna sóssótun óm lúkú. Lón ena atun, ka filatá ewe mettóch mi pwúng itá kopwe féri? Emén a fen peseok óm kopwe áeá óm kewe tufich lón án Satan ei fénúfan, usun chék met mi fis ngeni Taniel? Lupwen a fis ngonuk ena esin sóssót, ka tongeni weweiti ika ifa letipen Jiowa usun?​—Ef. 5:17.

¹⁰ Pwata a lamot óm kopwe silei pélúwen ekkena kapas eis? Pokiten epwe álisuk le mirititi úkúkún choun ewe kefil án emén epwe papatais. Óm papatais a pwáraatá ngeni ekkewe ekkóch pwe ka féri eú pwon mi lamot ngeni Jiowa. Ka pwon ngeni pwe kopwe tongei me angang ngeni seni unusen letipom tori feilfeiló chék. (Mark. 12:30) Mi lamot pwe meinisin chókkewe mi papatais repwe tipeppós le apwénúetá ar pwon ngeni Jiowa.​—Álleani Än Salomon Afalafal 5:4, 5.

11, 12. (a) Met a lamot epwe ffat ngeni ewe emén mi mochen papatais? (b) Met epwe álisuk le eáni ekiek pwúng usun án Jiowa we kókkótun papatais?

¹¹ Ewe Paipel a apasa pwe meinisin néún Jiowa kewe aramas, pwal mwo nge ekkewe kúkkún me sáráfé, repwe angang ngeni “fän püsin letiper.” (Kölf. 110:3) Iwe, mi lamot an epwe ffat ngeni emén pwe an mochen papatais a feito seni mochenin pwisin letipan. Ina minne, eli mi lamot óm kopwe etittinaéchú ika met popun ka mochen papatais, ákkáeúin ika ka mááritá lón ewe enlet.

¹² Lón óm mámmááritá, ese mwáál ka fen kúna chómmóng ra papatais, neman pwal mwo nge chiechiom kewe me pwiium kewe. Nge kopwe túmúnúéch pwe kete poputá le meefi pwe a lamot kopwe pwal papatais pokiten chék ka tikeri och úkúkún ier are pokiten chék meinisin ra papatais. Ifa usun kopwe túmúnú pwe ka eáni án Jiowa ekiek usun papatais? Awora fansoun le ekieki ika pwata a fókkun lamot ewe mettóch papatais. Kopwe kúna chómmóng popun mi múrinné seni lón ei lesen me pwal en lesen mwirin ei.

13. Ifa usun ka tongeni silei ika óm mochen papatais a feito seni mochenin pwisin letipom?

¹³ Óm etittina óm kewe iótek, ina eú mettóch mi tongeni álisuk le silei ika óm mochen papatais a wesewesen seni mochenin letipom. Fán fite ka kan iótek ngeni Jiowa? Mi tichik masouen óm kewe iótek? Pélúwen ekkena kapas eis repwe tongeni pwáraatá ifa úkúkún péchékkúlen óm riri ngeni Jiowa. (Kölf. 25:4) Fán chómmóng Jiowa a awora pélúwen ach kewe iótek me lón Paipel. Iwe, pwal eú mettóch mi tongeni álisuk le silei ika ka enletin mochen akkarap ngeni Jiowa me angang ngeni, ina óm etittina óm kókkótun káé. (Jos. 1:8) Pwisin eisinuk: ‘Ua kan féri ai pwisin káé Paipel iteitan? Ua pwapwa le fiti meinisin ekkewe kókkót lón ám famili fel?’ Pélúwen ekkena kapas eis repwe álisuk le kúna ika óm mochen papatais a feito seni pwisin letipom.

14. Áweweei sókkofesenin án emén fangóló manawan ngeni Kot me an papatais.

¹⁴ Ekkóch kúkkún me sáráfé neman rese wesewesen silei sókkofesenin án emén fangóló manawan ngeni Kot me an papatais. Ekkóch ra tongeni erá pwe ra fen fangóló manawer ngeni Jiowa nge resaamwo mmólnetá ar repwe papatais. Nge mi wesewesen tufich ena? Ika ka fangóló manawom ngeni Jiowa a wewe ngeni pwe ka iótek ngeni me pwon pwe kopwe angang ngeni tori feilfeiló chék. Nge ewe atun ka papatais, ka pwáraatá ngeni aramas pwe ka fen fangóló manawom ngeni Jiowa. Ina minne,  me mwen kopwe papatais, mi lamot kopwe weweiti weween án emén fangóló manawan ngeni Kot.

15. Met weween án emén fangóló manawan ngeni Jiowa?

¹⁵ Lupwen ka fangóló manawom ngeni Jiowa, ka ereni pwe iei ka onómu manawom fán nemenian. Ka pwon pwe óm akkangang ngeni ina met epwe fókkun lamot lón manawom. (Álleani Mateus 16:24.) Ina eú pwon ngeni Kot mi fókkun lamot kopwe apwénúetá! (Mat. 5:33) Iwe ifa usun kopwe pwáraatá pwe ka silei pwe manauom ese chúen nóm fán pwisin nemeniom nge a nóm fán nemenien Jiowa?​—Rom 14:8.

16, 17. (a) Eáni eú kapas áwewe mi áweweei weween án emén fang manawan. (b) Lupwen emén a fangóló manawan ngeni Kot, met a wesewesen apasa ngeni Kot?

¹⁶ Sipwe nengeni ei kapas áwewe. Anchangei pwe emén chienom a liffang ngonuk efóch tarakú. A ngonuk ewe taropween rechister fán itan me erenuk: “Ei tarakú woom.” Nge mwirin, chienom na a apasa: “Upwe wisen akkamwéchú kiian ei, me ngang upwe wisen ukkuwei nge esap en.” Epwe met meefiom usun ena liffang? Epwe met meefiom usun chienom na mi ngonuk ena tarakú?

¹⁷ Lupwen emén a fangóló manawan ngeni Jiowa, a ereni Kot: “Ngang ua fang ngonuk manawei. Manawei a nóm fán nemeniom.” A wor án Jiowa pwúúng le ekieki pwe eménna epwe apwénúetá an pwon. Nge epwe ifa ika ena emén a poputá le álleasolapa Jiowa ren an kammwet lemonomon ngeni emén esap chón angang ngeni Kot? Are met ika eménna a etiwa ewe sókkun angang epwe kan eppeti an fiti ewe angangen afalafal are ekkewe mwich? Iwe, ena emén ese apwénúetá an pwon ngeni Jiowa. A chék usun ewe emén mi amwéchú kiien ewe tarakú seni ewe emén a liffang ngeni. Lupwen sia fangóló manawach ngeni Jiowa, sia ereni, “Manawei a nóm fán nemeniom, ese chúen nóm fán nemeniei.” Iwe, fansoun meinisin sipwe féri minne Jiowa a mochen, pwal mwo nge lón ewe atun esap ina met sia pwisin mochen féri. Sipwe áppirú Jesus, ewe a erá: “Üa feitiu seni läng pwe üpwe föri letipen ewe mi tiniei, nge sap püsin letipei.”​—Joh. 6:38.

18, 19. (a) Ifa usun minne Rose me Christopher ra apasa a pwáraatá pwe án emén papatais ina eú feiéch mi emmwen ngeni pwal chómmóng feiéch? (b) Met meefiom usun ewe mettóch papatais?

¹⁸ A ffat pwe ewe mettóch papatais, eú kefil mi lamot emén epwe lóóm ekiekiéchú mwen epwe féri. A eú watteen feiéch án emén fangóló manawan ngeni Jiowa me papatais. Ekkewe kúkkún me sáráfé mi tongei Jiowa me weweiti weween án emén fangóló manawan ngeni Kot, rese pireir le fangóló manawer me papatais. Rese niamam ren minne ra filatá le féri. Emén teenage mi papatais itan Rose a erá: “Ua tongei Jiowa, ese pwal wor eú angang me lúkún ai angang ngeni i mi tongeni atoto ngeniei watteen pwapwa. Ua fókkun silei pwe ai filatá le papatais, ina ewe mettóch ua wesewesen mochen féri lón manawei.”

¹⁹ Iwe met pwóróusen Christopher, ewe sia fós usun lepoputáán ei lesen? Ifa meefian usun an filatá le papatais lupwen a 12 ierin? A erá pwe i a fókkun pwapwa an a féri ena kefil. A poputá le fiti ewe angangen regular pioneer lupwen a 17 ierin, me lupwen a 18 ierin a wiliti emén chónálillisin mwichefel. Nge iei a angang lón Bethel. Iei alon: “Ua féri eú kefil mi pwúng lupwen ua filatá ai upwe papatais. A masou manawei ren angang mi aúchea fán iten Jiowa me an we mwicheich.” Ika ka mochen papatais, ifa usun kopwe ammólnatá ngeni? Ewe lesen mwirin ei epwe pélúweni ena kapas eis.