1-3. (a) Ikkefa ekkewe ekkesiwil eli a weires ngenikich sipwe féri mwirin ach papatais? (b) Atun a weires ngenikich sipwe ámúrinnééló napanapach nge sise ekieki epwe ina usun, ikkefa ekkewe kapas eis neman sipwe eáni? (Ppii ewe sasing lepoputáán ei lesen.)

 REN fite ier, Kevin a ppet wóón moni, ún suupwa, únnúmmóng sakaw me angei sáfei mi efeiengaw. ^[1] Mwirin, a káé usun Jiowa me a mochen epwe wiliti chiechian. Nge ren an epwe fis ena, a lamot epwe féri watteen ekkesiwil lón manawan. Iwe, a féri ena ekkesiwil ren álillisin Jiowa me manamanen An we Kapas, ewe Paipel.​—Ipru 4:12.

² Mwirin án Kevin papatais, a lamot pwe epwe chúen féri ekkesiwil lón manawan pwe epwe ámúrinnééló manawan manawen Chón Kraist. (Ef. 4:31, 32) Áwewe chék, i a kan songokkái. A máirú atun a kúna úkúkún weiresin an epwe nemeni an song. Ren enletin, Kevin a erá pwe an epwe káé le nemeni an song a mmen weires lap seni an kaúló le féri ekkewe mettóch mi ngaw a kan féfféri me lóóm mwen an a papatais! Nge  a tongeni féri ekkesiwil ren an tingormaú ngeni Jiowa an álillis me an káéfichi ewe Paipel.

³ Mwen ach papatais, chómmóng me leich sia féri watteen ekkesiwil pwe sipwe eáni ewe manaw me ren alon Paipel. Pwal mwo ikenái, sia mirititi pwe mi wor ekkewe ekkesiwil mi kisikis a lamot sipwe féri pwe sipwe áppirúfichi Kot me Kraist. (Ef. 5:1, 2; 1 Pet. 2:21) Áwewe chék, neman sia esilla pwe sia kan ngúngngúnúngúnúngaw are sia kan ukkuwofós me apasa kapas mi ámeteki ekkóch. Are neman fán ekkóch sia niwokkus ren met ekkóch repwe ekieki usuch are apasa pwe minne sia féri ese pwúng. Neman sia kan akkachocho le féri ewe ekkesiwil lón fitu ier nge sia chúen féfféri ena mettóch mi mwáál. Iwe neman sia ekieki: ‘Pwata a kon weires ngeniei ai féri ekkeei ekkesiwil mi kisikis? Met upwe féri pwe upwe apwénúetá minne ewe Paipel a apasa pwe upwe tongeni ákkámúrinnééló napanapei?’

4. Pwata sise tongeni apwapwaai Jiowa lón féfférúch meinisin?

⁴ Sia tongei Jiowa me sia tipeni lón unusen letipach le apwapwaai i. Nge mi elichippúng pún sise tongeni apwapwaai i fansoun meinisin pokiten sise unuséch. Fán chómmóng sia meefi meefien aposel Paulus ei: “Pun inamwo ika a nom rei ewe mochenin föri mine a mürina, nge üsap tongeni föri.”—Rom 7:18; Jas. 3:2.

5. Ikkefa ekkewe ekkesiwil sia fen féri me mwen ach papatais? Nge ikkefa ekkewe apwangapwang sia chúen fiffiu ngeni?

⁵ Me mwen sipwe chóni ewe mwichefel, mi lamot sipwe úkútiw le féri ekkewe féffér Jiowa a oput. (1 Kor. 6:9, 10) Nge sise mwo unuséch. (Kol. 3:9, 10) Ina popun sia chék mwámmwáálliló inaamwo ika sia fen papatais mwirin fitu ier. Fán ekkóch, ese pwúng mochenich me meefiach kewe are a weires ngenikich ach sipwe angang wóón eú apwangapwang a nóm rech. Ren enletin, neman sia fen úkkú ngeni ena chék apwangapwang lón fitu ier.

6, 7. (a) Met a atufichikich le wiliti chiechien Jiowa inaamwo ika sise unuséch? (b) Pwata sisap pireir le tittingorei Jiowa omusomusen ach tipis?

⁶ Ikaamwo sise unuséch nge sia tongeni riri ngeni Jiowa me angang ngeni. Chechchemeni iteitan ewe atun ka kerán wiliti chiechien Jiowa. I ewe A kúna múrinnéom me a mochen kopwe silei i. (Joh. 6:44) A pwal silei óm kewe mwáál me apwangapwang me a silei pwe kopwe pwal féri minne ese pwúng. Nge Jiowa a chúen mochen kopwe chiechian.

⁷ Jiowa a fókkun tongekich ren an ngenikich eú liffang mi aúchea. A tiinaato Néún we Jesus ngeni fénúfan pwe epwe fangóló manawan pwe epwe eú méén kepich fán iten ach kewe tipis. (Joh. 3:16) Atun sia mwáálliló sia tongeni tingorei Jiowa omusomusen ach tipis. Pokiten ena méén kepich, sia lúkúlúk pwe epwe omusakicheló me sipwe chúen chiechian. (Rom 7:24, 25; 1 Joh. 2:1, 2) Chemeni pwe Jesus a máló fán iten chókkewe mi aier. Ina popun, inaamwo ika sia meefi pwe met sia féri a fókkun ngaw nge sisap fókkun úkútiw le iótek pwe Jiowa epwe omusakicheló. Ika sise tingorei epwe omusaaló ach kewe tipis, epwe usun nge sise mochen télú péúch atun ra limengaw. A ifa me kilisouch pwe Jiowa a suuki alen ach sipwe wiliti chiechian inaamwo ika sise unuséch!​—Álleani 1 Timoty 1:15.

8. Pwata sisap tunaló ach kewe apwangapwang?

⁸ Pwúngún sise tongeni ekieki pwe ese  wor ach apwangapwang are sia kúnetipingen fán iter. Jiowa a erenikich met sókkun aramas a mochen epwe chieneni. (Kölf. 15:1-5) Ina popun ika sia mochen akkarap ngeni, mi lamot sipwe akkachocho le áppirú i me Néún we. A lamot sipwe pwal achocho le nemeni mochenich mi mwáál me sia pwal mwo nge tongeni likitaló ekkóch me leir. Ese lifilifil ifa úkúkún ttaman sia fen papatais nge a lamot sipwe ákkámúrinnééló napanapach.​—2 Kor. 13:11.

9. Pwata sia silei pwe sia tongeni sóssópwósópwóló le pwilitalong ewe manaw mi fé?

⁹ Iei alon aposel Paulus ngeni ekkewe Chón Kraist: “Iei mine oupwe likitätiu ekewe föför oua föföri lupwen oua manaueni ewe manauen lom, iei ewe manau a katala ren an kewe mochenia mi atuputup. Letipemi me ekiekimi epwe fokun söfösefäl, oupwe fokun angei ewe manau mi fö mi för lon lapalapen Kot o pwäla lon eu manau mi enletin pwüng me pin.” (Ef. 4:22-24) Ewe kapasen Krik mi afféúni ekkeei kapas “epwe fokun söfösefäl” ra wewe ngeni pwe ach pwilitalong ewe manaw mi fé epwe sóssópwósópwóló. Ina popun ese lifilifil ifa úkúkún ttaman fansoun ach akkangang ngeni Jiowa nge sia chúen tongeni káé napanapan kewe. Ewe Paipel a tongeni álisikich le féfféri ekkewe ekkesiwil lón manawach pwe sipwe áppirúfichi i.

10. Met a lamot sipwe féri pwe sipwe ekkesiwil ren álillisin ewe Paipel? Ikkefa ekkewe kapas eis neman sipwe eáni?

¹⁰ Kich meinisin sia mochen álleasochisi alon Paipel. Nge a lamot sipwe angang weires ika sia mochen ekkesiwili napanapach. Pwata a lamot angang weires? Nge met, Jiowa ese tongeni ámecheresi ach sipwe féri minne mi pwúng?

11-13. Pwata Kot a mochen ach sipwe fókkun achocho le pworacho ngeni ach kewe apwangapwang?

¹¹ Atun sia ekieki unuselapen láng me fénúfan me masouan kewe, sise tipemwaramwareiti pwe Jiowa a tongeni féri mettóch meinisin ren an we manaman. Ren chék áwewe, a fératá akkar, ewe mi fókkun péchékkúl. Iteiten seken ewe akkar a awora watteen saram me pwichikkar. Nge ekis chék ena saram me pwichikkar a lamot fán iten epwe wor manaw wóón fénúfan. (Kölf. 74:16; Ais. 40:26) Jiowa a pwal ngeni néún kewe chón angang wóón fénúfan péchékkúl atun ra osupwangan. (Ais. 40:29) A ffat pwe ika Jiowa a mochen, iwe a fókkun tongeni mecheresiló ach sipwe okkufu ach kewe apwangapwang me aúkatiw mochenich kewe mi mwáál. Nge pwata ese féri?

¹² Jiowa a ngenikich ach tufichin pwisin filatá. A mut ngenikich ach sipwe pwisin filitá ika sipwe álleasochisi i are sisap. Nge atun sia filatá le álleasochisi i me achocho le féri letipan, sia pwári pwe sia tongei me mochen apwapwaai i. Satan a erá pwe ese wor án Jiowa pwúúng le nemenem. Nge atun sia álleasochisi Jiowa, sia pwári pwe sia mochen pwe i epwe ach Sounemenem. Sia pwal lúkúlúk pwe Semach mi tong a aúcheani iteitan ewe achocho sia féri le álleasochisi i. (Hiop 2:3-5; SalF. 27:11) Atun sia achocho le nemeni ach apwangapwang ikaamwo a weires, sia tuppwél ngeni Jiowa me pwári pwe sia mochen pwe i epwe ach Sounemenem.

¹³ Jiowa a erenikich pwe sipwe fókkun achocho le áppirú napanapan kewe. (Álleani 2 Petrus 1:5-7; Kol. 3:12) A pwal  mochen sipwe angang weires le nemeni ekiekich me meefiach. (Rom 8:5; 12:9) Atun sia achocho le féri ekkesiwil me sópwéch, iwe sia fókkun pwapwa.

14, 15. Met sia tongeni féri pwe sipwe ámááraatá ekkewe napanap Jiowa a efich? (Ppii ewe pwóór “ Iótek me Paipel Ra Siwili Napanaper.”)

¹⁴ Met a lamot sipwe féri pwe sipwe ámááraatá ekkewe napanap Jiowa a efich? A lamot sipwe mut ngeni Kot epwe emmwenikich lap seni ach sipwe chék pwisin filatá minne sipwe siwili. Iei alon Rom 12:2, Agapé: “Öüsap öppirüw lapalapen ei fönüfanen ikenäi, nge öüpwe ekkesiwili lapalapen manawemi ren ämi öüpwe asöfösäfäli ämi ekiek pwe öüpwe tongeni le älletafichi met mi mwirinnö me met mi fich me minne Kot a unusen tipeni.” Ren ach sipwe silei minne Jiowa a mochen, a lamot sipwe eáni lúkúlúk wóón an kewe álillis a awora. A lamot sipwe álleani ewe Paipel iteiten rán, ekilonei wóón minne sia álleani me iótek ngeni Jiowa pwe epwe fang ngenikich an we manaman mi fel. (Luk. 11:13; Kal. 5:22, 23) Ren ekkena mettóch, Jiowa a tongeni álisikich le weweiti met a apwapwaai i me sia tongeni káé le eáni ekiekin. Iwe mwirilóón, minne sia ekieki, eáni fós me féri repwe akkapwapwaai Jiowa me sia tongeni nemeni ach kewe apwangapwang. Nge mi chúen lamot ach sipwe úkkú ngeni ach kewe apwangapwang.​—SalF. 4:23.

¹⁵ Me lúkún ach álleani ewe Paipel iteiten rán, a lamot sipwe káé ewe Paipel ren álillisin néúch kewe puk, usun chék Ewe Leenien Mas me Awake! Chómmóng pwóróus lón ekkena puk ra asukulakich ifa usun sipwe tongeni áppirú napanapen Jiowa kewe me ifa usun sipwe úkkú ngeni ach kewe apwangapwang. Neman sia tongeni kúna ekkóch pwóróus are wokisin mi fókkun álisikich. Sia tongeni isoni ekkena pwóróus me wokisin pwe sipwe tongeni ákkálleaniir.

16. Pwata sisap lichippúng ika sise tongeni mwittir féri ekkesiwil?

¹⁶ A lamot watteen fansoun le káé pwe sipwe áppirú napanapen Jiowa kewe. Ina popun ika ka meefi pwe kese féri chómmóng ekkesiwil lón manawom ren met ka tipeni, kopwe mosonottam. Akkomwan neman a lamot pwe kopwe aumwesuk le féri alon Paipel. Nge lapólóón óm ekieki me féri minne Jiowa a mochen kopwe féri, epwe mecheresiló óm kopwe ekieki ekiekin Kot me féri minne mi pwúng.​—Kölf. 37:31; SalF. 23:12; Kal. 5:16, 17.

17. Ika sia tuppwél ngeni Jiowa, ifa ewe mettóch mi amwarar sia mwétéresiti le kúna?

¹⁷ Sia mwétéresiti ewe fansoun atun sipwe unuséch me angang ngeni Jiowa tori feilfeiló. Lón ena atun sisap chúen ú ngeni apwangapwangach kewe me epwele mecheres ngenikich le áppirú Jiowa. Nge ren mwo iei sia tongeni fel ngeni Jiowa pokiten a ngenikich ewe liffangen méén kepich. Inaamwo ika sise unuséch, sia tongeni apwapwaai i ika sia sópweló le angang weires le féri ekkesiwil me álleasochisi minne a asukula ngenikich lón ewe Paipel.

18, 19. Pwata sia tongeni lúkúlúk pwe a wor án Paipel manaman le ekkesiwili napanapach?

¹⁸ Kevin a féri úkúkún an tufich le nemeni an song. A ekilonei wóón minne a álleani lón Paipel me fókkun achocho le ekkesiwili napanapan. A pwal apwénúetá ekkewe éúréúr seni chiechian kewe Chón Kraist. Kevin a angang wóón an kewe apwangapwang lón fitu ier, iwe ló, ló, ló, a wiliti emén chónálillisin mwichefel. A fen 20 ier iei, a emén mwán mi ásimaw. Nge tori ikenái, a silei pwe a lamot an epwe úkkú ngeni an kewe apwangapwang.

¹⁹ Sia tongeni ákkámúrinnééló napanapach usun chék Kevin. Pún ika sia ina usun, epwe sópwósópwóló ach akkarap ngeni Jiowa. (Kölf. 25:14) Ika sia achocho úkúkún ach tufich le féri ekkesiwil pwe sipwe apwapwaai Kot, iwe epwe álisikich le sópwéch. Sia tongeni lúkúlúk pwe ren álillisin ewe Paipel sia tongeni féfféri ekkesiwil lón manawach.​—Kölf. 34:8.