1, 2. (a) Ifa usun ei ótóten fénúfan a léllé ngeni emén chón atai allúk epwele ninniiló? (Ppii ewe sasing lepoputáán ei lesen.) (b) Epwe met meefien meinisin chókkewe lón láng me wóón fénúfan lupwen ei ótóten fénúfan a fen kataló?

 ANCHANGEI mwo. Ekkewe chón mas lón eú leenien kalapus ra pani emén chón atai allúk mi soun ni aramas. Nge lón ar fetál, ekkena chón mas ra púchérútá me apasa ei usun ena chón atai allúk: “Ei somá a fetáleló!” Pwata ra apasa ena? Inaamwo ika ena chón atai allúk mi chúen manaw me mi pwal nikin péchékkúl, nge i a fen kúna kapwúngún máló me iei epwele ninniiló. Iwe, usun itá pwe i mi fen máló. *

² Ei fénúfan mi ngaw sia nónnóm wóón a usun chék ewe chón atai allúk epwele ninniiló. Ewe Paipel a erá: ‘Fanüfan epwe morola.’ (1 Joh. 2:17) Jiowa a fen apwúngaló pwe ekiseló chék ei ótóten fénúfan epwele kataló. Ese wor tipemwaramwar, epwe fókkun fis. Nge katalóón ei ótóten fénúfan mi sókkóló seni ninniilóón ena chón atai allúk lón eú mettóch mi lamot. Ekkóch aramas neman ra meefi pwe ese pwúng kapwúngún ewe chón atai allúk, me  ra ú ngeni me áneán pwe epwe siwil ewe kapwúng pwe esap ninniiló. Iwe nge, Jiowa i emén soukapwúng mi unuséch, iwe a fókkun pwúng o wenechar kapwúngún ei ótóten fénúfan an epwe kataló. (Tut. 32:4) Katalóón ei ótót esap mmangóló. Mwirin katalóón ei ótót, meinisin lón láng me wóón fénúfan repwe tipeeú ngeni pwe mi pwúng minne Jiowa a apwúngaló. Epwe atoto watteen kinamwe!

3. Ikkefa ekkewe rúáánú osukosuk epwe móróló lupwen epwe war án Kot we Mwú?

³ Met a kapachelong lón ewe “fanüfan” epwe “morola”? A kapachelong ekkewe mettóch mi ngaw mi fen wiliti kinikin manawen aramas lón ei fansoun. Ekiseló chék ekkena mettóch meinisin repwe móróló. Iei pwal kinikinin ewe kapas allim usun án Kot we Mwú. (Mat. 24:14) Lón ei lesen, sipwe fós usun rúáánú osukosuk epwe móróló lupwen epwe war án Kot we Mwú. Ikkeei: aramas mi ngaw, mwicheichen aramas mi pworoingaw, féffér mi ngaw, me ngawen nónnómun ei fénúfan. Lón eú me eú ekkena osukosuk sipwe káé (1) ifa usun ra áweiresi manawach, (2) met Jiowa epwe féri ngeniir, me (3) met epwe siwiliir.

4. Ifa usun ekkewe aramas mi ngaw ra áweiresi manawach lón ei fansoun?

⁴ Ifa usun ekkewe aramas mi ngaw ra áweiresi manawach lón ei fansoun? Ewe aposel Paulus a apasa pwe lón ekkewe ránin lesópwólóón “epwe wor fansoun weires.” Mwirin a pwal apasa: “Ekewe aramasangau me soulängatuputup repwe chök fokun ngauala.” (2 Tim. 3:1-5, 13) Ka fen kúna ei mettóch? Chómmóng leich sia fen kúna riáfféú ren ekkewe aramas mi mwááneson mi chék pwúnúchéúfetál, chón oputa aramas seni pwal ekkóch einang, me chón atai allúk mi kirikiringaw. Ekkóch leir rese sótun aopaaló ar kana féfféringaw. Ekkóch ra pwomwen álisi aramas nge ren enletin iir mi kirikiringaw. Nge, inaamwo ika esap mwo fán eú án aramas mi ngaw féfféringaw ngenikich, nge sia chúen kúna weires rer. Sia fókkun lichippúng lupwen sia rongorong pwóróusen án ekkóch kirikiringaw ngeni semirit, chinnap, me pwal chókkewe rese tongeni túmúnú pwisin iir. Ekkeei aramas mi ngaw ra usun manmwacho are pwal mwo nge ekkewe chónláng mi ngaw. (Jas. 3:15) Sia kilisou ren án Jiowa we Kapas mi awora ngenikich ápilúkúlúk allim.

5. (a) Met a chúen suuk ngeni ekkewe aramas mi ngaw? (b) Met epwe fis ngeni chókkewe rese mochen siwil?

⁵ Met Jiowa epwe féri? Lón ei fansoun, Jiowa a suuki ngeni aramas mi ngaw ar repwe ekkesiwili manawer. (Ais. 55:7) Inaamwo ika ekiseló chék ei ótóten fénúfan epwele kataló, nge ekkena aramas resaamwo kúna kapwúng. Iwe nge, met epwe fis ngeni chókkewe rese mochen siwil, iir kewe mi penaatá ei ótóten fénúfan tori poputáán ewe riáfféú mi lapalap? Jiowa a pwonei pwe epwe amóeló meinisin aramas mi ngaw seni fénúfan. (Álleani Kölfel 37:10.) Lón ei fansoun, chómmóng ra silei ifa usun repwe aopaaló ar kewe féfféringaw seni aramas, me fán chómmóng rese kúna chappen ar féffér. (Hiop 21:7, 9) Nge ewe Paipel a áchema ngenikich pwe “mesen Kot a afota alen ekewe aramas, a nengeni fefetalin pecher. Esap wor eu leni mi kiroch ika rochokich ia ekewe aramasangau ra tongeni aopeer ie.” (Hiop 34:21, 22) Ina minne, aramas rese fókkun tongeni opoló seni Jiowa. Jiowa a tongeni kúna án aramas féfféringaw meinisin. Mwirin Armaketon, sipwe tongeni nengeni ikewe ie ekkena aramas ra kan nóm ie, nge sisap chúen kúner. Repwe móróló tori feilfeiló chék!—Kölf. 37:12-15.

6. Ié kewe repwe nónnóm lupwen ekkewe aramas mi ngaw ra móróló, me pwata a eú kapas allim ena?

 ⁶ Ié kewe repwe nónnóm lupwen ekkewe aramas mi ngaw ra móróló? Jiowa a pwonei: “Ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.” Mwirin lón pwal ena kél mi pin, a mak: “Ekewe chon pwüng repwe fanüeni ewe fanü o nonom won tori feilfeilachök.” (Kölf. 37:11, 29) Ié kana “ekewe chon tipetekison” me “ekewe chon pwüng”? Ekkewe mi tipetekison, iir ekkewe mi angei káit me ren Jiowa me ra álleasochisi i. Ekkewe mi pwúng, iir ekkewe ra mochen féri minne mi pwúng me ren Kot. Lón ach ei fénúfan ikenái, mi wor chómmóng aramas mi ngaw lap seni aramas mi pwúng. Nge lón ewe ótót sefé, ekkewe chék aramas mi tipetekison me mi pwúng repwe nónnóm, me repwe ewilaaló fénúfan ngeni eú paratis!

7. Ifa usun ekkewe mwicheichen aramas mi pworoingaw ra áweiresi manawach ikenái?

⁷ Ifa usun ekkewe mwicheichen aramas mi pworoingaw ra áweiresi manawach ikenái? Chómmóng mettóch mi ngaw mi fis wóón fénúfan ikenái esap efisien emén me emén aramas nge fen ekkewe mwicheichen aramas. Ekkewe mwicheichen lamalam ra otupu fite million aramas. Áwewe chék, ra chofonatá pwóróus usun Kot, ra apasa pwe aramas rese tongeni lúkúlúk wóón Paipel, me ra chofona usun met epwe fis ngeni fénúfan me aramas lón mwachkkan. Ekkewe mwú mi pworoingaw ra apéchékkúla maun me angangen akkachofesá lefilen aramas mi sókkóló einanger, me ra eriáfféwú ekkewe mi mwelele me chókkewe rese tongeni túmúnú pwisin iir. Ekkena esin mwú ra wéúéchúló me a péchékkúleló ar nemenem ren ar angei liffangen emichimich me lifilifil ngeni aramas. Ekkewe mwicheichen aramas mi tipemmóng ra elimengawa fénúfan, atai pwúkún masouen fénúfan, me tunosolá ngeni aramas pwe epwe watteeló winnen ekkóch chék aramas. A ffat pwe ekkewe mwicheichen aramas iir ra efisi wakkatteen riáfféú wóón ei fénúfan ikenái.

8. Me ren ewe Paipel, met epwe fis ngeni ekkewe mwicheichen aramas usun itá iir mi péchékkúl me ren chómmóng aramas ikenái?

⁸ Met Jiowa epwe féri? Ewe riáfféú mi lapalap epwe poputá lupwen ekkewe mwúún fénúfan repwe maunei meinisin mwicheichen lamalam mi chofona, ewe Paipel a áweweei pwe a usun emén fin lisowu mi iteni Papilon mi Lapalap. (Pwär. 17:1, 2, 16; 18:1-4) Epwe unusen taló ekkena mwicheichen lamalam. Nge met epwe fis ngeni ekkewe pwal ekkóch mwicheichen aramas mi pworoingaw? Ewe Paipel a apépéér ngeni ekkewe fénú me ekkewe chuuk pokiten me ren aramas ra nikinikin péchékkúl me núkúchar. (Álleani Pwärätä 6:14.) Nge a pwal apasa pwe meinisin ekkewe mwú me pwal ekkewe ekkóch mwicheichen aramas rese álisatá án Kot we mwú repwe kataló. Ina ewe sáingolóón kinikinin ewe riáfféú mi lapalap. (Jer. 25:31-33) Mwirin ena, esap chúen wor mwicheichen aramas mi pworoingaw!

9. Pwata sia tongeni lúkúlúk pwe ewe fénúfan mi fé epwe kókkótéch?

⁹ Met epwe siwili ekkewe mwicheichen aramas mi pworoingaw? Mwirin Armaketon, epwe chúen wor mwicheichen aramas wóón fénúfan? Ewe Paipel a apasa: “Nge usun än Kot pwon sia witiwiti eu läng mi fö me eu fanüfan mi fö ia pwüng epwe chöchöla ie.” (2 Pet. 3:13) Ewe láng lóóm me fénúfan lóóm, iir ekkewe mwú mi pworoingaw me ekkewe aramas ra nemenem wóór. Lupwen ra móróló,  met epwe siwiliir? “Eu läng mi fö me eu fanüfan mi fö.” Ewe láng mi fé a weneiti ewe mineféén mwú, ewe Jesus Kraist me ekkewe 144,000 repwe nemenem lón. Ewe fénúfan mi fé a weneiti ekkewe aramas mi nóm fán nemenien án Kot we Mwú. Jesus me chienan kewe sounemenem repwe unusen áppirú Jiowa Kot, ewe Kot mi kókkótéch. (1 Kor. 14:33) Ina minne, ewe “fanüfan mi fö” epwe kókkótéch. Epwe wor ekkewe mwán mi múrinné repwe wisen túmúnú. (Kölf. 45:16) Ekkena mwán repwe nóm fán emmwenien Kraist me ekkewe 144,000. Anchangei ena fansoun lupwen meinisin mwicheichen aramas mi pworoingaw resap chúen nóm, me epwe chék wor eú mwicheich mi tipeeú esap tongeni pworoingawoló!

10. Met sókkun féffér mi ngaw a chéúfetál lón leeniom we, me ifa usun a áweiresuk me óm famili?

¹⁰ Ifa usun ekkewe féffér mi ngaw ra áweiresi manawach ikenái? Sia nónnóm lón ei fénúfan mi ur ren féfférún sikepwach, tunosolá, me angangen akkachofesá. Án ei fénúfan minen apwapwa me kunou ra féri pwe ekkena esin mettóch mi ngaw epwe ámmeseik, me ra pwal esiita án Jiowa kewe allúk usun met mi pwúng me met mi mwáál. (Ais. 5:20) A ákkáeúin lamot ngeni ekkewe sam me in ar repwe angang weires le túmúnú néúr kewe seni ekkena esin etipetip mi ngaw. Nge ren enletin, mi lamot ngeni meinisin Chón Kraist mi enlet ar repwe angang weires le túmúnú ar riri ngeni Jiowa atun ra nónnóm lón ei fénúfan ese súféliti án Kot kewe allúk.

11. Met sia káé seni án Jiowa kapwúng wóón Sotom me Komora?

¹¹ Met Jiowa epwe féri ngeni ekkewe féffér mi ngaw? Ekieki usun met Jiowa a féri ren ekkewe mettóch mi ngaw mi fiffis lón ekkewe telinimw Sotom me Komora. (Álleani 2 Petrus 2:6-8.) Lot, i emén aramas mi pwúng, i me an famili ra fókkun riáfféú ren meinisin féfféringawen aramas lón leenier we. Jiowa a ataieló unusen ena leeni pwe epwe amóeló ekkewe mettóch mi ngaw a fiffis ikena ie. Nge an féri ena a pwal “eu lenien eniweniw ngeni chokewe resap meniniti Kot” lón ei fansoun. Jiowa a amóeló ekkena féffér mi ngaw meinisin lón fansoun lóóm, iwe epwe pwal ina usun lón ei fansoun lupwen epwe ataieló ei ótóten fénúfan.

12. Ikkefa ekkóch angang sia mwétéresiti lón ewe fansoun ei ótóten fénúfan epwe móróló?

¹² Met epwe siwili féffér mi ngaw? Lón ewe ótót sefé, sipwe pwapwaiti chómmóng angang mi ámmeseik. Áwewe chék, sipwe álillis pwe ei fénúfan epwe wiliti eú paratis me aúetá imwach me imwen attongeach kewe. Sipwe pwal etiwasefáli ekkewe fite fite million aramas repwe manawsefál seni máló, me áiti ngeniir usun Jiowa me mettóch meinisin a féri fán ásengesin aramas. (Ais. 65:21, 22; Föf. 24:15) Lón ena fansoun, epwe wor chómmóng ach angang epwe apwapwakich me epwe elingaaló Jiowa!

13. Met mwirilóón ewe féfférún ú ngeni mi fis lón ewe tánipiin Eten?

¹³ Ifa usun ngawen nónnómun ei fénúfan a áweiresi manawach lón ei fansoun? A ngawóló nónnómun ei fénúfan pokiten a ur ren aramas mi ngaw, mwicheichen aramas mi pworoingaw, me féffér mi ngaw. Kich meinisin sia kúna riáfféú pokiten maun, mwelele, koput lefilen aramas mi sókkóló einanger, samau, me máló. Ekkeei mettóch ra poputá seni án Satan, Atam, me Efa ú ngeni Jiowa. Ar féfférún ú ngeni a kkúú manawach meinisin.

14. Met Jiowa epwe féri ren ngawen nónnómun ei fénúfan?

 ¹⁴ Met Jiowa epwe féri ren ngawen nónnómun ei fénúfan? Sipwe nengeni ekkeei pwóróus. Jiowa a pwonei an epwe aúkatiw maun meinisin. (Álleani Kölfel 46:9.) Epwe amóeló samau. (Ais. 33:24) Epwe aúkatiw máló tori feilfeiló chék. (Ais. 25:8) Epwe amóeló mwelele. (Kölf. 72:12-16) Jiowa epwe amóeló meinisin ekkewe pwal ekkóch mettóch mi ngaw mi áweiresi manawen aramas lón ei fansoun. Epwe pwal mwo nge aúkatiw án Satan me néún kewe chónláng mi ngaw etipetipa aramas!​—Ef. 2:2.

15. Ikkefa ekkóch mettóch repwe móróffóchóló mwirin Armaketon?

¹⁵ Anchangei ika epwe ifa usun ei fénúfan lupwen esap chúen wor maun, samau, are máló! Esap chúen wor mwichen soufiu, pisekin maun, are ekkewe leenien áchechchem fán iten maun. Esap chúen lamot an epwe wor pioing, tokter, kangof, leenien mi má, me peias. Esap chúen wor atai allúk, iwe esap chúen lamot an epwe wor polis, alarm, are neman pwal mwo nge lok are kii! Meinisin ekkeei mettóch mi ngaw mi efisi án aramas aúrek, repwe móróffóchóló.

16, 17. (a) Epwe ifa meefien chókkewe repwe kúna manaw mwirin Armaketon? Eáni eú áwewe. (b) Ifa usun sipwe lúkúlúk pwe sipwe kúna manaw mwirin katalóón ei ótót minen lóóm?

¹⁶ Epwe ifa usun manawach lupwen ekkeei mettóch mi ngaw mi fiffis wóón fénúfan repwe móróló? Ese mecheres ach sipwe anchangei. Ren fansoun langattam sia fen nónnóm lón ei fénúfan mi ngaw nónnómun, ina popun neman sise fen tepereni úkúkún án ei fénúfan atoto ach aúrek. Áwewe chék, chókkewe mi kan nónnóm únúkkún eú tengkia rese chúen tepereni watteen akúrangen ena leeni. Pwal ekkewe aramas mi nónnóm únúkkún ewe leenien kóturuló kápich neman rese chúen osukosuk ren pwóngawen ena leeni. Nge lupwen Jiowa epwe amóeló meinisin mettóch mi ngaw mi fiffis wóón fénúfan, iwe aramas repwe fókkun meefi ngaseló!

¹⁷ Met epwe siwili meinisin ekkewe weires sia meefi lón ei fansoun? Kölfel 37:11 a apasa pwe aramas repwe “pwapwaäsini ar feiöch me kinamwe mi somwola.” A ifa me apwapwaan ach silei pwe ina letipen Jiowa fán itach! Lón ei fansoun mi áweires, achocho úkúkún óm tufich le fitipachei Jiowa me an we mwicheich. A mmen aúchea óm ápilúkúlúk fán iten mwachkkan, kopwe ekilonei me túmúnú pwe ka wenewenen lúkú pwe epwe pwénútá, me kopwe pwal apwóróusa ngeni aramas usun. (1 Tim. 4:16; 1 Pet. 3:15) Ika ina, ka tongeni wesewesen lúkúlúk pwe lupwen ei ótóten fénúfan epwe kataló, en kopwe kúna manaw me pwapwa tori feilfeiló chék!