1. Ifa usun Apraham a pwáraatá pwe a lúkúlúk pwe Jiowa emén Kot mi pwúng? (Ppii ewe sasing lepoputáán ei lesen.)

 “IFA usun, ewe Souapwüngün unusen fanüfan esap eäni apwüng fän pwüng?” (Ken. 18:25) Ewe mwán mi tuppwél Apraham ese eáni ena kapas eis pokiten a tipemwaramwar ren Kot. Nge an we kapas eis a fen pwáraatá an lúkúlúk pwe Jiowa epwe apwúngú ekkewe telinimw Sotom me Komora fán an pwúng mi unuséch. A lúkúlúk pwe Jiowa esap tongeni “niela ekewe chon pwüng fiti chon pwüngingau.” Me ren Apraham, “ese tufich” án Jiowa epwe ina usun. Mwirin, Jiowa a apasa ei usun pwisin i: “I ewe achau, an föför ra unusen mürina, pun an kewe al meinisin ra pwüng. I eman Kot mi allükülük, esap wor an mwäl, a pwüng o wenechar.”​—Tut. 31:19; 32:4.

2. Pwata ese fókkun tufich án Jiowa epwe féri mettóch mi pwúngúngaw?

² Pwata Apraham a lúkúlúk pwe fansoun meinisin Jiowa epwe féri minne mi pwúng? Pokiten Jiowa, i ewe leenien áppirú mi lapalap fán iten ewe mettóch pwúng. Iwe, pokiten  Jiowa mi unusen pwúng, mettóch meinisin a apwúngaló epwe chék pwúng fansoun meinisin. Ewe Paipel a erá: “Ewe Samol mi Lapalap a sani pwüng me let.”​—Kölf. 33:5.

3. Apwóróusa eú mettóch mi pwúngúngaw a fis wóón fénúfan lón ei fansoun.

³ Ach silei pwe Jiowa emén mi pwúng fansoun meinisin a mmen oururu letipach. Iwe nge, ei fénúfan a ur ren pwúngúngaw. Áwewe chék, aramas ra kúna kapwúngún ar repwe kalapus fán iten eú féffér rese fen féri. Nge iei, ren ekkewe mineféén álillis lón pekin chosa, a leteló pwe ekkóch lein chókkana ese wesewesen wor tipisiir, nge solapan pwe ra fen kalapus ren fite fite ier. Ekkena esin pwúngúngaw ra elichippúngú me asonga aramas. Iwe nge, mi pwal wor eú sókkun pwúngúngaw epwe tongeni fen kon weires án emén epwe likiitú ngeni. Met ena?

4. Ifa usun án emén Chón Kraist lúkú epwe tongeni kúna sóssót?

⁴ Ekkewe Chón Kraist ra silei pwe repwe kúna án aramas féffér ngeniir mi pwúngúngaw me lúkún ewe mwichefel. Iwe nge, ach lúkú epwe tongeni kúna sóssót ika me lón ewe mwichefel a fis ngenikich are ngeni pwal emén och mettóch nge me rech usun ina eú féffér mi pwúngúngaw. Ika a fis ena, met kopwe féri? Kopwe mut ngeni an epwe áchepetekuk?

5. Pwata itá sisap máirú ika emén epwe féri ngenikich are ngeni pwal emén och mettóch mi pwúngúngaw me lón ewe mwichefel?

⁵ Kich meinisin sise unuséch me sia kan mwáálliló, ina popun lón ewe mwichefel mi tufich án emén epwe féri ngenikich are ngeni pwal emén och mettóch mi pwúngúngaw. (1 Joh. 1:8) Ikaamwo ei mettóch ese kan fis lón mwichefel, nge ika a fis, ekkewe Chón Kraist mi tuppwél rese máirú are chepetek ren. Jiowa a awora ngenikich kapasen fén lón Paipel epwe álisikich le akkamwéchú ach tuppwél ika emén pwiich a féri ngenikich och féffér mi pwúngúngaw.​—Kölf. 55:12-14.

6, 7. Met sókkun féffér mi pwúngúngaw emén pwiich a kúna lón ewe mwichefel, me met sókkun napanap a álisi i?

⁶ Nengeni met a fis ngeni Willi Diehl. Poputá seni ewe ier 1931, Pwiich Diehl a tuppwél lón an angang Bethel lón Bern, Switzerland. Lón 1946, a fiti ewe awaluen class lón ewe Sukulen Gilead lón New York, U.S.A. Mwirin och fansoun seni an sochungio, a wiseni ewe wis chónemmwen mi wisen sáifetál lón Switzerland. Lón pwóróusen manawen Pwiich Diehl, i a apwóróusa pwe lón May 1949, a esile ngeni ewe keangen ofesilap lón Switzerland pwe a ekiekin pwúpwúlú. Ekkewe mi wisen emmwen lón ena ofes ra ereni pwe repwe angei seni wisan kewe meinisin, me a chék mumu ngeni an epwe pioneer. Pwiich Diehl a apasa: “Ese mumu ngeniei ai upwe eáni afalafal . . . Chómmóng rese chúen kapong ngenikem, féfférúr ngenikem usun itá nge ám mi fen katowu.”

⁷ Met Pwiich Diehl a féri? A apasa: “Iwe nge, ám mi silei pwe pwúpwúlú ese atai allúkún Paipel, ina minne aua chék likiti ám kewe osukosuk ngeni Jiowa lón ám iótek me lúkúlúk wóón i.” Inaamwo ika ekkóch pwiich kewe rese eáni ewe ekiek  mi pwúng usun pwúpwúlú, nge mwirin och fansoun, ra eáni ewe ekiek mi pwúng usun. Iwe, Pwiich Diehl a wisenisefáli wisan kewe. Jiowa a efeiéchú an tuppwél. * Sipwe pwisin eisinikich: ‘Ika ngang ua kúna ena sókkun pwúngúngaw, upwe pwal mosonottam me witiwiti Jiowa an epwe áwena minne a fiffis? Are upwe lúkúlúk wóón pwisin ngang me sótun áwena ena pwúngúngaw?’​—SalF. 11:2; álleani Mika 7:7.

8. Pwata sia tongeni mwáálliló lón ach ekieki pwe a fis och pwúngúngaw ngenikich are ngeni pwal emén?

⁸ Ika ka meefi pwe mi wor och pwúngúngaw a fis lón ewe mwichefel, chemeni pwe ka pwal tongeni mwáálliló lón meefiom na. Pwata? Kich sise unuséch me sia tongeni wewengaweiti minne a fis. Pwal och neman sise silei meinisin met a fis. Nge ese lifilifil ika mi pwúng minne sia weweiti are ese pwúng, mi lamot sipwe iótek ngeni Jiowa, lúkúlúk wóón i, me amwéchú ach tuppwél. Ekkeei mettóch repwe túmúnúkich ach sisap “tip ngeni ewe Samol mi Lapalap.”​—Álleani Än Salomon Fos 19:3.

9. Ikkefa ekkewe pwóróus sipwe káé lón ei lesen me lón en lesen mwirin ei?

⁹ Sipwe káé lesen seni úlúngát pwóróus lón Paipel usun néún Jiowa aramas mi kúna pwúngúngaw. Lón ei lesen, sipwe pwóróus usun néún néún néún Apraham we itan Josef me minne pwiin kewe ra féri ngeni. Lón en lesen mwirin ei, sipwe pwóróus usun napanapen féfférún Jiowa ngeni King Ahap me minne a fis lón manawen Petrus me lón Antiokia lón Siria. Atun ach káé ekkeei pwóróus, ppii ifa usun ka tongeni chék nefotofot wóón Jiowa me akkamwéchú óm ririéch ngeni, ákkáeúin lupwen ka lúkú pwe féfférún emén ngonuk mi pwúngúngaw.

10, 11. (a) Ikkefa ekkewe féffér mi pwúngúngaw Josef a kúna? (b) Met a suuk ngeni Josef lupwen a nónnóm lón kalapus?

¹⁰ Josef, i emén néún Jiowa chón angang mi tuppwél mi kúna pwúngúngaw seni ekkewe chón ekis. Nge ewe a kon eletipechowu i, ina án pwisin pwiin kewe féfféringaw ngeni. Lupwen Josef a 17 ierin, pwiin kewe ra turufi me améméló usun emén slave. Mwirin ra uwealó Isip. (Ken. 37:23-28; 42:21) Mwirin, lón ena fénúen ekis, emén fefin a tipimwáál ngeni Josef pwe a sótun reipei. Ra chék mwittir oturalong lón kalapus nge rese etittina ika mi pwúng. (Ken. 39:17-20) Josef a kúna riáfféú usun emén slave me emén chón kalapus lón ina epwe úkúkún 13 ier. Ikkefa ekkewe lesen sia tongeni káé seni án Josef kúna pwúngúngaw epwe tongeni álisikich ika sia pwal kúna ena sókkun seni pwiich kewe?

 ¹¹ Lupwen Josef a nóm lón kalapus, ewe meilapen chón ammólnatá únúmen ewe king a pwal kóturulong lón kalapus. Lón eú pwiin, átena a eáni eú ttan, iwe Jiowa a álisi Josef le áweweei an ttan. Josef a áweweei pwe i epwe musowu seni kalapus me angangsefál ngeni Farao. Mwirin Josef a apwóróusa ngeni átena met a fis ngeni. Sia tongeni káé chómmóng mettóch esap chék seni met Josef a pwár ngeni nge pwal seni met ese pwár ngeni.​—Ken. 40:5-13.

12, 13. (a) Ifa usun sia silei pwe Josef ese fangetá ren met a fis ngeni? (b) Met Josef ese apwóróusa ngeni ewe chón ammólnatá únúmen ewe king?

¹² Álleani Keneses 40:14, 15. Nengeni pwe Josef a apasa, “ra soläniei seni ewe fanüen chon Ipru.” A ffat pwe Josef a kúna pwúngúngaw. Josef a pwal fókkun affata pwe ese pwúng minne ra etipisi wóón. Ina popun a tingorei ewe meilapen chón ammólnatá únúmen ewe king an epwe ereni Farao usun i. Met Josef a mochen an epwe fis? A mochen an epwe ‘towu seni ewe imwen fötek.’

¹³ Iwe met, Josef a chék fangetá ren an na osukosuk ese féri och mettóch an epwe pwákini? Aapw, Josef a silei pwe i a kúna chómmóng pwúngúngaw lón manawan. Ina popun a apwóróusa pwóróusen manawan ngeni ewe chón ammólnatá únúmen ewe king me áneán pwe ena mwán a  tongeni álisi. Nge nengeni pwe Paipel ese apasa pwe Josef a ereni emén pwe pwisin pwiin kewe ra kirikiringaw ngeni, ese pwal mwo nge ereni Farao. Iwe, lupwen pwiin kewe ra feito Isip me ra cháfengen me Josef, Farao a fókkun etiwaéchur me etiwer pwe repwe nónnóm lón Isip me pwapwaiti “öchün pisekin unusen ei fanü.”​—Ken. 45:16-20.

14. Met epwe túmúnúkich seni ach sipwe apasa mettóch mi ngaw ika sia kúna och pwúngúngaw lón ewe mwichefel?

¹⁴ Ika sia ekieki pwe sia kúna pwúngúngaw lón ewe mwichefel, sipwe fókkun túmúnú pwe sisap apwóróusafetálei met a fis. Pwúngún pwe mi lamot sipwe kútta álillis seni ekkewe mwán mi ásimaw me ereniir ika emén pwiich a féri eú tipis mi chou. (Lif. 5:1) Iwe nge, fán chómmóng met a fis ese weneiti án emén féri och tipis mi chou. Iwe neman sia tongeni kinamwefengen me pwiich we inaamwo ika sise fen ereni ekkóch, pwal mwo ekkewe mwán mi ásimaw. (Álleani Mateus 5:23, 24; 18:15.) Sipwe tuppwél me apwénúetá ekkewe kapasen emmwen lón Paipel lón ekkeei mettóch. Fán ekkóch, sipwe mirititi pwe sia chék wewengaweiti met a fis, nge ren enletin ese fis och pwúngúngaw. Ika ina, sipwe pwapwa pwe sise awatteeló ewe osukosuk ren ach ngúnúngúnúngawa pwiich we! Chechchemeni pwe ese lifilifil ika kich mi pwúng are mwáál, nge ach fósongaw usun emén esap tongeni ámúrinnééló met a fis. Ach tuppwél ngeni Jiowa me pwiich kewe epwe túmúnúkich seni ach sipwe féri ena esin mwáál. Ewe soumakken kélfel a apasa pwe “ätewe mi aleasochisi Kot” “esap aitengaua eman, esap föri mine a ngau ngeni chienan.”​—Kölf. 15:2, 3; Jas. 3:5.

15. Ifa usun án Josef riri ngeni Jiowa a eú feiéch?

¹⁵ Sia tongeni káé pwal eú lesen mi lamot seni Josef. Lón ekkewe 13 ier a kúna riáfféú seni och pwúngúngaw, a pwáraatá pwe a eáni án Jiowa ekiek. (Ken. 45:5-8) Esap fán eú a tipi ngeni Jiowa met a fis ngeni. Pwúngún, Josef ese ménúki ewe riáfféú a kúna seni ena pwúngúngaw, nge ese maraseló letipan. Nge ewe mi lamot seni meinisin, ese mut ngeni apwangapwangen aramas me féfférúr mi mwáál an epwe áimuoló i seni Jiowa. Pokiten án Josef tuppwél, a kúna án Jiowa áwena ewe pwúngúngaw me an efeiéchú i me an famili.

16. Pwata mi lamot sipwe apéchékkúlaló ach riri ngeni Jiowa lupwen sia kúna pwúngúngaw lón ewe mwichefel?

¹⁶ Mi lamot sipwe pwal ina usun, sipwe aúcheani me túmúnú ach riri ngeni Jiowa. Mi lamot sisap mut ngeni apwangapwangen pwiich kewe an epwe áimukicheló seni ewe Kot sia tongei me fel ngeni. (Rom 8:38, 39) Nge ika sia kúna pwúngúngaw  lón ewe mwichefel, sipwe fen áppirú Josef me apéchékkúla ach riri ngeni Jiowa. Achocho le eáni án Jiowa ekiek. Mwirin ach féri úkúkún ach tufich le pwákini ach osukosuk ren ach apwénúetá ekkewe kapasen emmwen lón Paipel, mi lamot sipwele chék likiti ngeni Jiowa. Sia tongeni lúkúlúk pwe Jiowa epwe áwena ena mettóch lón ewe napanap me fansoun mi fich me ren.

17. Ifa usun sipwe pwáraatá pwe sia lúkúlúk wóón “ewe Souapwüngün unusen fanüfan”?

¹⁷ Lón ach nónnóm lón ei fénúfan mi ngaw, sia silei pwe sia tongeni kúna pwúngúngaw. Nge fán ákkáeú, neman kopwe kúna lón ewe mwichefel án emén eáni féffér ngonuk mi pwúngúngaw are ngeni pwal emén en mi sissilei. Kosap chepetek. (Kölf. 119:165) Nge kopwe fen akkamwéchú óm tuppwél ngeni Kot, kútta an álillis lón iótek, me lúkúlúk wóón. Chechchemeni pwe pokiten kich sise unuséch, ka tongeni wewengaweiti minne a fis, me neman kese silei mettóch meinisin lón minne a fis. Kopwe áppirú Josef me túmúnú seni óm kopwe apasa mettóch mi ngaw usun ewe osukosuk pún mi fen tongeni awatteeló. Sáingoon, lap seni óm kopwe lúkúlúk wóón pwisin en, kopwe fen apposa letipom le amwéchú óm tuppwél me witiwiti Jiowa fán mosonottam pwe epwe pwisin áwena ewe osukosuk. Iwe, Jiowa epwe pwapwa reom me efeiéchuk, usun met a féri ngeni Josef. Ka tongeni lúkúlúk pwe Jiowa, “ewe Souapwüngün unusen fanüfan,” epwe féri minne mi pwúng fansoun meinisin, “pun an kewe al meinisin ra pwüng.”​—Ken. 18:25; Tut. 32:4.

18. Met sipwe káé lón en lesen mwirin ei?

¹⁸ Lón en lesen mwirin ei sipwe káé pwal ruu pwóróusen néún Jiowa aramas lóóm iir mi kúna pwúngúngaw. Ekkeei pwóróus repwe álisikich le kúna ifa usun tipetekison me omusaaló tipisin aramas repwe tongeni álisikich le eáni án Jiowa ekiek usun pwúngiéch.