1, 2. (a) Pwata a mmen lamot ewe mettóch slave me ngaseló lón fansoun aposel Paulus we? (b) Ié we ewe Populapen ngaseló mi enlet me ren Paulus?

EKKEWE Chón Kraist lón fansoun ekkewe aposel ra nóm fán nemenien ewe Mwúún Rom, ewe mwú mi fókkun pwapwa ren ar kewe allúk, kókkótun kapwúng me ar ngaseló. Nge, ena mwú mi fókkun péchékkúl ra likit ngeni néúr kewe slave ar repwe wisen féri ekkewe angang mi áweires. Lón eú atun, ina epwe iteiten emén lein úlúmén aramas lón ewe Mwúún Rom, i slave. Ren enletin, slave me ngaseló, ikkena ekkewe mettóch aramas ese lifilifil me ekkewe Chón Kraist lón ena atun ra kan ekieki usur.

² Fán chómmóng aposel Paulus a mak usun ngaseló. Nge saminne a sótun pwákini osukosuken aramas lón an we fansoun, usun met chómmóng aramas lón ena atun ra mochen féri. Nge, Paulus me chienan kewe Chón Kraist ra fókkun achocho le áiti ngeni aramas kapas allimen Mwúún Kot we me álisiir le weweiti úkúkún aúchean án Kraist Jesus asorun  méén kepich. Paulus a ereni chienan kewe Chón Kraist ia ra tongeni kúna me ie ewe Populapen ngaseló mi enlet. A makkeei: “Jiowa I emén Ngún, me ia án Jiowa we manaman mi fel a nóm ie, a wor ngaseló.”​—2 Kor. 3:17, NW.

3, 4. (a) Met Paulus a fós usun mwen ekkewe wokisin lón 2 Korint 3:17? (b) Met mi lamot sipwe féri ren ach sipwe eáni ewe ngaseló mi feito seni Jiowa?

³ Lón néún Paulus we arúúachéén taropwe ngeni chón Korint, a fós usun met a fis ngeni Moses lupwen a feitiw me wóón ewe chuuk Sinai mwirin an nóm mwen mesen néún Jiowa we chónláng. A saramaram wóón mesen Moses! Iwe, ekkewe chón Israel ra niwokkus lupwen ra kúna, ina popun a pwélúoló wóón mesan ngeni eché mangaku. (Eks. 34:29, 30, 33; 2 Kor. 3:7, 13) Paulus a áweweei: “Nge ewe pwölüpwöl a särifila, lupwen eman aramas a kul ngeni ach Samol.” (2 Kor. 3:16) Met weween alon Paulus na?

⁴ Sia káé seni ewe lesen mwen ei pwe Jiowa, ewe Chón Fératá mettóch meinisin, i chék ewe Emén a tufichin féri met chék a mochen nge ese wor kaúkún. Ina minne, a pwúng pwe a wor ngaseló ren Jiowa me ikewe “ia án Jiowa we manaman mi fel a nóm ie.” Nge Paulus a apasa pwe ika sia mochen ach sipwe eáni ngaseló, mi lamot sipwe kuliiti Jiowa. A wewe ngeni pwe mi lamot an epwe wor ach ririéch ngeni. Ekkewe chón Israel lón ewe fénúpéén ra chék eáni ekiekin aramas, nge esap ekiekin Jiowa. Usun itá eché pwélúpwél a pwélúoló ekiekiir me letiper. Ra mochen áeá ewe ngaseló ra kerán angei le apwénúetá pwisin mocheniir.​—Ipru 3:8-10.

5. (a) Met sókkun ngaseló aramas ra tongeni eáni ren án Jiowa we manaman mi fel? (b) Ifa usun sia silei pwe emén slave are emén mi kalapus a chúen tongeni eáni ewe sókkun ngaseló mi pop seni Jiowa? (c) Ikkefa ekkewe kapas eis mi lamot sipwe pélúweniir?

⁵ Ewe ngaseló mi pop seni án Jiowa manaman mi fel a lap seni ach ngaseló seni ach slave, me a pwal lap seni met aramas ra tongeni awora. A tongeni angasakicheló seni fétekin tipis me máló me seni fétekin ekkewe fel mi chofona me eérenier kewe. (Rom 6:23; 8:2) A ifa me watteen ena ngaseló! Pwal mwo nge emén slave are emén mi fen kalapus a tongeni eáni ena ngaseló. (Ken. 39:20-23) Emén Chón Kraist fefin itan Nancy Yuen me Pwiich Harold King ra kalapus ren fite ier pokiten ar lúkú, nge ra chúen eáni ena sókkun ngaseló. Ka tongeni katol ar apwóróusa met a fis ngeniir wóón JW Broadcasting. (Ppii fán INTERVIEWS AND EXPERIENCES > ENDURING TRIALS.) Iei sipwe pélúweni ekkeei ruu kapas eis: Ifa usun sia tongeni pwáraatá pwe sia fókkun aúcheani ach ngaseló? Me ifa usun sia tongeni áeáfichi ach ngaseló?

6. Ifa usun ekkewe chón Israel ra pwári pwe rese meefi kilisou ren ewe ngaseló Jiowa a ngeniir?

⁶ Sia kan kilisou ngeni emén mi liffang ngenikich eú liffang mi aúchea. Nge, ekkewe  chón Israel rese kilisou ren ewe ngaseló Jiowa a ngeniir. Fitu chék maram mwirin án Jiowa angasereló seni Isip, ra poputá le mwon ener lón Isip. Ra ngúnúngúnúngaw ren ewe mana, ewe mwéngé Jiowa a awora ngeniir. Ra pwal mwo nge mochen liwiniti Isip! Me rer pwe ener kewe ‘ik, küri me senia, nengi me anion pwal ninnikü’ ra aúchea lap seni ewe ngaseló Jiowa a fen ngeniir ren ar repwe tongeni fel ngeni. Ina popun Jiowa a fókkun song rer. (Num. 11:5, 6, 10; 14:3, 4) Ena pwóróus a áiti ngenikich eú lesen mi lamot.

7. Ifa usun Paulus a apwénúetá pwisin an we kapasen fén lón 2 Korint 6:1, me ifa usun sipwe áppirú i?

⁷ Paulus a éúréúra Chón Kraist meinisin ar resap aúcheangawa ewe ngaseló Jiowa a awora ngeniir me ren Néún we, Jesus Kraist. (Álleani 2 Korint 6:1.) Paulus ese unuséch me a nóm fán nemenien tipis me máló, me ena mettóch a mmen eriáfféwú. Nge a chúen tongeni apasa: “Kilisou ngeni Kot a angasaei ren ach Samol Jesus Kraist!” Pwata a apasa ena? Paulus a áweweei ngeni chienan kewe Chón Kraist: ‘Pun ewe allükün ngün mi ngenikich manau lon Kraist Jesus a angasaei seni ewe allük mi afisätä tipis me mäla.’ (Rom 7:24, 25; 8:2) Mi lamot ach sisap fókkun ménúki án Jiowa angasakicheló seni fétekin tipis me máló, usun met Paulus a pwal féri. Ena méén kepich a suuki ngenikich ach sipwe angang ngeni ach we Kot fán eú mwelien letip mi liméch, me ena mettóch a wesewesen apwapwaai kich.​—Kölf. 40:8.

8, 9. (a) Ifa án aposel Petrus we kapasen éúréúr usun ach áeá ach ngaseló? (b) Ifa usun emén a tongeni áeámwáálli an ngaseló?

⁸ Mi lamot sisap chék kilisou ngeni Jiowa, nge sipwe pwal túmúnúéchú ach sisap áeámwáálli ach ngaseló. Áwewe chék, aposel Petrus a éúréúrakich ach sisap áeá ach ngaseló le túkúmaaló ach kewe féffér mi mwáál. (Álleani 1 Petrus 2:16.)  Ena kapasen éúréúr a áchema ngenikich met a fis ngeni ekkewe chón Israel lón ewe fénúpéén. Ikenái, neman a pwal lamot ngenikich ena kapasen éúréúr lap seni lón ena fansoun. Satan me an ei fénúfan ra etipetipakich ren chómmóng mettóch sia mochen, áwewe chék ren úf, mwéngé, únúmach me ekkewe minen kunou me apwapwa. Ekkewe chón advertise ra tipachem le néúnéú ekkewe aramas mi liéch me átéch ar repwe etipetipakich le mééni ekkewe sókkun mettóch rese wesewesen lamot ngenikich. A mmen mecheres ach sipwe tipetipeló ren ei fénúfan pwe sipwe áeámwáálli ach we ngaseló.

⁹ Án Petrus kapasen fén a pwal weneiti ekkewe kefil mi lamot sia féri lón manawach ren choweán kefilin sukul me angang. Áwewe chék, lón ei fansoun chómmóng ra fókkun pesei ekkewe sáráfé ar repwe fókkun achocho pwe repwe ketiw ngeni ekkewe sukul tekia mi fókkun múrinné. Chómmóng ra ereniir pwe ika ra fiti sukul tekia, iwe repwe eáni ekkewe sókkun angang mi múrinné, epwe watte néúr moni, me repwe kúna ésúfélúr. Ra tongeni áiti ngeniir ekkóch pwóróus usun itá mi pwári pwe chókkewe mi sochungio seni sukul tekia a watte peioffur lap seni chókkewe mi chék sochungio seni high school. Lupwen a nóm ren ekkewe sáráfé eú kefil epwe kkúú unusen manawer, iwe usun a mmen fókkun éch me rer ar repwe filatá le fiti sukul tekia. Nge met a lamot iir me semer kewe me iner repwe chechchemeni?

10. Met mi lamot sipwe chechchemeni lupwen sia féri ekkewe kefil mi weneiti pwisin manawach?

¹⁰ Neman ekkóch ra meefi pwe pokiten ekkena kefil ra chék weneiti pwisin manawer, iwe mi wor ar pwúúng le filatá met chék ra mochen ika mwelien letiper mi kinamwe ren. Ra tongeni ekieki alon Paulus we mi erá: “Pwota üpwe küna apwüng won mine üa föri lon ai ngas, pokiten mengiringirin leluken eman?” (1 Kor. 10:29) Inaamwo ika mi wor ach pwúúng le féri pwisin ach kewe kefil usun sukul me angang, nge mi lamot sipwe chechchemeni pwe mi wor aúkúkún ach pwúúng me mi kan wor mwirilóón ekkewe kefil meinisin sia eáni. Ina popun Paulus a apasa: “‘A mwümwütä ngenikich pwe sipwe föri mettoch meinisin.’ Ewer, mi pwüng, nge sap mettoch meinisin ra lomot ngenikich. ‘A mwümwü ngenikich ach sipwe föri mettoch meinisin,’ nge sap mettoch meinisin ra alisikich.” (1 Kor. 10:23) Ina popun, inaamwo ika mi wor ach pwúúng le féri kefil lón met mi weneiti pwisin manawach, nge ach mochen esap ina ewe mi fókkun lamot seni meinisin.

11. Ifa ewe popun Jiowa a angasakicheló?

¹¹ Lupwen Petrus a éúréúrakich ach sisap áeámwáálli ach ngaseló, a pwal apasa pwe sia áeáfichi ach ngaseló lupwen sia áeá manawach pwe sipwe “nöün Kot chon angang.” Ewe popun Jiowa a néúnéú Jesus le angasakich seni fétekin tipis me máló pwe sipwe tongeni áeá unusen manawach le angang ngeni I.

12. Ifa ewe leenien áppirú Noa me an we famili ra isetiw fán itach?

¹² Sia tongeni fókkun áeáfichi ach ngaseló lupwen sia unusen áeá ach fansoun me péchékkúl le angang ngeni Jiowa. Ach féri  ena epwe túmúnúkich seni ach sisap rikiló me akkomwa lón manawach mettóchun fénúfan me pwisin mochenich. (Kal. 5:16) Ekieki met Noa me an we famili ra féri. Ra nóm lón eú fénúfan mi ngaw me uren mwánesól. Nge rese angolong lón mwékútúkútún aramas are minne ra achocho ngeni lón ena fansoun. Ra filatá ar repwe akkachocho le féri ewe angang Jiowa a ewisa ngeniir. Ra fala ewe waimw, ioni mwéngé fán iter me fán iten ekkewe man, me éúréúra aramas usun ewe Noter. “Noa a föri meinisin mine Kot a allük ngeni.” (Ken. 6:22) Pokiten ena, Noa me an we famili ra manawewu seni sópwólóón ena ótót.​—Ipru 11:7.

13. Met Jiowa a allúkú ngenikich ach sipwe féri?

¹³ Met Jiowa a allúkú ngenikich ach sipwe féri ikenái? Kich néún Jesus chón káé, iwe sia silei pwe Kot a allúkú ngenikich ach sipwe afalafal. (Álleani Lukas 4:18, 19.) Lón ei fansoun, Satan a achunaló mesen lape ngeni aramas, me rese mirititi pwe ra nóm fán nemenien lamalam chofona, pisek me moni, me ótóten politics. (2 Kor. 4:4) Sia usun Jesus, a wor wisach le álisi aramas ar repwe silei me fel ngeni Jiowa, ewe Koten ngaseló. (Mat. 28:19, 20) Ese mecheres ewe angangen afalafal. Lón ekkóch leeni, aramas rese pwal ekieki ar repwe silei Kot, me ekkóch ra pwal mwo nge song lupwen sia afalafal ngeniir. Nge pokiten Jiowa a fen allúkú ngenikich ach sipwe afalafal, iwe mi lamot ach sipwe pwisin eisinikich, ‘Ngang mi tongeni áeá ai ngaseló le alapaaló ai angang ngeni Jiowa?’

14, 15. Met chómmóng néún Jiowa kewe aramas ra filatá le féri? (Ppii ewe sasing lepoputáán ei lesen.)

¹⁴ Chómmóng néún Jiowa kewe aramas ra mirititi pwe a fókkun arapakkan sópwólóón ei ótót, iwe a mmen apéchékkúlakich ena me ach kúna ar filatá le ámecheresaaló nónnómun manawer me poputá le pioneer. (1 Kor. 9:19, 23) Ekkóch ra pwisin pioneer lón leenier kewe, nge ekkóch ra mwékút ngeni ekkewe mwichefel mi osupwangen álillis ie. Lón ekkewe nimu ier ra ló, lap seni 250,000 ra poputá le pioneer, me iei a wor lap seni 1,100,000 regular pioneer. A ifa me amwararan pwe chómmóng ra ákkáeá ar ngaseló le angang ngeni Jiowa lón ena napanap!​—Kölf. 110:3.

¹⁵ Met a álisiir le áeáfichi ar ngaseló? Nengeni pwóróusen John me Judith, ra angang ngeni Jiowa lón sókkopaten fénú ren 30 ier. Ra apwóróusa pwe lupwen ewe Sukulen Pioneer a poputá lón ewe 1977, a wor pesepes ngeni ekkewe chón fiti ena sukul ar repwe mwékút ngeni ekkewe leeni mi wor osupwangen chón afalafal ie. Ren ar repwe féri ena, mi lamot repwe ámecheresaaló nónnómun manawer. Ina popun fán chómmóng, John a siwili an angangen moni. Ló, ló, ló, ra mwékút ngeni eú fénú. Met a álisiir le ataweei weiresin ar káé eú mineféén fós, eérenaaló eú mineféén eéreni me likiitú fán weiresin weather lón ena fénú?  Ra iótek ngeni Jiowa me lúkúlúk wóón an epwe álisiir. Met meefier usun ar angang ngeni Jiowa lón ena esin napanap ren fite ier? John a erá: “Ua meefi pwe ua unusen áeá ai péchékkúl lón ei angang mi fókkun múrinné seni meinisin. A lapóló ai lúkú pwe Jiowa i wesewesen emén, me usun emén sam mi tong. Iei ua weweéchúti weween James 4:8, ewe a erá: ‘Oupwe arap ngeni Kot, iwe, epwe arap ngenikemi.’ Ua fókkun silei pwe ua kúna ewe sókkun manaw mi apwapwa me mi wor aúchean.”

16. Ifa usun pwiich kewe fitengeréú ra áeáfichi ar ngaseló?

¹⁶ Ekkóch ra tongeni pioneer ren langattam fansoun usun chék John me Judith. Ekkóch ra tongeni pioneer ren ekis chék fansoun pokiten nónnómur. Nge chómmóng ra álillis lón ewe angangen kaú imw wóón unusen fénúfan. Áwewe chék, ina epwe 27,000 pwiich kewe ra ló álillis ren kaútáán ach we ofesilap lón Warwick, New York. Ekkóch ra álillis ren ruu wiik, fitu maram, me eú ier are fen lap seni. Chómmóng pwiich kewe ra fen pennúkú chómmóng mettóch ren ar repwe angang lón Warwick. Iir leenien áppirú mi fókkun múrinné ren chókkewe iir mi áeá ar ngaseló le mwareiti me asamolu Jiowa, ewe Koten ngaseló!

17. Met sia tongeni ápilúkúlúkú ika sia áeáfichi ach ngaseló iei?

¹⁷ Sia kilisou ren ach silei Jiowa me eáni ewe ngaseló pokiten sia fel ngeni. Sipwe pwáraatá pwe sia fókkun aúcheani ach ngaseló ren ekkewe kefil sia féri. Sisap áeámwáálli ach ngaseló nge sipwe fen áeá ach ngaseló le unusen angang ngeni Jiowa ren úkúkún ach tufich. Iwe sia tongeni pwapwaiti ekkewe feiéch Jiowa a pwonei lupwen epwe pwénútá ei oesini: “Lon eu rän förien Kot kana repwe ngasala seni ar ngauala me tala o eti nöün Kot kewe lon ar ngasala me ling.”​—Rom 8:21.