1. Pwata aposel Paulus a pesei ekkewe popun Chón Kraist chón Ipru ar repwe “fokun” apéchékkúlafengeniir?

LÓN fansoun ekkewe aposel, iei met aposel Paulus a fénéú ngeni ekkewe chón Ipru Chón Kraist: “Ousipwe ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen usun ekoch ra föföri. Nge sipwe fokun apöchökülafengenikich lefilach, pun sia silei pwe Ränin ach Samol a arapoto.” (Ipru 10:24, 25) Neman pwiich kana ra ekieki ika pwata Paulus a ereniir ar repwe alapaaló ar apéchékkúlafengeniir. Kis seni nimu ier mwirin ena, a ffatoló eú popun. Lón ena atun ra kúna pwe a arapoto ránin án Jiowa kapwúng wóón Jerusalem. Ra mirititi pwe a lamot ar repwe sú seni ena telinimw usun met Jesus a fen ereniir ar repwe féri. (Luk. 21:20-22; Föf. 2:19, 20) Ránin Jiowa we a war lón ewe ier 70 lupwen ekkewe chón Rom ra ataieló Jerusalem.

2. Pwata a lamot ach sipwe alapaaló ach ekkekieki usun ach sipwe apéchékkúlafengenikich lón ei fansoun?

 ² Ikenái, nónnómuch a pwal usun nónnómur. A arapoto ránin Jiowa we mi “fokun eniwokus.” (Sow. 2:11) Alon ewe soufós Sefanaia ei a pwal weneiti lón ach ei fansoun: “Ewe rän mi lap, ränin ewe Samol mi Lapalap a arapoto, a arapoto o müttirito.” (Sef. 1:14) Ina ewe popun mi lamot ach sipwe “ekiekifengeni usun ach sipwe tongeni alollolätai chienach ren ach eäni chen me föför mürina.” (Ipru 10:24) Mi lamot sipwe fókkun alapaaló ach ekkekieki pwiich kewe pwe sipwe tongeni apéchékkúler atun mi lamot ngeniir.

3. Met ewe aposel Paulus a apasa usun apéchékkúl? (Ppii ewe sasing lepoputáán ei lesen.)

³ “Än eman aramas öürek lon lelukan a afisätä lolilen, nge eu kapas pwetete a apwapwai i.” (SalF. 12:25) Mi wor ekkewe atun mi lamot ngenikich meinisin apéchékkúl. Paulus a affata pwe pwal mwo nge chókkewe mi wisen apéchékkúla ekkewe ekkóch a pwal pwisin lamot ngeniir apéchékkúl. A mak ngeni pwiin kewe Chón Kraist lón Rom: “Üa fokun mochen churikemi pwe üpwe ngenikemi och feiöchün ngün pwe oupwe pöchökülela, wewen, pwe ämi me ngang sipwe apöchökülafengenikich ren ach lükülük.” (Rom 1:11, 12) Iwe, pwal mwo nge aposel Paulus a lamot ngeni apéchékkúl fán ekkóch.​—Álleani Rom 15:30-32.

4, 5. Ié kewe sia tongeni apéchékkúler lón ei fansoun, me pwata?

⁴ Ikenái, sia tongeni apéchékkúla ekkewe chón angang ngeni Jiowa full-time, áwewe chék ren ekkewe pioneer mi tuppwél. Chómmóng me leir ra fen pennúkú met ra pwapwaiti lón manawer pwe repwe tongeni pioneer. A pwal ina usun ren ekkewe misineri, chón Bethel, chónemmwen mi wisen sáifetál me pwúlúwer kewe, me chókkewe mi angang lón ekkewe leenien chiyakú. Iir meinisin ra pennúkúóló ese lifilifil met pwe repwe tongeni alapaaló ar angang ngeni Jiowa. Ina minne, mi lamot sipwe apéchékkúler. Chómmóng ra mochen angang ngeni Kot full-time nge iei rese chúen tongeni, iwe ra pwal pwapwa lupwen aramas ra apéchékkúler.

⁵ Pwal ié kewe mi fich ngeniir ach sipwe apéchékkúler? Sia tongeni apéchékkúla chómmóng pwiich kewe mi fen filatá ar repwe lipich pokiten ra mochen álleasochisi Jiowa me pwúpwúlú “lon chok ewe Samol.” (1 Kor. 7:39, Testament Mi Fö) Ekkewe fin pwúpwúlú ra péchékkúletá lupwen pwúlúwer kewe ra ereniir pwe ra tongeer me kilisou ngeniir ren meinisin met ra féri. (SalF. 31:28, 31) Ekkewe Chón Kraist mi kúna riáfféúmwáál are samau, a pwal lamot ngeniir apéchékkúl. (2 Tes. 1:3-5) Jiowa me Jesus ra oururu meinisin chókkewe mi tuppwél.​—Álleani 2 Tesalonika 2:16, 17.

6. Met sia káé usun wisen ekkewe mwán mi ásimaw me ren Aisea 32:1, 2?

⁶ Álleani Aisea 32:1, 2. Sia nóm lón ei fansoun weires me sia tongeni mwittir meefi letipechou me lichippúng. Jesus Kraist a néúnéú ekkewe “samol,” iir ekkewe mwán mi ásimaw mi kepit me ekkewe mwán mi ásimaw lein ekkewe ekkóch siip pwe repwe apéchékkúlakich. Ekkena mwán mi ásimaw lón ewe mwichefel rese “nemeni” ach lúkú nge  ra ‘chok etikich le angang’ fán iten ach sipwe pwapwa. Ra mochen álisikich ach sipwe pwapwa me akkamwéchú ach tuppwél.​—2 Kor. 1:24, TF.

7, 8. Ifa usun ekkewe mwán mi ásimaw repwe apéchékkúla pwiir kewe lón kapas me féffér?

⁷ Ekkewe mwán mi ásimaw ra tongeni áppirú aposel Paulus, átewe mi kan achocho le apéchékkúla pwiin kewe Chón Kraist. Iei met a makkeei ngeni ekkewe Chón Kraist lón Tesalonika mi nóm fán riáfféúmwáál: “Pokiten aia fokun tongekemi, aia pwal pwapwa le fang ngenikemi sap chök ewe Pworausen Manau seni Kot, nge pwal püsin manauem, pun aia fokun echenikemi.”​—1 Tes. 2:8.

⁸ Ekkewe mwán mi ásimaw ra fókkun tongeni apéchékkúla pwiir kewe ren met ra apasa. Nge fansoun meinisin mi naf ena? Iei alon Paulus ngeni ekkewe mwán mi ásimaw seni Efisos: “Sipwe fokun alisi ekewe chon apwangapwang o chechemeni ekewe kapas ach Samol Jesus a püsin apasa, ‘Sia feiöch ren ach fang lap seni ach angei mettoch.’” (Föf. 20:35) Paulus a tipemecheres le ‘fangala meinisin met mi wor ren, pwal püsin manauan’ fán iten pwiin kewe Chón Kraist. A ánnetatá ren féfférún pwe a pwapwa le féri úkúkún an tufich fán iter. (2 Kor. 12:15) Pwal ina chék usun, mi lamot án ekkewe mwán mi ásimaw repwe apéchékkúla me oururu pwiir kewe esap chék lón kapas nge pwal ren ar féffér. Ena mettóch a pwári pwe ra wesewesen tongekich.​—1 Kor. 14:3.

9. Ifa usun ekkewe mwán mi ásimaw ra awora kapasen fén ngeni pwiich kewe lón ewe napanap epwe apéchékkúler?

⁹ Ren án ekkewe mwán mi ásimaw repwe apéchékkúla pwiir kewe, fán ekkóch mi lamot ar repwe fénér. Ekkewe mwán mi ásimaw ra káé seni Paipel ifa usun repwe fénéú chón ewe mwichefel fán ewe napanap epwe apéchékkúler. Jesus a isetiw eú leenien áppirú mi múrinné usun ena angangen fén lupwen a fénéú ekkewe mwichefel lón Asia Minor mwirin an máló me manawsefál. A tuwenewen an kewe kapasen fén ngeni ekkewe mwichefelin Efisos, Perkamon, me Tiatira. Nge me mwen an fénér, a akkomw apúnger ren ar kewe féffér múrinné meinisin. (Pwär. 2:1-5, 12, 13, 18, 19) Jesus a ereni ewe mwichefelin Laotisea: “Üa apwüngü o amiriti chokewe meinisin üa tongeer. Iei minne kopwe achocho o aier seni om tipis.” (Pwär. 3:19) Ekkewe mwán mi ásimaw ra achocho le áppirú Kraist lón ar awora kapasen fén ngeni pwiich kewe.

10. Ifa usun oukich meinisin sia tongeni apéchékkúlafengenikich?

¹⁰ Esap chék wisen ekkewe mwán mi ásimaw ar repwe apéchékkúla ekkewe ekkóch. Paulus a pesei meinisin Chón Kraist ar repwe néúnéú “sokun kapas mi afefetai aramas o alisiir lon ar osupwang, pwe chokewe mi rongorong ngeni repwe feiöch ren.” (Ef. 4:29) Emén me emén kich itá sipwe silei osupwangen ekkewe ekkóch pwe sipwe tongeni álisiir. Iei met Paulus a makkeei ngeni ekkewe chón Ipru Chón Kraist: “Oupwe apöchökülätä pöümi me pwäsukumi kana mi apwangapwang. Oupwe awenechara ekewe al oupwe fetal won, pwe ekewe chon pechemä resap apwangapwangala, nge repwe pöchökülela.” (Ipru 12:12, 13) Kich meinisin, pwal mwo nge ekkewe kúkkún, sia tongeni apéchékkúlafengenikich ren ach kapas.

11. Met a álisi Marthe lupwen a meefi letipechou?

 ¹¹ Emén Chón Kraist fefin itan Marthe a letipechou ren och fansoun. A makkeei: “Eú rán atun ua iótek ren ai upwe angei apéchékkúl, ua chuuri emén pwiich fefin chinnap mi pwári an tongeei ei. Nge a fókkun lamot ngeniei ena lón ena atun. A pwal apwóróusa ngeniei ewe atun a kúna ewe esin sóssót ua pwal kúna lón ena atun. Iwe ua meefi pwe esap chék ngang pwe a wor chienei.” Eli pwiich na ese pwal silei úkúkún an álisi Marthe ren an kapas!

12, 13. Ifa usun sipwe tongeni apwénúetá ewe kapasen fén lón Filipi 2:1-4?

¹² Iei met Paulus a makkeei ngeni ekkewe Chón Kraist lón Filipi: ‘Iwe, are a wor och apilukuluk allim lon Kraist, are och chip ren tong, are pwipwifengen lon ewe ngun, are mu o umoumoch, oupwe aunusochulo ai pwapwa ren ami tongfengen, ren ami tipeeu o ekiek-eu chok. Ousap fori och ren kirikiringau are ren lamalamtekia, nge lon ami tipetekison oupwe chok ekieki pwe ekkewe ekkoch ra murinno seni ami. Nge ousap tumunu chok en me pisekin, pwe oupwe pwal tumunufichi pisekin ekkewe ekkoch.’​—Fil. 2:1-4, TF.

¹³ Mi lamot kich meinisin sipwe ekieki alen ach sipwe tongeni álillisfengen. Sia tongeni fang “och chip ren tong,” pwári pwe sia ekiekifengenikich, me “mu o umoumoch” pwe sipwe apéchékkúla pwiich kewe.

14. Ifa eú alen ach sipwe tongeni apéchékkúla ekkewe ekkóch?

¹⁴ A apwapwa ngenikich ach rong pwe chókkewe sia fen álisiir me lóóm ra akkamwéchú  ar tuppwél ngeni Kot. Aposel Johannes a makkeei: “Esap wor och a apwapwaei me lükün ai rongorong pwe nei kana ra manaueni ewe manauen let.” (3 Joh. 4) Chómmóng pioneer ra pwapwa lupwen ra silei pwe ewe emén ra fen álisi me lóóm le silei ewe enlet, iei a chúen tuppwél ngeni Jiowa, neman a pwal mwo nge wiliti emén pioneer. Ina minne, lupwen ekkewe pioneer ra lichippúng, sia tongeni áchema ngeniir meinisin met ra fen féri le álisi aramas.

15. Ifa usun sia tongeni apéchékkúla chókkewe mi tuppwél le angang ngeni Kot?

¹⁵ Chómmóng chónemmwen mi wisen sáifetál me pwúlúwer kewe ra apasa pwe ra fen péchékkúletá lupwen chón ewe mwichefel ra mak ngeniir me kilisou ngeniir ren ar chuuriir. A pwal ina usun meefien ekkewe mwán mi ásimaw, misineri, pioneer me ekkewe chón Bethel, chókkewe mi angang ngeni Jiowa fán tuppwél. Eli sipwe apéchékkúler ren ach apasa ach kilisou ngeniir.

16. Met sipwe féri ren ach sipwe tongeni apéchékkúla emén?

¹⁶ Ifa usun ika a weires ngonuk óm kopwe pwári ngeni aramas meefiom usur? Ren enletin, ese kon weires ach sipwe apéchékkúla aramas. Sótun emelimel ngeni emén. Nge ika ese emelimel ngonuk, iwe eli pokiten a wor an osukosuk are eli a lamot an epwe wor emén epwe fós ngeni. Ka tongeni oururu ren óm aúseling ngeni meefian.​—Jas. 1:19.

17. Met a apéchékkúla emén pwiich alúwél?

¹⁷ Emén pwiich alúwél itan Henri a fókkun lichippúng pwe chómmóng aramasan me  chón an famili ra úkútiw le angang ngeni Jiowa. Emén me leir, seman we, i emén mwán mi ásimaw me lóóm. Emén chónemmwen mi wisen sáifetál a kúna pwe Henri a letipechou, iwe a etiwa ar repwe ló ún kofi lón kafie. A aúselingéch atun Henri a ereni meefian. Henri a mirititi pwe epwe chék tongeni álisi chón an we famili le liwiniti ewe enlet ika a amwéchú an tuppwél ngeni Kot. A pwal kúna ourur seni an álleani Kölfel 46, Sefanaia 3:17, me Markus 10:29, 30.

18. (a) Met King Salomon a makkeei usun apéchékkúl? (b) Met aposel Paulus a eáni pesepes?

¹⁸ Met sia tongeni káé seni pwóróusen Marthe me Henri? Kich meinisin sia tongeni oururu me apéchékkúla emén pwiich mi osupwangen apéchékkúl. King Salomon a makkeei pwe a múrinné eú “sokun kapas mi fichiti eu me eu fansoun. Wopwapwan won mesen eman a apwapwai leluken aramas, nge pworaus mi mürina a akinamwei inisin aramas.” (SalF. 15:23, 30) Ka tongeni ekieki emén en mi sissilei nge a letipechou? Pwata kese állea ngeni Ewe Leenien Mas are állea ngeni eú pwóróus me wóón ewe website? Ese pwal weires ena. Pwal och, Paulus a áiti ngenikich pwe ach kélfengen ach kewe kélún mwich a tongeni ekinamwekich. A makkeei: “Oupwe aiti ngeni eman me eman lefilemi ei kapas o fönööfengenikemi fän mirit. Oupwe kölü ekewe kölfel, ekewe kölün lamalam me ekewe köl mi pin. Oupwe köl ngeni Kot fän kilisou lon letipemi.”​—Kol. 3:16; Föf. 16:25.

19. Pwata epwe chék lallapóló lamoten apéchékkúl, me met mi lamot sipwe féri?

¹⁹ Lón ei fansoun sia feffetál ngeni warotoon ránin Jiowa we, a pwal lapóló lamoten ach sipwe apéchékkúlafengenikich. (Ipru 10:25) Sipwe pwapwa ika sia apwénúetá án Paulus ei kapasen fén: “Oupwe apöchökülafengenikemi o alilisfengen lefilemi, usun oua fen föri iei.”​—1 Tes. 5:11.