1-2. Pwata Jesus a meefi lólilen?

JESUS a meefi lólilen lón ewe sáingoon rán mwen an we epwele máló. Ekiseló chék aramas mi kirikiringaw repwele eriáfféwú me nieló. Nge Jesus ese chék lólilen ren an silei pwe epwele máló. A fókkun tongei Seman we me a mochen apwapwaai. Jesus a silei pwe ika a amwéchú an tuppwél fán ena sóssót epwele kúna, iwe epwe álisatá itéchúlóón iten Jiowa we. Jesus a pwal tongei aramas, me a silei pwe ach ápilúkúlúkún kúna manaw esemuch a lóngólóng wóón an akkamwéchú an tuppwél ngeni Jiowa tori máló.

² Inaamwo ika Jesus a nóm fán watteen aúrek nge a chúen meefi kinamwe. Iei met a ereni néún kewe aposel: “Ai kinamwe üa fang ngenikemi.” (Joh. 14:27) A eáni “än Kot kinamwe,” ewe kinamwe mi pop seni án emén ririéch ngeni Jiowa. Ena kinamwe a ekinamwei ekiekin me letipen Jesus.​—Fil. 4:6, 7.

3. Met sipwele etittina lón ei lesen?

³ Ese wor emén leich a fis ngeni ewe úkúkún watteen weires Jesus a likiitú fan, nge meinisin ekkewe chón tapweló mwirin, repwe kúna sóssót. (Mat. 16:24, 25; Joh. 15:20) Iwe fán ekkóch sipwe meefi lólilen usun Jesus. Ifa usun sipwe túmúnú pwe aúrek ete nemenikicheló me atai kinamween letipach? Sipwe etittina úlúngát mettóch Jesus a féri atun an angangen afalafal wóón fénúfan me ppii ifa usun sipwe tongeni áppirú lupwen sia nóm fán sóssót.

4. Ifa usun Jesus a pwáraatá pwe a iótek fansoun meinisin lón ewe sáingoon ránin manawan usun met 1 Tesalonika 5:17 a pesekich le féri?

⁴ Álleani 1 Tesalonika 5:17. Jesus a iótek fán chómmóng lón unusen ewe sáingoon ránin manawan wóón fénúfan. Lupwen a poputááni áchechchemenien an máló, a ióteki ewe pilawa me ewe wain. (1 Kor. 11:23-25) Me mwen ar ló seni ewe leeni ra féri ewe Pasofer ie, a iótek, fengen me néún kewe chón káé. (Joh. 17:1-26) A iótek fán fite lupwen iir me néún kewe chón káé ra wareiti ewe chukun Olif lón ewe pwinin. (Mat. 26:36-39, 42, 44) Me ekkewe sáingoon kapas a eáni me mwen an we epwele máló, a apasaatá lón iótek. (Luk. 23:46) Jesus a chék iótek ngeni Jiowa usun mettóch meinisin a fis lón ena sáingoon ránin manawan wóón fénúfan.

5. Pwata a kisikisiló án ekkewe aposel pwora?

⁵ Eú popun Jesus a tongeni likiitú fán an sóssót, pokiten a lúkúlúk wóón Seman we me ikkiótek ngeni. Nge ekkewe aposel rese likiitú le iótek lón ena pwinin. Iwe mwirin, ar pwora a kisikisiló lupwen a toriir sóssót. (Mat. 26:40, 41, 43, 45, 56) Lupwen sia kúna sóssót, sia chék tongeni akkamwéchú ach tuppwél ika pwe sia áppirú Jesus me “iotek” iteitan. Met sia tongeni ióteki?

6. Ifa usun lúkú epwe álisikich le akkamwéchú ach kinamwe?

⁶ Sia tongeni iótek ngeni Jiowa an epwe ‘alisikich pwe ach lükü i epwe wattela.’ (Luk. 17:5; Joh. 14:1) Mi lamot ngenikich lúkú pokiten Satan epwe sótuni meinisin ekkewe chón tapweló mwirin Jesus. (Luk. 22:31) Ifa usun ach lúkú epwe tongeni álisikich le akkamwéchú ach kinamwe inaamwo ika ra  chék akkatapw ach kewe osukosuk? Lupwen sia féri úkúkún ach tufich le pwákini ach osukosuk, iwe lúkú epwe amwékútúkich le likiti ngeni Jiowa. Pokiten sia lúkúlúk pwe Jiowa a tufichin pwákini meinisin lap seni kich, iwe sia tongeni meefi kinamween ekiekich me letipach.​—1 Pet. 5:6, 7.

7. Met sia káé seni meefien Robert?

⁷ Iótek a álisikich le akkamwéchú kinamween letipach ese lifilifil met sókkun sóssót sipwe kúna. Nengeni pwóróusen emén mwán mi ásimaw mi tuppwél itan Robert, 80 som ierin iei. A erá: “Ewe pesepes mi mak lón Filipi 4:6, 7 a álisiei le likiitú fán ai kewe sóssót lón manawei. Ua osupwang lón pekin moni. Pwal ren och fansoun, use chúen wiseni ewe wis mwán mi ásimaw.” Met a álisi Robert le akkamwéchú kinamween letipan? A erá: “Atun ua poputá le aúrek, mwittir chék ua kan iótek. Ua lúkú pwe lupwen ua kan alapaaló ai fansoun iótek me sié ngeni Kot, iwe a pwal lapóló ai meefi kinamwe.”

8. Ifa pwal eú popun Jesus a eáni eú letip mi kinamwe me ren Johannes 8:29?

⁸ Álleani Johannes 8:29. Jesus a akkamwéchú kinamween letipan pwal mwo nge atun aramas ra eriáfféwúmwááli, pokiten a silei pwe a apwapwaai Seman we. A chék álleasochis inaamwo ika a weires ngeni. A tongei Seman we me akkomwa an angang ngeni lón unusen manawan. Me mwen an feitiw fénúfan, i Néún Kot we sousile angang. Me lupwen a nóm wóón fénúfan, a tinikken le áiti ngeni aramas usun Seman we. (Mat. 6:9; Joh. 5:17) Ena angang a  atoto ngeni Jesus watteen pwapwa.​—Joh. 4:34-36.

9. Ifa usun ach akkachocho le fiti ewe angangen afalafal a álisikich le akkamwéchú kinamween letipach?

⁹ Sia tongeni áppirú Jesus ren ach ákkálleasochisi Jiowa me ‘alapalafochei ach achocho lon ewe angangen ach Samol.’ (1 Kor. 15:58) Lupwen sia áeá ‘unusen ach fansoun’ lón ewe angangen afalafal, sia tufichin eáni ekiek mi pwúng usun ach kewe osukosuk. (Föf. 18:5) Áwewe chék, fán chómmóng chókkewe sia kan chuuriir lón afalafal, a fen kon chómmóng ar osukosuk lap seni kich. Nge, lupwen ra silei usun án Jiowa tong me apwénúetá an kewe emmwen, a échúló manawer me lapóló ar pwapwa. Iteiten ach kúna an fis ena, a alapaaló ach lúkúlúk pwe Jiowa epwe túmúnúkich. Me ena lúkúlúk epwe álisikich le akkamwéchú kinamween letipach. Emén Chón Kraist fefin a riáfféú lón unusen manawan ren an letipechou me meefi pwe ese wor lamotan. A kúna pwúngún ei pwóróus. A erá: “Lupwen ua achocho lón ewe angangen afalafal, ua meefi pwapwa me usun ua tongeni nemeni ai kewe memmeef. Ua lúkú pwe ua ina usun pokiten lupwen ua fiti ewe angangen afalafal, ina ewe atun ua meefi pwe ua kon chiechiéch ngeni Jiowa.”

10. Met ka káé seni meefien Brenda?

¹⁰ Ekieki usun pwóróusen emén chienach fefin itan Brenda. Iir me néún we nengngin a úriir eú watteen samau itan multiple sclerosis. Brenda ese tongeni fetál me a chék wakaawa wheelchair, me a aúkúk péchékkúlan. A kan afalafal imw me imw úkúkún an tufich nge lape ngeni a kan chék afalafal ren an mak taropwe. A erá: “Lupwen ua mirititi me weweiti pwe use tongeni chikar seni ai we samau lón ei fansoun, ua ngas me ua tongeni nefótófót wóón ai angangen afalafal. Ren enletin, ai angangen afalafal a álisiei ai usap nefótófót wóón pwisin ai kewe aúrek. Nge a álisiei le nefótófót wóón ai álisi chókkewe ua afalafal ngeniir lón ám we leenien afalafal. Me iteitan, ena angang a ákkáchema ngeniei ewe ápilúkúlúk allim fán iten mwachkkan.”

11-13. (a) Ifa usun ekkewe aposel me ekkewe ekkóch ra pwári pwe iir wesewesen chiechien Jesus? (b) Met Jesus a meefi ren álillisin chiechian kewe?

¹¹ Lón unusen án Jesus angangen afalafal, néún kewe aposel mi tuppwél, iir wesewesen chiechian. Ar fitipachei Jesus a ánnetatá pwúngún ei mwuten kapas mi erá: “Mi wor eman chiechian a kan ngeni, lap seni wesewesen pwiin.” (SalF. 18:24) Jesus a aúcheani ekkena esin chiechi. Atun an angangen afalafal, ese wor ié me lein pwisin pwiin kewe ra lúkú i. (Joh. 7:3-5) Mi wor eú atun aramasan kewe ra pwal mwo nge ekieki pwe a umwes. (Mark. 3:21) Nge lón ewe pwinin me mwen án Jesus epwele máló, a tongeni ereni néún kewe aposel mi tuppwél: “Ämi oua etiei lon ai kewe riaföü meinisin.”​—Luk. 22:28.

¹² Fán ekkóch, ekkewe aposel ra elichippúngú Jesus, nge ese kon nefótófót wóón ar kewe apwangapwang, nge a kúna pwe ra lúkú i. (Mat. 26:40; Mark. 10:13, 14; Joh. 6:66-69) Lón ewe sáingoon pwiin me mwen án Jesus epwele ninniiló, iei met a ereni ekkena mwán mi tuppwél: “Üa aita ngenikemi chiechiei, pun üa asile ngenikemi meinisin mine üa rongorong me ren Semei.” (Joh. 15:15) A ffat pwe chiechien Jesus kewe ra fókkun apéchékkúla. Letipen Jesus a uren pwapwa ren án ekkewe aposel álisi lón ewe angangen afalafal.​—Luk. 10:17, 21.

¹³ A pwal wor chiechien Jesus kewe me lúkún ekkewe aposel. Iir mwán me fefin mi álisi  lón ewe angangen afalafal me pwal lón ekkewe ekkóch mettóch. Ekkóch ra etiwato Jesus lón imwer kewe pwe epwe wor ia epwe tongeni mwéngé ie. (Luk. 10:38-42; Joh. 12:1, 2) Ekkóch ra fiti i lón an sái, me ra fang ngeni minne a nóm rer. (Luk. 8:3) A wor chiechien Jesus mi múrinné pokiten pwal i emén chiechier mi múrinné. A féfféréch ngeniir me ese kútta seniir met rese tufichin féri. Jesus a unuséch, nge a aúcheani álillisin chiechian kewe rese unuséch. Ese mwáál, ra álisi Jesus le akkamwéchú kinamween letipan.

14-15. Ifa usun sipwe tongeni kúnékún chiechiach mi múrinné, me ifa usun ra tongeni álisikich?

¹⁴ Chiechiach mi múrinné repwe álisikich le akkamwéchú ach tuppwél ngeni Jiowa. Ika pwe pwisinkich ewe esin chiechi mi múrinné, iwe ina ewe mettóch epwe fókkun efisi met aramas repwe mochen wiliti chiechiach ren. (Mat. 7:12) Áwewe chék, ewe Paipel a pesekich ach sipwe áeá ach fansoun me péchékkúl fán iten aramas, nge ákkáeúin fán iten chókkewe mi “osupwang.” (Ef. 4:28, Testament Mi Fö) Ka tongeni ekieki emén lón óm we mwichefel mi osupwangen álillis? Ka tongeni ló shopping fán iten emén pwiich mi mwenilong lón imwan? Ka tongeni amwéngééni eú famili mi osupwang? Ika ka sile áeáán ewe jw.org^® website me JW Library^® app, ka tongeni álisi ekkewe ekkóch lón óm we mwichefel ar repwe pwal kúna álillisin ekkewe pwóróus mi aúchea seniir? Lupwen ka achocho le ákkálisi aramas, ese mwáál kopwe pwal pwapwa.​—Föf. 20:35.

¹⁵ Chiechiach kewe repwe álisikich lupwen sia nóm fán sóssót, me ákkálisikich le  akkamwéchú kinamween letipach. Elihu a aúseling ngeni Hiop lupwen a apwóróusa ngeni an kewe weires, iwe chiechiach kewe ra pwal álisikich ren ar akkaúseling ngenikich fán mosonottam lupwen sia ereniir ach lólilen. (Hiop 32:4) Mi lamot sisap ekieki pwe chiechiach kewe repwe féri kefil fán itach, nge eú alen tipachem ach sipwe aúselinga ar kapasen fén mi lóngólóng wóón Paipel. (SalF. 15:22) King Tafit a tipetekison le etiwa álillisin chiechian kewe, iwe sipwe pwal áppirú ach sisap lamalamtekia iwe sise mochen etiwa álillisin chiechiach kewe lupwen ra mochen álisikich lón ach osupwang. (2 Sam. 17:27-29) Enlet ekkena esin chiechi, iir liffangach seni Jiowa.​—Jas. 1:17.

16. Ifa ewe eú chék alen ach sipwe kúna kinamwe me ren Filipi 4:6, 7? Áweweei.

¹⁶ Álleani Filipi 4:6, 7. Pwata Jiowa a erenikich pwe sia tongeni angei ewe esin kinamwe, i a awora me ren “Kraist Jesus”? Pokiten sia chék tongeni kúna kinamween ekiekich me letipach mi nómoffóch ika sia lúkú Jesus me weweiti wisan lón pwénútáán letipen Kot. Áwewe chék, ren án Jesus asorun méén kepich, a musoló meinisin ach kewe tipis. (1 Joh. 2:12) A ifa me ngaselóón letipach ren ach silei ena! Lón wisen Jesus we Kingen án Kot we Mwú, epwe amóeló meinisin minne mi ngaw Satan me an ei ótót ra atoto. (Ais. 65:17; 1 Joh. 3:8; Pwär. 21:3, 4) A ifa me amwararen ena ápilúkúlúk! Inaamwo ika Jesus a ewisa ngenikich eú angang mi weires, nge a chék nóm rech me ákkálisikich lón ekkeei ránin lesópwólóón. (Mat. 28:19, 20) Ach silei ena mettóch a apworaikich! Ren ach sipwe tongeni akkamwéchú ach kinamwe, a fókkun lamot ach sipwe eáni ngaseló, ápilúkúlúk me pwora.

17. (a) Ifa usun emén Chón Kraist epwe tongeni akkamwéchú kinamween letipan? (b) Met kopwe tongeni féri usun met Johannes 16:33 a pwonei?

¹⁷ Iwe, ifa usun kopwe tongeni akkamwéchú kinamween letipom lupwen ka riáfféú ren ssenúkún óm kewe sóssót? Ka tongeni féri ena ren óm áppirú met Jesus a fen féri. Akkomw, iótek me sópwósópwóló chék le ikkiótek. Oruuan, kopwe álleasochisi Jiowa me afalafal fán tinikken inaamwo ika a weires ngonuk. Me aúlúngátin, kútta álillisin chiechiom kewe atun ka nóm fán sóssót. Iwe, án Kot we kinamwe epwe túmúnú ekiekum me letipom. Kopwe usun Jesus le okkufu ese lifilifil sókkun sóssót epwe toruk.​—Álleani Johannes 16:33.