1. Met mi lamot kich meinisin sipwe féri?

KOPWE mochen fiti eú kitir ka silei pwe a áweires ákkáeúin ika ka meefi pwe ka samau are mélúlú? Ese mwáál kosap mochen. Iwe nge, aposel Paulus a apasa pwe meinisin Chón Kraist mi enlet ra fiti eú kitir. (Ipru 12:1) Ese lifilifil ika kich kúkkún are chinnap, péchékkúl are mélúlú, nge a lamot ngenikich meinisin ach sipwe likiitú tori sópwólóón ika sia mochen angei ewe feiéch Jiowa a pwon ngenikich.​—Mat. 24:13.

2. Me ren 2 Timoty 4:7, 8, pwata Paulus a tongeni pesei ekkewe Chón Kraist?

² Paulus a tongeni pesei Chón Kraist pokiten a fen sópwéch lón an “awesöchüela ewe kitir.” (Álleani 2 Timoty 4:7, 8.) Nge menni ewe kitir Paulus a fós usun?

3. Ifa ewe kitir Paulus a fós usun?

³ Fán ekkóch Paulus a asukula aramas lesen mi lamot ren an áeá kapas áwewe wóón ekkewe minen urumwot chón Kriis lóóm ra kan eáni. (1 Kor. 9:25-27; 2 Tim. 2:5) Lón ekkóch atun a eáni kapas áwewe usun án emén ssá lón eú kitir ren an epwe áweweei manawen Chón Kraist. (1 Kor. 9:24; Kal. 5:7, Testament Mi Fö) Emén a fiti ewe “kitir” lupwen a fangóló manawan ngeni Jiowa me papatais. (1 Pet. 3:21) Epwe tikeri ewe tepkiri lupwen Jiowa epwe ngeni winnan, ewe manaw esemuch.​—Mat. 25:31-34, 46; 2 Tim. 4:8.

4. Met sipwe pwóróus wóón lón ei lesen?

⁴ Ifa usun án emén ssá lón eú marasong, a léllé ngeni án emén manaweni manawen emén Chón Kraist? Ra lélléfengen wóón fitu mettóch. Sipwe pwóróus usun úlúngát me leir.  Áeúin, mi lamot ach sipwe ssá wóón ewe al mi pwúng; oruuan, mi lamot ach sipwe nefótófót wóón ewe tepkiri; me aúlúngátin, mi lamot sipwe chék likiitú inaamwo ika a weires.

5. Ifa ewe al mi lamot sipwe aleni, me pwata?

⁵ Ren an epwe fich ngeni ekkewe sensú ar repwe angei ewe win lón wesewesen eú kitir, mi lamot repwe ssá wóón ewe al a fen kkótóló. Pwal ina chék usun, ika sia mochen angei winnach we manaw esemuch, mi lamot sipwe aleni ewe alen pwúng lón ach manaweni manawen Chón Kraist. (Föf. 20:24; 1 Pet. 2:21) Iwe nge, Satan me chókkewe mi tapweló mwirin, ra mochen ach sipwe filingaw, me ra mochen ach sipwe “etiir.” (1 Pet. 4:4) Ra esiita ewe sókkun manaw sia manaweni, me ra erá pwe ewe manaw ra manaweni a fen múrinné pún ina ewe alen ngaseló. Nge ese pwúng minne ra erá.​—2 Pet. 2:19.

6. Met sia káé seni pwóróusen Brian?

⁶ Chókkewe mi manaweni ewe esin manaw aramas mi nóm fán nemenien án Satan ei ótót ra eáni, repwe kúna pwe ewe al ra filatá le aleni ese angasereló, nge ra fen slave ngeni Satan me pwisin mocheniir. (Rom 6:16) Sipwe ppii pwóróusen Brian. Inan kewe me seman ra pesei an epwe manaweni manawen Chón Kraist. Nge lupwen a teenage, a tipemwaramwar ika ina ewe al epwe atoto ngeni pwapwa. Brian a filatá an epwe fiti alen chókkewe mi eáni ewe sókkun manaw mi nóm fán emmwenien Satan. A erá: “Use fen tepereni pwe ewe ngaseló ua tipeni ina tipitipin chék, me a emmwen ngeni ai upwe umwesimwesiiti ekkewe mettóch mi efeiengaw. Ló, ló, ló, ua áeámwáálli drugs me sakaw, me ua eáni manaw mi limengaw. Mwirin fitu ier, ekis me ekis ua sótuni sókkun drugs mi kon péchékkúl, me ekkena drugs ra nemenieiló. . . . Ua poputá le amémé drugs pwe upwe atufichi manawei.” Ló, ló, ló, Brian a filatá le eáni ewe manaw mi tipeeú ngeni án Jiowa kewe allúk. A siwili manawan me papatais lón ewe 2001. A wesewesen pwapwa iei lón an manaweni manawen Chón Kraist. *

7. Me ren Mateus 7:13, 14, ikkefa ekkewe ruuofóch al mi nóm mwach?

⁷ A fókkun lamot ach sipwe filatá le aleni ewe al mi pwúng! Satan a mochen ach sipwe fangetá lón ach ssá wóón ewe al mi chékúkkún mi “ale ngeni manau esemuch,” me rikiiti ewe al mi chémmóng, ewe lape ngeni aramas ra fetál wóón. Ra sani ena al  pún a mecheres ar repwe fetál wóón. Nge a “ale ngeni feiengau esemüch.” (Álleani Mateus 7:13, 14.) Mi lamot sipwe lúkúlúk wóón Jiowa me aúseling ngeni ren ach sipwe likiitú le aleni ewe al mi pwúng me sisap riki seni.

8. Met emén chón ssá epwe féri ika a chepeti och mettóch me turuló?

⁸ Ekkewe chón ssá lón eú marasong ra nengeniéchú ewe al repwe ssá wóón pwe rete chepeti och mettóch. Iwe nge, neman repwe chúen tongeni rukoló le chepeti pechen chiener we le ssá are ipwelong lón eú pwaang. Ika ra turuló, repwe pwáátásefál me sópweló le ssá. Rese kon pwal ekieki met ewe ra chepeti, nge ra chék kon ekieki ar repwe tikeri ewe tepkiri me áneánei ar repwe win.

9. Met sipwe féri ika sia chepetek me turutiw?

⁹ Lón ach kitirin manaw, neman sipwe turuló fán chómmóng ren ach mwáálliló ren minne sia apasa are féri. Are neman chienach kewe lón ewe kitir repwe mwáálliló me ekinása letipach. Itá sisap máirú ika a fis ena. Kich meinisin sise unuséch, me kich meinisin sia sássá wóón ewe al mi chékúkkún mi ale ngeni manaw. Ina minne, epwe chék fis pwe fán ekkóch sipwe purefengen are songfengen. Paulus a erá pwe fán ekkóch epwe wor popun ach sipwe “chou ngeni eman.” (Kol. 3:13) Nge sipwe fen nefótófót wóón winnach we mi nóm mwach, lap seni ach nefótófót wóón met a áchepetekikich. Ika sia chepetek, sipwe filatá le pwáátásefál me sópweló le ssá. Ika sia akkamwéchú ach song me sise mochen pwáátásefál, iwe sisap tongeni tikeri ewe tepkiri me angei winnach we. Pwal och, sipwe tongeni eppeti ekkewe ekkóch lón ar akkachocho le ssá wóón ewe al mi chékúkkún.

10. Ifa usun sipwe túmúnú pwe sisap eú minen “chepetek” ngeni chienach kewe?

¹⁰ Pwal eú alen ach sipwe túmúnú pwe sisap eú minen “chepetek” ngeni chienach kewe lón ewe kitirin manaw, ina ren ach tipemecheres ngeni mocheniir lap seni ach chék péchéú wóón mochenich. (Rom 14:13, 19-21; 1 Kor. 8:9, 13) Lón ena napanap, sise usun ekkewe sensú lón eú wesewesen kitir. Ra  okkuffengen, me emén me emén a achocho pwe epwe win. Ekkena chón ssá ra kon ekieki ar repwe win. Iwe ra tongeni tiini chiener kewe pwe ra mochen repwe akkomw. Nge, lón ach kitirin manaw, sise kan okkuffengen. (Kal. 5:26; 6:4) Sia achocho le álisi chómmóng ar repwe fitikich le tikeri ewe tepkiri le angei ewe feiéchún manaw. Ina popun, sia achocho le apwénúetá án Paulus kapasen fén seni Kot ren ach sisap ‘chök ekieki en me an feiöch, nge sipwe pwal ekieki feiöchün chienach.’​—Fil. 2:4.

11. Met emén sensú a nefótófót wóón, me pwata?

¹¹ Ekkewe sensú lón eú kitir rese chék nefótófót wóón ewe al repwe ssá wóón, nge ra pwal nefótófót wóón ewe tepkiri. Inaamwo ika rese wesewesen kúna ewe tepkiri, nge ra tongeni anchangei pwe ra tikeri me angei winner. Ra chék akkachocho ren ar ekieki usun winner we.

12. Met Jiowa a pwonei ngenikich fán tong?

¹² Lón ach we kitirin manaw, fán tong Jiowa a pwonei an epwe fókkun efeiéchúkich ren ewe manaw esemuch lón láng are lón paratis wóón fénúfan ika sia áwesaaló ewe kitir. Ewe Paipel a áweweei usun ena feiéch pwe sipwe tongeni anchangei epwe ifa úkúkún amwararen manawach lón ena atun. Ach ekkekieki usun án Jiowa pwon ngenikich fán iten mwachkkan, epwe apéchékkúlaló ach tipeppós le likiitú.

13. Ifa ewe álillis mi nóm rech nge ese nóm ren ekkewe sensú?

¹³ Mi lamot ngeni ekkewe sensú lón án chón Kriis kewe urumwot ar repwe likiitú fán sókkopaten weires, áwewe chék ren ar pekkus are metekitek. Nge ra chék lúkúlúk wóón pwisin ar péchékkúl, me minne ra káé atun ra rensú. Sia usun ekkena sensú pún sia pwal angei káit ren ifa usun sipwe ssá lón ewe kitirin manaw. Nge a wor álillisich lap seni ekkena sensú. Sia tongeni angei ewe péchékkúl ese wor aúkúkún. Ika sia lúkúlúk wóón Jiowa, a pwonei an esap chék áitikich nge epwe pwal apéchékkúlakich!​—1 Pet. 5:10.

14. Ifa usun 2 Korint 12:9, 10 a álisikich le likiitú fán ach kewe weires?

¹⁴ Paulus a pwal likiitú fán chómmóng weires. Aramas ra esiita me eriáfféwúmwááli, me fán ekkóch a pwal meefi apwangapwang me a likiitú fán ‘eu samau a fokun metek ren.’ (2 Kor. 12:7) Me ren pwe an kana weires a fen suuki ngeni alen an epwe lúkúlúk wóón Jiowa, nge esap fen ikkena popun an epwe fangetá. (Álleani 2 Korint 12:9, 10.) Pokiten Paulus a eáni ena ekiek, iwe Jiowa a álisi lón an kewe weires meinisin.

15. Met sipwe kúna ika sia áppirú Paulus?

¹⁵ Sia pwal tongeni kúna esiit me riáfféúmwáál pokiten ach lúkú. Sia pwal tongeni weires ren apwangapwangen inisich are pekkusuló. Nge ika sia áppirú Paulus, meinisin ekkena weires ra tongeni suuki ngenikich alen ach sipwe kúna án Jiowa tong me álillis.

16. Met ka tongeni féri inaamwo ika ka semmwen?

¹⁶ Ka itiló wóón óm kiekien samau are wawa wheelchair? A apwangapwang pwásukum are ka nennengaw? Ika ewer, iwe oua tongeni angangfengen me ekkewe sáráfé me ekkewe mi péchékkúl? Ka fókkun tongeni! Chómmóng ekkewe chinnap me ekkewe mi samau ra sássá wóón ewe alen manaw. Rese tongeni féri ei angang ren pwisin ar péchékkúl. Nge ra angei án Jiowa péchékkúl seni ar akkaúseling án Chón Kraist kewe mwich wóón phone are katol wóón Internet. Ra pwal fiti ewe angangen afalafal ren ar afalafal  ngeni ekkewe tokter, kangof me aramaser kewe.

17. Met meefien Jiowa usun chókkewe mi apwangapwang?

¹⁷ Ika kese tongeni féri meinisin met ka mochen féri fán iten Jiowa, kosap lichippúng me ekieki pwe kese tongeni likiitú tori ewe sópwólóón. Jiowa a tongeok ren óm lúkú i, me meinisin met ka fen féri fán itan lón ánein ekkewe ier. Fen iei ewe atun a kon lamot ngonuk an álillis, me esap likitukoló. (Kölf. 9:10) Nge epwe fen lapóló an akkarap ngonuk. Iei alon emén Chón Kraist fefin mi likiitú fán ekkóch an semmwen: “Pokiten a chék lallapóló ai semmwen, ua kúna pwe a kisikisiló ai fansoun le afalafala aramas ewe enlet. Nge ua silei pwe Jiowa a pwapwa ren pwal mwo nge ai kisikisin achocho, me a pwal apwapwaaei.” Lupwen ka letipechou, kopwe chechchemeni pwe kese áláemén. Ekieki án Paulus leenien áppirú, me chemeni an ei kapasen apéchékkúl: “Üa pwapwa lon ai apwangapwang, . . . pun lupwen üa apwangapwang, ngang üa pöchökül.”​—2 Kor. 12:10.

18. Ifa ewe esin weires mi kkóló áweiresin ekkóch ra kúna?

¹⁸ Ekkóch mi sássá wóón ewe alen manaw ra kúna pwal eú sókkun weires. Ra likiitú fán pwisin ar kewe weires ekkewe ekkóch rese tongeni kúna are weweiti. Áwewe chék, ra likiitú fán semwenin letipechou are ssenúkún aúrek. Pwata a kkóló áweiresin minne néún Jiowa kana chón angang mi áchengicheng ra kúna? Pokiten ika a kup péún emén are nóm wóón wheelchair, meinisin ra tongeni kúna me ra tongei me mochen álisi. Iwe nge, chókkewe mi semwenin letipechou are úriir osukosuken ekiek, usun itá me lúkún iir mi péchékkúl. Nge ra wesewesen riáfféú usun chék riáfféún emén mi kup chúún. Iwe pokiten aramas rese tongeni kúna ar riáfféú, neman rese áfánniir me tongeer.

19. Met sia káé seni pwóróusen Mefiposet?

¹⁹ Ika a wor met mi áweiresuk le unusen angang ngeni Jiowa, me ka meefi pwe aramas rese weweiti nónnómum, ka tongeni péchékkúletá ren pwóróusen Mefiposet. (2 Sam. 4:4) A likiitú fán terin inisin, me King Tafit a apwúngúmwáálli. Minne a fis ngeni Mefiposet, esap tipisin. Ese eáni ekiek mi mwáál, nge a chék kilisou ren ekkewe mettóch mi múrinné a fis. A kilisou ren kirekiréchún Tafit ngeni me lóóm. (2 Sam. 9:6-10) Ina minne, Mefiposet a ekieki unusen minne a fis lupwen Tafit a apwúngúmwáálli. Ese song ren án Tafit féfférmwáál ngeni. Ese tipi ngeni Jiowa met Tafit a féri. Mefiposet a nefótófót wóón met a tongeni féri le álisatá ewe  king mi kefilitá me ren Jiowa. (2 Sam. 16:1-4; 19:24-30) Jiowa a apachaalong lón an we Kapas án Mefiposet leenien áppirú mi múrinné pwe sipwe káé seni.​—Rom 15:4.

20. Ifa usun aúrek a áweiresi ekkóch, me met ra tongeni lúkúlúkú?

²⁰ Pokiten a úri ekkóch pwiich kewe semwenin ssenúkún aúrek, ra fókkun niwokkus me nisássáw lein aramas. Inaamwo ika a weires ngeniir ar repwe nóm lein chómmóng aramas, nge ra chúen fiti án ewe mwichefel kewe mwich me ekkewe mwichelap. A weires ngeniir ar repwe fós ngeni aramas rese sissileer, nge ra chúen fós ngeni aramas atun ra fiti afalafal. Ika pwal ina usum, kopwe lúkúlúk pwe kese áláeménúló. Chómmóng ra pwal kúna ena esin weires. Chechchemeni pwe Jiowa a pwapwa ren óm achocho seni unusen letipom. Óm kese fangetá, a ánnetatá pwe Jiowa a ekkefeiéchuk me fang ewe péchékkúl mi lamot ngonuk. * (Fil. 4:6, 7; 1 Pet. 5:7) Ika ka sópweló le angang ngeni Jiowa fán weiresin apwangapwangen inisum are ekiekum, ka tongeni lúkúlúk pwe a pwapwa reom.

21. Met kich meinisin sia tongeni féri ren án Jiowa álillis?

²¹ Sia kilisou pwe a wor sókkofesenin ewe kitir Paulus a fós usun seni eú wesewesen kitir. Lón eú kitir lón fansoun lóóm, emén chék a tongeni win. Nge meinisin mi likiitú fán tuppwél lón án Chón Kraist we kitirin manaw, repwe angei winner, ewe manaw esemuch. (Joh. 3:16) Pwal och, mi lamot epwe péchékkúl inisin meinisin sensú lón eú kitir, pún ika rese, resap tongeni win. Iwe nge lón ewe kitirin manaw, chómmóng kich ese péchékkúl inisich, nge sia chék likiitú. (2 Kor. 4:16) Ren án Jiowa álillis, sipwe áweséchúoló ewe kitir!