1. Met Jiowa a kúna seni néún kewe aramas?

JIOWA KOT a “pwapwaäsini nöün aramas.” (Kölf. 149:4) A ifa me apwapwaan ena! Jiowa a kúna napanapach kewe mi múrinné. A kúna pwe sia tongeni wiliti emén aramas mi múrinné. Me a álisikich ach sipwe wiliti chiechian. Ika sia akkamwéchú ach tuppwél ngeni, epwe pwal tuppwél ngenikich tori feilfeiló!​—Joh. 6:44.

2. Pwata a weires ngeni ekkewe ekkóch ar repwe lúkú pwe Jiowa a tongeer?

² Eli ekkóch repwe erá, ‘Ua silei pwe Jiowa a tongei chón an we mwicheich unus, nge ifa usun upwe silei ika Jiowa a tongeei wóón winikapei?’ Met a tongeni efisi án emén eáni ena kapas eis? Oksana, * emén mi kúna watteen riáfféú seni me lekúkkúnún, a erá: “Ua fókkun pwapwa lupwen ua papatais me poputá le pioneer. Nge mwirin 15 ier, ua poputá le chemeni ekkewe mettóch mi ngaw ra fis ngeniei me lekúkkúni. Ua poputá le ekieki pwe Jiowa ese tongeei me ese fich ngeniei an tong.” Pwal Yua emén pioneer fefin mi kúna watteen weires seni me lekúkkúnún, a erá: “Ua fangóló manawei ngeni Jiowa pokiten ua mochen apwapwaai. Nge ua fókkun lúkú pwe esap fókkun tongeni tongeei.”

3. Met sipwe káé lón ei lesen?

³ Ka usun ekkena rúúemén Chón Kraist fefin mi tuppwél mi enletin tongei Jiowa nge eli ka tipemwaramwar ika a tongeok. Pwata a lamot kopwe lúkú pwe a enletin tongeok?  Me met a tongeni álisuk le likiitú fán fétekin ekiek ese pwúng? Sipwe ppii pélúwen ekkena kapas eis.

4. Pwata a efeiengaw ika sia tipemwaramwar pwe Jiowa a tongekich?

⁴ Atun sia fókkun lúkú pwe Jiowa a tongekich, sipwe mochen angang ngeni úkúkún ach tufich pwal mwo nge fán weires. Nge ika sia tipemwaramwar ika Kot a tongekich, ach “pöchökül a kisikis.” (SalF. 24:10) Me ika sia letipengaw me poputá le ekieki pwe Jiowa ese tongekich, iwe epwe weires ngenikich ach sipwe ú ngeni etipetipaen Satan.​—Ef. 6:16.

5. Met a fis ngeni ekkóch pwiich kewe iir mi ekieki pwe Kot ese tongeer?

⁵ A apwangapwangoló án ekkóch Chón Kraist mi tuppwél lúkú lón ach ei fansoun pokiten tipemwaramwar. Iei alon emén mwán mi ásimaw itan James: “Inaamwo ika ua angang lón Bethel me ua pwapwa le álillis lón eú mwichefel mi eáni eú sókkun fós, nge ua ekieki ika Jiowa a wesewesen etiwa ai angang ngeni. Lón eú atun, ua pwal mwo nge ekieki ika Jiowa a aúseling ngeni ai kewe iótek.” Iei alon Eva pwal emén mi angang ngeni Jiowa full-time: “Ua kúna pwe a mmen efeiengaw ika sia tipemwaramwar ika Jiowa a tongekich, pokiten a kkúú meinisin minne sia féri fán itan. Iwe sia úkútiw le mochen angang ngeni me sise chúen pwapwa lón ach angang ngeni.” Iei alon Michael emén regular pioneer me mwán mi ásimaw: “Ika kese lúkú pwe Kot a tongeok, iwe kopwe towau seni.”

6. Met a lamot ach sipwe féri lupwen sia poputá le tipemwaramwar usun án Kot tong?

⁶ Ekkena pwóróus ra áiti ngenikich ifa usun ekiek ese pwúng a tongeni atai ach lúkú. Nge met a lamot ach sipwe féri lupwen sia poputá le tipemwaramwar usun án Kot tongekich? Mi lamot sipwe mwittir urusawu me lón ekiekich. Sipwe tingorei Jiowa an epwe álisikich le siwili ach kewe aúrek ngeni ‘än Kot kinamwe mi tekia seni ach tongeni weweiti epwe tümwünü lelukach me ekiekich.’ (Kölf. 139:23; Fil. 4:6, 7) Me chemeni pwe esap chék kich. A pwal wor pwiich kewe mi tuppwél, iir mi pwal likiitú fán memmeef ese pwúng. Pwal mwo nge néún Jiowa kewe  chón angang lón fansoun lóóm ra pwal kúna ena esin weires. Sipwe ppii met sia tongeni káé seni pwóróusen aposel Paulus.

7. Ikkefa ekkewe weires Paulus a kúna?

⁷ Fán ekkóch ka meefi pwe ka kokotiw ren chómmóngun óm angang me kese tongeni ataweer meinisin? Ika ewer, iwe kopwe weweiti meefien Paulus. A aúrek, esap chék fán iten eú mwichefel nge, “fän iten ekewe mwichefel meinisin.” (2 Kor. 11:23-28) Ka riáfféú ren eú semmwen mi angealó pwapwaóm? Paulus a riáfféú ren ‘efoch fölun ira lon fitukan.’ Eli ina eú semmwen me a fókkun mochen chikar seni. (2 Kor. 12:7-10, Testament Mi Fö) Ka letipengaw ren pwisin óm kewe apwangapwangen futuk? A pwal ina usun Paulus fán ekkóch. A kér ngeni pwisin i “eman aramas mi attong o weiresikis” pokiten a fiffiu ngeni pwisin an kewe apwangapwang.​—Rom 7:21-24.

8. Met a álisi Paulus le likiitú fán an kewe weires?

⁸ Inaamwo ika Paulus a kúna ekkena sókkopaten sóssót, nge a chék akkangang ngeni Jiowa. Met a álisi le féri ena? Inaamwo ika a silefichi an kewe apwangapwang, nge a fókkun lúkú ewe méén kepich. A silei án Jesus ei pwon pwe “meinisin mi lükü [Jesus] . . . repwe eäni manau esemüch.” (Joh. 3:16; Rom 6:23) Paulus pwal i emén me lein chókkewe mi lúkú ewe méén kepich. A fókkun lúkú pwe Jiowa a tipemecheres le omusaaló tipis, pwal mwo nge tipisin chókkewe mi tipis watte ika ra aier.​—Kölf. 86:5.

9. Met sia káé seni alon Paulus kewe lón Kalatia 2:20?

⁹ Paulus a pwal lúkú manamanen án Kot tong mi pwá lón Kraist. (Álleani Kalatia 2:20.) Nengeni alon Paulus keei mi alúkúlúk lesópwólóón ena wokisin: “Ewe Nöün Kot mi echeniei o fangala manauan fän itei.” Paulus ese meefi pwe a kon ngaw iwe Kot esap tongeni tongei. Ese ekieki, ‘Ua weweiti pwata Jiowa epwe tongei chiechiei kewe chón lúkú, nge esap fókkun tongeni tongeei.’ Paulus a áchchema ngeni ekkewe chón Rom: “Lupwen sia chüen nonom lon tipis, Kraist a mäla fänäsengesich.” (Rom 5:8) Án Kot tong ese wor lekéúkún!

10. Met sia káé seni Rom 8:38, 39?

¹⁰ Álleani Rom 8:38, 39. Paulus a unusen lúkú manamanen án Kot tong. A makkeei pwe ese wor met “epwe tongeni aimwüfesenikich  seni än Kot we chen.” Paulus a silei úkúkún án Jiowa mosonottam ngeni ewe mwúún Israel. A pwal silei úkúkún án Jiowa úméúméch ngeni pwisin i. Iwe, usun itá Paulus a apasa, ‘Pokiten Jiowa a tiinaato pwisin Néún we an epwe máló fán itei, iwe itá usap tipemwaramwar pwe a tongeei.’​—Rom 8:32.

11. Ikaamwo Paulus a féri ekkewe tipis mi mak lón 1 Timoty 1:12-15, nge pwata a fókkun lúkú pwe Kot a tongei?

¹¹ Álleani 1 Timoty 1:12-15. Ese mwáál Paulus a mengiringir ren minne a féri me lóóm. A kér ngeni pwisin i emén chón tipis ‘mi ngau seni meinisin,’ pokiten me mwen án Paulus silei ewe enlet, a fókkun eriáfféwúmwááli ekkewe Chón Kraist ekis meinisin, oturalong ekkóch lón imwen fétek, me tipeeú ngeni ninniilóón ekkóch. (Föf. 26:10, 11) Ka tongeni anchangei meefien Paulus ika a chuuri emén Chón Kraist sáráfé, seman kewe me inan ra ninniiló pokiten tipisin Paulus? Paulus a niamam ren minne a féri, nge a silei pwe ese tongeni ekkesiwili minne a fis me lóóm. A lúkú pwe Kraist a máló fán itan me a makkeei fán lúkúlúk: “Ren än Kot ümöümöch üa wilila.” (1 Kor. 15:3, 10) Ifa ewe lesen fán itach? Kopwe lúkú pwe Kraist a máló fán itom me a suuki ngonuk alen óm kopwe ririéch ngeni Jiowa. (Föf. 3:19) Minne sia féri iei me lón mwachkkan, ina met a aúchea me ren Kot, nge esap mwáállich kewe me lóóm, ese lifilifil ika kich emén Chón Pwáraatá Jiowa lón na atun are sisaamwo.​—Ais. 1:18.

12. Ifa usun minne a mak lón 1 Johannes 3:19, 20, a tongeni álisikich ika sia meefi pwe ese wor aúcheach are tongach?

¹² Atun ka ekieki usun án Jesus máló pwe epwe omusaaló óm kewe tipis neman kopwe apasa, ‘Ese fich ngeniei ena liffang.’  Pwata ka meefi ina usun? Letipach a tongeni otupukich me ámmeef ngenikich pwe ese wor aúcheach are tongach. (Álleani 1 Johannes 3:19, 20.) Lón ekkena atun a lamot ach sipwe chemeni pwe “Kot a tekia seni mwelien letipach.” Án Semach we lón láng tong me omusakicheló a tekia seni sókkun memmeef ese pwúng lón letipach. A lamot ach sipwe lúkú pwe Jiowa a tongekich. Ren ach sipwe féri ena, a lamot ach sipwe kákkáé an we Kapas, ikkiótek ngeni, me chichchiechi ngeni néún kewe aramas mi tuppwél. Pwata a fókkun lamot ach sipwe féri ekkena mettóch?

13. Ifa usun ach kákkáé án Kot we Kapas a tongeni álisikich? (Pwal ppii ewe pwóór “ Usun án ewe Paipel Álisiir.”)

¹³ Káé án Kot we Kapas iteiten rán, iwe epwe fate ngonuk napanapen Jiowa kewe mi múrinné. Kopwe meefi an chúnguk. Óm ekkekilonei eú pwóróus lón án Kot we Kapas iteiten rán, a tongeni affataéchú óm ekiek me ‘amiriti’ óm ekiek me letipom. (2 Tim. 3:16) Iei alon Kevin, emén mwán mi ásimaw mi weires ren an meefi pwe ese wor aúchean: “Ai ákkálleani me ekkekilonei masouen Kölfel 103, a álisiei le miritiló me ua weweéchúti meefien Jiowa usui.” Eva, ewe mi mak pwóróusan akkomw, a erá: “Me mwen ai upwe annut iteiten rán, ua ekkekilonei meefien Jiowa. A ekinamwei letipei me apéchékkúla ai lúkú.”

14. Ifa usun iótek a tongeni álisikich?

¹⁴ Ikkiótek. (1 Tes. 5:17) Ika ka mochen chiechi ngeni emén a lamot kopwe fóffós ngeni me pwár ngeni meefiom. Pwal ina usun ren ach chiechi ngeni Jiowa, lupwen sia pwáraawu ach memmeef, ach ekiek, me ach kewe aúrek ngeni lón iótek sia pwári ach lúkúlúk lón I me silei pwe a tongekich. (Kölf. 94:17-19; 1 Joh. 5:14, 15) Yua, ewe mi mak pwóróusan akkomw, a erá: “Lupwen ua iótek ngeni Jiowa, use chék ereni met a fis ngeniei lón na rán, nge ua pwár ngeni enletin meefiei. Ló, ló, ló, ua poputá le kúna pwe Jiowa, esap usun emén boss lón eú kompeni, nge i emén Sam mi enletin tongei néún kewe.”​—Ppii ewe pwóór “ Ka Fen Álleani?”

15. Ifa usun Jiowa a chúngúkich?

¹⁵ Chiechi ngeni chiechiach kewe mi tuppwél, iir liffangach me ren Jiowa. (Jas. 1:17) Semach we lón láng a chúngúkich ren an awora ngenikich ach famili lón pekin ngún iir mi “tongeekich fansoun meinisin.” (SalF. 17:17) Lón néún Paulus we taropwe ngeni chón Kolose, a féúni ekkóch Chón Kraist mi álisi me a erá pwe “a fokun watte ar alilis.” (Kol. 4:10, 11) A pwal mwo nge lamot ngeni  Kraist Jesus álillis, me a aúcheani ewe álillis a angei seni chiechian kewe chónláng me aramas.​—Luk. 22:28, 43.

16. Ifa usun chiechiach kewe mi tuppwél ra tongeni álisikich le ririéch ngeni Jiowa?

¹⁶ Ka unusen kúna álillis seni chiechiom kewe mi tuppwél iir liffang me ren Jiowa? Ach ereni emén chiechiach mi ásimaw ach kewe lólilen esap ina esissillen ach apwangapwang, nge fen ina eú minen túmún. Nengeni met James a apasa, ewe mi mak pwóróusan akkomw: “Ai chiechiéch ngeni ekkewe Chón Kraist mi ásimaw a fókkun álilliséch ngeniei. Lupwen ua choutiw ren ekiek ese pwúng, chiechiei kana mi aúchea ra aúseling ngeniei fán mosonottam me áchema ngeniei pwe ra tongeei. Pokiten iir, ua mirititi pwe Jiowa a tongeei me chúngúei.” A ifa me aúchean ach ámááraatá me chichchiechi ngeni pwiich kewe Chón Kraist!

17-18. Ié a lamot sipwe aúseling ngeni, me pwata?

¹⁷ Satan a mochen ach sipwe fangetá lón ach fiu le féri minne mi pwúng. A mochen ach sipwe lúkú pwe Jiowa ese tongekich me ese fich ngenikich an epwe amanawakich. Nge sia fen káé pwe ese pwúng ena.

¹⁸ Jiowa a tongeok me ka fókkun aúchea me ren. Ika ka álleasochisi Jiowa, kopwe “nonom lon an chen” tori feilfeiló usun chék Jesus. (Joh. 15:10) Kosap aúseling ngeni Satan are lúkú letipom mi apwúnguk. Nge kopwe fen aúseling ngeni Jiowa, ewe mi kúna ekkewe napanap mi múrinné ren emén me emén kich. Kopwe lúkú pwe Jiowa a “pwapwaäsini nöün aramas,” kapachelong en!