Pwata Jesus a aloni alon Tafit kewe lón Kölfel 22:1, mwen chék an we epwele máló?

Me mwen chék án Jesus epwele máló a apasa minne a mak lón Mateus 27:46: “Ai Kot, ai Kot, pwota ka likitieila?” An apasa ena, a apwénúetá alon Tafit ewe soumakken kélfel, mi mak lón Kölfel 22:1. (Mark. 15:34) A mwáál ach apwúngaló pwe Jesus a aloni ekkena pokiten a lichippúng are pokiten a ekis apwangapwang an lúkú. Jesus a unusen weweiti ewe popun a lamot epwe máló me a tipemecheres le féri ena. (Mat. 16:21; 20:28) A pwal silei pwe atun epwe máló, Jiowa esap “tiela inisin” seni feiengaw. (Hiop 1:10) Ina minne, Jiowa a mut ngeni Jesus an epwe ánneta pwe a tongeni akkamwéchú an tuppwél ese lifilifil áweiresin an máló.​—Mark. 14:35, 36.

Iwe pwata Jesus a aloni alon ena wokisin? Inaamwo ika sise kon lien silei, nge sipwe pwóróus wóón eli ekkóch popun. *

Án Jesus apasa ena, itá a erá pwe Jiowa esap angolong lón an máló? A lamot án Jesus epwe pwisin fangóló manawan pwe epwe méén kepich, nge Jiowa esap pwal álisi. I emén aramas me a lamot epwe máló pwe epwe “nenni mäló fänäsengisin iteiten emön me emön aramas.”​—Ipru 2:9, Agapé.

Ren án Jesus aloni ekkóch masouen ena Kölfel 22, itá a mochen án aramas repwe ekieki  unusen Kölfel 22? Ekkewe chón Jus lón ena atun, ra kan akkamwéchú masouen chómmóng kél mi pin. Atun ra rong eú wokisinen eú kél mi pin, iwe epwe cheme ngeniir unusen ewe kél mi pin. Ika ina met Jesus a ekiekin féri, iwe epwe fen álisi ekkewe chón Jus mi tapweló mwirin ar repwe chemeni ekkewe chómmóng oesini lón Kölfel 22, usun minne epwe fis atun an máló. (Kölf. 22:7, 8, 15, 16, 18, 24) Pwal och, ekkewe sáingoon wokisin lón Kölfel 22 ra mwareiti Jiowa, me áweweei pwe i kingen unusen fénúfan.​—Kölf. 22:27-31.

Án Jesus aloni alon Tafit kana itá a wewe ngeni pwe a erá pwe ese atai allúk? Me mwen án Jesus ninniiló, án chón Jus kapwúng tekia a apwúngúmwáálli pwe i emén chón turunufas. (Mat. 26:65, 66) Ra mwittir apwúngú Jesus lukenipwin, me ena sókkun kapwúng ese unusen fiti kkótun pwúngún allúk. (Mat. 26:59; Mark. 14:56-59) Atun Jesus a apasa: “Ai Kot, ai Kot, pwota ka likitieila?” eli a mochen ámmeef ngeni aramas pwe ese wor met mi ngaw a féri pwe epwe fich ngeni an epwe ninniiló.

Itá Jesus a pwal áchema ngeni aramas pwe inaamwo ika Jiowa a mut ngeni Tafit, ewe soumakken ena kélfel, an epwe riáfféú nge esap weween pwe Jiowa ese chúen tongei? Alon Tafit na, esap itá weween nge a nafangaw an lúkú. Mwirin an apasa ena, a erá pwe a lúkúlúk pwe Jiowa a tongeni seláni néún kewe aramas me sópweló le efeiéchú. (Kölf. 22:23, 24, 27) Pwal ina chék usun, inaamwo ika Jesus “Nöün Tafit” we, a riáfféú wóón ewe iráán ninni, nge esap weween pwe Jiowa ese chúen tongei.​—Mat. 21:9.

Itá Jesus a pwáraawu watteen an letipeta ren án Jiowa ese túmúnú lón ena atun pwe epwe unusen ánneta an tuppwél? Jiowa ese akkóta seni me lepoputáán án Néún we epwe riáfféú me máló. A kerán chék fis ena mwirin án Atam me Efa álleasolap. Jesus ese féri minne mi mwáál, nge a lamot an epwe riáfféú me máló pwe epwe pélúweni án Satan kewe tipimwáál a eppiietá me awora ewe méén kepich pwe epwe méénisefáli met a péút seni aramas. (Mark. 8:31; 1 Pet. 2:21-24) Epwe chék pwénútá ena, ika Jiowa a mwo mut ngeni Jesus an epwe kúna riáfféú me máló, nge epwe kerán ina lón manawan an esap túmúnú.

Itá Jesus a sótun álisi ekkewe chón tapweló mwirin ar repwe nefótófót wóón ewe popun Jiowa a mut ngeni an epwe máló wóón ewe iráán ninni? * Jesus a silei pwe chómmóng repwe chepetek ren napanapen an ninniiló usun emén chón atai allúk wóón ewe iráán ninni. (1 Kor. 1:23) Ika néún kewe chón káé repwe nefótófót wóón enletin popun an ninniiló, iwe repwe weweiti aúchean an máló. (Kal. 3:13, 14) Repwe ekieki pwe i emén Chón Amanaw nge esap emén chón atai allúk.

Ese lifilifil popun án Jesus aloni ekkena, nge a mirititi pwe ren an máló wóón ewe iráán ninni, a féri letipen Jiowa. Mwirin chék án Jesus aloni masouen ena kél, a apasa: “A wesila!” (Joh. 19:30; Luk. 22:37) Ewer, án Jiowa ese túmúnú Jesus ren ekis fansoun, a mut ngeni an epwe unusen apwénúetá meinisin ekkewe popun a titiito ngeni fénúfan pwe epwe féri. Ena mettóch a pwal atufichi Jesus an epwe apwénúetá meinisin minne a mak usun “lon än Moses we Allük, pwal lon ekewe puken soufos me Kölfel.”​—Luk. 24:44.