1-2. Met weween ewe méén kepich, me pwata a lamot ngenikich?

ATUN ewe mwán mi unuséch Atam a tipis, a péút seni ewe tufichin manaw esemuch esap chék pwisin fán itan, nge pwal fán iten mwirimwirin kewe. Ese wor an kúnetipingen ren met a féri. A pwisin filatá an epwe tipis. Nge ifa usun ren mwirimwirin kewe? Mwirimwirin kewe rese féri met mi mwáál me rese pese ngeni Atam ena tipis. (Rom 5:12, 14) Mi fich ngeni Atam an epwe máló ren met a féri. Nge itá Jiowa a tongeni féri met pwe mwirimwirin Atam kewe repwe manaw tori feilfeiló? Ewer! Ekiseló mwirin án Atam tipis, Jiowa a poputá le pwári ifa usun epwe seláni mwirimwirin kewe fite million seni anúmamaúen tipis me máló. (Ken. 3:15) Lón ewe fansoun Jiowa a filatá, epwe tiinaato Néún we seni láng pwe epwe “fangala manauan fänäsengesiir pwe möön manauer.”​—Mark. 10:45; Joh. 6:51.

² Met weween ewe méén kepich? Lupwen néún Chón Kraist we Tesin Krik a fós usun ewe méén kepich, a wewe ngeni minne Jesus a mééni pwe liwinin minne a péút seni Atam. (1 Kor. 15:22) Pwata a lamot ngenikich ena méén kepich? Pokiten lón án Jiowa allúk usun pwúng lón ewe Allúkún Moses, a allúkú manaw ngeni manaw. (Eks. 21:23, 24) A péút seni Atam manawan mi unuséch. Ren an epwe pwénútá án Kot pwúng, Jesus a asor manawan mi unuséch. (Rom 5:17) Ina minne a wiliti “Samach mi nom tori feilfeilachök” ngeni meinisin chókkewe mi lúkú ewe méén kepich.​—Ais. 9:6; Rom 3:23, 24.

3. Me ren Johannes 14:31 me 15:13, pwata Jesus a tipemecheres le fangóló manawan mi unuséch?

³ Jesus a tipemecheres le fangóló manawan pokiten a fókkun tongei Seman we lón láng me tongekich. (Álleani Johannes 14:31; 15:13.) Pokiten ena tong, a úppós le  akkamwéchú an tuppwél lón unusen manawan me apwénúetá letipen Seman we. Pokiten ena, epwe pwénútá minne Jiowa a tipeni seni lepoputáán fán iten aramas me fénúfan. Lón ei lesen sipwe pwóróus wóón ewe popun Kot a mut ngeni Jesus an epwe fókkun riáfféú me mwen an we epwele máló. Sipwe pwal ekis káé pwóróusen emén soumakken Paipel mi unusen aúcheani ewe méén kepich. Me sáingolóón sipwe pwóróus wóón ifa usun sia tongeni pwári ach kilisou ren ewe méén kepich me ifa usun sia tongeni alapaaló ach aúcheani ewe asor Jiowa me Jesus ra awora fán itach.

4. Áweweei napanapen án Jesus ninniiló.

⁴ Ekieki met a fis lón sáingoon ránin manawen Jesus wóón fénúfan. Inaamwo ika a tongeni tingorei eú mwichen chónláng ar repwe túmúnú, nge a mut ngeni ekkewe mwichen soufiun Rom ar repwe liapeni me awatangawa. (Mat. 26:52-54; Joh. 18:3; 19:1) Ra awata ngeni efóch sáál mi ekinása inisin. Mwirin ra ekietá wóón sékúrún we mi kinás efóch úr mi chou. Jesus a poputá le átekinaló ena úr ngeni ewe leenien ninni. Nge ekiseló mwirin ekkewe soufiun Rom ra ereni pwal emén mwán an epwe wii le ekii. (Mat. 27:32) Atun Jesus a wareiti ewe leeni epwele ninniiló ie, ekkewe chón nieló ra chúfélú kumwuchun me apachapachan ngeni ewe iráán ninni. Choun Jesus wóón ewe iráán ninni a ammesamóngaaló kilasan kewe mi chúfél. Inan we me chienan kewe ra fókkun kechiweiti nge ekkewe néúwisin Jus ra turunufasa. (Luk. 23:32-38; Joh. 19:25) Jesus a riáfféú ren fitu awa. Ngasangasan me ammatan a weires pokiten itiitin inisin me a weiresiló an epwe ngasangas. Jesus a silei pwe a fen tuppwél, me me mwen chék an we epwele máló a sáingooni an iótek ngeni Jiowa. Iwe a rootiw me a sópwóló. (Mark. 15:37; Luk. 23:46; Joh. 10:17, 18; 19:30) Ina eú ninni mi fókkun ámmetek, assaw me eriáfféú ren fitu awa me mwen an epwele máló!

5. Me ren Jesus met a kon áweires lap seni napanapen an ninniiló?

⁵ Me ren Jesus pwe napanapen an máló esap ina met a kon ámeteki letipan. Nge a fen kon eriáfféú ngeni ewe popun ra tipimwáál ngeni wóón pwe epwe ninniiló. Ra tipi ngeni pwe i emén chón turunufas, emén mi ésúfélúngawa Kot are iten Kot we. (Mat. 26:64-66) Ena tipimwáál a fókkun áweires ngeni Jesus pwe iwe a áneánei án Seman we esap mut ngeni an epwe kúna ena esin assaw. (Mat. 26:38, 39, 42) Pwata Jiowa a mut ngeni Néún na mi áchengicheng an epwe riáfféú me máló? Sipwe pwóróus wóón úlúngát popun.

6. Pwata Jesus a eitiwetá wóón efóch iráán ninni?

⁶ Áeúin, a lamot án Jesus epwe eitiwetá wóón efóch iráán ninni pwe epwe angasaaló ekkewe chón Jus seni eú anúmamaú. (Kal. 3:10, 13) Ra anúmamaú pokiten ra fen pwonei pwe repwe álleasochisi án Kot allúk, nge rese. Iwe a fich ngeniir ar repwe máló pokiten iir mwirimwirin Atam me pwal pokiten ena anúmamaú. (Rom 5:12) Án Kot allúk ngeni Israel a apasa pwe emén mwán mi féri eú tipis mi fich ngeni máló itá epwe ninniiló. Iwe, ewe inis epwe eitiwetá wóón efóch irá. * (Tut. 21:22, 23; 27:26) Pokiten Jesus a eitiwetá wóón efóch irá, ekkewe chón Jus ra tongeni ngase seni ena anúmamaú me an asor a tongeni álisiir inaamwo ika ra oputa.

7. Ifa ewe oruuen popun án Kot mut ngeni Néún we an epwe riáfféú?

 ⁷ Iei ewe oruuen popun pwata Kot a mut ngeni Néún we an epwe riáfféú. A ammólnatá Jesus fán iten wisan lón mwan pwe néúch Souasor mi Lap. Jesus a pwisin kúna úkúkún weiresin án emén álleasochisi Kot fán ssenúkún sóssót. A fókkun meefi riáfféú pwe iwe a sié lón iótek “fän mwelian mi leüömong, a pwal kechü.” Pokiten Jesus a fen piin tolong lón riáfféú, iwe a weweiti met a lamot ngenikich me ‘a tongeni alisikich’ atun sia “tolong lon sosot.” A ifa me kilisouch ren án Jiowa seikaatá emén néúch Souasor mi Lap mi úméúméch “esap eman mi tongomang ngeni ach apwangapwang”!​—Ipru 2:17, 18; 4:14-16; 5:7-10.

8. Ifa ewe aúlúngátin popun án Kot mut ngeni Jesus an epwe kúna ssenúkún sóssót?

⁸ Aúlúngátin, Jiowa a mut ngeni Jesus an epwe kúna riáfféú mi kon ssenúk ren an epwe pélú ei kapas eis mi lamot. Itá a tufich ngeni aramas ar repwe akkamwéchú ar tuppwél ngeni Jiowa pwal mwo nge fán ssenúkún sóssót? Satan a erá pwe ese tufich! A erá pwe aramas ra chék angang ngeni Kot fán iten ar repwe angei pwisin feiéchúr, me a lúkú pwe ra usun chék semer we Atam, rese tongei Jiowa. (Hiop 1:9-11; 2:4, 5) Jiowa a fókkun lúkú pwe Néún we epwe tuppwél, ina popun a mut ngeni an epwe unusen kúna sóssót. Jesus a akkamwéchú an tuppwél me ánneta pwe Satan i emén mi kapas chofona.

9. Ifa ewe leenien áppirú aposel Johannes a isetiw fán itach?

⁹ A péchékkúleló án chómmóng Chón Kraist lúkú ren pwóróusen ewe méén kepich. Ra chék sópweló le afalafal fán koput me ra likiitú fán sókkopaten sóssót lón ánein manawer. Ekieki pwóróusen ewe aposel Johannes. A afalafala ewe enlet usun Kraist me ewe méén kepich fán tuppwél ren úkúkún lap seni wone ier. Atun a arapakkan 100 ierin, ewe Mwúún Rom a ekieki pwe i emén mi efeiengaw ina popun ra kalapusei wóón ewe téé Patmos. Met tipisin? A “arongafeili än Kot kapas” me ewe enlet usun Jesus. (Pwär. 1:9) A ifa me múrinnéén an leenien áppirú usun lúkú me likiitú!

10. Ifa usun makkeien Johannes kewe ra pwári pwe a aúcheani ewe méén kepich?

¹⁰ Lón makkeien Johannes kewe, a pwári watteen an tongei Jesus me an aúcheani ewe méén kepich. Lap seni fán ipúkú, Johannes a fós usun ena méén kepich me ekkewe feiéch mi pop seni ena méén kepich. Áwewe chék, Johannes a makkeei: “Are eman a föri tipis, a wor eman mi penikich, Jesus Kraist ewe chon pwüng.” (1 Joh. 2:1, 2) Makkeien Johannes kewe ra pwal menlapei lamoten ewe angangen afalafal usun Jesus. (Pwär. 19:10) A ffat pwe Johannes a unusen aúcheani ewe méén kepich. Ifa usun sipwe pwári pwe sia pwal aúcheani ewe méén kepich?

11. Met a tongeni álisikich le ú ngeni sóssót?

¹¹ Ú ngeni ewe sóssót le féri tipis. Ika sia enletin aúcheani ewe méén kepich, sisap eáni ei ekiek: ‘Ese pwal lamot ngeniei ai upwe achocho ai usap féri tipis. Ua tongeni chék féri tipis, nge upwap tingor omusomus.’ Nge lupwen sia kúna sóssót le féri minne mi ngaw, sipwe fen apasa: ‘Ifa usun upwe tongeni eletipengawa Jiowa me Jesus mwirin ekkewe mettóch meinisin ra fen féri fán itei?’ Iwe sia tongeni tingorei Jiowa epwe fang  ngenikich péchékkúl me tingormaú ngeni: “Kosap atolongakem lon sosot.”​—Mat. 6:13.

12. Ifa usun sipwe tongeni apwénúetá ewe kapasen emmwen lón 1 Johannes 3:16-18?

¹² Tongei pwiich kewe Chón Kraist. Atun sia pwári ena esin tong, sia pwal pwári pwe sia aúcheani ewe méén kepich. Pwata? Pokiten Jesus a fangóló manawan esap chék fán itach nge pwal fán iten pwiich kewe. Ika a tipemecheres le máló fán iter, iwe a ffat pwe ra fókkun aúchea me ren. (Álleani 1 Johannes 3:16-18.) Sia pwári pwe sia tongei pwiich kewe ren napanapen féfférúch ngeniir. (Ef. 4:29, 31–5:2) Áwewe chék, sia álisiir atun ra semmwen are atun ra likiitú fán ekkewe sóssót mi áweires kapachelong atun a fis feiengaw watte. Nge met itá sipwe féri ika emén chienach Chón Kraist a ámeteki letipach?

13. Pwata sipwe tipemecheres le omusaaló tipis?

¹³ Fán ekkóch a weires ngonuk óm kopwe omusaaló tipisin chienom Chón Kraist? (Lif. 19:18) Ika ina usun, iwe kopwe apwénúetá ei pesepes: “Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis.” (Kol. 3:13) Iteiten sia omusaaló pwiich kewe, sia pwári ngeni Semach we lón láng pwe sia enletin aúcheani ewe méén kepich. Ifa usun sipwe sópweló le akkalapaaló ach aúcheani ena liffang seni Kot?

14. Ifa eú alen ach sipwe tongeni alapaaló ach aúcheani ewe méén kepich?

¹⁴ Kilisou ngeni Jiowa ren ewe méén kepich. Iei alon emén fefin Chón Kraist itan Joanna 83 ierin seni India: “Me rei a aúchea ai upwe kan pani lón ai iótek iteiten rán ewe méén kepich me kilisou ngeni Jiowa fan itan.” Iteiten rán, atun ka iótek, ereni Jiowa met ka mwáálliló wóón me tingorei an epwe omusaakoló. Nge ika ka féri tipis mi chou, a pwal lamot ngonuk álillisin ekkewe mwán mi ásimaw. Repwe aúseling ngonuk me awora kapasen emmwen mi fiti tong seni án Kot we Kapas. Oupwe iótekfengen me repwe tingorei Jiowa an epwe omusaakóló pwe kopwe tongeni eáni eú ririéchsefál ngeni I.​—Jas. 5:14-16.

15. Pwata sipwe awora fansoun le álleani usun ewe méén kepich me ekilonei usun?

¹⁵ Ekilonei usun ewe méén kepich. Iei alon emén Chón Kraist fefin itan Rajamani 73  ierin: “A kan cháicháiwu me lemesei atun ua álleani pwóróusen án Jesus riáfféú.” Eli ka pwal letipechou atun ka ekieki úkúkún watteen riáfféún Néún Kot na. Nge lapólóón óm ekilonei wóón minne Jesus a pennúkúóló, a pwal ina lapólóón óm tongeer me Seman we. Ka tongeni káé usun ewe méén kepich lón óm pwisin káé pwe epwe álisuk le ekilonei usun.

16. Ifa usun ach áiti ngeni aramas usun ewe méén kepich a álisikich? (Ppii ewe sasing wóón péén.)

¹⁶ Asukula Aramas usun ewe méén kepich. A lapóló ach aúcheani ewe méén kepich iteiten ach fós ngeni aramas usun. A wor rech ekkóch minen álillis mi álilliséch sia tongeni néúnéú le asukula aramas usun popun án Jesus máló fán itach. Áwewe chék, sia tongeni néúnéú ewe puk Pwóróus Allim Seni Kot! lesen 4 itelapan “Ié ewe Jesus Kraist?” Are sia tongeni néúnéú ewe puk Met ewe Paipel A Wesewesen Apasa? sópwun 5 itelapan “Ewe Méén Kepich, án Kot Liffang mi Lapalap Seni Meinisin.” Me iteiten ier a lapóló ach aúcheani ewe méén kepich ren ach fiffiti Áchechchemen án Jesus máló me ren ach tinikken le etiwa aramas le fitikich. A ifa me feiéchúch ren án Jiowa ewisa ngenikich le asukula aramas usun Néún na!

17. Pwata ewe méén kepich ina án Kot liffang mi lapalap seni meinisin ngeni aramas?

¹⁷ Ese wor tipemwaramwar pwe a wor popun mi pwúng ach sipwe ámááraatá me akkalapaaló ach aúcheani ewe méén kepich. Pokiten ewe méén kepich, sia tongeni ririéch ngeni Jiowa inaamwo ika sise unuséch. Pokiten ewe méén kepich, epwe unusen taló angangen ewe Tefil. (1 Joh. 3:8) Pokiten ewe méén kepich, epwe pwénútá minne Jiowa a tipeni me lepoputáán ngeni fénúfan. Unusen fénúfan epwe wiliti eú paratis me meinisin repwe tongei Jiowa me angang ngeni. Ina minne iteiten rán, sipwe kútta ifa usun sipwe pwári pwe sia aúcheani ewe méén kepich, án Kot we liffang mi lapalap seni meinisin ngeni aramas!