1-2. Ifa usun sipwe tongeni tapweló mwirin Jesus lón ipwan? Áweweei.

ANCHANGEI pwe ka fiti eú kúmien chón fetál lón eú fénúpéén mi efeiengaw nge mi chék pwúl mworomwor. Emén mi sileéchú ena leeni a wisen emmwenikemi. Atun a fetál, a ráseló rásin ipwan lón ewe pwúl mworomwor. Mwirin, ka tepereni pwe kese chúen kúna ewe chón emmwen! Nge kese niwokkus. Ámi me chienom kewe chón fetál oua chék tapweló lón rásin ipwen ewe chón emmwen úkúkún ámi tongeni!

² Kich Chón Kraist mi enlet, usun sia fetál lón eú fénúpéén mi efeiengaw, ina ei fénúfan mi ngaw. Sia kilisou pwe Jiowa a awora emén Chón Emmwen mi unuséch, ina i Jesus Kraist Néún we, ewe sia tongeni tapweló mwirin lón ipwan. (1 Pet. 2:21) Me ren eú puk mi áweweei Paipel, Petrus a aléllééi Jesus ngeni emén chón emmwen. Jesus a usun emén chón emmwen mi likiti rásin ipwan kewe pwe sipwe tongeni tapweló lón. Sipwe pwóróus usun ekkeei úlúngát kapas eis usun ach tapweló mwirin Jesus lón ipwan. Met weween ach sipwe tapweló mwirin Jesus lón ipwan? Pwata sipwe féri ena? Me ifa usun sipwe féri ena?

3. Met weween ach sipwe tapweló mwirin emén lón ipwan?

³ Met weween ach sipwe tapweló mwirin emén lón ipwan? Lón ewe Paipel, fán ekkóch ekkeei kapas “fetál” me “peche” a wewe ngeni met emén a féri lón manawan. (SalF. 3:23; 6:18) Ewe leenien áppirú emén a isetiw, a tongeni wewe ngeni rásin ipwan kewe mi ráseló mwirin an fetál. Iwe, ach tapweló mwirin emén lón ipwan, a wewe ngeni ach sipwe áppirú i.

4. Met weween ach sipwe tapweló mwirin Jesus lón ipwan?

⁴ Iwe, met weween ach sipwe tapweló mwirin Jesus lón ipwan? A wewe ngeni ach sipwe áppirú an leenien áppirú. Lón ewe wokisin ei lesen a lóngólóng wóón, aposel Petrus a ákkáeúin  fós usun án Jesus leenien áppirú mi múrinné ren an likiitú fán riáfféú, nge a pwal chómmóng alen ach sipwe tongeni áppirú Jesus. (1 Pet. 2:18-25) Ren enletin, unusen manawen Jesus, meinisin minne a apasa me féri, iir leenien áppirú fán itach pwe sipwe tapweló mwirin.

5. Itá mi tufich ngeni aramas rese unuséch ar repwe wesewesen áppirú án Jesus leenien áppirú mi unuséch? Áweweei.

⁵ Pokiten kich sise unuséch, itá sia tongeni wesewesen áppirú án Jesus leenien áppirú? Ewer, sia tongeni. Petrus ese erá pwe mi lamot ach sipwe unuséch lón ach tapweló mwirin Jesus. Nge a pesekich ach sipwe “tapwela mürin lon ipwan.” Ika sia tapweló mwirin ren úkúkún ach tufich pwal mwo nge fán ach apwangapwangen tipis, sipwe álleasochisi alon ewe aposel Johannes ei: “Fefetal usun chok [Jesus] a fefetal.”​—1 Joh. 2:6, Testament mi Fö.

6-7. Pwata sia tongeni erá pwe ach tapweló mwirin Jesus epwe ámúrinnééló ach chiechi ngeni Jiowa?

⁶ Ika sia tapweló mwirin Jesus lón ipwan, epwe échúló ach chiechi ngeni Jiowa. Pwata sia tongeni apasa ena? Áeúin, Jesus a isetiw eú leenien áppirú mi múrinné ren an manaweni eú sókkun manaw mi apwapwaai Kot. (Joh. 8:29) Ina popun, ika sia tapweló mwirin Jesus lón ipwan, sipwe apwapwaai Jiowa. Me sia tongeni lúkú pwe Semach we lón láng epwe arap ngeni chókkewe mi achocho le chiechi ngeni.​—Jas. 4:8.

⁷ Oruuan, Jesus a unusen áppirúfichi Seman we. Ina popun, Jesus a tongeni erá: “Iö a künaei, a küna Semei.” (Joh. 14:9) Sia pwal áppirú Jiowa lupwen sia áppirú napanapen Jesus kewe me féfférún ngeni ekkewe ekkóch, áwewe chék ren an meefi attongen emén mi úri rupun pwétúr, an chúngú emén  fefin mi riáfféú ren eú watteen semmwen, me ren an úméúméch ngeni chón letipeta. (Mark. 1:40, 41; 5:25-34; Joh. 11:33-35) Lapólóón ach áppirú Jiowa, pwal ina lapólóón ach riri ngeni.

8. Áweweei pwata ach tapweló mwirin Jesus lón ipwan epwe álisikich le “akufu” fénúfan.

⁸ Ika sia tapweló mwirin Jesus lón ipwan, epwe álisikich ach sisap tup ren án ei fénúfan mi ngaw minen orukoruk. Lón ewe sáingoon pwinin manawen Jesus wóón fénúfan a tongeni erá: “Üa akufu fanüfan.” (Joh. 16:33) A wewe ngeni pwe ese mut ngeni pwisin i an epwe tipetipeló ren ekiekin chón ei fénúfan, féfférúr, me minne ra achocho ngeni. Jesus ese fókkun ménúki ewe popun a titiito ngeni fénúfan, ina ren an epwe epinaaló iten Jiowa we. Nge ifa usun ren kich? A chómmóng met a tongeni erikikicheló lón ei fénúfan. Nge ika sia usun Jesus le nefótófót wóón ach féri letipen Jiowa, sipwe pwal “akufu” fénúfan.​—1 Joh. 5:5.

9. Met mi lamot sipwe féri pwe sipwe chék nónnóm wóón ewe al mi ale ngeni manaw esemuch?

⁹ Ika sia tapweló mwirin Jesus lón ipwan, sipwe tongeni kúna manaw esemuch. Lupwen emén alúwél mi pisekisek a eisini Jesus met a lamot epwe féri ren an epwe kúna manaw esemuch, Jesus a erá: “Kopwe feito o tapweto müri.” (Mat. 19:16-21) Iei alon Jesus ngeni ekkóch chón Jus rese lúkú pwe i ewe Kraist: “Nei kewe sip ra . . . tapweto müri. Üa fang ngeniir manau esemüch.” (Joh. 10:24-29) Iei alon Jesus ngeni Nikotemus, emén mi chóni án chón Jus we kapwúng tekia mi sani án Jesus asukul pwe chókkewe “mi lükü i” repwe “eäni manau esemüch.” (Joh. 3:16) Sia anganga ach lúkú Jesus ren ach apwénúetá met a áiti ngenikich me áppirú minne a féri. Ika sia féri ena, sipwe chék nónnóm wóón ewe al mi ale ngeni manaw esemuch.​—Mat. 7:14.

10. Met a lamot sipwe féri pwe sipwe sissileeló Jesus? (Johannes 17:3)

¹⁰ Me mwen ach sipwe tongeni tapweló mwirin Jesus lón ipwan, a lamot ach sipwe sissileeló i. (Álleani Johannes 17:3.) Ach sipwe “silei” Jesus, a chék sóssópwósópwóló. Mi lamot ach sipwe akkalapaaló ach káé usun i, weween napanapan kewe, an ekiek, me met a lónguni manawan. Ese lifilifil ttamen ach nóm lón ewe enlet, nge mi lamot ach sipwe akkachocho le “silei” Jiowa me Néún we.

11. Met masouen ekkewe rúáánú Puken Kapas Allim?

¹¹ Ren án Jiowa tong, a apachaalong lón an we Kapas ekkewe rúáánú Puken Kapas Allim ren an epwe álisikich le sissileeló Néún we. A masou ekkewe Puken Kapas Allim ren pwóróusen uruwoon manawen Jesus me an angangen afalafal. Ekkena puk ra apwóróusa ngenikich met Jesus a apasa, met a féri, me meefian. Ekkena rúáánú puk ra álisikich le enletin “ekieki” usun án Jesus leenien áppirú.  (Ipru 12:3) Iwe lón kapas áwewe, usun itá a nóm rásin ipwen Jesus lón ekkena puk. Ren ach kákkáé ekkena Puken Kapas Allim, sia tongeni sissileeló Jesus. Iwe, sia tongeni tapweló mwirin lón ipwan.

12. Ifa usun sipwe unusen angei álillis seni ekkewe Puken Kapas Allim?

¹² Ren ach sipwe unusen angei álillis seni ekkewe Puken Kapas Allim, a lamot ach sipwe féri pwal ekkóch mettóch me lúkún chék ach álleaniir. A lamot ach sipwe awora fansoun le káéfichiir me ekiloner. (Apépé ngeni Josua 1:8.) Sipwe pwóróus wóón ruu emmwen mi tongeni álisikich le ekilonei ekkewe Puken Kapas Allim me apwénúetá minne sia álleani.

13. Ifa usun kopwe anchangei pwe ekkewe pwóróus lón ekkewe Puken Kapas Allim ra wesewesen fis?

¹³ Áeúin, anchangei pwe ka pwisin kúna ren mesom met a fis lón ekkewe pwóróus mi mak lón ekkewe Puken Kapas Allim. Anchangei pwe ka kúna, rong, me meefi met ewe a fiffis. Ren óm kopwe tongeni féri ena, research seni ekkewe puken álillisin Paipel mi kawor me ren án Jiowa we mwicheich. Etittina ekkewe epwipwiin wokisin, weween minne a fis me mwan me mwirin lón ewe pwóróus ka kákkáé. Kútta pwal ekkóch pwóróus usun ekkewe aramas me leeni mi mak lón ena pwóróus ka álleani. Alélléfengeni ena pwóróus ka kákkáé ngeni pwal chék ena esin pwóróus nge mi mak lón pwal eú ekkewe Puken Kapas Allim. Fán ekkóch, emén chón makkeei eú Puken Kapas Allim a apachaalong lón makkeian eú pwóróus mi amwarar, nge ewe chón makkeei pwal eú Puken Kapas Allim ese pwal féúni lón makkeian.

14-15. Met a lamot sipwe féri pwe sipwe apwénúetá minne sia káé seni pwóróusen manawen Jesus?

¹⁴ Oruuan, apwénúetá lón manawom ekkewe pwóróus lón ekkewe Puken Kapas Allim. (Joh. 13:17) Mwirin óm káéfichi eú pwóróus lón eú Puken Kapas Allim, kopwe pwisin eisinuk: ‘A wor eú lesen lón ei pwóróus ua tongeni apwénúetá lón manawei? Ifa usun ua tongeni néúnéú ei pwóróus le álisi pwal emén?’ Ekieki usun emén ka sissilei, iwe fán  tong me súfél ka tongeni apwóróusa ngeni ewe lesen ka káé.

¹⁵ Sipwele káé eú pwóróus ren ifa usun sipwe tongeni apwénúetá ekkena ruu emmwen. Sipwe etittina pwóróusen ewe fefin mi wéúngaw mi má seni pwúlúwan, ewe Jesus a kúna me lón ewe imwenfel.

16. Apwóróusa met ka anchangei pwe a fis lón Markus 12:41.

¹⁶ Anchangei pwe ka pwisin kúna ren mesom met a fis lón ei pwóróus. (Álleani Markus 12:41.) Kachitoni met a fis. A sereni Nisan 11 ier 33, kis seni eú wiik mwen án Jesus epwele máló. Jesus a afalafal lón ewe imwenfel arapakkan unusen ewe rán. Nge ekkewe néúwisin lamalam ra chék úkkú ngeni. Nge iwe ekiseló, ekkóch me leir ra eisini ika met an pwúúng wóón ena angang a féri. Ekkóch ra pwal sótun ssárei ren ar eisini ekkewe kapas eis mi orukoruk. (Mark. 11:27-33; 12:13-34) Nge iei, Jesus a mwékút ngeni pwal eú kinikin lón ewe imwenfel. Eli ina ewe leeni ra kan kér ngeni Leenien Fefin pwe iwe a tongeni kúna ekkewe leenien asor únúkkún etippen ena leeni. A móóttiw me poputá le attola ekkewe aramas atun ra waalong ar kewe asor lón ekkewe leenien asor. A kúna chómmóng aramas mi pisekisek mi waalong chómmóng féún moni. Eli Jesus a pwal mwo nge tongeni rong kararen néúr kewe féún moni mi turulong lón ewe leenien asor.

17. Met ewe fefin mi wéúngaw mi má seni pwúlúwan mi mak lón Markus 12:42 a féri?

¹⁷ Álleani Markus 12:42. Ekiseló mwirin, Jesus a kúna emén fefin. Neminna emén “mi wöüngau a mä pwülüan.” (Luk. 21:2) A fókkun weires nónnómun manawan, ese mwáál a weires ngeni an epwe kamé minne mi lamot ngeni. Nge a pwere ngeni eú ekkewe leenien asor me ánnifaalóng rúúeféú kúkkún moni, eli ese pwal mwo nge karar atun a ppúngúlóng lón ewe leenien asor. Jesus a silei met a ppúngúlóng, ekkewe rúúeféú féún lepta, ikkena ekkewe féún senis mi fókkun kisikis aúchear lón ena fansoun. Ese pwal mwo nge naf ngeni méén emén nichok, ewe machchang mi fókkun mékúkkún fán iten mwéngé.

18. Me ren Markus 12:43, 44, met Jesus a apasa usun án ewe fefin mi má seni pwúlúwan asor?

¹⁸ Álleani Markus 12:43, 44. Jesus a fókkun mwaar ren ewe fefin mi má seni pwúlúwan. Ina popun a kérato néún kewe chón káé me itin ngeniir ena fefin me apasa: “Ei fefin mi wöüngau a mä pwülüan a uwalong chomong asor lon ewe lenien asor lap seni ekewe aramas meinisin.” Mwirin a áweweei: “Ir [ákkáeúin ekkewe mi pisekisek] meinisin ra uwalong somwen wöür, nge neminei seni an wöüngau a uwalong meinisin mine a wor ren, a fangala meinisin mine a manau seni.” Lupwen ewe fefin mi tuppwél mi má seni pwúlúwan a waalong sáingoon néún moni lón ena rán, a isenalong manawan lepéún Jiowa.​—Kölf. 26:3.

19. Ifa ewe lesen mi lamot sia káé seni alon Jesus kewe usun ewe fefin mi wéúngaw mi má seni pwúlúwan?

¹⁹ Apwénúetá lón manawom ewe pwóróus. Pwisin eisinuk: ‘Ifa ewe lesen ua tongeni káé seni alon Jesus kewe usun ewe fefin mi wéúngaw mi má seni pwúlúwan?’ Ekieki usun ena fefin mi má seni pwúlúwan. Ese wor tipemwaramwar pwe a mochen fang ngeni Jiowa lap seni met a fen eáni asor. Nge, a féri úkúkún an tongeni, a fang ngeni Jiowa met mi múrinné seni meinisin. Me Jesus a silei pwe an asor a aúchea me ren Seman we. Iwe, iei ewe lesen mi lamot fán itach: Jiowa a pwapwa atun sia fang ngeni met mi múrinné seni meinisin, ina ach angang ngeni seni unusen letipach  me unusen manawach. (Mat. 22:37; Kol. 3:23) Jiowa a pwapwa rech atun a kúna ach achocho úkúkún ach tufich! Ena kapasen emmwen a weneiti úkúkún ewe fansoun me péchékkúl sia áeá lón ach fel ren ach angangen afalafal me ach fiti ekkewe mwich.

20. Ifa usun ka tongeni apwénúetá ewe lesen seni pwóróusen ewe fefin mi má seni pwúlúwan? Áweweei.

²⁰ Ifa usun ka tongeni apwénúetá ewe lesen seni pwóróusen ewe fefin mi má seni pwúlúwan? Ekieki usun chókkewe mi tongeni péchékkúletá ika ka áchema ngeniir pwe Jiowa a pwapwa ren met ra tufichin féri fán itan. Áwewe chék, en mi silei emén Chón Kraist fefin chinnap eli a mengiringir are meefi pwe a lamotongaw pokiten ese chúen wor an péchékkúl le féri usun minne a féfféri me lóóm lón ewe angangen afalafal? Are ka silei emén Chón Kraist mwán mi riáfféú ren eú semmwen mi ámmetek ren fansoun langattam, nge a lichippúng pokiten ese chúen tongeni fiffiti ekkewe mwich iteitan lón ewe Leenien Mwich? Álisi chókkana ren óm eáni “kapas mi mürina chök, sokun kapas mi afefetai aramas.” (Ef. 4:29) Apwóróusa ngeniir ekkewe lesen mi apéchékkúl sia káé seni pwóróusen ewe fefin mi wéúngaw mi má seni pwúlúwan. Óm kewe kapas mi apéchékkúl ra tongeni áchema ngeniir pwe Jiowa a pwapwa lupwen sia fang ngeni met mi múrinné seni meinisin. (SalF. 15:23; 1 Tes. 5:11) Atun ka apúnga ekkewe ekkóch ren ar fang ngeni Jiowa úkúkún ar tufich, ese lifilifil ika usun itá a chék kisikis, iwe ka tapweló mwirin Jesus lón ipwan.

21. Met ka úppós le féri?

²¹ Sia fókkun kilisou ren ekkewe Puken Kapas Allim mi masou ren chómmóng pwóróus usun manawen Jesus mi atufichikich le áppirú i me tapweló mwirin lón ipwan! Pwata kese káé ekkewe Puken Kapas Allim lón óm pwisin káé are Famili Fel? Sipwe chechchemeni pwe ren ach sipwe unusen angei álillisin ena esin káé, mi lamot ach sipwe anchangei pwe sia pwisin kúna ren mesach met a fis lón ekkewe pwóróus me apwénúretá lón manawach. Me lúkún ach áppirú minne Jesus a féri, a lamot ach sipwe pwal aúseling ngeni minne a apasa. Lón ewe lesen mwirin ei, sipwe pwóróus usun met sia tongeni káé seni alon Jesus kewe me mwen chék an we epwele máló.