1. Pwata sia kan uwawu meefiach lón ach kewe mwich?

 PWATA sia kan fiti mwich? Ewe akkaúchean popun, pwe sipwe mwareiti Jiowa. (Kölf. 26:12; 111:1) Sia pwal fiti ach kewe mwich pwe sipwe apéchékkúlafengenikich lón ekkeei fansoun mi áweires. (1 Tes. 5:11) Atun sia uwawu meefiach lón ach kewe mwich, sia féri iir me ruu ekkena mettóch.

2. Ineet atun sia tongeni uwawu meefiach lón ach kewe mwich?

² A suuk ngenikich ach sipwe uwawu meefiach lón ach kewe mwich iteiten wiik. Áwewe chék, lón ach kewe mwich lón weekend, sia tongeni uwawu meefiach atun ewe Káéén Leenien Mas. Atun ach kewe mwich lón weekday, sia tongeni uwawu meefiach atun ekkewe kinikin, Kúkkútta Pwóróus Aúchea, Án ewe Mwichefel Káéén Paipel, me pwal lón ekkóch kinikin atun ewe chón afalafal a eáni kapas eis.

3. Met a tongeni áweiresi ach sipwe uwawu meefiach, me ifa usun Ipru 10:24, 25 a tongeni álisikich?

³ Kich meinisin sia mochen mwareiti Jiowa me apéchékkúla chienach kewe chón lúkú. Nge a wor met a tongeni áweiresi ach sipwe uwawu meefiach. Eli sia niwokkus are eli sia fókkun mochen memmeef, nge fán ekkóch ewe chónemmwen ese kérikich atun sia eitietá péúch. Met a tongeni álisikich lón ekkena atun? Minne Paulus a makkeei ngeni ekkewe chón Ipru, a tongeni álisikich le silei pélúwan. Atun a fós usun aúchean ach mwichfengen, a erá pwe a lamot ach sipwe nefótófót wóón ach “apöchökülafengenikich lefilach.” (Álleani Ipru 10:24, 25.) Atun sia mirititi pwe ekkewe ekkóch lón ewe mwich ra tongeni péchékkúletá ren pwal mwo nge ach ekis uwawu meefiach  mi pwári ach lúkú, iwe sisap kon pireir le memmeef. Me inaamwo ika ewe chónemmwen ese kan kon kékkérikich, nge sia pwapwa pwe ekkewe ekkóch ra pwal tongeni uwawu meefier.—1 Pet. 3:8.

4. Ikkefa ekkewe úlúngát mettóch sipwe káé lón ei lesen?

⁴ Lón ei lesen, sipwe akkomw pwóróus wóón ifa usun sia tongeni apéchékkúlafengenikich lón eú kúkkún mwichefel, ikewe mi chék chókúkkún chón uwawu meefier. Mwirin, sipwe ppii ifa usun sipwe apéchékkúlafengenikich lón eú watteen mwichefel, ikewe a chómmóng chókkewe mi mochen uwawu meefier. Sáingolóón, sipwe pwóróus wóón ifa usun sia tongeni apéchékkúla ekkewe ekkóch ren met sipwe apasa atun sia uwawu meefiach.

5. Ifa usun sia tongeni apéchékkúlafengenikich inaamwo ika a chókúkkún chón fiti mwich?

⁵ Lón eú kúkkún mwichefel are kúmi, ese kan kon chómmóng chókkewe ewe chónemmwen epwe kériir ar repwe uwawu meefier. Fán ekkóch, eli a lamot án ena chónemmwen epwe ekis witiwit me mwen an epwe wor emén epwe eitietá péún. Iwe, eli ach mwich epwe echchipwang, iwe esap tongeni apéchékkúlakich. Met ka tongeni féri? Kopwe tipemecheres le ekkeitietá poum. Óm féri ena, a tongeni efisi án ekkewe ekkóch repwe pwal ukkuwawu meefier.

6-7. Ifa usun sia tongeni ekisikisaaló ach niwokkus le memmeef?

⁶ Met ka tongeni féri ika ka meefi niwokkus le uwawu meefiom? Chómmóng ra pwal meefi ena esin memmeef. Iwe nge, ren óm kopwe akkapéchékkúla chienom kewe Chón Kraist, kopwe kútta ekkóch alen óm kopwe ekisikisaaló óm niwokkus le uwawu meefiom. Ifa usun ka tongeni féri ena?

⁷ Eli epwe álilliséch ngonuk óm enniwili ekkóch ekkewe kapasen emmwen lón ekkewe lesen mi kerán katowu lón Ewe Leenien Mas. b Áwewe chék, kopwe mmólnefichitá. (SalF. 21:5) Lapólóón óm sileéchú masouen ewe lesen, epwe pwal ina mecheresilóón óm kinamwe le uwawu meefiom. Pwal och, kopwe ammwocha meefiom. (SalF. 15:23; 17:27) A tongeni kisikisiló óm pireir le memmeef ika ka chék ammwocha meefiom. Eú memmeef mi mwoch, eli eú are ruu sentence, a tongeni ámecheresi án chienom kewe repwe weweiti ewe pwóróus, lap seni eú memmeef mi ttam me chómmóng pwóróus lón. Óm uwawu meefiom lón pwisin óm kapas, a pwári pwe ka mmólnefichitá me ka weweiti ewe lesen.

8. Met meefien Jiowa ren ach achocho úkúkún ach tongeni?

⁸ Ifa usun ika ka sótuni ekkóch ekkena kapasen emmwen nge ka chúen niwokkus le uwawu meefiom lap seni fán eú are fán ruu? Kopwe lúkúlúk pwe Jiowa a aúcheani óm achocho ren úkúkún óm tongeni. (Luk. 21:1-4) Jiowa ese erenuk óm kopwe féri met mi lap seni met ka tongeni féri. (Fil. 4:5) Ekieki met ka tongeni féri, isetiw met kopwe achocho ngeni, me iótek pwe kopwe eáni letip mi kinamwe. Lepoputáán, eli ka tongeni achocho le uwawu meefiom mi chék mwochomwoch.

9. Met a tongeni áweiresi óm kopwe uwawu meefiom lón eú watteen mwichefel?

⁹ Ika a chómmóng chón afalafal lón óm we mwichefel, iwe eli epwe pwal sókkóló met  a áweiresi óm kopwe uwawu meefiom. Eli a kon chómmóng chienach kewe ra mochen uwawu meefier, ina pwata ewe chónemmwen ese kúna óm eitietá poum. Áwewe chék ren Danielle, a mmen kan sani an epwe uwawu meefian lón mwich. c Me ren neminna pwe ina kinikinin an fel ngeni Kot, alen an epwe apéchékkúla ekkewe ekkóch, me apéchékkúla an lúkú áitien Paipel kewe. Nge atun a mwékút ngeni eú watteen mwichefel, ewe chónemmwen ese kan kon kékkéri, me fán ekkóch ese pwal mwo nge kéri lón unusen ewe mwich. A apasa: “Ua letipengaw, me meefi pwe usun itá a péút seniei eú feiéch. Atun a soun fiffis ena, iwe kopwe poputá le ekieki ika turun tipan an esap kéruk.”

10. Ifa usun sia tongeni alapaaló ach uwawu meefiach lón ach kewe mwich?

¹⁰ Ka pwal meefi met Danielle a meefi? Ika ewer, iwe eli ka ekieki pwe kopwele chék fangetá me kopwele chék aúseling lón ekkewe mwich. Nge kosap úkútiw le achocho le memmeef. Met ka tongeni féri? Eli epwe álilliséch óm ammólnatá fitu memmeef lón eú me eú ekkewe mwich pwe ika ewe chónemmwen ese kéruk lepoputáán ewe káé, iwe epwe chúen wor met kopwe memmeef wóón atun a sópwósópwóló ewe mwich. Atun ka ammólnatá ewe Káéén Leenien Mas, ekieki ifa usun eú me eú ekkewe parakraf ra riri ngeni itelapen ewe lesen. Ika ka féri ena, epwe wor met kopwe memmeef wóón lón ena lesen. Pwal och, ka tongeni ammólnatá óm kopwe memmeef wóón ekkewe parakraf mi pwóróus usun áitien Paipel kewe mi weires ach sipwe áweweei. (1 Kor. 2:10) Pwata? Pokiten eli esap chómmóng repwe memmeef wóón ena kinikin lón ena lesen. Nge ifa usun ika ka apwénúetá ekkena pesepes, nge mwirin fitu mwich ewe chónemmwen ese pwal kéruk? Ka tongeni fós ngeni me mwen ewe mwich me ereni menni kapas eis ka mochen pélúweni.

11. Met Filipi 2:4 a pesekich le féri?

¹¹ Álleani Filipi 2:4. Fán emmwenien ewe ngún mi fel, ewe aposel Paulus a pesei ekkewe Chón Kraist ar repwe kútta met epwe échiti ekkewe ekkóch. Ifa usun sia tongeni apwénúetá ena kapasen emmwen atun ach  kewe mwich? Ren ach chemeni pwe ekkewe ekkóch ra pwal usuch le mochen uwawu meefier.

12. Ifa ewe mettóch mi múrinné sia tongeni féri pwe sipwe apéchékkúla ekkewe ekkóch lón ach kewe mwich? (Pwal ppii ewe sasing.)

¹² Ekieki ei. Atun oua pwóróusfengen me chienom kewe, itá en chék kopwe wisen fóffós iwe esap pwal wor atun ar repwe fós? Aapw! Ka mochen ar repwe pwal fós. Pwal ina usun lón ach kewe mwich, sia mochen mut ngeni chómmóng ar repwe uwawu meefier. Ren enletin, eú me lein ekkewe mettóch mi kon múrinné sia tongeni féri le apéchékkúla chienach kewe, ina ach mut ngeniir ar repwe pwári ar lúkú lón ar memmeef. (1 Kor. 10:24) Sipwe ppii ifa usun sia tongeni féri ena.

13. Ifa usun sia tongeni mut ngeni chómmóng chón mwich ar repwe uwawu meefier?

¹³ Eú mettóch, sipwe chék ammwocha ach memmeef pwe epwe wor fansoun án ekkewe ekkóch repwe pwal memmeef. Ekkewe mwán mi ásimaw me ekkewe chón afalafal mi lipwákéch, ra tongeni isetiw leenien áppirú. Pwal mwo nge atun ka uwawu meefiom mi chék mwoch, kopwe túmúnú óm kosap kon fós usun chómmóng pwóróus. Ika ka memmeef wóón unusen ewe parakraf, iwe esap chúen wor met ekkewe ekkóch repwe memmeef wóón. Áwewe chék, lón ei parakraf a wor ekkeei ruu kapasen pesepes, sipwe ammwocha ach memmeef me túmúnú ach sisap kon fós usun chómmóng pwóróus. Ika en akkomw ka memmeef wóón ei parakraf, iwe achocho le chék memmeef wóón eú lein ekkena pwóróus.

14. Met a tongeni álisikich le filatá fán fite sipwe eitietá péúch? (Pwal ppii ewe sasing.)

¹⁴ Kopwe mirit le filatá fán fitu kopwe uwawu meefiom. Ika sia kon chék ekkeitietá péúch iteitan, iwe epwe efisi án ewe chónemmwen epwe osenimu le kékkérikich inaamwo ika ekkewe ekkóch rese mwo memmeef. Ena mettóch a tongeni efisi án ekkewe ekkóch resap mochen eitietá péúr.—SalAf. 3:7.

15. (a) Met sipwe féri ika ewe chónemmwen ese kérikich? (b) Ifa usun ekkewe chónemmwen repwe pwári ar ekieki meinisin? (Ppii ewe pwóór, “ Ika En Ka Wisen Emmweni ewe Káé.”)

 ¹⁵ Atun chómmóng chón mwich ra eitietá péúr atun ewe káé, iwe eli ewe chónemmwen esap kérikich ach sipwe memmeef sefál inaamwo ika sia mochen memmeef fán chómmóng. Nge fán ekkóch, ewe chónemmwen esap mwo nge kérikich fán eú. A tongeni elichippúng ena, nge sisap song ika ese kérikich.—SalAf. 7:9.

16. Ifa usun sia tongeni apéchékkúla chókkewe mi uwawu meefier?

¹⁶ Ika ka mochen memmeef fán fite, nge ewe chónemmwen ese kéruk sefál, iwe pwata kese aúselingéch meefien ekkewe ekkóch me apúnger mwirin ewe mwich? Chienom kewe Chón Kraist ra tongeni péchékkúletá ren óm apúnger usun chék ar péchékkúletá ren ar rong óm kewe memmeef. (SalF. 10:21) Ach eáni kapasen apúng, pwal ina eú alen ach sipwe apéchékkúlafengenikich.

17. (a) Ifa usun ekkewe sam me in ra tongeni álisi néúr kewe le ammólnatá meefier mi fich ngeni ieriir? (b) Me ren ewe video, ikkefa ekkewe rúáánú mettóch epwe álisikich le ammólnatá ach memmeef? (Pwal ppii ewe footnote.)

¹⁷ Ifa usun sia pwal tongeni apéchékkúlafengenikich atun ach kewe mwich? Ika en emén sam are in, álisi néúmi kewe kúkkún le ammólnatá ar memmeef mi fich ngeni ieriir.  (Mat. 21:16) Fán ekkóch, sia kan káé ekkewe lesen mi alóllóól, áwewe chék ren osukosuk lón pwúpwúlú are liméchún manawach, nge ese mwáál epwe wor eú are ruu parakraf lón ena lesen emén semirit a tongeni memmeef wóón. Pwal och, álisi néúmi kewe le weweiti popun ewe chónemmwen eli esap kériir iteiten ar eitietá péúr. Óm áwewe ngeniir ena, a tongeni álisiir ar resap lichippúng ika a kéri ekkewe ekkóch nge ese kériir.—1 Tim. 6:18. d

18. Ifa usun sia tongeni túmúnú pwe ach kewe memmeef esap kon nefótófót wóón pwisinkich? (Än Salomon Fos 27:2)

¹⁸ Kich meinisin sia tongeni ammólnatá ach kewe memmeef mi apéchékkúla chienach kewe Chón Kraist me elingaaló Jiowa. (SalF. 25:11) Eli fán ekkóch, sia ekis memmeef wóón pwisin pwóróusen manawach, nge a lamot sipwe túmúnú ach sisap kon fós chómmóng usun pwisinkich. (Álleani Än Salomon Fos 27:2; 2 Kor. 10:18) Nge sipwe fen achocho le nefótófót wóón Jiowa, an we Kapas, me néún kewe aramas. (Pwär. 4:11) Ewer, ika ewe kapas eis a erenikich ach sipwe memmeef wóón pwisin meefiach, iwe mi fich ach sipwe féri ena. Eú áwewe usun ena, a nóm lón ei parakraf mwirin ei.

19. (a) Met epwe fis ika sia ekieki meinisin chókkewe mi fiti mwich? (Rom 1:11, 12) (b) Met ka aúcheani seni ach uwawu meefiach lón ach kewe mwich?

¹⁹ Inaamwo ika ese wor allúk mi tichiki ifa usun sipwe uwawu meefiach, nge oukich meinisin sia tongeni achocho pwe ach memmeef epwe apéchékkúlakich meinisin. Eli epwe wewe ngeni ach sipwe uwawu meefiach fán chómmóng. Are a tongeni wewe ngeni ach sipwe menemenéch ren ach tongeni uwawu meefiach, me pwapwa ren an suuk ngeni ekkewe ekkóch ar repwe pwal uwawu meefier. Ika sia nefótófót wóón met a échiti chienach kewe lón ach kewe mwich, sia tongeni pwapwa le “apöchökülafengenikich.”—Álleani Rom 1:11, 12.