LESEN 19
Ifa Usun Sia Tongeni Apéchékkúla Ach Lúkú án Jiowa Pwon Usun ewe Ótót Séfé?
“Ifa usun, [Jiowa] epwe apasa och, nge esap föri?”—NUM. 23:19.
KÉL 142 Amwéchúnnúkú Ach Ápilúkúlúk
MINNE SIPWELE KÁÉ a
1-2. Met a lamot sipwe féri atun sia witiwiti warotoon ewe ótót séfé?
SIA fókkun kilisou ren án Jiowa pwonei pwe epwe ekkesiwili ei ótóten fénúfan ngeni eú ótót séfé mi pwúng. (2 Pet. 3:13) Inaamwo ika sise silei ineet epwe fis ena ótót séfé, nge ekkeei mettóch sia kúkkúna an fiffis lón ei ótót ra affata pwe a chék arapoto.—Mat. 24:32-34, 36; Föf. 1:7.
2 Nge ren mwo iei, ese lifilifil úkúkún ttamen ach nóm lón ewe enlet, nge a lamot kich meinisin sipwe apéchékkúla ach lúkú ena pwon. Pwata? Pún pwal mwo lúkú mi péchékkúl, a tongeni apwangapwangoló. Ren enletin, ewe aposel Paulus a eita ngeni ewe lúkú mi apwangapwang, ewe “sokun tipis mi alikafifikich.” (Ipru 12:1) Ren ach sipwe túmúnú an esap apwangapwangoló ach lúkú, a lamot sipwe ekilonei iteitan ekkewe mettóch mi ánneta pwe ekiseló chék ewe ótót séfé epwe wesewesen fis.—Ipru 11:1.
3. Met sipwele pwóróus wóón lón ei lesen?
3 Lón ei lesen, sipwe pwóróus wóón úlúngát alen ach sipwe apéchékkúla ach lúkú án Jiowa we pwon usun ewe ótót séfé: (1) sipwe ekilonei pwóróusen ewe méén kepich, (2) sipwe ekieki usun án Jiowa manaman, me (3) sipwe féri ekkewe mettóch epwe apéchékkúla ach riri ngeni Jiowa. Sipwe pwal ppii ifa usun minne Jiowa a ereni Apakuk a apéchékkúla ach lúkú lón ei fansoun. Nge akkomwan, sipwe ppii ekkóch mettóch a tongeni fis ngenikich lón ei fansoun nge mi lamot an epwe péchékkúl ach lúkú ewe pwon usun ewe ótót séfé epwele waroto.
INEET A LAMOT AN EPWE PÉCHÉKKÚL ACH LÚKÚ?
4. Ikkefa ekkewe kefil sipwe eáni nge a lamot an epwe péchékkúl ach lúkú?
4 A lamot pwe ach lúkú epwe péchékkúl atun sia féri kefil iteiten rán. Áwewe chék ren ach kefil usun chiechi, minen apwapwa, sukul, pwúpwúlú, néúch semirit, me angangen moni. A éch ach sipwe pwisin eisinikich: ‘Ai kewe kefil ra pwári pwe ua lúkú pwe ei ótót esap nómottam me ekiseló chék epwele siwil ngeni án Kot we ótót séfé? Are ua filatá le féri ekkewe mettóch chókkewe rese lúkú pwe ra tongeni manaw tori feilfeiló ra féfféri?’ (Mat. 6:19, 20; Luk. 12:16-21) Sia tongeni féri ekkewe kefil mi múrinné ika sia apéchékkúlaló ach lúkú pwe ewe ótót séfé a chék arapoto.
5-6. Pwata a lamot an epwe péchékkúl ach lúkú atun fansoun weires? Eáni eú kapas áwewe.
5 A lamot pwe ach lúkú epwe péchékkúl atun sia kúna pwal ekkóch sóssót. Eli sipwe kúna riáfféúmwáál, úrikich semmwen mi chou, are pwal ekkóch mettóch mi tongeni efisi ach sipwe lichippúng. Me akkomwan, eli sia meefi pwe sia tongeni likiitú fán ach kewe sóssót. Nge ekkewe osukosuk usun chék ekkena, ra tongeni fis ren langattam fansoun, ina popun a lamot an epwe péchékkúl ach lúkú pwe sipwe likiitú me sópweló le angang ngeni Jiowa fán pwapwa.—Rom 12:12; 1 Pet. 1:6, 7.
6 Atun sia nóm lepwolen eú sóssót, eli sia meefi pwe án Jiowa we ótót séfé esap fókkun war. Itá ach meefi ena a pwári pwe a apwangapwang ach lúkú? Aapw. Áwewe chék ren ei kapas áwewe. Atun a chék púppúng rán ren fitu wiik, eli sia meefi pwe esap chúen ttin akkar. Pwal ina usun, atun sia fókkun meefi lichippúng, eli sipwe meefi pwe ewe ótót séfé esap fókkun war. Iwe nge ika a péchékkúl ach lúkú, sia silei pwe án Kot kewe pwon repwe pwénúetá. (Kölf. 94:3, 14, 15; Ipru 6:17-19) Ach lúkú ena, epwe álisikich le sópweló le akkomwa ach fel ngeni Jiowa lón manawach.
7. Ifa ewe esin ekiek mi lamot sipwe túmúnúkich seni?
7 A pwal lamot an epwe péchékkúl ach lúkú pwe sipwe tongeni féri ewe angangen afalafal. Chómmóng chókkewe sia afalafal ngeniir ra meefi pwe ewe kapas allim usun warotoon án Kot we ótót séfé esap fókkun fis. (Mat. 24:14; Is. 33:32) Sipwe fókkun túmúnú pwe site usur le tipemwaramwareiti met Jiowa a áiti ngenikich. Ren an esap fis ena, a lamot ach sipwe akkapéchékkúla ach lúkú. Sipwele ppii úlúngát alen ach sipwe féri ena.
EKILONEI PWÓRÓUSEN EWE MÉÉN KEPICH
8-9. Ifa usun ach ekilonei pwóróusen ewe méén kepich a apéchékkúla ach lúkú?
8 Eú alen ach sipwe tongeni apéchékkúla ach lúkú, ina ren ach ekilonei pwóróusen ewe méén kepich. Ewe méén kepich a alúkúlúkúkich pwe án Kot kewe pwon repwe wesewesen pwénútá. Atun sia ekiekifichi popun an kawor ewe méén kepich, me úkúkún met Jiowa a pennúkúóló, iwe a péchékkúleló ach lúkú pwe epwe fókkun fis met i a pwonei usun eú manaw ese wor muchchún lón eú ótót mi múrinné seni ei. Pwata sia tongeni erá ena?
9 Met Jiowa a pennúkúóló ren an epwe awora ewe méén kepich? A tiinaato me láng Néún we mwánichi mi áchengicheng, chiechian we mi fókkun pacheéch ngeni, pwe epwe uputiw wóón fénúfan usun emén aramas mi unuséch. Atun Jesus a nóm wóón fénúfan a likiitú fán sókkopaten sókkun weires. A mááli eú sókkun máló mi ámmetek. A ifa me watteen ewe liiwin Jiowa a ménatiw! Ach we Kot mi tong esap fókkun mut ngeni Néún we an epwe kúna riáfféú me máló ren chék ach sipwe eáni eú manaw múrinné nge mi mwochomwoch. (Joh. 3:16; 1 Pet. 1:18, 19) Pokiten Jiowa a fangóló Néún we mi aúchea an epwe álisikich, iwe I epwe pwal nochchei ach sipwe tongeni kúna manaw tori feilfeiló lón ewe ótót séfé.
EKIEKI USUN ÁN JIOWA MANAMAN
10. Met Jiowa a tufichin féri me ren Efisos 3:20?
10 Oruuen alen ach sipwe apéchékkúla ach lúkú, ina ach ekieki án Jiowa manaman. A wor an manaman le apwénúetá meinisin met a eáni pwon. Ewer, me ren chómmóng aramas pwe ewe manaw esemuch lón ewe ótót séfé, ese fókkun tufich. Nge fán chómmóng, Jiowa a pwonei ekkewe mettóch aramas rese fókkun tongeni féri. A tongeni féri ena pún i ewe Kot mi Unusen Manaman. (Hiop 42:2; Mark. 10:27) Ina popun, sise máirú ren an pwonei ngenikich an epwe féri ekkewe mettóch mi fókkun amwarar.—Álleani Efisos 3:20.
11. Áweweei eú me lein án Kot kewe pwon mi amwarar. (Ppii ewe pwóór “ Ekkóch Pwon mi Amwarar Ra Fen Pwénúetá.”)
11 Ikkeei ekkóch ekkewe mettóch Jiowa a pwonei ngeni néún kewe aramas lón fansoun lóóm nge usun itá esap tongeni fis. A alúkúlúkú ngeni Apraham me Sara ar repwe néúni emén át lón ar ierin chinnap. (Ken. 17:15-17) A pwal ereni Apraham pwe mwirimwirin kewe repwe fénúeni ewe fénú Kanaan. Atun mwirimwirin Apraham kewe, ekkewe chón Israel, ra slave lón Isip ren fite fite ier, usun itá ena pwon esap tongeni fis. Nge a fis. Ló, ló, ló, Jiowa a erá pwe ewe fefin Elisapet epwe néúnéú lón an ierin chinnap. A pwal ereni Maria, ewe esaamwo tori mwán, an epwe néúnatiw Néún we. Ena mettóch epwe apwénúetá met Jiowa a pwonei fitengeréú ier me mwan, lón ewe tánipiin Eten!—Ken. 3:15.
12. Met Josua 23:14 me Aisea 55:10, 11 ra alúkúlúkú ngenikich usun án Jiowa manaman?
12 Atun sia ekieki usun meinisin án Jiowa kewe pwon me ifa usun a apwénúretá, sia weweiti pwe a watte an manaman. Iwe, epwe péchékkúleló ach lúkú an we pwon usun ewe ótót séfé. (Álleani Josua 23:14; Aisea 55:10, 11.) Ena mettóch a tongeni elipwákéchúkich le álisi aramas ar repwe weweiti pwe ewe pwon usun ewe ótót séfé, esap eú chék ttan are túttúlap. Iei met Jiowa a pwisin erá usun eú láng séfé me eú fénúfan séfé: “Ekei kapas, . . . ra let o allükülük.”—Pwär. 21:1, 5.
FÉRI EKKEWE METTÓCH EPWE APÉCHÉKKÚLA ACH RIRI NGENI JIOWA
EKKEWE MWICH
Ifa usun ei mettóch a tongeni apéchékkúla óm lúkú? (Ppii parakraf 13)
13. Ifa usun ach kewe mwich ra tongeni apéchékkúla ach lúkú? Apwóróusa eú pwóróus.
13 Aúlúngátin alen ach sipwe apéchékkúlaló ach lúkú, ina ach féri ekkewe mettóch mi weneiti ach riri ngeni Jiowa. Áwewe chék ren ifa usun sia kúna álillis seni ach kewe mwich. Anna, emén chienach mi áeá watteen fansoun lón sókkopaten angangen full-time, a erá: “Ekkewe mwich ra álisiei le apéchékkúla ai lúkú. Inaamwo ika ewe chón afalafal ese kon angéch le asukul are apwóróusa eú mineféén pwóróus, nge fán chómmóng ua rong och mettóch mi álisiei le weweéchúti ewe Paipel. Ena mettóch a apéchékkúla ai lúkú.” b A pwal péchékkúleló ach lúkú atun sia aúseling meefien chienach kewe lón ach kewe mwich.—Rom 1:11, 12; 10:17.
ANGANGEN AFALAFAL
Ifa usun ei mettóch a tongeni apéchékkúla óm lúkú? (Ppii parakraf 14)
14. Ifa usun ewe angangen afalafal a apéchékkúla ach lúkú?
14 Sia pwal apéchékkúla ach lúkú atun sia fiti ewe angangen afalafal. (Ipru 10:23) Barbara, emén chienach mi angang ngeni Jiowa ren lap seni 70 ier, a erá: “Fansoun meinisin, ua kúna pwe ewe angangen afalafal a apéchékkúla ai lúkú. Lapólóón ai fós ngeni aramas usun án Jiowa kewe pwon mi amwarar, pwal ina péchékkúlelóón ai lúkú.”
PWISIN KÁÉ
Ifa usun ei mettóch a tongeni apéchékkúla óm lúkú? (Ppii parakraf 15)
15. Ifa usun ach pwisin káé Paipel a apéchékkúla ach lúkú? (Pwal ppii ekkewe sasing.)
15 A pwal wor eú mettóch mi apéchékkúla ach lúkú, ina ach pwisin káé. Susan, emén chienach a kúna pwe a álilliséch ngeni atun a akkóta ineet epwe féri an pwisin káé. A erá: “Lón Ráninfel ua káé ewe lesen lón ewe Káéén Leenien Mas sipwe káé lón nan wiik. Sárinfál me Oruu, ua ammólnatá fán iten ewe mwich lón weekday. Nge lón ekkewe lusun rán, ua féri ai pwisin káé.” Pokiten Susan a fókkun fiti an kókkótun káé, iwe a sópwósópwóló le apéchékkúla an lúkú. Irene, pwal emén chienach mi angang fitu ier lón ach we ofesilap lón New York, a kúna pwe an káé án Paipel kewe oesini, a apéchékkúla an lúkú. A erá: “Ua fókkun mwaar ren pwénúetáán án Jiowa kewe oesini tori pwal mwo nge ekkewe kisikisin pwóróus.” c
“EPWE FOKUN PWÖNÜETÄ”
16. Pwata án Jiowa kapasen alúkúlúk ngeni Apakuk, a wor weween fán itach lón ei fansoun? (Ipru 10:36, 37)
16 Ekkóch néún Jiowa kewe chón angang ra fen witiwiti warotoon sópwólóón ei ótót ren langattam fansoun. Ekkóch aramas ra ekieki pwe a fókkun mmang warotoon ewe sópwólóón. Nge, Jiowa a silei meefien néún kewe aramas. Ren enletin, iei met a alúkúlúkú ngeni ewe soufós Apakuk: “Mine üpwe pwäri ngonuk epwap pwönüetä lon eu fansoun mi kefilitä. Nge fansoun an epwe pwönüetä epwe fokun müttir, nge esap chofana. Are epwe mang le pwönüetä, kopwe chök witiwit. Epwe fokun pwönüetä, nge esap mang.” (Ap. 2:3) Itá fán iten chék Apakuk án Kot na kapasen alúkúlúk? Are alon na a pwal wor weween fán itach lón ei fansoun? Fán emmwenien Jiowa, aposel Paulus a pwal néúnéú ekkena kapas ngeni ekkewe Chón Kraist mi ésúkúsúkú warotoon ewe ótót séfé. (Álleani Ipru 10:36, 37.) Ewer, sia tongeni lúkúlúk pwe inaamwo ika sia ekieki pwe a mmangoto án Jiowa apwénúetá an we pwon pwe epwe selánikich, nge “epwe fokun pwönüetä, nge esap mang!”
17. Ifa usun emén chienach Chón Kraist fefin a apwénúetá án Jiowa we kapasen fén ngeni Apakuk?
17 Chómmóng néún Jiowa kewe chón angang ra apwénúetá an kapasen fén ar repwe “chök witiwit.” Ekkóch me leir ra fen witiwit ren fite fite ier. Áwewe chék ren pwóróusen Louise, emén mi poputá le angang ngeni Jiowa lón ewe ier 1939. A erá: “Lón ena atun, ua ekieki pwe ewe Armaketon epwe akkomw fis me mwen ai áwesi high school. Nge ese fis. Ren fiti fite ier, a álilliséch ngeniei ai álleani pwóróusen ekkewe aramas lón Paipel iir mi witi án Jiowa epwe apwénúetá an kewe pwon. Ua álleani pwóróusen Noa, Apraham, Josef, me pwal ekkewe ekkóch iir mi witiwit ren langattam fansoun me mwen ar repwe kúna pwénútáán met Jiowa a eáni pwon ngeniir. Ám lúkú fansoun meinisin pwe ekkewe pwon repwe pwénúetá, a álisikem me ekkewe ekkóch le lúkúlúk pwe ewe ótót séfé a fókkun arapoto.” Chómmóng chókkewe mi angang ngeni Jiowa ren langattam fansoun, ra fókkun tipeeú ngeni ena!
18. Ifa usun ach kakkatol férien Kot kewe a apéchékkúla ach lúkú warotoon ewe ótót séfé?
18 Ewer, esaamwo waroto ewe ótót séfé. Iwe nge, ekieki usun ekkóch ekkewe mettóch ra fen nóm, áwewe chék ren ekkewe fúú, irá, man, me pwal aramas. Ese wor emén epwe tipemwaramwar pwe ekkena mettóch esap iir wesewesan, inaamwo ika a wor eú atun rese mwo fisitá. Ra nóm iei pokiten chék Jiowa a fériiretá. (Ken. 1:1, 26, 27) Ach we Kot a pwal pwonei pwe epwe fératá eú ótót séfé. Iwe epwe apwénúetá ena pwon. Lón ewe ótót séfé, aramas repwe eáni manaw esemuch, fengen me inis mi péchékkúl. Sia fókkun lúkúlúk pwe ewe ótót séfé epwe war lón ewe fansoun Jiowa a filatá.—Ais. 65:17; Pwär. 21:3, 4.
19. Ifa usun ka tongeni apéchékkúla óm lúkú?
19 Nge ren mwo iei, kopwe achocho úkúkún óm tufich le apéchékkúla óm lúkú. Fansoun meinisin, aúcheani ewe méén kepich. Ekieki usun án Jiowa manaman. Féri ekkewe mettóch epwe apéchékkúla óm riri ngeni Jiowa. Ika kopwe féri ekkena mettóch, kopwe emén me lein “chokewe mi angei mine Kot a eäni pwon ren ar lükü me mosonotam.”—Ipru 6:11, 12; Rom 5:5.
KÉL 139 Anchangei En me lón ewe Ótót Sefé
a Chómmóng aramas lón ei fansoun, rese lúkú ewe pwon usun ewe ótót séfé Paipel a fós usun. Ra ekieki pwe ina chék eú ttan, are eú túttúlap. Iwe nge, kich sia fókkun lúkú pwe meinisin met Jiowa a eáni pwon repwe pwénútá. Ikaamwo ina, nge a chúen lamot ach sipwe akkapéchékkúla ach lúkú. Ifa usun? Ei lesen epwe áweweei.
b Ekkóch ekkeei it ra siwil.
c Sia tongeni kúna chómmóng lesen usun án Paipel kewe oesini me lón ewe Research Guide for Jehovah’s Witnesses fán ewe itelap “Prophecy.” Pwal ppii ewe lesen itelapan, “Ekkewe Oesini mi fen Pwénútá” lón Ewe Leenien Mas NAMPA 2 2018.
