Úa uputiw lón ewe ier 1955, a wor rúúemén pwii watte. Úa mámmááritá lón éérún Finland, lón ewe leeni itan Vantaa.

Inei we a papatais me wiliiti emén Chón Pwáraatá Jiowa fitu ier me mwen úa uputiw. Iwe nge, semei we a ú ngeni ewe enlet, me ese mut ngeni inei we an epwe káé ngenikem me uweikem ngeni ekkewe mwiich. Iwe a kan asukulakem ekkewe pwóróus seni Paipel atun semei we ese nóm.

Seni lealúwéli, úa filaatá le angang ngeni Jiowa. Áwewe chék, atun a fisu ieri, nei we sense a fókkun lingeringeriitiei pokiten úse mochen mwéngé verilättyjä (Nokop minen Finland mi nofit ngeni chcha). A fiiei me ámmesaaló awei wóón efóch péún, me a purelong lón awei efóch fóók mi wor nokop wóón. Úa pééni péún, iwe a turutiw ewe fóók.

Atun a 12 ieri, semei we a máló. Mwirin ena, úa tongeni fiti ekkewe mwiich. Chón ewe mwichefel, ra fókkun kirekiréch ngeniei, ena a amwékútúei le feffeitá lón pekin ngún. Úa poputá le álleani ewe Paipel iteiten rán me káéfichi ekkewe puk seni ach we mwicheich. Ái féfféri ekkena a álisiei le papatais lón ewe August 8, 1969, atun a 14 ieri.

Atun úa áwesi ái sukul, úa poputá le pioneer. Fitu wiik mwirin, úa mwékút ngeni Pielavesi, kkan ngeni lukanapen Finland, pwe úpwe álillis ikewe mi wor osupwangen chón afalafal ie.

 Lón Pielavesi, úa chuuri emén fépwúl itan Sirkka, me a wiliiti pwúlúwei we mi áchengicheng. Úa fókkun sani pokiten a tipetekison me a fókkun ririéch ngeni Jiowa. Ese achocho ngeni an epwe iteféúló are akkomwa kinamween manawan. Ám me rúúemén áúa fókkun mochen angang ngeni Jiowa ren úkúúkún ám tufich ese lifilifil ia. Áúa pwúpwúlú lón ewe March 23, 1974. Mwirin ám apwúpwúlú, áúse ló honeymoon, nge áúa fen ló álillis lón Karttula, ikewe mi fókkun osupwangen chón afalafal ie.

Seni chék me lepoputáán ám pwúpwúlú, Jiowa a fen pwáári ngenikem pwe epwe awora osupwangem lón pekin áion iká áúa akkomwa Mwúún we. (Mat. 6:33) Áwewe chék, lón Karttula, ese wor wáám. Me akkomwan, áúa chék wawa pasiken. Iwe nge, atun winter a fókkun patapat. A lamot ngenikem efóch tarakú pwe áúpwe tongeni tikeri ekkewe aramas lón ám we watteen leenien afalafal. Nge ese naf néúm moni le mééni efóch wáám tarakú.

Áúa máirú pwe pwii we watte a etto chuurikem. A kirekiréch le fang ngenikem waan we. A fen mééni ewe insurance. A chék lamot áúpwe kamé káás. Iwe a wor wáám.

Jiowa a pwáári ngenikem pwe a wisen awora osupwangem, nge wisem ám áúpwe akkomwa Mwúún we.

Atun áúa fiti ewe Sukulen Pioneer lón ewe 1978, Raimo Kuokkanen, a emén ekkewe sense, a pesekem ám áúpwe ammasoua eché application fán iten ewe Sukulen Gilead. Iwe áúa poputá le káé fósun Merika pwe áúpwe tongeni fich ngeni ena sukul. Iwe nge, lón ewe 1980, me mwen áúa apply, áúa ketiw le álillis lón ewe keangen ofesilap Finland. Lón ena atun, ese mumu ngeni ekkewe chón Bethel ar repwe fiti Gilead. Nge áúa mochen álillis ikewe Jiowa a mochen áúpwe álillis ie, nge esap ia ám áúa mochen. Iwe áúa etiwa ewe etiwetiw. Iwe nge, áúa sópweeló le kákkáé fósun Merika assoun iká epwe suuk ngenikem ám áúpwe apply fán iten Gilead.

Mwirin fitu ier, ewe Mwichen Soupwúngúpwúng a mut ngeni ekkewe chón Bethel ar repwe apply ngeni ewe Sukulen Gilead. Ese pwen imwo áúa ammasoua eché application, nge esap pokiten áúa oput ám angang lón Bethel. Áúa fókkun  pwapwaiti ám angang! Áúa chék mochen álillis ikewe mi osupwangen chón afalafal ie iká ám mi fich ngeni. Áúa ketiw ngeni Gilead me áúa sochungio lón ewe fiik me tiuen class lón September 1985. Iwe áúa ttittiló Colombia.

Áúa kewis le álillis lón ewe keangen ofesilap lón Colombia. Úa fókkun achocho lón wisei we, nge mwirin eú ier, úa mochen álillis lón pwal eú leeni. Iwe epwe kerán ina ewe áeúin me sáingoon atun úa tingor ám áúpwe mwékút. Iwe a kewis ngenikem ám áúpwe misineri Neiva, lón ewe leeni itan Huila.

Úa fókkun sani ewe angangen afalafal. Atun úa pioneer lón Finland mwen ái pwúpwúlú, fán ekkóch úa kan afalafal seni lesossor tori lekuniol. Mwirin ám pwúpwúlú me Sirkka áúa kan afalafal unusen rán. Atun áúa afalafal lón ekkewe leeni mi towaw, fán ekkóch áúa chék annut leféén wáám we. Iká áúa féri ena, iwe ese lamot ngenikem áúpwe sáittam, me áúa tongeni mwittir poputá sorotáán ewe rán.

Atun áúa wiliiti misineri, áúa tinikken sefál. A chómmóngoló chóchóón chón ám we mwichefel, me pwiich kewe seni Colombia ra fókkun ésúúfél, pwáári tong, me aúcheani minne áúa féri.

Ese wor Chón Pwáraatá Jiowa lón ekkewe telinimw únúkkún Neiva, ikewe áúa wisen álillis ie. Iwe úa lólilen, iká ifa ussun ewe pwóróus allim epwe tori ekkena leeni. Iwe nge pokiten maun, ese fókkun túmún ngeni chón ekis ar repwe ló lón ekkena telinimw. Iwe úa tingorei Jiowa pwe emén seni ekkena telinimw epwe wiliiti Chón Pwáraatá Jiowa. Úa ekieki pwe a lamot eménna epwe nóm lón Neiva pwe epwe tongeni káé ewe enlet. Ina popun, úa ióteki pwe mwirin an papatais, epwe feffeitá me ásimawóló lón pekin ngún iwe mwirin liwiniti leenian pwe epwe tongeni afalafal. Itá úpwe silei pwe a fen wor án Jiowa kókkót mi fen kon múrinné seni minne úa ekieki.

Ekiseló mwirin ena, úa poputá le káé ngeni emén alúwél iten Fernando González, a nóm Algeciras lón eú ekkena telinimw ese wor Chón Pwáraatá Jiowa ie. Fernando a kan sái úkúúkún 30 mwail ngeni Neiva fán iten an angang. A ammólnatáéchú an káé iteiten wiik, me a pwal mwittir poputá le fiffiti ekkewe mwiich. Atun ewe áeúin wiiken án Fernando káé, a fen emwichafengeni fitemén chón leenian we me asukuler minne a káé.

Fernando a papatais lón ewe January 1990, wonu chék maram mwirin an poputá le káé. Mwirin ena, a pioneer. Pokiten a wor emén Chón Pwáraatá Jiowa lón Algeciras, iwe chón ewe keangen ofesilap ra meefi pwe a túmún án ekkóch special pioneer repwe kewis le álillis ikkena. Lón ewe February 1992, a poputá eú mwichefel lón ena telinimw.

Itá Fernando a chék akkafalafal lón leenian we? Aapw! Mwirin an pwúpwúlú, iir me pwúlúwan we ra mwékút ngeni San Vicente del Caguán, pwal eú sóópw ese wor Chón Pwáraatá Jiowa ie. Ra álillis ikena le féraatá eú mwichefel. Lón ewe 2002, Fernando a wiliiti emén chónemmwen mi wisen sáifetál, me iir me pwúlúwan we, Olga, ra sópweeló le chuchchuuri ekkewe mwichefel tori iei.

 Úa káé lamoten ái úpwe tichik lón ái iótek ussun ekkewe mettóch mi riri ngeni ái angang ngeni Jiowa. Jiowa epwe féri minne sise tufichin féri. Ren enletin, iei an ráás, nge esap ach.—Mat. 9:38.

Lón ewe 1990 a kewis ngenikem ám áúpwe wisen chuchchuuri ekkewe mwichefel. Áúa akkomw chuuri ekkewe mwichefel lón Bogotá ewe iolap. Áúa lólilen pwe áúsapw lipwákéch lón wisem na. Ám me pwúlúwei we ese wor aúcheam me ese wor met áúa lipwákéch lón. Me áúse ééreni le nóm lón telinimw mi tarangarang aramas. Iwe nge, Jiowa a apwénúetá an we pwon lón Filipai 2:13: “Pún Kot ewe a apéchékkúlakemi, a ngenikemi ewe mochen me ewe tufichin angang pwe ina met a pwapwa ren.”

Mwirin och fansoun, áúa wisen chuuri ekkewe mwichefel lón ewe leeni itan Medellín, ewe telinimw úa fós ussun me lepoputáán. Aramas ra fen éérenaaló féfférún akkachofesá wóón al pokiten rese chúen máirú iká a fis. Áwewe chék, lón eú atun úa káé ngeni emén lón imwan, aramas ra pekifengeniir lúkún. Itá úpwele op, nge nei we chón káé a chék sópweeló le álleani ekkewe parakraf, me ese rúké. Atun a wes le állea, a erá pwe epwe towu lúkún. Mwirin och fansoun, a tolongsefál fán rúúemén semirit me a ereniei fán mosonoson, “Omusaaló, úa towu eki nei kewe.”

A wor pwal ekkóch atun áúa nóm lón feiengaw. Lón eú atun, áúa afalafal imw me imw, pwúlúwei we a ssá ngeniei me a meseniwokkus. A erá pwe emén a peki. Úa fókkun máirú. Iwe nge mwirin, áúa mirititi pwe ena emén ese peki Sirkka, nge a mochen peki ewe mwán mi fetál únúkkún.

Lo, lo, lo, áúa éérenaaló ekkewe féfférún akkachofesá mi fiffis. Áúa péchékkúletá ren pwiich kewe lón ena leeni, ra kúkkúna ekkena esin weires me fán chómmóng a fis ngeniir mettóch mi kon ngaw seni ena. Áúa mirititi, pwe iká Jiowa a ákkálisiir, iwe epwe pwal álisikem. Fansoun meinisin, áúa álleasochisi án ekkewe mwán mi ásimaw kapasen emmwen, féri met mi lamot pwe áúpwe túmúnúéch, iwe likiti ngeni Jiowa.

Pwúngún pwe a wor ekkewe atun áúa meefi pwe a mmen efeiengaw, nge ren enletin rese. Fán eú, úa rong án rúúemén fefin púppúchérfengen kkan ngeni ikewe áúa nóm ie. Úse mochen katol ar ánini, nge ewe minne ká imwan ewe a ereniei pwe úpwe towu ren. Iwe úa mirititi pwe ese wor e ánini, nge rúúemén machchang iter parrot ra nikáppirú ekkewe aramas mi fóffós.

Lón ewe 1997, úa kewis le senseen ewe sukul fán iten chónálillisin mwichefel. b Úa fókkun sani le fiti ekkewe sukul ach we mwicheich a féri, nge úse fókkun ekieki pwe fán eú úpwe wisen sense.

Mwirin och fansoun, úa wisen district overseer. Atun a kaúló ena kókkót, úa liwiniti ái chuchchuuri ekkewe mwichefel. Ren úkúúkún 30 ier, úa pwapwaiti ái wiseni ewe wis sense me chónemmwen mi wisen sáifetál. Úa kúna chómmóng  feiéch seni ekkena wis. Iwe nge, sanne e mecheres. Úpwe áweweei.

Ngang emén mi tichik me uwonúkúnúk. Ena a álisi le likiitú fán ekkóch weires. Iwe nge, fán ekkóch úa kon tinikken le áwena mettóch mi mwáál lón ewe mwichefel. Fán ekkóch, úa éúréúra ekkóch ar repwe pwáári tong me repwe tipemirit ngeni ekkewe ekkóch. Iwe nge atun úa féri ena, úse pwal pwáári ekkena napanap úa ereniir ar repwe pwáári.—Rom 7:​21-23.

Pokiten ái kewe mwáál, fán ekkóch úa mmen lichippúng. (Rom 7:24) Lón eú atun, úa ereni Jiowa pwe a fen éch ái úpwe wes seni ái angangen misineri me liwiniti Finland. Lón na pwinin, úa fiti mwiich. Met úa rong seni ena mwiich a apéchékkúlaei ái úpwe chék nómotiw me achocho le angang wóón ái kewe apwangapwang. A chúng letipei tori iei ren ifa ussun Jiowa a pélúweni ái kewe iótek lón ewe napanap mi fataffatéch. Pwal och, úa fókkun kilisou ngeni ren ifa ussun a álisiei fán kirekiréch ái úpwe pworacho ngeni ái kewe apwangapwang.

Ám me Sirkka áúa fókkun kilisou ngeni Jiowa ren ám angang ngeni full-time lón unusen manawem. Me úa pwal kilisou ngeni Jiowa ren an efeiéchúei me fang ngeniei emén pwúlúwei mi tongeei me túppwél ngeniei lón ekkeei ier.

Ekiseló epwele 70 ieri, me úsapw chúen tongeni wiseni ewe wis sense me chónemmwen mi wisen sáifetál. Iwe nge, úse letipechou ren ena. Pwata? Pokiten úa fókkun lúkú pwe Jiowa a pwapwa ren ach fel ngeni fán tipetekison me ach mwareiti seni letipach mi uren tong me kilisou. (Mik. 6:8; Mark 12:​32-34) Iká sia mochen mwareiti Jiowa, ese lamot ach sipwe wiseni eú wis mi tekia.

Atun úa ekieki ussun ekkewe wis úa fen wiseniir, úa mirititi pwe úse wiseni ekkena wis pokiten úa múrinné seni ekkewe ekkóch, are pokiten a wor ái tufich. Esap fókkun ina! Nge úa wiseni ekkena wis pokiten án Jiowa úméúméch mi somwoló. A mut ngeniei ái úpwe álillis, inaamwo iká mi wor ái kewe apwangapwang. Iká esap pwúlún Jiowa, iwe úsapw tufichin apwénúetá wisei kena. Iwe, atun úa apwangapwang úa kúna án Jiowa álillis.—2 Kor. 12:9.