1. Met ewe paratis lón pekin ngún, me met a lamot sipwe úppós le féri?

 A WOR eú paratis wóón fénúfan lón ei fansoun mi ur ren aramas mi féri chómmóng angang mi múrinné. A ur ren fitu million aramas mi eáni ewe enletin kinamwe. Chókkewe iir mi fen nónnóm lón ei paratis ra úppós ar resap fókkun towu seni. Ra pwal mochen án chómmóng aramas repwe fitiir lón ena mettóch mi aúchea. Met ena? Ina ewe paratis lón pekin ngún! a

2. Ifa ussun a amwarar ewe paratis lón pekin ngún?

² Jiowa a féri eú leeni mi kinamwe lón eú napanap mi amwarar ikewe néún kewe aramas ra kinamwe me tipeeúfengen ie inaamwo iká ra nónnóm lón án Setan ei ótót mi ngaw me efeiengaw ikewe aramas ra koputfengen ie. (1 Jon 5:19; Pwár. 12:12) Ach we Kot mi tong a kúna ifa ussun ei ótót a efeiengawa aramas, nge I a efisi án néún kewe chón angang repwe meefi núkúnúkéch pwe repwe tongeni sópweeló le angang ngeni fán pwapwa. An we Kapas a áweweei pwe ewe paratis lón pekin ngún, ina eú leenien op mi núkúnúkéch me eú “tanipi mi nüküchöchön.” (Ais. 4:6; 58:11) Ren án Jiowa feiéch, chókkewe mi nónnóm lón ena paratis repwe meefi pwapwa me núkúnúkéch lón ekkeei ránin lesópwólóón mi áweires.—Ais. 54:14; 2 Tim. 3:1.

3. Ifa ussun ewe oesini lón Aisea sópwun 65 a akkomw pwénútá lón Israel lóóm?

³ Jiowa a néúnéú ewe soufós Aisea le áweweei epwe ifa nónnómun chókkewe mi nóm lón ewe paratis lón pekin ngún. Ka tongeni kúna an áwewe lón Aisea sópwun 65, ewe a ákkáeúin  pwénúetá lón ewe ier 537 mwen Kraist. Lón ena fansoun, ekkewe chón Jus mi áier ra ngaseló seni ar ooló lón Papilon me ra liwiniti wesetáán fénúer. Jiowa a efeiéchú néún kewe aramas me álisiir an epwe lingéchsefál ewe telinimwen Jerusalem mi fen taló, me a férisefál án ewe imwenfel epwe iolapen ewe fel mi enlet lón Israel.—Ais. 51:11; Sek. 8:3.

4. Ifa ussun ewe oesini lón Aisea sópwun 65 a pwéppwénútá lón ach ei fansoun?

⁴ Lón ewe ier 1919, a poputá ewe oruuen pwénútáán án Aisea we oesini, atun ekkewe chón fel ngeni Jiowa ra ngaseló seni ar fétek lón Papilon mi Lapalap. Ló, ló, ló, a chéúló ewe paratis lón pekin ngún wóón unusen fénúfan. Ekkewe chón afalafala pwóróusen ewe Mwú mi tinikken, ra poputááni chómmóng mwichefel me ra pwáári napanapen Chón Kraist kewe. Ekkewe mwán me fefin iir mi piin eáni féfférún akkachofesá are manawangaw, ra “eáni ewe manaw mi fé mi ffér me ren met Kot a tipeni.” (Efi. 4:24) Ewer, chómmóng me lein ekkena feiéch Aisea a fós ussur, repwe wesewesen fis lón ewe fénúfan séfé lón fansoun mwach. Nge pwal mwo nge iei, chómmóng feiéch sia kúkkúna lón ewe paratis lón pekin ngún. Sipwe ppii met weween ngenikich ena paratis lón pekin ngún, me pwata a lamot ach sisap fókkun towu seni.

NAPANAPEN CHÓKKEWE MI NÓM LÓN EWE PARATIS LÓN PEKIN NGÚN

5. Met sia pwapwaiti me lón ewe paratis lón pekin ngún me ren met Aisea 65:13 a pwonei?

⁵ Ra mét lón pekin ngún me ra meefi péchékkúl. Án Aisea we oesini a pwáári watteen sókkofesenin manawen chókkewe iir mi nóm lón ewe paratis lón pekin ngún me manawen chókkewe rese nóm lón. (Álleani Aisea 65:13.) Jiowa a kisáséú le fang chómmóng mettóch ngeni chókkewe mi fel ngeni pwe repwe ririéch ngeni. A fang ngenikich an we ngún mi fel, an we Kapas, me ekkewe puk me ekkewe álillis seni Paipel pwe sipwe tongeni “mongö o ün . . . [me] pwapwa.” (Apépé ngeni Pwáraatá 22:17.) Nge a fókkun sókkóló nónnómun chókkewe rese nóm lón ewe paratis lón pekin ngún pún ra “echik o kaka . . . , [me] säw.” Ese wor ar riri ngeni Kot.—Am. 8:11.

6. Ifa ussun Sowel 2:​21-24 a áweweei ekkóch ekkewe liffang Jiowa a fang ngenikich, me ifa ussun sia tongeni kúna feiéch seni?

⁶ Lón án Sowel we oesini, a néúnéú ekkewe mettóch mi aúchea ngeni manaw, áwewe chék ren féún wiich, wain, me apúra seni féún olif, le pwáári pwe Jiowa a kisáséú le awora ngeni néún kewe aramas met mi lamot ngeniir, kapachelong ekkewe mwéngé lón pekin ngún. (Sow. 2:​21-24) A féri ena ren an fang ngenikich ewe Paipel, ekkewe puk me álillis seni Paipel, ach we website, me ach kewe mwiich me mwichelap. Ach alamota ekkena mettóch iteiten rán, epwe efisi ach sipwe mét lón pekin ngún me meefi péchékkúl.

7. Met a efisi ach sipwe eáni eú letip mi kinamwe? (Aisea 65:14)

⁷ Ra pwapwa me menemenéch. Néún Kot kewe aramas ra tongeni ‘köl fän pwapwa’ pokiten ra fókkun kilisou ngeni. (Álleani Aisea 65:14.) Ekkewe pwóróus mi enlet mi apéchékkúlakich, ekkewe pwon mi oururukich lón án Kot we Kapas, me ach we ápilúkúlúk mi núkúchar mi lóngólóng wóón án Kraist we méén kepich, ra awora ngenikich eú letip mi kinamwe. Ach fóffósfengen me chienach kewe Chón Kraist ussun ekkena mettóch, a efisi ach sipwe eáni enletin pwapwa!—Kölf. 34:8; 133:​1-3.

8. Ikkefa ekkewe ruu napanap mi aúchea mi pwá me lón ewe paratis lón pekin ngún?

⁸ Ewe tong me tipeeúfengen lein néún Jiowa kewe aramas, ikkena ekkewe ruu napanap  mi aúchea mi pwá me lón ewe paratis lón pekin ngún. Ena ‘tipeeúfengen’ a álisikich le anchangei manawach lón ewe ótót séfé, ikewe néún Jiowa kewe chón angang repwe meefi ewe esin tong me tipeeú mi lap seni met ra meefi lón ei fansoun. (Kol. 3:14) Iei met emén Chón Kraist fefin a apasa ussun met a esilla ren néún Jiowa kewe aramas atun a ákkáeúin chuuriir: “Úse silei ifa ussun úpwe pwapwa pwal mwo nge lón ái famili. Ewe áeúin atun úa kúna án aramas enletin tongefengeniir, ina ewe atun úa chuuri Chón Pwáraatá Jiowa.” Iká emén a mochen eáni enletin pwapwa me menemenéch, iwe a lamot an epwe nóm lón ewe paratis lón pekin ngún. Ese lifilifil met chón ei fénúfan ra ekieki ussun néún Jiowa kewe chón angang, nge ra itéch are tikiéch me ren Jiowa me meinisin chókkewe mi fel ngeni.—Ais. 65:15.

9. Met Aisea 65:​16, 17 a pwonei ussun ekkewe osukosuk sia kúkkúna lón manawach?

⁹ Ra meefi kinamwe. Aisea 65:14 a apasa pwe chókkewe mi filaatá ar resap nóm lón ewe paratis lón pekin ngún, repwe ‘kechü fän weires o ngüngüres fän riaföün leluker.’ Nge, ifa ussun ren meinisin ekkewe mettóch mi efisi weiresin me riáfféún néún Kot kewe aramas? Ekiseló chék, ekkena mettóch repwe ‘manlüküla [me] monola’ seni Kot. (Álleani Aisea 65:​16, 17.) Jiowa epwe amóralóói ach kewe osukosuk, me ló, ló, ló, sisap chúen chemeni metekin letipach ren ekkena osukosuk mi torikich.

10. Pwata ka meefi pwe ach kapachelong lein ekkewe Chón Kraist, a ina eú feiéch? (Pwal ppii ewe sasing.)

¹⁰ Pwal mwo nge iei, sia meefi kinamwe atun sia nónnóm lón ach kewe mwiich, ikewe sia meefi ach ppánetá seni ach kewe aúrek pokiten ei ótót mi ngaw. Sia pwal álisi chienach kewe Chón Kraist ar repwe meefi kinamwe atun sia pwáári tong, pwapwa, kinamwe, kirekiréch, me tipepwetete, ekkóch me lein uwaan án Kot we ngún mi fel. (Kal. 5:​22, 23) A ifa me kilisouch ren ach chóni án Kot we mwicheich! Chókkewe iir mi chék nónnóm lón ewe paratis lón pekin ngún repwe unusen kúna pwénútáán án Kot we pwon ussun eú “läng mi fö me eu fanüfan mi fö.”

11. Me ren Aisea 65:​18, 19, ifa ussun ewe paratis lón pekin ngún Jiowa a féraatá a achchúngú letipach?

¹¹ Ra meefi ar kilisou me ra fókkun pwapwa. Aisea a pwal sópweeló le pwáári ekkewe popun sia “pwapwa o mwänek” lón ewe paratis lón pekin ngún. Jiowa a féraatá ena paratis lón kapas áwewe. (Álleani Aisea 65:​18, 19.) Ina pwata sisap máirú ren án Jiowa néúnéúkich le álisi aramas le towu seni ekkewe mwicheich lón ei ótót, ekkewe rese álisiir le silei ewe enlet  ussun Kot. Sisap pwal máirú ren án Jiowa néúnéúkich le álisi ekkena aramas le chóni ewe paratis mi amwarar lón kapas áwewe! Sia fókkun pwapwa ren ekkewe feiéch a torikich ren ach nóm lón ewe enlet, me sia fókkun mochen ereni aramas ussun ekkena feiéch.—Jer. 31:12.

12. Met meefiom ussun ekkewe pwon lón Aisea 65:​20-24, me pwata a ina meefiom?

¹² Sia pwal kilisou me fókkun pwapwa ren ewe ápilúkúlúk mi nóm rech pokiten ach eáni eú riri mi kinamwe lefilach me Jiowa. Ekieki meinisin ekkewe mettóch sipwe kúna me féri lón án Kot we ótót séfé! Iei met án Paipel pwon: “Esap chüen wor eman semirit . . . epwe manau ekoch chök rän, ika eman chinlap esap aunusa ierin manauan.” Sipwe ‘aüetä imwach o nonom lon [me] fotuki irän wain o ochei uan.’ Me ‘esap chüen fis pwe sipwe resin angang weires’ pokiten ‘ewe Samol mi Lapalap epwe afeichükich.’ A pwonei ngenikich eú manaw mi núkúnúkéch, menemenéch me wor aúchean. Jiowa a silei met a lamot ngeni emén me emén pwal mwo nge “mwen resamwo tüngor,” me epwe “ngeni ekewe mönümanau meinisin mine repwe menemenöch ren.”—Ais. 65:​20-24; Kölf. 145:16.

13. Ifa ussun Aisea 65:25 a áweweei ekkewe siwil aramas ra féri lón manawer atun ra poputá le angang ngeni Jiowa?

¹³ Ra eáni napanap mi kinamwe me ra meefi túmún. Ren álillisin án Kot we ngún mi fel, chómmóng chókkewe iir mi piin féfféri féfférún akkachofesá, me eáni manawen solá, a fókkun siwililó manawer. (Álleani Aisea 65:25.) Ra angang weires le likitaaló napanaper kewe minen lóóm. (Rom 12:2; Efi. 4:​22-24) Ewer, néún Kot kewe aramas, iir aramas rese unuséch, ina pwata sipwe chúen mwámmwáálliló. Iwe nge, Jiowa a etipeeúfengeni “sókkun aramas meinisin” lón eú ririin tong me kinamwe ese tongeni wor met epwe atai. (Tait. 2:11) Ina eú manaman ewe chék Kot mi unusen manaman a tongeni féri!

14. Ifa ussun a pwénúetá alon Aisea 65:25 lón manawen emén Chón Kraist mwán?

¹⁴ Itá aramas ra tongeni siwili napanaper? Áwewe chék iei pwóróusen emén alúwél. A kan soun towu me tolong lón kalapus mwen an esaamwo tori 20 ierin pokiten an eáni eú manaw mi limengaw me akkachofesá. A kalapus ren an solá lón tarakú, atai ekkewe imw me tolong lón, me a pwal atai ekkóch allúk. Me a chék mochen fiffiu ngeni aramas. Atun a kerán rong ussun ewe enlet seni Paipel, me poputá le fiffiti mwiich ren Chón Pwáraatá Jiowa, a fókkun lúkú pwe a kúna popun manawan, ina an epwe fel ngeni Jiowa lón ewe paratis lón pekin ngún. Mwirin an papatais, fán chómmóng a kan ekieki pwe Aisea 65:25 a weneiti manawan. A siwil ngeni emén aramas mi ussun siip, weween emén mi mosonoson, nge ese chúen ussun emén laion, weween emén mi arochongaw.

15. Pwata sia mochen etiwa ekkewe ekkóch le fitikich lón ewe paratis lón pekin ngún, me ifa ussun sia tongeni féri ena?

¹⁵ Aisea 65:13 a poputá ren ekkeei kapas: “Iei mine ewe Samol mi Lapalap a apasa.” Lesópwólóón wokisin 25 a apasa “iei alon ewe Samol mi Lapalap.” Fansoun meinisin, a pwénúetá met a apasa. (Ais. 55:​10, 11) Ewe paratis lón pekin ngún, a fen fiffis iei. Jiowa a féraatá eú mwicheichen pwipwi mi kkóló aúchean. Pokiten sia chóni ena mwicheich, sia tongeni eáni kinamwe me meefi túmún lón ei fénúfan mi ur ren féfférún akkachofesá. (Kölf. 72:7) Ren ekkena popun, sia mochen álisi chómmóng aramas úkúúkún ach tufich le fitikich lón ach we mwicheichen pwipwi Chón Kraist. Sia tongeni féri ena ren ach nefótófót wóón ach álisi aramas le wiliiti néún Jises chón káé.—Mat. 28:​19, 20.

 ÁLISI ARAMAS LE TOLONG LÓN EWE PARATIS LÓN PEKIN NGÚN

16. Met a tongeni álisi aramas le mochen tolong lón ewe paratis lón pekin ngún?

¹⁶ Emén me emén kich sia tongeni féri met ekkewe ekkóch repwe sani le tolong lón ewe paratis lón pekin ngún. Ren ach sipwe féri ena, a lamot ach sipwe áppirú Jiowa. I ese eriáni aramas le chóni an we mwicheich. Nge fen fán pwetete, a “pani” aramas ngeni i. (Jon 6:44; Jer. 31:3) Aramas mi letipwenechar mi káé ussun án Jiowa tong me napanapan kewe mi amwarar, ra pwisin mwékút le feito ren. Iwe, ifa ussun sipwe pwal panalong aramas lón ewe paratis lón pekin ngún ren napanapach kewe me féfférúch mi múrinné?

17. Ifa ussun sia tongeni álisi aramas le mochen tolong lón ewe paratis lón pekin ngún?

¹⁷ Eú alen ach sipwe lukeato aramas lón ewe paratis lón pekin ngún, ina ren ach féfférún tong me kirekiréch ngeni chienach kewe Chón Kraist. Atun ekkewe mineféto ra fiti ach kewe mwiich, sia mochen ar repwe kúna met ekkewe esap iir Chón Kraist eli mi fiti ekkewe mwiich lón Korint lóóm ra pwal kúna. Ra erá: “Kot a wesewesen nónnóm leimi.” (1 Kor. 14:​24, 25; Sek. 8:23) Ina minne, sipwe sópweeló le álleasochisi ei kapasen fén ach sipwe ‘kinamwefengen lefilach.’—1 Tes. 5:13.

18. Met a tongeni lukeato aramas ngeni ach we mwicheich?

¹⁸ Fansoun meinisin sipwe kan achocho le eáni ekiekin Jiowa ussun chienach kewe Chón Kraist. Sia féri ena ren ach nefótófót wóón napanaper kewe mi múrinné, nge esap wóón ar kewe apwangapwang, ekkewe repwele móróló. Fán tong, sia tongeni pwákini ekkewe osukosuk iká sipwe kan ‘kirekiréchfengen lefilach, unusen chúngúfengenikich, [me] enletin omusaaló tipisin emén me emén.’ (Efi. 4:32) Iwe, ekkewe aramas mi mochen kúna ekkena  esin napanap, repwe mochen tolong lón ewe paratis lón pekin ngún. b

NÓNNÓM LÓN EWE PARATIS LÓN PEKIN NGÚN

19. (a) Lón ewe pwóór “ Ra Towu Seni, Mwirin Ra Liwinsefál,” met ekkóch ra erá mwirin ar liwiniti ewe paratis lón pekin ngún? (b) Met a lamot sipwe úppós le féri? (Pwal ppii ewe sasing.)

¹⁹ A ifa me kilisouch ren ewe paratis lón pekin ngún! A fen lapóló múrinnéén lap seni me mwan, me a chómmóngoló chón fel ngeni Jiowa me ie. Sia mochen sópweeló le aúcheani ena paratis Jiowa a féri fán itach. Ngeni ié a mochen meefi péchékkúl, menemenéch, meefi kinamwe, me meefi túmún, a lamot epwe tolong lón ewe paratis lón pekin ngún, me esap fókkun towu seni! Iwe nge, sipwe túmúnúéch pokiten Setan a achocho le otupukich pwe sipwe towu seni. (1 Pit. 5:8; Pwár. 12:9) A lamot sisap mut ngeni an epwe sópwéch. Sipwe fókkun angang weires le túmúnú múrinnéén, liméchún, me kinamween ewe paratis lón pekin ngún.