EKKEWE chón káé Paipel mi letipwenechar ra usun chék chón kútta kolt. Mi lamot repwe angang weires me sópweló le kúkkútta ewe tipachem mi fókkun aúchea lón Paipel. Kich chón káé Paipel sia tongeni káé lesen seni ach etittina ekkeei úlúngát alen án aramas kúnékún kolt.

Anchangei mwo pwe ka fetál oroppen eú chénúpupu, nge ka kúna och mettóch usun eféú féúkúkkúnún faú mi nuponupetá ren ttinen ewe akkar. Ka rootiw me ka fókkun pwapwa pún ka kúna eféú féún kolt. A féúkúkkún seni mesen efóch masis, me ekkena esin féún kolt ra chókúkkún lap seni ekkewe féún taimon mi múrinné. Iwe, ese mwáál ka pwal nennefetál pwe kopwe ppii ika mi pwal wor ekkóch chienan.

Pwal ina chék usun, eú rán lóóm, emén néún Jiowa chón angang neman a feito ren imwom we pwe epwe erenuk pwóróusen ewe ápilúkúlúk lón Paipel. Neman ka fókkun chechchemeni ewe áeúin atun ka kúnékún féún kolt lón kapas áwewe. Neman ina ewe fansoun ka kerán kúna iten Kot we, Jiowa, me lón ewe Paipel. (Kölf. 83:18, NW) Are, neman ina ewe atun ka silei pwe ka tongeni wiliti chiechien Jiowa. (Jas. 2:23) Ka mwittir mirititi pwe ka kúna och mettóch mi aúchea seni kolt! Me neman ka pwal mwétéresiti óm kopwe kúna pwal ekkóch pwóróus mi aúchea me lón Paipel.

Fán ekkóch, a kan pwá fiteféú féún kolt mi fókkun féúkúkkún lón ekkewe chénúpupu. Lón fitu chék maram, ekkewe chón kút kolt mi angang weires ra tongeni ionfengeni fite paun kolt me ra tongeni améméló wóón fite fitengeréú chala.

Lupwen ka kerán poputá le káé Paipel ren emén Chón Pwáraatá Jiowa, neman ka meefi pwe usun itá en emén chón kút kolt fán an mworomwor mi masou ren kolt. Óm ekilonei ekkewe wokisin lón Paipel a alapaaló óm sile, iwe ka arap ngeni Jiowa. Atun óm mwasangasang le ekilonei ekkena pwóróus mi enlet lón Paipel, ka kúna ifa usun ka tongeni arap ngeni Jiowa me nónnóm lón an tong tori feilfeiló chék.​—Jas. 4:8; Jut. 20, 21.

Neman en ka fókkun tinikken le kútta ekkewe pwóróus mi aúchea lón Paipel usun chék emén mi kúkkútta féúkúkkúnún kolt. Mwirin óm káé ekkewe popun afalafal lón Paipel, neman a chúng letipom, iwe, ka  fangóló manawom ngeni Kot me papatais.​—Mat. 28:19, 20.

Emén chón kút kolt neman a tongeni kúnékún kolt me lón faú. Lón ekkóch leeni, a wor achaw a mwaren ekis watte ewe úkúkún kolt mi nofit ngeni, iwe aramas ra tongeni tuw are amékkú, angei, attatakisi, me uwawu ewe kolt seni lón. Lupwen sia nengeni ekkena mékkún achaw, neman sisap mwo nge kúna ewe kolt lón. Pwal mwo nge ekkewe esin féún achaw mi mwaren watte úkúkún ewe kolt lón, ina epwe 0.02 paun chék kolt epwe nóm leutun eféú féún achaw 2,000 paun choun! Iwe nge, emén chón kút kolt a chúen meefi pwe mi wor lamoten an epwe tuw ekkena esin féún achaw.

A pwal lamot án emén epwe angang weires mwirin an a fen káé “ekewe lepoputän lessen usun Kraist.” (Ipru 6:1, 2) A lamot angang weires ren óm kopwe kúna mineféén lesen mi álilliséch seni óm káé Paipel. Iwe, met kopwe féri pwe óm pwisin káéén Paipel epwe chúen uwaéch inaamwo ika ka fen káé ewe Paipel ren fite ier?

Kopwe sópweló óm mwasangasang le káé. Atun óm álleani eú pwóróus, kopwe áfánniéchú ekkewe kúkkún mettóch lón ka tongeni káé lesen seni. Ika ka sópweló óm achocho le káé, iwe kopwe kúna ekkewe pwóróus mi aúchea mi áiti ngonuk án Kot tipachem me emmwen. (Rom 11:33) Ren óm kopwe alapaaló óm sile lón Paipel, kopwe néúnéúéchú ekkewe minen álillisin kúttafichi pwóróus mi kawor lón fósun fénúom. Kopwe likiitú le kútta emmwen mi lamot ngonuk me pélúwen óm kewe kapas eis mi weneiti Paipel. Eisini ekkewe ekkóch ika menni wokisin me lesen ra meefi pwe a fókkun álilliséch me apéchékkúl ngeniir. Apwóróusa ngeni ekkewe ekkóch menni pwóróus ka aúcheani seni óm káé án Kot we Kapas.

Saminne ewe popun ka féri ekkena mettóch pwe kopwe chék ochukuchukatá óm sile. Ewe aposel Paulus a éúréúrakich, a erá pwe “silelap a afisätä lamalamtekia.” (1 Kor. 8:1) Iwe, kopwe angang weires pwe kopwe akkamwéchú óm tipetekison me péchékkúlen óm lúkú. Óm féri óm famili fel me óm pwisin káéén Paipel iteitan, epwe álisuk le manaweni ewe sókkun manaw mi tipeeú ngeni án Jiowa kewe allúk me epwe amwékútuk óm kopwe álisi pwal ekkóch aramas. Nge lap seni meinisin, kopwe pwapwa pún ka kúna och mettóch mi fókkun múrinné seni kolt.​—SalF. 3:13, 14.