Iei eú chék me lein ekkewe chómmóng mettóch chón oputa Jesus ra esiita i me néún kewe chón káé ren. Ewe Allúkún Moses a áweweei met epwe tongeni elimengawa emén, áwewe chék, och kilingaw, och chénú mi towu seni inis, are án emén attapa somáán aramas are man. Ewe Allúk a pwal awora kapasen éúréúr ren ifa usun emén epwe limeliméch sefál. A tongeni eáni asor, tútú, are emén epwe osupwatiw konik wóón.​—Lif., sópwun 11-15; Num., sópwun 19.

Ekkewe sense chón Jus are rappai ra apachaatá lón ewe Allúk pwal ekkóch pwisin ar allúk. Me ren eú puk, ekkewe rappai ra féri pwal ekkóch allúk mi tichik usun met epwe elimengawa emén me ifa usun a tongeni efisi án pwal ekkóch aramas repwe limengaw. Ekkena rappai ra pwal féri ekkewe allúk usun met sókkun pisek esap tongeni limengaw me met sókkun epwe tongeni limengaw me pwal ekkewe mettóch mi lamot aramas repwe féri pwe repwe limeliméch sefál.

Ekkewe chón oputa Jesus ra eisini i: “Pwota noumw kewe chon kaiö resap apwönüetä pwüngün ekewe allük seni ach kewe lewo, nge ra mongö aner won pöür mi limengau?” (Mark. 7:5) Ekkewe Farisi rese fósun féfférún limelim, weween téttélún paw me mwen án emén epwe mwéngé. Nge ra fen féri allúkún ar lamalam pwe me mwen án emén epwe mwéngé, mi lamot emén epwe ninitiw konik wóón péún eménna. Me ren ewe puk sia fen fós usun, ekkewe rappai ra “pwal pwúngúpwúng wóón menni sepi repwe tongeni áeá fán iten ninilóón ewe konik, met sókkun konik epwe fich, ié epwe wisen ninatiw ewe konik, me úkúkún tefen péún aramas ewe konik epwe ninitiw wóón.”

Ifa meefien Jesus usun meinisin ekkena allúk aramas ra pwisin fératá? A ereni ekkewe néúwisin lamalam chón Jus: “A fokun pwüng mine Aisea a fen osuni usumi. Ämi oua chon likatuputup usun a fen mak: ‘Kot a apasa: Ekei aramas ra asamoluei ren kapas chök, nge leluker a fokun toau seniei [Jiowa]. A lomotongau ar fel ngeniei, pun ra aiti ngeni aramas förien aramas allük, usun itä nge ai kewe allük.’ Ämi oua likitala an Kot kewe allük, nge oua aleasochis ngeni aitien aramas.”​—Mark. 7:6-8.