SIA osupwangen mosonottam lap seni lóóm, pokiten a weiresiló manawach lón ekkeei “ränin lesopolan.” (2 Tim. 3:1-5) Chómmóng aramas rese mosonottam. Ra pwisin achéchéér, ra sani le ánini, me rese nemenifichi pwisin iir. Ina minne, sipwe eisini pwisinkich: ‘Use chúen mosonottam usun chék ekkewe aramas wiliórui? Met weween enletin mosonottam? Met ua tongeni féri pwe mosonottam epwe kinikinin manawei?’

Met weween ewe kapas “mosonotam” lón néúnéún me ren Paipel? A wewe ngeni pwe esap chék likiitú fán osukosuk. Emén mi mosonottam a likiitú ren eú popun, weween pwe emén a ápilúkúlúkú pwe ena mettóch epwe múrinnéló. Ese ekieki chék pwisin i nge a pwal afaani meefien ekkewe ekkóch, pwal mwo nge chókkewe mi asonga are kirikiringaw ngeni. A sópweló le ápilúkúlúkú pwe ar ririfengen epwe múrinnéló. Nge ese ámáirú ena pwe Paipel a erá pwe mosonottam a fis pokiten tong. * (1 Kor. 13:4) Mosonottam pwal eú kinikinin ewe manaman mi fel. (Kal. 5:22, 23) Ina minne, met a lamot sipwe féri pwe sipwe enletin mosonottam?

Ren ach sipwe mosonottam, a lamot ach sipwe iótek fán iten álillisin án Jiowa we manaman mi fel, ewe a kan ngengngeni chókkewe mi eáni lúkúlúk wóón i. (Luk. 11:13) Ena manaman a fókkun péchékkúl, nge a chúen lamot ach sipwe etipeeúfengeni féfférúch me ach kewe iótek. (Kölf. 86:10, 11) Ei a wewe ngeni pwe sipwe fókkun achocho le pwári mosonottam iteiten rán me féri pwe epwe kinikinin manawach. Nge fán ekkóch neman sise féri ena. Met a tongeni álisikich?

A lamot ach sipwe káé me áppirú án Jesus leenien áppirú mi unuséch. Lupwen ewe aposel Paulus a fós usun ewe napanap “mi fö,” mi kapachelong mosonottam, a pesei: “Ewe kinamwe Kraist a ngenikemi epwe nemeni letipemi.” (Kol. 3:10, 12, 15) Ren ach sipwe féri ena, a lamot pwe sipwe áppirú án Jesus leenien áppirú me unusen lúkúlúk pwe lón fansoun mi fich, Kot epwe áwena mettóch. Ika sia eáni ena lúkúlúk, esap péút senikich ach mosonottam, ese lifilifil met ra fiffis.​—Joh. 14:27; 16:33.

Oukich meinisin sia mochen pwe ewe ótót sefé epwele mwittir feito. Nge sia káé ach sipwe alapaaló ach mosonottam lupwen sia ekieki úkúkún án Jiowa mosonottam ngenikich. Paipel a alúkúlúkúkich: “Ewe Samol esap mang le apwönüetä an pwon usun ekoch ra ekieki, pwe a mosonotam ngenikemi, pun esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Pet. 3:9) Iwe, ika sia ekieki án Jiowa mosonottam ngenikich, sipwe pwal alapaaló ach mosonottam ngeni ekkewe ekkóch. (Rom 2:4) Ineet a lamot sipwe mosonottam?

A chómmóng fansoun a lamot mosonottam lón ránin manawach. Áwewe chék, a lamot mosonottam pwe sisap atai án ekkewe ekkóch pwóróus ika sia meefi pwe mei wor mettóch a lamot sipwe apasa. (Jas. 1:19) A pwal lamot mosonottam atun emén a asongakich. Lap seni ach sipwe songokkái, a éch le chechchemeni féfférún Jiowa me Jesus ngeni ach kewe apwangapwang. Rese nefótófót wóón ekkewe kúkkún mettóch sia kan mwámmwáálliló wóón. Nge ra nengeni ekkewe napanap mi múrinné sia eáni me mosonottam le ngenikich fansoun ach sipwe múrinnéló.​—1 Tim. 1:16; 1 Pet. 3:12.

A pwal lamot mosonottam atun emén a erenikich pwe sia apasa are féri och mettóch mi mwáál. Neman sia mwittir song me pélúweni. Nge án Kot Kapas a erenikich pwe sisap féri ina usun. A erá: “Eman chon tipemosonoson a mürina seni eman chon tipetekia. Kosap songokai, pun song a nom lon letipen chon umwes.” (SalAf. 7:8, 9) Ina minne, inaamwo ika ewe tipimwáál ngenikich a unusen mwáál, nge a lamot sipwe mosonottam me ekiekéch me mwan sipwe féri och. Ina met Jesus a féri atun ekkewe ekkóch ra tipimwáál ngeni.​—Mat. 11:19.

A lamot ngeni ekkewe sam me in ar repwe mosonottam, ákkáeúin atun ra álisi néúr kewe le áwena napanaper are péútaaló mochen mi ngaw. Usun chék pwóróusen Mattias, ewe mi angang lón Bethel me Scandinavia. Lesáráféén Mattias, chienan kewe chón sukul ra soun ámángawa pokiten an lúkú. Lepoputáán, seman kewe mi inan rese silei minne a fiffis. Nge mwirin, ra kúna pwe a poputá le tipemwaramwareiti an lúkú. Semen Mattias we itan Gillis, a erá pwe a lamot ngeni i me pwúlúwan we mosonottam lón ena atun. Mattias epwe eáni kapas eis usun choweán: “Ié Kot? Epwe ifa ika Paipel esap ina án Kot Kapas? Ifa usun sia silei pwe wesewesen Kot a kútta ei are ena senikich?” A pwal eisini seman: “Pwata upwe kúna kapwúng ika use eáni memmeef me lúkú usumi?”

Gillis a áweweei: “Fán ekkóch án néúm we át eáni kapas eis a apasa lón song, esap ngenikem me inan we nge ngeni ewe enlet, ewe me ren, ina met a áweiresi manawan.” Ifa usun  Gillis a álisi néún we? “Ngang me nei we át aua mómmóót me pwóppwóróus ren fitu fitu awa.” Lape ngeni, Gillis a chék aúseling ngeni Mattias me eisini i kapas eis pwe epwe sótun weweiti meefian me ekiekin. Fán ekkóch Gillis a áweweei och mettóch ngeni néún we me ereni an epwe mwo ekieki ren eú rán are lap seni me mwen repwe fóssefál. Fán ekkóch, Gillis epwe erá pwe i epwe pwal ekieki ren fitu rán wóón met néún we a apasa. Lón ar keei fansoun pwóppwóróusfengen mi kan fiffis iteitan, Mattias a poputá le weweiti weween ewe méén kepich, me weweiti pwe Jiowa a tongekich, me a wor an pwúúng le nemenikich. Seman we a erá: “A lamot fansoun, me lape ngeni mi weires, nge ekis me ekis an tong ngeni Jiowa a mámmááritá lón letipan. Ngang me pwúlúwei we aua fókkun pwapwa pwe ám achocho le mosonottam le álisi néúm we lón an ierin teenage a wor lamotan me a kkúú letipan.”

Atun Gillis me pwúlúwan we ra mosonottam le álisi néúr we, ra lúkúlúk pwe Jiowa epwe álisiir. Gillis a erá: “Fán chómmóng ua ereni Mattias pwe ám tong mi alóllóól ngeni a amwékútúkem me inan we pwe aupwe tingormaw pwe Jiowa epwe álisi i le wewe.” Ekkeei sam me in ra fókkun pwapwa pwe ra mosonottam me rese fangetá.

A pwal lamot mosonottam ika sia túmúnú emén chón ach famili are emén chienach mi semmwen ren langattam fansoun. Usun chék pwóróusen Ellen, * emén mi pwal nónnóm lón Scandinavia.

Ina epwe walu ier ra ló, pwúlúwen Ellen a úri eú semmwen mi efeiengawa tupwuan. Minne a fis ngeni, a efisi an esap chúen meefi pwapwa, letipechou, are tong. Ei mettóch a fókkun áweiresi Ellen. A erá: “A lamot watteen mosonottam me iótek fán chómmóng.” A pwal erá: “Ewe wokisin ua fókkun sani mi oururuei, Filipi 4:13 (Testament Mi Fö), ewe mi erá: ‘Ngang mi tufich ren mettoch meinisin lon ewe emon mi apochokkulaei.’” Ren án Jiowa manaman me álillis, Ellen a likiitú fán mosonottam.​—Kölf. 62:5, 6.

Pwúngún, ewe leenien áppirú mi fókkun múrinné fán iten pwáraalóón mosonottam ina i pwisin Jiowa. (2 Pet. 3:15) Lón Paipel, sia kan álleani usun watteen án Jiowa mosonottam. (Ne. 9:30; Ais. 30:18) En mi chemeni napanapen án Jiowa pélúweni Apraham atun a eisini I chómmóng kapas eis usun filian le ataieló Sotom? Jiowa ese atai án Apraham fós. A mosonottam le aúseling ngeni eú me eú án Apraham kapas eis me aúrek. Mwirin, Jiowa a pwári pwe i a rongorong án Apraham kewe aúrek me a alúkúlúkú i pwe esap ataieló Sotom, inaamwo ika engol chék aramas mi pwúng ra nóm lón ena telinimw. (Ken. 18:22-33) Fansoun meinisin, Jiowa a kan aúseling fán mosonottam, me ese fókkun mwittir ngeni song!

Mosonottam a fókkun lamot lón napanap mi fé, a lamot meinisin Chón Kraist repwe eáni. Ika sia féri úkúkún ach tufich pwe sipwe enletin mosonottam, sia asamolu Jiowa, Semach we mi tong me mosonottam, me sipwe fit lein “chokewe mi angei mine Kot a eäni pwon ren ar lükü me mosonotam.”​—Ipru 6:10-12.