1. Met án Aisea we oesini a apasa usun Jesus, me pwata ena oesini a apéchékkúlakich?

ÁN Aisea we oesini usun Jesus Kraist a apéchékkúlakich me awora ngenikich ápilúkúlúk. Aisea a oesini pwe Jesus “esap eäni apwüng ren künan mesan, esap pwal apwüngala och ren rongeen selingan” nge epwe “apwüngü chon wöüngau fän pwüng.” (Ais. 11:3, 4) Pwata ena mettóch a apéchékkúlakich? Pokiten sia nónnóm lón ei fénúfan mi uren aapaap, me aramas ra kan apwúngúfengenniir ren met ra kúna me lúkún. Sia fókkun osupwangen emén Soukapwúng mi unuséch, ina i Jesus, ewe esap apwúngúkich ren minne chék a kúna ren napanapach me lúkún!

2. Met Jesus a allúkú ngenikich ach sipwe féri, me met sipwele pwóróus wóón lón ei lesen?

² Iteiten rán, sia kan ekiekietá och ekiek usun aramas. Nge pokiten sise usun unuséchún Jesus, iwe ese unusen pwúng minne sia ekieki. Sia mwittir tipetipeló ren kúnaen mesach. Nge Jesus a allúkú ngenikich: “Ousap apwüngü eman ren mine oua küna me  lükün, nge oupwe eäni apwüng fän pwüng.” (Joh. 7:24) Ina minne, Jesus a mochen ach sipwe áppirú i me sisap apwúngú aramas ren napanaper me lúkún. Lón ei lesen, sipwe pwóróus usun ekkeei úlúngát mettóch mi tongeni etipetipa ach ekiek usun aramas: wesetáán fénúer are ar lewo, úkúkún wéúúr, me ieriir. Lón ekkena mettóch, sipwe káé ifa usun sipwe tongeni álleasochisi Jesus ach sisap apwúngú aramas ren napanaper me lúkún.

3, 4. (a) Pwata a siwil án Petrus ekiek usun ekkewe chón lúkún Israel? (Ppii ewe sasing lepoputáán ei lesen.) (b) Ifa ewe mineféén pwóróus mi enlet Jiowa a áiti ngeni Petrus?

³ Anchangei meefien aposel Petrus lupwen ekkewe mwán ra tingorei an epwe feiló Seserea lón imwen Kornelius ewe chón lúkún Israel! (Föf. 10:17-29) Petrus a mááritá lón ewe ekiek pwe ekkewe chón lúkún Israel iir mi limengaw. Nge a kerán fis ngeni ekkóch mettóch mi efisi an epwe siwili an ekiek. Áwewe chék, Kot a ékúna ngeni Petrus och mettóch. (Föf. 10:9-16) Lón kúnaen Petrus we, a kúna och mettóch mi usun eché chenikam a feffeitiw me láng me a uren sókkopaten man mi limengaw me ren chón Jus. Mwirin och méngúngú a ereni: “Petrus kopwe ütä! Kopwe niela ekei man o kopwe ochoch fituker!” Petrus a apasa pwe esap fókkun mwéngé. Nge ewe méngúngú a apasa: “Kosap apasa pwe a limengau och mettoch are Kot a apasa pwe a limöch.” Mwirin ena, Petrus ese weweiti met ena méngúngú a mochen ereni. Iwe lón na chék atun, néún Kornelius kewe chón angang ra war. Án Kot we manaman mi fel a emmweni Petrus le feiló ngeni imwen Kornelius we, iwe Petrus a fitaaló ekkena mwán.

⁴ Ika Petrus a chék apwúngú mettóch ‘ren mine a küna me lükün,’ iwe esap fis pwe a ló ngeni imwen Kornelius we. Ekkewe chón Jus rese kan ló ngeni imwen chón lúkún Israel. Nge pwata Petrus a ló? Inaamwo ika Petrus a aapaap ngeni ekkewe chón lúkún Israel nge a siwili an ekiek ren met Kot a ékúna ngeni, me án Kot we manaman mi fel a emmweni i. Mwirin án Petrus aúseling ngeni Kornelius, a erá: “Iei üa fokun mefi pwe a let pwe Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.” (Föf. 10:34, 35) Me ren Petrus, a mmen amwarar ena mineféén pwóróus, me epwe kkúú meinisin ekkewe Chón Kraist. Ifa usun?

5. (a) Met Jiowa a mochen Chón Kraist meinisin repwe weweiti? (b) Inaamwo ika sia silei ewe enlet, nge met sókkun memmeef sipwe chúen tongeni eáni?

⁵ Jiowa a néúnéú Petrus le álisi ekkewe Chón Kraist meinisin le weweiti pwe I ese lifilifil aramas. Jiowa ese pwal ekieki ika kich chón menni fénú, met ach lewo, einang are fósun fénúach. Ika sia niwokkusiti Kot me féri minne mi pwúng, iwe epwe etiwakich. (Kal. 3:26-28; Pwär. 7:9, 10) Ese mwáál ka silei ena mettóch. Nge ifa usun ika ka mááritá lón eú fénú are famili ra kan lifilifil aramas? Itá epwe tufich an epwe ekis nóm reom ena esin memmeef inaamwo ika pwe me reom  kese ina usun? Pwal mwo nge mwirin án Petrus álisi ekkóch le mirititi pwe Kot ese lifilifil aramas, nge a wor atun pwe pwisin i a pwári an lifilifil aramas. (Kal. 2:11-14) Ina minne, ifa usun sipwe tongeni álleasochisi Jesus me úkútiw le apwúngú aramas ren chék napanaper me lúkún?

6. (a) Met a tongeni álisikich le péútaaló ewe mettóch lifilifil aramas? (b) Met án ewe mwán mi ásimaw we repot a pwári usun pwisin i?

⁶ Ren ach sipwe silei ika sia lifilifil aramas, mi lamot sipwe etittina pwisinkich me aléllééi ach ekiek ngeni minne sia káé seni án Kot we Kapas. (Kölf. 119:105) Sia pwal tongeni tingorei emén chiechiach ika a fen esilla pwe sia lifilifil aramas nge kich pwisin sise tepereni. (Kal. 2:11, 14) Neman sia kon kan eáni ekkena sókkun memmeef, nge sise fen meefi pwe sia ina usun! Iei met a fis ngeni emén mwán mi ásimaw. A makkeei eú repot ngeni ewe keangen ofesilap usun eú pean pwúpwúlú mi fókkun achocho lón ar angang ngeni Jiowa full-time. Ewe mwán pwúpwúlú, chón eú einang aramas ra kan ekieki pwe iir mi lamot kisikis. Ewe mwán mi ásimaw a makkeei lón an we repot pwe ena mwán a fókkun múrinné nge a pwal sópweló le apasa: “Inaamwo ika i chón eú einang nge féfférún kewe me napanapen manawan a álisi ekkewe ekkóch ar repwe mirititi pwe esap meinisin chón ena einang ra chék limengaw me napanapangaw manawer.” Ifa ewe lesen fán itach? Ese lifilifil úkúkún wisach lón án Jiowa we mwicheich, nge mi lamot sipwe etittina pwisinkich me etiwa ewe álillis pwe sipwe tongeni esilla ika a chúen nóm rech och memmeefin lifilifil aramas. Iwe pwal met sipwe tongeni féri?

7. Ifa usun sipwe tongeni pwáraatá pwe sia fen ‘fokun suki letipach’?

⁷ Ika sia ‘fokun suki letipach’ sipwe siwili aapaap ngeni tong. (2 Kor. 6:11-13) Ka kan sani le kukkunou chék ngeni chókkewe mi léllé fénúemi, ámi einang, lewo are fós? Ika ina, sótun kunou ren pwal ekkewe ekkóch. Ka tongeni etiwa pwiich kewe seni sókkopaten fénú pwe oupwe mwin le afalafal. Are ka tongeni etiwer lón imwom pwe oupwe mwéngéfengen are kunoufengen. (Föf. 16:14, 15) Iwe ló, ló, ló, letipom epwe fókkun uren tong pwe ese chúen wor memmeefin aapaap lón. Iei sipwe pwóróus wóón pwal eú mettóch sia tongeni apwúngú aramas wóón ‘ren mine sia küna me lükün.’

8. Met sia tongeni káé seni Lifitikos 19:15 ren ifa usun wéún aramas a tongeni kkúú ach ekiek usur?

⁸ Wéúéchún are wéúngawen aramas a tongeni kkúú ach ekiek usur. Lifitikos 19:15 a erá: “Ousap peni eman mi wöüngau ika awina eman mi lap, nge oupwe eäni kapwüng ngeni chon arumi fän pwüng.” Ifa usun wéún emén a tongeni kkúú ach ekiek usun?

9. Ifa ewe pwóróus mi eletipechou Salomon a makkeei, me ifa ewe lesen fán itach?

⁹ Fán emmwenien Kot, Salomon a makkeei ei pwóróus mi eletipechou: “Eman chon  wöüngau a koput me ren aramas, pwal mwo nge ren chon arun, nge eman chon wöümong a wor chomong chiechian.” (SalF. 14:20) Met ena wokisin a áiti ngenikich? Ika sise túmúnúéch, sia tongeni mochen chék chiechi ngeni pwiich kewe mi wéúéch nge esap fen ekkewe mi wéúngaw. Pwata a fókkun efeiengaw ach sipwe apwúngú aramas alóngólóng wóón wéúúr?

10. Ifa ewe osukosuk James a éúréúra ekkewe Chón Kraist usun?

¹⁰ Ika sia apwúngú pwiich kewe alóngólóng wóón ar pisekisek are wéúngaw, iwe sia tongeni efisi tipefesen lón ewe mwichefel. Ina met a fis ngeni ekkóch mwichefel lón fansoun ekkewe aposel, iwe James a éúréúra ekkena Chón Kraist usun. (Álleani James 2:1-4.) Sise tongeni mut ngeni tipefesen an epwe fis lón ach mwichefel. Iwe, ifa usun sipwe túmúnúkich ach sisap apwúngú aramas alóngólóng wóón wéúúr?

11. Itá wéúéchún are wéúngawen emén epwe álisi le ririéch ngeni Kot? Áweweei.

¹¹ Mi lamot ach sipwe eáni án Jiowa ekiek usun pwiich kewe. Jiowa ese aúcheani emén pokiten i mi pisekisek are wéúngaw. Ach riri ngeni Jiowa ese lóngólóng wóón úkúkún néúch moni are pisekich. Pwúngún pwe Jesus a apasa: “Epwe fokun weires ngeni aramas mi pisekisek ar repwe tolong lon Mwün Läng,” nge ese apasa pwe esap fókkun tufich. (Mat. 19:23) Jesus a pwal apasa: “Oua feiöch  ämi mi wöüngau, pun oupwe mwüni ewe Mwün Kot.” (Luk. 6:20) Nge esap weween pwe chón wéúngaw meinisin repwe aúseling ngeni Jesus me kúna feiéch mi kkóló aúchean. A wor chómmóng aramas mi wéúngaw rese tapweló mwirin Jesus. Ren enletin, sise tongeni apasa pwe án emén riri ngeni Jiowa a lóngólóng wóón minne a nóm ren.

12. Met ewe Paipel a áiti ngenikich usun ekkewe mi wéúéch me ekkewe mi wéúngaw?

¹² Mi wor pwiich kewe mi wéúéch me wéúngaw me lein néún Jiowa kewe aramas. Nge iir meinisin ra tongei Jiowa me angang ngeni seni unusen letiper. Ewe Paipel a ereni ekkewe mi wéúéch pwe “resap pwal anomu ar apilükülük won wöür epwe morola, nge repwe apilükülükü Kot.” (Álleani 1 Timoty 6:17-19.) Án Kot we Kapas a pwal éúréúra meinisin néún Jiowa kewe chón angang, chókkewe mi wéúéch me wéúngaw, pwe mi efeiengaw ar repwe tongei moni. (1 Tim. 6:9, 10) Lupwen sia eáni án Jiowa ekiek usun pwiich kewe, iwe sisap apwúngúúr ren úkúkún wéúúr. Nge ifa usun ren úkúkún ierin emén? Mi éch ach sipwe apwúngú aramas alóngólóng wóón ieriir?

13. Met ewe Paipel a áiti ngenikich usun ach pwáraatá tong ngeni ekkewe mi mwukóló?

¹³ Fán chómmóng ewe Paipel a fós usun lamoten ach sipwe súféliti ekkewe chinnap are chókkewe mi mwukóló. Lifitikos 19:32 a erá: “Kopwe ütä me mwen eman mi pwech möküran o asamolu ekewe chinlap, kopwe meninitiei ngang ewe Samol mi Lapalap om we Kot.” Än Salomon Fos 16:31 a erenikich pwe “meten mökür mi üwan epa mwärämwär mi ling, a fis ngeni eman mi manau fän pwüng.” Paulus a ereni Timoty an esap kapas péchékkúl ngeni ekkewe chinnap mwán nge epwe chék fós ngeniir usun itá nge iir seman. (1 Tim. 5:1, 2) Inaamwo ika Timoty a wisen emmweni ekkewe Chón Kraist mwán mi mwukóló, nge a lamot epwe pwáraatá tong me súfél fansoun meinisin.

14. Ineet atun epwe tongeni lamot ach sipwe áwena emén mi watte senikich?

¹⁴ Ifa usun ika emén mi mwukóló a pwisin filatá an epwe tipis are apéchékkúla och mettóch mi eletipechowu Jiowa? Me ren Jiowa emén mi pwisin filatá an epwe féri tipis epwe chék kúna chappen an tipis, inaamwo ika i emén chinnap me a ésúfél me ren aramas. Nengeni ewe kapasen emmwen mi mak lón Isikiel 9:5, 6: “Üa rongorong pwe Kot a apasa ngeni pwal ekewe ekoch mwän, ‘Oupwe tapwela mürin ätei lon ei telinimw o niela ekewe aramas . . . Oupwe fokun niela chinlap mwän me alüal me föpwül, pwal semirit me fefin.’” Sia kúna pwal ena esin ekiek lón án Aisea we oesini. (Ais. 65:20) Ina minne, ach súféliti Jiowa, ewe Kot mi nóm seni me lóóm lóóm, ina met a lamot seni meinisin. (Tan. 7:9, 10, 13, 14) Ach súfél fán iten Kot epwe apworaikich le áwena emén mi osupwangen álillis, ese lifilifil ika fite ierin eménna.​—Kal. 6:1.

15. Met sia káé seni aposel Paulus usun ach súféliti pwiich kewe alúwél?

¹⁵ Ifa usun ika pwiich we a chék emén alúwél? A itá wewe ngeni pwe ese fich ngeni ach sipwe súféliti? Aapw. Paulus a makkeei ngeni Timoty: “Kopwe tümwünuk, pwe esap wor eman epwe urumwoteek pokiten om alüal, nge kopwe eu lenien apirü ngeni ekewe chon lükü lon om kapas, lon om föför, lon om chen, lon om lükülük, pwal lon om limöch.” (1 Tim. 4:12) Ina epwe 30 ierin Timoty lupwen Paulus a makkeei ngeni ena.  Nge Paulus a ewisa ngeni Timoty sókkopaten wis mi chou. Ifa ewe lesen fán itach? Mi lamot sisap apwúngú pwiich kewe alúwél ren chék ieriir. Ekieki pwe Jesus a fen féri chómmóng mettóch lupwen a chék 33 ierin!

16, 17. (a) Ifa usun ekkewe mwán mi ásimaw ra apwúngaló ika mi fich ngeni emén an epwe wiseni ewe wis mwán mi ásimaw are chónálillisin mwichefel? (b) Ifa usun án emén pwisin ekiek are eérenien fénúan epwe ú ngeni met ewe Paipel a apasa?

¹⁶ Me ren ekkóch eéreni, aramas lón ekkóch fénú rese kan súféliti ekkewe alúwél. Iwe pokiten ena, ekkóch mwán mi ásimaw neman repwe meefi pwe ese fich ngeni emén alúwél an epwe wiseni ewe wis chónálillisin mwichefel are mwán mi ásimaw, inaamwo ika itá mi fen fich ngeni. Nge esap fán eú án ewe Paipel apasa pwe mi wor aúkúkún ierin emén pwiich ren an epwe kefilitá le wiseni ewe wis chónálillisin mwichefel are mwán mi ásimaw. (1 Tim. 3:1-10, 12, 13; Tit. 1:5-9) Ika emén mwán mi ásimaw a fératá eú allúk pokiten eérenien fénúan, iwe i ese fiti pwúngún án Kot we Kapas. Itá ekkewe mwán mi ásimaw resap apwúngú ekkewe alúwél ren met ra pwisin ekieki are eérenien fénúer, nge epwe lóngólóng wóón án Kot we Kapas.​—2 Tim. 3:16, 17.

¹⁷ Ika ekkewe mwán mi ásimaw rese fiti án ewe Paipel emmwen ren kefilitáán ekkewe mwán mi ásimaw are chónálillisin mwichefel, iwe ra tongeni pinei kefilitáán pwiich kewe mi fen itá fich ngeniir ekkena wis. Lón eú fénú, emén chónálillisin mwichefel a apwénúetáéchú wisan kewe, iwe ekkewe mwán mi ásimaw ra tipeeú pwe a fen eáni ekkewe napanap me ren ewe Paipel itá epwe nóm ren emén mwán mi ásimaw. Iwe nge, ekkóch chinnap mwán mi ásimaw ra meefi pwe mi chék nikinikin kúkkún átena ren an epwe eáni ena wis, iwe ese kefil. Mi elichippúng pún pwiich na ese kefil pokiten chék ena. Usun itá ena sókkun ekiek a chéú lón chómmóng fénú. A fókkun lamot ach sipwe lúkúlúk wóón ewe Paipel lap seni wóón pwisin ach ekiek are eérenien fénúach. Ika ina, sipwe álleasochisi Jesus me sisap apwúngú aramas ren kúnaen mesach.

18, 19. Met epwe álisikich le eáni án Jiowa ekiek usun pwiich kewe Chón Kraist?

¹⁸ Inaamwo ika sise unuséch nge sia chúen tongeni káé ifa usun sipwe eáni án Jiowa ekiek usun aramas. (Föf. 10:34, 35) Ina minne, mi lamot sipwe áfánniéchú ekkewe emmwen lón án Kot Kapas. Lupwen sia apwénúretá, sia álleasochisi án Jesus allúk ach sisap ‘apwüngü eman ren mine sia küna me lükün.’​—Joh. 7:24.

¹⁹ Ekiseló chék, ach King Jesus Kraist epwe apwúngú aramas meinisin. An kapwúng epwe lóngólóng wóón án Kot kewe allúk mi pwúng, nge esap wóón minne a kúna are rongorong. (Ais. 11:3, 4) Sia fókkun mwétéresiti ena fansoun mi amwarar!