LÓN ewe ier, a wor fitengeréú pwiich kewe Chón Kraist mwán wóón unusen fénúfan ra kefilitá pwe repwe eáni ekkewe wis mwán mi ásimaw me chónálillisin mwichefel. Ika en emén me leir, ese mwáál ka pwapwa pwe ka tongeni angang fán iten Jiowa me pwiium kewe Chón Kraist lón ei napanap mi fé.

Iwe nge, ese pwal wor ngawen óm meefi niwokkus pokiten wisom na. Iei alon Jason, emén mwán mi ásimaw nge a chék alúwél: “Lupwen ua kerán wiseni ena wis, ua meefi pwe a kon lululó ekkewe mineféén angang upwe féri.” Moses me Jeremaia ra meefi pwe ra tufichingaw lupwen ra angei ekkewe mineféén wis seni Jiowa. (Eks. 4:10; Jer. 1:6) Ika a pwal ina usun meefiom, iwe met ka tongeni féri pwe kopwe apéchékkúla óm lúkúlúk me sópweló le feffeitá? Ka tongeni káé chómmóng mettóch seni án Timoty leenien áppirú.​—Föf. 16:1-3.

Neman a 20 som ierin Timoty lupwen a poputá le fiti aposel Paulus lón an angangen sáifetál. Lupwen Timoty a kerán ketiw lón ena angang, neman a meefi pwe a lipwákingaw le asukula me fénéú aramas pokiten a chék ier kúkkún. (1 Tim. 4:11, 12; 2 Tim. 1:1, 2, 7) Nge a chék akkachocho le feffeitá, iwe mwirin engol ier, Paulus a ereni ekkewe chón Filipi: “Ua apilukuluk allim lon ewe Samol Jises pwe upwe muttir tinau Timoti remi.” Pwata a ina usun meefien Paulus? A áweweei: “Pun esor emon rei epwe fokkun chungukemi epwe usun chok i.”​—Fil. 2:19, 20, Testament Mi Fö.

Pwata Timoty a eú leenien áppirú mi fókkun múrinné fán iten ekkewe mwán mi ásimaw? Ekieki usun ekkeei wonu popun.

1. A wesewesen chúngú aramas. Paulus a ereni pwiin kewe Chón Kraist lón Filipi pwe Timoty epwe ‘fokkun chungur.’ (Fil. 2:20, TF) Timoty a mochen ar repwe akkamwéchú ar ririéch ngeni Jiowa, me a tipemecheres le pennúkú an fansoun me péchékkúl pwe epwe álisiir.

Iei met William, emén mwán mi ásimaw lap seni 20 ier a kan ereni ekkewe mwán mi ásimaw mi kerán eáni ena wis: “Oupwe tongei pwiich kewe. Nefotofot wóón minne ra osupwang ren lap seni ámi ekieki chék le féri wisemi le tichikin akkótaéchú ewe mwichefel.” Kosap usun emén chón uwou bus, mi chék kon ekieki an epwe wareiti ekkewe leenien sousou bus lón ewe kulók mi kefilitá, nge ese fen ekieki án ekkewe chón sousou bus repwe tongeni fiti ewe bus.

2. A akkomwa án Jiowa angang. Paulus a apasa pwe Timoty a sókkóló seni chókkewe mi “chök ekieki püsin ar, nge resap ekieki usun ewe angangen Jesus Kraist.” (Fil. 2:21) Paulus a kúna pwe chienen Timoty kewe Chón Kraist ra kon nefotofot wóón pwisin manawer. Fán ekkóch ra akkomwa pwisin ar mochen lap seni ar angang ngeni Jiowa. Nge esap ina usun Timoty! Lupwen a suuk ngeni Timoty an epwe alapaaló an angang ngeni Kot, mwittir chék a mwékút usun chék Aisea, ewe mi erá: “Ngang üa mochen, kopwe tiniei.”​—Ais. 6:8.

Ifa usun kopwe itepék me rúúepek lón óm túmúnú pwisin minne mi lamot ngonuk me minne mi lamot ngeni ewe mwichefel? Áeúin, kopwe apwénúetá án Paulus ei kapasen fén le “filätä mine a fokun mürina.” (Fil. 1:10) Akkomwa án Jiowa angang. Oruuan, túmúnuk seni ekkewe sókkun mettóch epwe angealó watteen óm fansoun me péchékkúl. Paulus a ereni Timoty: “Kopwe sü seni tipen alüal, nge kopwe fokun achocho ngeni om kopwe eäni pwüng, lükülük, chen me kinamwe.”​—2 Tim. 2:22.

3. A angang weires lón án Jiowa angang. Iei met Paulus a apasa usun Timoty: “I me ngang aia angangfengen fän iten ewe  Pworausen Manau usun chök eman nau a angangfengen me saman.” (Fil. 2:22) Timoty ese chipwang. Ra angang weires me Paulus, me ena mettóch a apéchékkúla ar ririéch.

A chómmóng angang sia tongeni féri lón án Jiowa we mwicheich lón ei fansoun. Ei angang a atoto enletin pwapwa me epwe álisuk le ririéchfengen me pwiium kewe Chón Kraist. Ina minne, kopwe túmúnú pwe fansoun meinisin kopwe ‘alapalafochei óm achocho lon ewe angangen ach Samol.’​—1 Kor. 15:58.

4. A apwénúetá minne a káé. Iei met Paulus a makkeei ngeni Timoty: “Ka fen appiru ai afanafan, ai föfför me met popun ai manaueni ei manau. Ka fen kuna ai nuku, ai engino, ai tong, ai nikiitu.” (2 Tim. 3:10, Kapasen God.) Timoty a apwénúetá minne a káé, ina minne a eáni pwal ekkóch wis.​—1 Kor. 4:17.

Pwata kese kútta emén mwán mi ásimaw ren fansoun langattam ka tongeni áppirú? Tom, emén mwán mi ásimaw ren fite ier, a chechchemeni án pwal emén mwán mi ásimaw ren fansoun langattam áfánni i me fókkun angei káit seni. A erá: “Ua kan kútta an emmwen me apwénúetá an kapasen fén. Ena mettóch a mwittir ámááraatá ai lúkúlúk.”

5. A kan pwisin ákkáiti i. Iei met Paulus a fénéú ngeni Timoty: “Kopwe chök achocho le asipok lon om souläng.” (1 Tim. 4:7) Inaamwo ika mi wor emén a kan wisen kanchini emén chón fiti eú urumwot, nge mi chúen lamot epwe achocho le pwisin esipaéchú. Paulus a pesei Timoty: “Kopwe likitü lon om aleani ekewe Toropwe mi Pin ngeni ekewe souläng, kopwe afalafaleer usun o asukula ngeniir. . . . Kopwe föri pwüngün ekei mettoch o fokun achocho ngeni om kopwe apwönüretä, pwe aramas meinisin repwe küna om fefeitä lon om souläng.”​—1 Tim. 4:13-15.

Mi pwal lamot kopwe akkachocho le lipwákéchúló. Kopwe tinikken lón óm kákkáé ewe Paipel, me kopwe silei ekkewe mineféén emmwen a kan katowu seni ach we mwicheich. Kosap kon lúkúlúk wóón pwisin en. Mi mwáál óm kopwe ekieki pwe pokiten a fen watte óm sile, iwe ka tongeni pwákini ese lifilifil osukosuk, me ese pwal lamot kopwe akkomw kúttafichi álillis seni néúch kewe puk me ewe Paipel. Kopwe áppirú Timoty, “kopwe püsin tümwünuk, kopwe pwal tümwünü mine ka afalafal won.”​—1 Tim. 4:16.

6. A lúkúlúk wóón án Jiowa we manaman mi fel. Lupwen Paulus a fós usun án Timoty angangen afalafal, a áchema ngeni: “Ren manamanen ewe Ngünmifel mi nom loch kopwe tümwünüöchü ewe Pworausen Manau Kot a lükü ngonuk.” (2 Tim. 1:14) A lamot ngeni Timoty an epwe lúkúlúk wóón án Kot we manaman mi fel.

Iei alon Donald, emén mwán mi ásimaw ren fite ier: “Mi lamot pwe ekkewe mwán mi kefilitá repwe aúcheani ar ririéch ngeni Kot. Chókkewe ra féri ena repwe ‘pöpöchökülela.’ Ika ra tingorei Kot an we manaman mi fel me ámááraatá uwaan kewe, iwe iir repwe wesewesen eú feiéch ngeni pwiir kewe Chón Kraist.”​—Kölf. 84:7; 1 Pet. 4:11.

A mmen apéchékkúlakich ach kúna ekkewe mineféén chónálillisin mwichefel me ekkewe mwán mi ásimaw ra kan akkachocho le feffeitá lón ar angang ngeni Jiowa usun chék en. Jason, ewe sia fen fós usun, a erá: “Seni ewe atun ua eáni ei wis wisen emén mwán mi ásimaw, ua káé chómmóng mettóch me a péchékkúleló ai lúkúlúk. Iei, ua wesewesen pwapwaiti wisei we, me rei iei eú wis mi fókkun aúchea!”

Kopwe akkachocho le feffeitá? Ika kopwe áppirú án Timoty we leenien áppirú, kopwe pwal eú feiéch ngeni pwiium kewe Chón Kraist.